Yereemii 18:1-23
18 Tɔm ndʋ tɩlɩnɩ Yehowa cɔlɔ nɛ tɩtalɩ Yereemii yɔ, ndʋ yɔ:
2 «Kʋyɩ nɛ ŋtii cʋʋ mayʋ ɖɩɣa taa,+ nɛ mankaɣ yebu nɛ ŋnɩɩ mɔn-tɔm peeɖe.»
3 Peeɖe mankʋyaa nɛ mentii cʋʋ mayʋ ɖɩɣa taa, nɛ eɖiɣni labʋ tʋmɩyɛ cʋʋ mayʋ kpela yɔɔ.
4 Ɛlɛ cʋʋ ñanaɣ ŋga cʋʋ mayʋ kpaɣ cʋʋ nɛ ɛmaɣna yɔ, kɛwɛɛkɩ e-nesi taa. Peeɖe ɛkpaɣ-kʋ nɛ ɛɖaɣnɩ maʋ cʋʋ ñanaɣ lɛɛka, ɛzɩ ɛsɔɔlʋʋ yɔ.*
5 Nɛ Yehowa tɔm talɩ-m se:
6 «“Ɛzɩ ma ɖɔɖɔ maapɩzɩɣ nɛ malabɩ-mɩ ɛzɩ cʋʋ mayʋ ɛnɛ ɛlabʋ yɔ, Oo Izrayɛɛlɩ ɖɩɣa? Ɩna! Ɛzɩ cʋʋ wɛʋ cʋʋ mayʋ nesi tɛɛ yɔ, mbʋ ɖɔɖɔ ɩwɛ me-nesi tɛɛ, Oo Izrayɛɛlɩ ɖɩɣa,”+ Yehowa yɔɔdʋʋna.
7 Alɩwaatʋ ndʋ payɩ mɔyɔɔdʋʋ ɛjaɖɛ naɖɩyɛ yaa kewiyaɣ nakɛyɛ tɔm se mɛnkpɛzɩɣ-kɛ nɛ mɔyɔkɩ-kɛ nɛ mɛnpɛɖɩ nɛ manɖɩzɩ-kɛ,+
8 nɛ ɛjaɖɛ nɖɩ ɖiyele ɖɩ-kañatʋ lakasɩ nzɩ sɩ-tɔm mɔyɔɔdaa yɔ, mankaɣ ɖɔɖɔ lɛɣzʋʋ ma-lɩmaɣza* pɩlɩɩnɩ asɛyʋʋ ŋgʋ maaɖʋwa se mɔnkɔŋnɩ ɖɩ-yɔɔ yɔ kɩ-yɔɔ.+
9 Ɛlɛ alɩwaatʋ ndʋ payɩ mɔyɔɔdʋʋ ɛjaɖɛ naɖɩyɛ yaa kewiyaɣ nakɛyɛ tɔm se mamaɣ-kɛ nɛ mankam-kɛ,
10 nɛ ɛjaɖɛ nɖɩ ɖɩlakɩ mbʋ pɩfɛyɩ ɖeu mɛ-ɛsɩndaa yɔ nɛ ɖɩɩñaŋ mɔ-nɔɔ taa tɔm yɔ, mankaɣ lɛɣzʋʋ ma-lɩmaɣza* pɩlɩɩnɩ kɩbandʋ ndʋ maaɖʋwa se malakɩ-ɖɩ yɔ tɩ-yɔɔ.”
