Galaatii mba 3:1-29
3 Hayɩ, Galaatii mba kɩmɛlɛmɩŋ mɩ! Awɛnɩ ɖoŋ kɩdɛkɛdɩŋ ɛnɩ mɩ-yɔɔ,+ mɩ mba pawɩlɩ-mɩ kaɣlaa se pakam Yesu Krɩstʋ sizika yɔɔ yɔ?+
2 Tɔm kʋɖʋmtʋ tʋnɛ mañɩnɩɣ se mɔnpɔzɩ-mɩ:* Paɣtʋ tʋma yɔɔ ɩmʋ fezuu yaa tisuu mbʋ ɩwɛnɩ tɔm ndʋ ɩnɩwa yɔ pɩ-yɔɔ ɩmʋ-kʋ?+
3 Ɩwɛ kɩmɛlɛndʋ kpem mbʋ? Ɩpaɣzɩ ɖɔm fezuu taa nʋmɔʋ* lɛ, tomnaɣ yɔɔ ɩtɛŋ nʋmɔʋ ŋgʋ?*+
4 Ɩtɔɔ kʋñɔmɩŋ sakɩyɛ falaa yem yaa we? Toovenim taa lɛ, manawa se ɩtɩtɔɔ-ɩ falaa yem.
5 Pʋyɔɔ lɛ, weyi ɛhaɣ-mɩ fezuu nɛ ɛlakɩ ɖɔɖɔ maamaaci lakasɩ+ mɩ-hɛkʋ taa yɔ, paɣtʋ tʋma yɔɔ ɛlakɩ mbʋ, yaa tisuu mbʋ ɩwɛnɩ tɔm ndʋ ɩnɩwa yɔ pɩ-yɔɔ ɛlakɩ mbʋ?
6 Ɛzɩ Abraham «kaawɛnʋʋ tisuu Yehowa* yɔɔ nɛ pakpaɣ-ɩ se ɛkɛ ɛyʋ siɣsiɣ tʋ» yɔ.+
7 Pɩtʋʋ fɛyɩ se ɩnawa se mba pɔñɔʋnɩ tisuu kpam yɔ, mba kɛnɩ Abraham pɩyalaa.+
8 Nɛ mayaɣ kaatɛm naʋ se Ɛsɔ kaɣ tɩŋnʋʋ tisuu yɔɔ nɛ ɛyaa ajɛɛ taa mba se siɣsiɣ tɩnaa lɛ, kɛlɛyɩ susuu tɔm kɩbandʋ tʋnɛ Abraham: «Pɩtɩŋnɩ ñɔ-yɔɔ lɛ, mankaɣ wazʋʋ ajɛɛ tɩŋa.»+
9 Mbʋ yebina nɛ mba pɔñɔʋnɩ tisuu kpam yɔ, peɖiɣni-wɛ wazʋʋ, pa nɛ Abraham weyi ɛɛwɛnɩ tisuu yɔ.+
10 Mba payɩ pataɣ liu paɣtʋ tʋma yɔ, pɔlɔ pɔ-yɔɔ nɔɔ kɩdɛkɛdaɣ, mbʋ pʋyɔɔ yɔ pamawa se: «Weyi ɛɛɖɔkʋʋ tɔm ndʋ payɩ pama Paɣtʋ takayaɣ kikpiyaɣ taa se ɛɖɔ tɩ-yɔɔ yɔ, pɔlɔ ɛ-yɔɔ nɔɔ kɩdɛkɛdaɣ.»+
11 Pɩtasɩ lɛ, pɩnaɣ kaɣlaa se paatɩŋɩɣnɩ paɣtʋ yɔɔ nɛ payaa nɔɔyʋ se siɣsiɣ tʋ Ɛsɔ ɛsɩndaa,+ mbʋ pʋyɔɔ yɔ «ɛyʋ siɣsiɣ tʋ kaɣ wɛʋ wezuu e-tisuu yɔɔ.»+
12 Pɩtɩkɛ tisuu yɔɔ pasɩ Paɣtʋ tigiɖe. Ɛlɛ «weyi ɛɖɔŋ tɔm tʋnɛ tɩ-yɔɔ yɔ, tɩkaɣ yebu nɛ ɛwɛɛ wezuu.»+
13 Krɩstʋ yabɩ-ɖʋ+ nɛ eholi-ɖʋ+ nɔɔ kɩdɛkɛdaɣ ŋga Paɣtʋ lɔ ɖɔ-yɔɔ yɔ ke-nesi tɛɛ alɩwaatʋ ndʋ ɛpɩsɩ weyi pɔlɔ ɛ-yɔɔ nɔɔ kɩdɛkɛdaɣ ɖo-lone taa yɔ, mbʋ pʋyɔɔ yɔ pamawa se: «Ɛyʋ weyi popuzi-i ɖaʋ* yɔɔ yɔ, pɔlɔ ɛ-yɔɔ nɔɔ kɩdɛkɛdaɣ.»+
14 Pɩlabɩ mbʋ se Abraham wazaɣ ɛtɩŋnɩ Krɩstʋ Yesu yɔɔ nɛ ketii ajɛɛ yɔɔ,+ se pɩsa nɛ ɖe-tisuu yɔɔ lɛ, ɖɩmʋ fezuu+ ŋgʋ paalabɩ-ɖʋ kɩ-tamaɣ yɔ.
