Izaayii 48:1-22
48 Ɩnɩɩ tɔm tʋnɛ, Oo Yakɔɔb ɖɩɣa,Mɩ mba ɩyaɣ mɩ-tɩ nɛ Izrayɛɛlɩ hɩɖɛ+Nɛ ɩlɩnɩ Yuuda lɩm taa* yɔ,Mɩ mba iɖuki Yehowa hɩɖɛ taa+Nɛ ɩyaɣ Izrayɛɛlɩ tɛ Ɛsɔ,Paa ɩɩlakɩ mbʋ nɛ toovenim nɛ siɣsiɣ wɛtʋ yɔ.+
2 Mbʋ pʋyɔɔ yɔ payaɣ pa-tɩ nɛ tɛtʋ kiɖeɖetu hɩɖɛ+Nɛ pañɩnɩɣ se Izrayɛɛlɩ tɛ Ɛsɔ ɛsɩnɩ-wɛ,+Ɛnʋ weyi payaɣ-ɩ se yoyaa tɛ Yehowa yɔ.
3 «Meheyi-mɩ caanaʋ taa* tɔm ɖooo lɔŋ.
Tɩlɩnɩ ma-mamaɣ mɔ-nɔɔ taa,Nɛ meyeba nɛ patɩlɩ-tʋ.+
Mankʋyɩ tɔm ndʋ tɩ-yɔɔ kpɛdɛyɛ, nɛ tɩla.+
4 Mbʋ pʋyɔɔ yɔ manawa se ŋwɛ ñʋʋ taa ɖoŋ siŋŋ—Ño-pondone kɛ ñɩɣyʋʋ hoɖe nɛ ñe-kiɖe kɛ ñɩɣyʋʋ kɩsɛɛmʋʋ+—
5 Meheyi-ŋ tʋ ɖooo lɔŋ.
Pʋcɔ nɛ tɩlakɩ lɛ, meyeba nɛ ŋnɩɩ-tʋ,Se pɩsa nɛ ŋtaayɔɔdɩ se: “Man-sɩʋ kpeliɣa labɩnɩ mbʋ;Man-sɩʋ kpeliɣa nɛ ma-ñɩɣtʋ sɩʋ kpeliɣa* pɔyɔɔdɩna nɛ pɩla mbʋ.”
6 Ŋnɩwa nɛ ŋna pʋnɛ pɩtɩŋa payɩ.
Ɩɩkaɣ-tʋ susuu na?+
Kpaɣnɩ lɛɛlɛɛyɔ lɛ, monsusuu-ŋ wondu kɩfatʋ tɔm,+Mɛsaɣ tɛɛ tɔm ndʋ pasɩwa nɛ ŋtɩsɩm-tʋ yɔ.
7 Lɛɛlɛɛyɔ ɖeke pɛwɛɛ nɛ palɩzɩɣ-tʋ, nɛ tɩtaawɛɛ ɖooo lɔŋ,Wondu ndʋ ŋtaanɩɩ tɩ-tɔm wiɖiyi pʋcɔ nɛ pɩtalɩɣ sɔnɔ yɔ,Se pɩsa nɛ ŋtaayɔɔdɩ se: “Na! Mɛntɛm-tʋ sɩm.”
8 Aayɩ, ŋtɩnɩɩ,+ ŋtɩtɩlɩ,Nɛ ɖooo lɛ ña-nɩŋgbaaŋ taatʋlɩ.
Mbʋ pʋyɔɔ yɔ manawa se ŋkɛ agutaaku tʋ siŋŋ,+Nɛ paya-ŋ se kɩwɛɛkɩm laɖʋ kpaɣnɩ ɖooo ña-lʋlʋʋ wiye.+
9 Ɛlɛ ma-hɩɖɛ yɔɔ lɛ, mankaɣ pɩsɩnʋʋ man-pana;+Ma-maɣmaɣ man-samtʋ yɔɔ lɛ, mankaɣ man-tɩ ɖɔkʋʋ,Nɛ maakaɣ-ŋ ɖɩzʋʋ.+
10 Na! Malaba nɛ ŋwɛɛ kele kele, ɛlɛ pɩtɩkɛ ɛzɩ palakʋʋ liidiye nɛ ɖɩwɛɣ kele kele yɔ.+
Mantakɩ-ŋ* kʋñɔŋ miŋ momoɖe taa.+
11 Ma-maɣmaɣ mɔ-yɔɔ, ma-maɣmaɣ mɔ-yɔɔ mankaɣ labʋ mbʋ,+Mbʋ pʋyɔɔ yɔ, ɛzɩma manpɩzɩɣ meyele man-tɩ nɛ pepisi-m?+
Maacɛlɩɣ man-samtʋ nɔɔyʋ.*
12 Welisini-m, Oo Yakɔɔb, nɛ Izrayɛɛlɩ weyi maya-ɩ yɔ.
Mɛnkɛ kʋɖʋm ɛnʋ.+ Mɛkɛnɩ kajalaɣ tʋ; mɛkɛnɩ ɖɔɖɔ kɛdɛzaɣ tʋ.+
13 Me-nesi maɣmaɣ sɩnɩ tɛtʋ tigiɖe,+Nɛ me-nesi kɩbanzɩ posi ɛsɔdaa.+
Alɩwaatʋ ndʋ mayaɣ-wɛ yɔ, pɛkpɛndɩɣ nɛ pakʋyɩ.