11 «Lɛɛlɛɛyɔ mentendi-ŋ, heyi tɔm tʋnɛ Yuuda mba nɛ Yeruzalɛm taa mba: “Tɔm tʋnɛ Yehowa yɔɔdʋʋ: ‘Ɩna, menɖiɣni ñɔɔzʋʋ* asɛyʋʋ nakʋyʋ nɛ menɖiɣni labʋ ɖʋtʋ natʋyʋ mɩ-yɔɔ. Mentendi-mɩ, iyele mɩ-nʋmɔŋ kɩdɛkɛdɩŋ nɛ ɩpɩsɩ, nɛ ɩñɔɔzɩ mɩ-nʋmɔŋ nɛ mɩ-lakasɩ.’”»+
12 Ɛlɛ pɔyɔɔdɩ se: «Taaɖʋ ña-tɩ kʋñɔŋ!+ Mbʋ pʋyɔɔ yɔ ɖɩkaɣ ɖɔm ndʋ ɖa-maɣmaɣ ɖɩmaɣzɩɣ yɔ tɩ-yɔɔ, nɛ ɖa-taa paa weyi lɛ ɛkaɣ labʋ ɛzɩ ɛ-laŋɩyɛ nɖɩ ɖɩkɛ kɩdɛkɛdɩyɛ nɛ ɖɩwɛɛ kpɩzɩŋ yɔ ɖɩsɔɔlʋʋ yɔ.»+
13 Pʋyɔɔ lɛ, tɔm tʋnɛ Yehowa yɔɔdʋʋ:
«Mentendi-mɩ, mɩ-maɣmaɣ iwolo nɛ ɩpɔzɩ ajɛɛ taa nɛ ɩna.
Atɛm tɔm natʋyʋ nɩʋ ɛzɩ tʋnɛ yɔ?
Izrayɛɛlɩ pɛlɛ weyi ɛtɩtɩlɩ abalʋ yɔ ɛlabɩ kʋzɔɔtʋ lakasɩ nzɩ sɩ-wayɩ fɛyɩ yɔ.+
14 Ɛzɩ Libaŋ ɖɔmbɛɛ mʋkɩ kaaŋ weyi ɩwɛ kɩ-kajalanzɩ taa yɔ ɩ-yɔɔ?
Yaa lɩm kiniɣdim mbʋ pɩlɩnɩ poliŋ taa nɛ pikpeŋ yɔ, pɩkaɣ sɔʋ na?
15 Ɛlɛ man-samaɣ sɔ mɔ-yɔɔ.+
Mbʋ pʋyɔɔ yɔ palaɣ kɩlaŋ mbʋ pɩɩwazɩɣ pʋyʋ yɔ,*+Nɛ peyeki nɛ pituuluu ɛyaa pa-nʋmɔŋ taa, ɖooo lɔndaa nʋmɔŋ taa,+Se pɔɖɔ nʋmɔŋ cikpeŋ weyi patɩñɔɔzɩ-ɩ nɛ ɩfɛyɩ layɩɩ yɔ* ɩ-taa.
16 Pʋyɔɔ lɛ, pɛ-ɛjaɖɛ kaɣ pɩsʋʋ sɔɔndʋ pʋyʋ+Nɛ mbʋ panaɣ-pʋ nɛ pahʋlʋʋ kancʋʋlaɣ tam yɔ.+
Weyi ɛtɩŋɩɣnɩ peeɖe yɔ, ɛkaɣ cɔnʋʋ nɛ sɔɔndʋ kpa-ɩ nɛ ekpiɣyi ɛ-ñʋʋ.+
17 Mankaɣ-wɛ mɩzʋʋ koyindu ɛsɩndaa, ɛzɩ wɩsɩ ɖɩlɩyɛ taa helim yɔ.
Pa-asɛyʋʋ kɩyakʋ wiye lɛ, mankaɣ-wɛ haʋ siɣye, ɛlɛ maayeki nɛ pana mɛ-ɛsɩndaa.»*+
18 Nɛ pɔyɔɔdɩ se: «Ɩkɔɔ, iyele nɛ ɖɩkpɛyɩ Yereemii tɔm,+ mbʋ pʋyɔɔ yɔ paɣtʋ* ɛɛkaɣ ɖɩm ɖɔ-cɔjɔnaa cɔlɔ yaa lɔŋ tasʋʋ ɛɛkaɣ ɖɩm ɖɔ-lɔŋsɩnɖaa cɔlɔ yaa tɔm ɛɛkaɣ ɖɩm ɖa-nayaa cɔlɔ. Ɩkɔɔ nɛ ɖɩyɔɔdɩ tɔm kɩdɛkɛdɩtʋ ɛ-yɔɔ* nɛ ɖitaakemsi tɔm ndʋ ɛyɔɔdʋʋ yɔ.»