15 Koobiya, mantɩŋɩɣnɩ mbʋ ɛyaa lakɩ yɔ pɩ-yɔɔ nɛ maha kɩɖaʋ nakʋyʋ: Ye paɖʋ ɛgbɛyɛ naɖɩyɛ nɛ pañɩɣ ɖɩ-yɔɔ niye, paa ɛyʋ ɛñɩɣnɩ ɖɩ-yɔɔ niye yɔ, nɔɔyʋ ɛɛpɩzɩɣ nɛ ɛcɛ ɛgbɛyɛ nɖɩ yaa ɛsɔzɩ nabʋyʋ ɖɩ-yɔɔ.
16 Paalabɩ tamasɩ Abraham nɛ ɛ-lʋlʋʋ taa tʋ.*+ Masɩ tɩtɔ se «nɛ ña-lʋlʋʋ taa mba,»* ɛzɩ pɔɖɔwa yɔ. Ɛlɛ sɩtɔm se «nɛ ña-lʋlʋʋ taa tʋ,»* mbʋ pʋyɔɔ yɔ ɛkɛ ɛyʋ kʋɖʋm, ɛnʋ lɛ Krɩstʋ.+
17 Mantasɩɣ ɖɔɖɔ yɔɔdʋʋ se: Paɣtʋ ndʋ paɖʋ-tʋ pɩnzɩ 430 wayɩ yɔ,+ tɩɩcɛkɩ ɛgbɛyɛ nɖɩ Ɛsɔ kaaɖʋwa yɔ se tɩɖɩzɩ tamaɣ ŋga ɛlaba yɔ.
18 Mbʋ pʋyɔɔ yɔ ye paɣtʋ ɛkɛnɩ ñɩm mbʋ Ɛsɔ haɣ yɔ pi-tigiɖe yɔ, ɖɩnɛ ɛlɛ pi-tigiɖe tɩtasɩ kɛnʋʋ tamaɣ nakɛyɛ; ŋgʋ tamaɣ yɔɔ Ɛsɔ tɩŋnaa nɛ ɛha-pʋ Abraham faaa.+
19 Ye mbʋ, ɛbɛ yɔɔ paɖʋ Paɣtʋ yɔ? Pɔsɔzɩ-tʋ se pɩsa nɛ pawɩlɩ mbʋ paɣtʋ yɔɔ maʋ kɛnaa yɔ,+ nɛ pɩkɔɔ nɛ pɩsɩɩnɩ alɩwaatʋ ndʋ lʋlʋʋ taa tʋ weyi palabɩ-ɩ tamaɣ yɔ ɛkɔŋ yɔ;+ nɛ loliyu nɔɔyʋ+ nesi tɛɛ Ɛsɔ tiyiyaa+ ɖʋzɩ Paɣtʋ ndʋ nɛ ɛlɛ yele nɛ patɩlɩ-tʋ.
