Keɣa 109:1-31
Hendu teyaa ñʋʋdʋ. Daviid hendu.
109 Oo Ɛsɔ, ña weyi mansaŋ yɔ,+ taasu tamɩyɛ.
2 Mbʋ pʋyɔɔ yɔ kañatʋ tɩnaa nɛ cɛtɩyaa yɔɔdʋʋ tɔm kɩdɛkɛdɩtʋ mɔ-yɔɔ.
Pɔyɔɔdʋʋ mɔn-tɔm nɛ cɛtɩm nzʋlʋma;+
3 Pɔcɔ-m nɛ pata nɛ pɔyɔɔdʋʋ mɔ-yɔɔ paɖɩyɛ tɔm,Nɛ pakaɖɩɣnɩ-m ŋgʋ mantɩlabɩ-wɛ nabʋyʋ.+
4 Mawɩlɩɣ-wɛ sɔɔlɩm, ɛlɛ pi-lone taa lɛ, pakaɖɩɣnɩ-m;+Ɛlɛ maayeki tɩmʋʋ.
5 Pɛhɛyɩɣ-m kɩdɛkɛdɩm kɩbandʋ lone taa,+Nɛ pɛhɛyɩɣ-m paɖɩyɛ mɔn-sɔɔlɩm lone taa.+
6 Sɩɩ kañatʋ tʋ nɔɔyʋ mon-koyindu ñʋʋdʋ;*Koyindu nɔɔyʋ* ɛsɩŋ e-nesi kɩbanzɩ yɔɔ.
7 Paahʋʋnɩ-ɩ tɔm lɛ, ɛ-tɔm ɛsɩ;*Ɛ-adɩma maɣmaɣ, pakpaɣ-yɛ ɛzɩ akɛ kɩdɛkɛdɩm yɔ.+
8 E-wezuu caɣʋ kɩyakɩŋ ɩwɛɛ ññɩɩ;+Nɔɔyʋ ɛmʋ waɖɛ nɖɩ ɛwɛna se eɖiyi samaɣ yɔ.+
9 E-piya* ɩpɩsɩ piya nzɩ sɩfɛyɩ caa yɔ,Ɛ-halʋ ɛpɩsɩ lelu.
10 E-piya* ɩpɩsɩ mba pɛyɛlɩɣ nɛ pasʋlʋmʋʋ yɔ,Sɩlɩɩnɩ njaa wena a-taa sɩcakɩ yɔ a-taa nɛ sɩñɩnɩ tɔɔnaɣ.
11 Weyi ɛ-cɔlɔ ɛkɩndaa yɔ, ɛlɛ ɛmʋ* mbʋ payɩ ɛwɛna yɔ,Agɔma ɩlazɩ e-wondu.
12 Nɔɔyʋ ɛtaalabɩ-ɩ camɩyɛ lakasɩ,*Nɛ nɔɔyʋ ɛtaana e-piya nzɩ sɩfɛyɩ caa yɔ sɩ-pʋtɔdɩyɛ.
13 Tɛtɛ nɛ paɖɩzɩ ɛ-lʋlʋʋ taa mba;+Tɛtɛ nɛ pahɩzɩ pa-hɩla kpaɖʋʋ kʋɖʋmʋʋ taa.
14 Yehowa ɛtɔzɩ ɛ-cɔzɔnaa kɩwɛɛkɩm yɔɔ,+Ɛtaahɩzɩ e-ɖoo kɩdɛkɛdɩm.
15 Mbʋ palaba yɔ, pɩwɛɛ Yehowa maɣzɩm taa paa ɛzɩmtaa;Ɛla nɛ pataatasɩ pɔ-yɔɔ tɔzʋʋ tɛtʋ yɔɔ.+
16 Mbʋ pʋyɔɔ yɔ, ɛtɩtɔzɩ se ɛla camɩyɛ lakasɩ,*+Ɛlɛ ɛtaŋaɣ kʋñɔndʋ,+ weyi ɛwɛ tanɩm taa yɔ nɛ weyi ɛwɛ laŋwɛɛkɩyɛ taa yɔSe ɛkʋ-wɛ.+
17 Ɛɛsɔɔlɩ nɔɔ kɩdɛkɛdaɣ lɔʋ, nɛ mbʋ ɖɔɖɔ pɩtɛmnɩ-ɩ;Ɛtaasɔɔlɩ lalaa wazʋʋ, pʋyɔɔ etihiɣ wazaɣ nakɛyɛ.
18 Eesu nɔɔ kɩdɛkɛdaɣ lɔʋ ɛzɩ toko yɔ.
Pɩsʋ e-tomnaɣ taa ɛzɩ lɩm yɔ,Pɩsʋ ɛ-mɔɔ taa ɛzɩ num yɔ.
