Galaatii mba 6:1-18
6 Koobiya, paa ɛyʋ nɔɔyʋ ɛkpɛzɩ nɩŋgbaŋaɣ kɩdɛkɛdaɣ nakɛyɛ pʋcɔ nɛ eɖiɣzina yɔ, mɩ mba ɩpɩ fezuu taa yɔ* ɩñaɣ pana nɛ ɩñɔɔzɩ ɛyʋ ɛnʋ nɛ hɛɛɛ wɛtʋ.+ Ɛlɛ ñɛ-ɛsɩyɛ ɛwɛɛ ña-maɣmaɣ ñɔ-yɔɔ,+ se pɩtaakɛdɩ nɛ ña ɖɔɖɔ pɩtakɩ-ŋ.+
2 Iwolo pɩ-yɔɔ nɛ ɩsɩɣlɩɣ ɖama sʋʋtʋ,+ ɖɩnɛ ɛlɛ ɩkaɣ ɖɔm Krɩstʋ paɣtʋ yɔɔ.+
3 Mbʋ pʋyɔɔ yɔ, ye nɔɔyʋ ɛmaɣzɩɣ se ɛkɛ pʋyʋ nɔɔyʋ ŋgʋ ɛtɩkɛ nabʋyʋ yɔ,+ epeɣziɣ ɛ-tɩ kipeɣzu.
4 Ɛlɛ paa weyi lɛ, ewili ɛ-maɣmaɣ ɛ-lakasɩ taa,+ ɖɩnɛ ɛlɛ ɛkaɣ naʋ mbʋ pɩ-yɔɔ pɩwɛɛ se ɛ-taa ɛla leleŋ nɛ ɛ-maɣmaɣ ɛ-tɩ yɔ, nɛ pɩtaakɛnɩ ɛzɩma ɛkɛdɩɣ ɛ-tɩ nɛ ɛyʋ lɛlʋ yɔ.+
5 Mbʋ pʋyɔɔ yɔ paa weyi lɛ, ɛkaɣ sɩɣlʋʋ ɛ-maɣmaɣ ɛ-sʋʋtʋ.+
6 Pɩtasɩ lɛ, weyi peɖiɣni-i wɩlʋʋ tɔm yɔ, pɩwɛɛ se ɛha weyi ɛwɩlɩɣ-ɩ tɔm ndʋ yɔ wondu kɩbandʋ kpeekpe.+
7 Itaapeɣzi mɩ-tɩ:* Paawoŋuu Ɛsɔ. Mbʋ pʋyɔɔ yɔ, mbʋ payɩ ɛyʋ ɖuu yɔ, mbʋ ɖɔɖɔ ɛkaɣ kʋm;+
8 mbʋ pʋyɔɔ yɔ weyi eɖuu se pɩwazɩ e-tomnaɣ yɔ, ɛkaɣ kʋm sɩm* e-tomnaɣ taa, ɛlɛ weyi eɖuu se pɩwazɩ fezuu yɔ, ɛkaɣ kʋm fezuu taa wezuu maatɛŋ.+
9 Pʋyɔɔ lɛ, pɩtaanɩɩ-ɖʋ nɛ mbʋ pɩwɛ ɖeu yɔ pɩ-labʋ, mbʋ pʋyɔɔ yɔ alɩwaatʋ talɩɣ lɛ, ɖɩkaɣ kʋm ye pɩtɩnɩɩ-ɖʋ yɔ.*+
10 Pʋyɔɔ lɛ, alɩwaatʋ ndʋ payɩ ɖɩwɛnɩ waɖɛ yɔ, ɖɩla ɛyaa tɩŋa mbʋ pɩwɛ ɖeu yɔ, ɛlɛ kɔzɩ kɔzɩ lɛ mba ɖa nɛ wɛ ɖɩka tisuu yɔ.