20 Ye tɔm etukuuni ɛyʋ kʋɖʋm ɖeke yɔ, pɩtɩcɛyɩ se loliyu nɔɔyʋ ɛwɛɛ, ɛlɛ Ɛsɔ kɛ kʋɖʋm koŋ.
21 Ye mbʋ, Paɣtʋ kaɖɩɣnɩ tamasɩ nzɩ Ɛsɔ laba yɔ? Kpa! Mbʋ pʋyɔɔ yɔ ye paaɖʋ paɣtʋ natʋyʋ se tɩpɩzɩɣ nɛ tɩha wezuu yɔ, toovenim taa lɛ, paɣtʋ yɔɔ ɖɔm yɔɔ lɛ, paaya-ɖʋ se siɣsiɣ tɩnaa.
22 Ɛlɛ Masɩ ɖʋzɩ pɩtɩŋa kɩwɛɛkɩm nesi tɛɛ, se pɩsa nɛ pala mba pɛwɛnɩ tisuu yɔ tamaɣ ŋga kalɩnɩ Yesu Krɩstʋ yɔɔ tisuu taa yɔ.
23 Ɛlɛ pʋcɔ nɛ tisuu talɩɣ lɛ, paasɩ-ɖʋ paɣtʋ tɛɛ nɛ paɖɩɣ-ɖʋ; nɛ ɖɩɖaŋ tisuu mbʋ pɔkɔŋaɣ pɩ-yɔɔ kuluu yɔ.+
24 Pʋyɔɔ lɛ, Paɣtʋ pɩsɩ ɖɔ-yɔɔ kandɩyʋ* weyi ewokini-ɖʋ Krɩstʋ cɔlɔ yɔ,+ se pɩsa nɛ patɩŋnɩ tisuu yɔɔ nɛ payaa-ɖʋ se siɣsiɣ tɩnaa.+
25 Ɛlɛ lɛɛlɛɛyɔ tisuu kɔm yɔ,+ ɖɩtɩtasɩ wɛʋ kandɩyʋ* nɔɔyʋ tɛɛ.+
26 Toovenim taa lɛ, tisuu mbʋ ɩwɛnɩ Krɩstʋ Yesu yɔɔ yɔ pʋyɔɔ lɛ,+ mɩ-tɩŋa ɩkɛ Ɛsɔ pɩyalaa.+
27 Mbʋ pʋyɔɔ yɔ mɩ mba payɩ pamɩyɩsɩ-mɩ lɩm Krɩstʋ taa yɔ, isu Krɩstʋ.+
28 Yuuda tʋ yaa Grɛɛkɩ tʋ fɛyɩ,+ yom yaa weyi ɛwɛ ɛ-tɩ yɔɔ yɔ ɛfɛyɩ,+ abalʋ yaa halʋ fɛyɩ,+ mbʋ pʋyɔɔ yɔ mɩ-tɩŋa ɩkɛ kʋɖʋm mɩ nɛ Krɩstʋ Yesu mɩ-nɔɔ kʋɖʋmaɣ labʋ taa.+
29 Pɩtasɩ lɛ, ye ɩkɛ Krɩstʋ pʋyʋ yɔ, pʋbʋ lɛ, ɩkɛ Abraham lʋlʋʋ taa mba*+ toovenim taa, mba pɔkɔŋ mʋʋ ñɩm+ ɛzɩ Ɛsɔ labʋ tamaɣ yɔ.+
Pɩ-tɛɛ tɔm
^ Piye piye, «se mantɩlɩ mɩ-cɔlɔ.»
^ Piye piye, «Ɩpaɣzɩ fezuu taa.»
^ Piye piye, «tomnaɣ yɔɔ ɩtɛŋ?»
^ Cɔnɩ Tɔm kɩsɔzɩtʋ A5.
^ Yaa «sizika.»
^ Piye piye, «nɛ ño-ɖomaɣ.»
^ Piye piye, «nɛ ño-ɖomasɩ.»
^ Piye piye, «nɛ e-ɖomaɣ.»
^ Yaa «pɩsɩ ɖa-nʋmɔʋ wɩlɩyʋ.»
^ Yaa «nʋmɔʋ wɩlɩyʋ.»
^ Piye piye, «Abraham ɖomaɣ.»