19 Ɛ-nɔɔ kɩdɛkɛdaɣ lɔʋ ɛñɔɔnɩ-ɩ ɛzɩ pɩsaʋ ŋgʋ ehuu yɔ,+Pɩwɛɛ ɛzɩ tambaɖɛ nɖɩ ɛtaŋ paa ɛzɩmtaa yɔ.
20 Mbʋ Yehowa hɛyɩɣ weyi ɛkaɖɩɣnɩ-m yɔ+Nɛ mba pɔyɔɔdʋʋ tɔm kɩdɛkɛdɩtʋ mɔ-yɔɔ* yɔ.
21 Ɛlɛ ña lɛ, Kɩbaɣlʋ Kɩlɩm Yehowa,Ña-hɩɖɛ yɔɔ lɛ, labɩ-m kɩbandʋ.+
Holi-m, mbʋ pʋyɔɔ yɔ ñɔ-sɔɔlɩm siɣsiɣ ñɩmbʋ wɛ ɖeu.+
22 Mbʋ pʋyɔɔ yɔ mɛnfɛyɩnɩ ɖoŋ nɩɩyɩ nɛ mɛnkɛ kʋñɔndʋ,+Nɛ ma-laŋɩyɛ tʋlɩ pɔʋ.+
23 Mɛnɖɛɣ ɛzɩ kuzotuu ŋgʋ kiɖiɣni mʋʋʋ yɔ;Pɩñamsɩ-m ɛzɩ nakaʋ yɔ.
24 Nɔɔ hɔkʋʋ yɔbɩ ma-nʋmbɔla;Mɛntɛm ɖanzɩ nɛ mawɩlɩ.*
25 Manpɩsɩ woŋa pʋyʋ pɛ-ɛsɩndaa.+
Panaɣ-m lɛ, pekpiɣyiɣ ñʋŋ.+
26 Hayɩ mɛ-Ɛsɔ Yehowa, sɩnɩ-m;Tɩŋnɩ ñɔ-sɔɔlɩm siɣsiɣ ñɩmbʋ yɔɔ nɛ ŋya ma-ñʋʋ.
27 Tɛtɛ nɛ patɩlɩ se ñe-nesi labɩnɩ mbʋ;Se ña, Oo Yehowa, ñalabɩnɩ mbʋ.
28 Paba ɩlɔ nɔɔ kɩdɛkɛdaɣ, ɛlɛ ña lɛ wazɩ kɩwazʋ.
Fɛyɛ ɛkpa-wɛ alɩwaatʋ ndʋ pakʋyʋʋ mɔ-yɔɔ yɔ,Ɛlɛ ña-lɩmɖʋyʋ ɛwɛɛ laŋhʋlʋmɩyɛ taa.
29 Mba pakaɖɩɣnɩ-m yɔ, fɛyɛ ehuuzi pɔ-yɔɔ;Fɛyɛ ehuuzi pɔ-yɔɔ ɛzɩ toko kɩɖaɣlʋʋ yɔ.*+
30 Mankaɣ sam Yehowa nɛ mɛntɛ man-taa;Mankaɣ-ɩ sam ɛyaa sakɩyɛ ɛsɩndaa.+
31 Mbʋ pʋyɔɔ yɔ ɛkaɣ sɩŋʋʋ kʋñɔndʋ nesi kɩbanzɩ yɔɔSe ɛya ɛ-ñʋʋ mba pakʋʋ ɛ-tɔm yɔ* pe-nesi tɛɛ.
Pɩ-tɛɛ tɔm
^ Piye piye, «ɛ-ñʋʋdʋ.»
^ Yaa «Ɛ-yɔɔ kʋyɩyʋ nɔɔyʋ.»
^ Yaa «pɔtɔ se ɛkɛ kɩdɛkɛdʋ.»
^ Piye piye, «Ɛ-pɩyalaa.»
^ Piye piye, «Ɛ-pɩyalaa.»
^ Yaa «Mba paakɩndɩ-ɩ se ɛɛhɛyɩ-wɛ nɛ kɛzɛɣa sɔsɔɔ yɔ, pañɩ kpacanaa.»
^ Yaa «ɛtaawɩlɩ-ɩ sɔɔlɩm siɣsiɣ ñɩmbʋ.»
^ Yaa «se ɛwɩlɩ sɔɔlɩm siɣsiɣ ñɩmbʋ.»
^ Yaa «man-kalɩzaɣ yɔɔ.»
^ Piye piye, «Mon-tomnaɣ wɩlaa, num fɛyɩ ka-taa.»
^ Yaa «toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ.»
^ Yaa «ɛ-kalɩzaɣ tɔm yɔ.»