19 Hayɩ Yehowa, kemsini-m,Nɛ ŋwelisi tɔm ndʋ mon-koyindinaa wɛɛ nɛ pɔyɔɔdʋʋ yɔ.
20 Ɛzɩ pɩwɛɛ se pakpaɣ kɩdɛkɛdɩm nɛ pɛhɛyɩnɩ kɩbam na?
Mbʋ pʋyɔɔ yɔ pohuyi pɔʋ se palɩzɩ me-wezuu.*+
Tɔzɩ ɛzɩma maasɩŋ ñɛ-ɛsɩndaa se mɔyɔɔdɩ pɔ-yɔɔ tɔm kɩbandʋ,Se monposi ña-pana nɛ pɔ-cɔlɔ yɔ.
21 Pʋyɔɔ lɛ, yele nɛ ñɔɔsɩ kʋ pa-pɩyalaa,Nɛ ŋɖʋzɩ-wɛ laɣɖɛ ɖoŋ tɛɛ.+
Pa-halaa ɩpɩsɩ halaa mba pe-piya sɩba yɔ nɛ lelaa.+
Kʋdɔŋ ŋgʋ kɩkɔŋnɩ sɩm yɔ, kɩkʋ pɛ-ɛyaa,Pakʋ pe-evebiya nɛ laɣɖɛ you taa.+
22 Panɩɩ kubuka taŋ pa-ɖɩsɩ taaAlɩwaatʋ ndʋ ŋkɔŋnɩ ɛtɛlɛmwaa pɔ-yɔɔ tuda yɔ.
Mbʋ pʋyɔɔ yɔ pohuyi pɔʋ se pakpa-mNɛ pañɩbɩ kpacanaa ma-nɩŋgbanzɩ.+
23 Ɛlɛ ña lɛ, hayɩ Yehowa,Ŋsɩm camɩyɛ lɩmaɣza wena palabɩ mɔ-yɔɔ se pakʋʋ-m yɔ.+
Taahuuzi pa-kɩdɛkɛdɩm yɔɔ,Nɛ taahɩzɩ pa-kɩwɛɛkɩm ñɛ-ɛsɩndaa.
Yele nɛ pituuli-wɛ ñɛ-ɛsɩndaa+Alɩwaatʋ ndʋ ŋkʋyʋʋ pɔ-yɔɔ ña-pana taa yɔ.+
Pɩ-tɛɛ tɔm
^ Piye piye, «ɛzɩ ɛzɩma pɩtʋʋzɩ cʋʋ mayʋ ɛsɩndaa se ɛla.»
^ Yaa «mankaɣ ɖɔɖɔ kpiɖuu.»
^ Yaa «mankaɣ kpiɖuu.»
^ Piye piye, «lɩzʋʋ.»
^ Yaa «nɛ patisuyi-i yɔ.»
^ Yaa «palaɣ kɩlaŋ mbʋ pɩɩwazɩɣ pʋyʋ yɔ nɛ kɩlaŋ ñɔsɩ kpaɣ.»
^ Piye piye, «mankaɣ-wɛ wɩlʋʋ siɣye nɛ pɩɩkɛɣnɩ ɛsɩndaa.»
^ Piye piye, «ɖɩmabɩ-ɩ nɛ nzʋlʋmɩyɛ.»
^ Yaa «wɩlɩtʋ.»
^ Yaa «man-kalɩzaɣ.»