11 Ɩna ɛzɩma mama-mɩ nɛ ma-maɣmaɣ me-nesi nɛ pɩpaɣlɩ camɩyɛ kpooluu kpooluu yɔ.
12 Mba payɩ pɔsɔɔlaa se pana-wɛ se pɛkɛ ɛyaa kɩbama tomnaɣ taa yɔ, mba ñakɩnɩ pana se pañɩɣ mɩ-yɔɔ nɛ iyele nɛ pɛpɛlɩ-mɩ; palakɩ mbʋ, mbʋ pʋyɔɔ yɔ paañɩnɩɣ se Krɩstʋ nazɩm sizika* yɔɔ lɛ panazɩ-wɛ.
13 Mbʋ pʋyɔɔ yɔ halɩ mba pɛpɛlɩɣ-wɛ yɔ pa-maɣmaɣ paaɖɔŋ Paɣtʋ yɔɔ,+ ɛlɛ pañɩnɩɣ se pɛpɛlɩ-mɩ nɛ pakʋndɩnɩ mi-tomnasɩ.
14 Ɛlɛ ma lɛ tɛtɛ nɛ mantaakʋndɩ wiɖiyi, ye pɩtɩkɛ ɖa-Kɩbaɣlʋ Yesu Krɩstʋ nazɩm sizika* yɔɔ yɔ.+ Mɛ-ɛsɩndaa lɛ, ɛ-yɔɔ pɩtɩŋnaa nɛ pakʋ ɛjaɖɛ,* nɛ ɛjaɖɛ ɛsɩndaa lɛ, ɛ-yɔɔ pɩtɩŋnaa nɛ pakʋ-m.*
15 Mbʋ pʋyɔɔ yɔ, pɛlɩtʋ tɩkɛ pʋyʋ nɛ kɩdɩbɛlɩtʋ tɩkɛ pʋyʋ ɖɔɖɔ;+ ɛlɛ wonuu kɩlɩzʋʋ kɩfalʋʋ kɛnɩnɩ pʋyʋ.+
16 Piyele nɛ mba payɩ pɔɖɔŋ wezuu caɣʋ paɣtʋ tʋnɛ tɩ-yɔɔ camɩyɛ yɔ, laŋhɛzɩyɛ nɛ pʋtɔdɩyɛ naʋ ɛwɛɛ pɔ-yɔɔ, ɛɛɛ, Ɛsɔ tɛ Izrayɛɛlɩ yɔɔ.+
17 Kpaɣnɩ lɛɛlɛɛyɔ lɛ, nɔɔyʋ ɛtaaca-m tɔm, mbʋ pʋyɔɔ yɔ yʋsasɩ nzɩ sɩwɩlɩɣ se mɛnkɛ Yesu yom yɔ sɩwɛ mon-tomnaɣ yɔɔ.+
18 Koobiya, ɖa-Kɩbaɣlʋ Yesu Krɩstʋ lootiye ɛwɛɛ fezuu ŋgʋ ɩlɩzɩɣ nɛ ɩwɩlɩɣ yɔ kɩ-cɔlɔ. Amɛn.
Pɩ-tɛɛ tɔm
^ Yaa «mɩ mba ɩwɛnɩ fezuu taa wɛtʋ ndʋ pɩpɔzʋʋ yɔ.»
^ Pɩpɩzɩɣ pɩkɛ, «Itaayele nɛ nɔɔyʋ peɣzi-mɩ.»
^ Yaa «mbʋ pɩɖazaa yɔ.»
^ Yaa «ye ɖɩtɩlɔ nɛ ɖise yɔ.»
^ Cɔnɩ Tɔm pee sɔsɔna tɔbʋʋ lɩzʋʋ.
^ Cɔnɩ Tɔm pee sɔsɔna tɔbʋʋ lɩzʋʋ.
^ Yaa «nɛ paka ɛjaɖɛ sizika yɔɔ.»
^ Yaa «pakamɩ-m sizika yɔɔ.»