14 Mɩ-tɩŋa payɩ, ikpeɣli ɖama nɛ iwelisi.
Pa-taa anɩ susi wondu ndʋ tɩ-tɔm?
Ma Yehowa mɔnsɔɔlɩ weyi yɔ,+Ɛkaɣ labʋ mbʋ mɔnsɔɔlaa yɔ Babilɔɔnɩ,+Nɛ ɛ-nɩŋgbɛɛŋa kaɣ kɔm Kalɩdee mba wayɩ.+
15 Ma-maɣmaɣ mɔyɔɔdɩna, nɛ mayaa-ɩ.+
Mɔnkɔnɩ-ɩ, nɛ pɩkaɣ-ɩ ɖenuu ɛ-nʋmɔʋ taa.+
16 Ɩñɔtɩnɩ-m, nɛ ɩnɩɩ tɔm tʋnɛ.
Kpaɣnɩ ɖooo ɖɩbazɩyɛ taa lɛ, mantɩyɔɔdɩ mɛsaɣ tɛɛ.+
Kpaɣnɩ alɩwaatʋ ndʋ tɩlaba yɔ, maawɛ peeɖe.»
Nɛ lɛɛlɛɛyɔ Kɩbaɣlʋ Kɩlɩm Yehowa tiyi-m, nɛ e-fezuu ɖɔɖɔ.
17 Tɔm tʋnɛ Yehowa yɔɔdʋʋ, Weyi ɛɖaɣnɩ-ŋ yabʋ yɔ, Izrayɛɛlɩ tɛ Kiɖeɖeu:+
«Ma Yehowa, mɛkɛnɩ ñɛ-Ɛsɔ,Weyi ɛwɩlɩɣ-ŋ tɔm se pɩwazɩ ña-maɣmaɣ* yɔ,+Weyi eɖiyiɣ-ŋ nʋmɔʋ ŋgʋ kɩ-taa pɩwɛɛ se ŋɖɔ yɔ.+
18 Ye ŋŋtisaɣ nɛ ŋwelisiɣ man-paɣtʋ!+
Ðɩnɛ ɛlɛ ña-laŋhɛzɩyɛ kaapɩsɩ ɛzɩ pɔɔ yɔ+Nɛ ñe-siɣsiɣ wɛtʋ pɩsɩ ɛzɩ teŋgu taa lɩm hola yɔ.+
19 Ña-lʋlʋʋ taa mba* kaaɖɔ ɛzɩ kañɩŋa yɔNɛ ñe-liɖe taa piya ñɔɖɔɔ ɛzɩ kañɩŋa pee yɔ.+
Paakaɣ pa-hɩɖɛ hɩzʋʋ yaa paakaɣ-ɖɩ ɖɩzʋʋ mɛ-ɛsɩndaa kpa.»
20 Ɩlɩɩ Babilɔɔnɩ taa!+
Ise Kalɩdee mba cɔlɔ!
Isusi-tʋ nɛ taa leleŋ kubusi! Isusi-tʋ!+
Iyele nɛ patɩlɩ-tʋ nɛ piwolo pɩtalɩ tɛtʋ kamasɩ yɔɔ.+
Ɩyɔɔdɩ se: «Yehowa ɖaɣnɩ yabʋ ɛ-lɩmɖʋyʋ Yakɔɔb.+
21 Lɔkɔtʋ tɩɖɛɛ-wɛ alɩwaatʋ ndʋ eɖiyi-wɛ nɛ ɛtɩŋnɩ kañɩmbusuu ageeta taa yɔ.+
Eyeba nɛ lɩm lɩɩnɩ kaaʋ taa nɛ pikpe se pɔñɔɔ;Ɛfaɣ kaaʋ nɛ eyele nɛ lɩm yabɩtɩ.»+
22 Yehowa yɔɔdʋʋ se: «Kañatʋ tɩnaa fɛyɩnɩ laŋhɛzɩyɛ.»+
Pɩ-tɛɛ tɔm
^ Pɩpɩzɩɣ pɩkɛ, «Yuuda lʋlʋʋ taa.»
^ Piye piye, «kajalaɣ.»
^ Yaa «man-sɩʋ kpeliɣa ŋga poyolisi ñɩɣtʋ nɛ polubina yɔ.»
^ Yaa «Mewili-ŋ.» Pɩpɩzɩɣ pɩkɛ, «Malɩzɩ-ŋ.»
^ Yaa «Ma nɛ nɔɔyʋ ɖɩɩtayɩɣ man-samtʋ.»
^ Yaa «se piɖeni ña-maɣmaɣ.»
^ Piye piye, «Ño-ɖomaɣ.»
