Yereemii 31:1-40
31 «Alɩwaatʋ ndʋ tɩ-taa lɛ, mankaɣ pɩsʋʋ Izrayɛɛlɩ hɔŋ kpeekpe tɛ Ɛsɔ, nɛ ɩkaɣ pɩsʋʋ man-samaɣ,+ Yehowa yɔɔdʋʋna.»
2 Tɔm tʋnɛ Yehowa yɔɔdʋʋ:
«Ɛyaa mba laɣɖɛ tɩkʋ-wɛ yɔ, pɔ-tɔm kɛdɩnɩ Ɛsɔ kañɩmbusuu taaAlɩwaatʋ ndʋ Izrayɛɛlɩ ɖɔŋaɣ nɛ ɛɖɛɣ ɛ-ɖɩhɛzɩyɛ lone taa yɔ.»
3 Ðooo poliŋ taa Yehowa lɩ mɔ-yɔɔ nɛ eheyi-m se:
«Mɔnsɔɔlɩ-ŋ nɛ tamtam sɔɔlɩm.
Pʋyɔɔ mɔhɔmɩ-ŋ nɛ sɔɔlɩm siɣsiɣ ñɩmbʋ nɛ mɔnkɔnɩ mɔn-cɔlɔ.*+
4 Nɛ mankaɣ-ŋ ɖaɣnʋʋ maʋ nɛ ŋkaɣ ɖaɣnʋʋ pɩsʋʋ ɛjaɖɛ.+
Oo Izrayɛɛlɩ pɛlɛ weyi ɛtɩtɩlɩ abalʋ yɔ, ŋkaɣ ɖaɣnʋʋ kpaɣʋ ñe-nesi tɛɛ soo*Nɛ ŋlɩɩnɩ payɛ nɛ amɛya.*+
5 Ŋkaɣ tasʋʋ ɖʋʋ viiñi hayɩm Samaarii pʋŋ yɔɔ,+Viiñi hayɩyaa kaɣ sɔʋ viiñi nɛ pɔtɔɔ ki-pee.+
6 Mbʋ pʋyɔɔ yɔ kɩyakʋ nakʋyʋ kaɣ kɔm nɛ feŋiyaa mba pɛwɛ Efrayim pʋŋ taa yɔ pakaɣ mabʋ kubuka sɔsɔɔ se:
“Ɩkʋyɩ, iyele nɛ ɖɩkpa Siyɔŋ, ɖɛ-Ɛsɔ Yehowa cɔlɔ.”»+
7 Mbʋ pʋyɔɔ yɔ tɔm tʋnɛ Yehowa yɔɔdʋʋ:
«Itee Yakɔɔb hendu nɛ taa leleŋƖma taa leleŋ kubusi mbʋ pʋyɔɔ yɔ ɩwɛ ajɛɛ ñʋŋ yɔɔ.+
Isusi tɔm ndʋ; ɩsa Ɛsɔ nɛ ɩyɔɔdɩ se:
“Hayɩ Yehowa, ya ña-samaɣ ñʋʋ, Izrayɛɛlɩ ɛyaa mba pɩkazaa yɔ.”+
8 Mankaɣ-wɛ kpaɣʋ nɛ hayo kiŋ ɛjaɖɛ taa nɛ manpɩsɩna.+
Mankaɣ-wɛ kpeɣluu nɛ tɛtʋ hɔɔlɩŋ weyi ɩkɩlɩ posuu yɔ ɩ-taa.+
Yʋlʋm nɛ taɖɩyɛ tʋ pakaɣ wɛʋ pa-taa,+Halʋ hoɣa tʋ nɛ halʋ weyi eɖiɣni lʋlʋʋ yɔ, pa-tɩŋa payɩ pakaɣ wɛʋ pa-taa.
Alɩwaatʋ ndʋ papɩsɩɣ cɩnɛ yɔ, pakaɣ kɛʋ ɛyaa samaɣ sɔsɔɔ.*+
9 Pakaɣ kɔm nɛ wiluu.+
Mankaɣ-wɛ ɖiyuu alɩwaatʋ ndʋ petendiɣ se mana pa-pʋtɔdɩyɛ yɔ.
Mankaɣ-wɛ ɖiyuu nɛ mowoni lɩm lemisi cɔlɔ,+Mankaɣ-wɛ tɩŋnʋʋ nʋmɔʋ ŋgʋ kɩ-taa wɛ layɩɩ nɛ piituuluu-wɛ yɔ.
Mbʋ pʋyɔɔ yɔ mɛnkɛ Izrayɛɛlɩ Caa, nɛ Efrayim kɛnɩ man-kajalaɣ pɩɣa.»+
10 Ɩnɩɩ Yehowa tɔm, ajɛɛ mɩ,Nɛ isusi-tʋ lɩm hɛkʋ taa tɛtʋ ndɩ ndɩ ndʋ tɩwɛ poliŋ taa yɔ tɩ-taa se:+
«Weyi ɛmɩzɩ Izrayɛɛlɩ mba yɔ, ɛkaɣ-wɛ kpeɣluu.
Ɛkaɣ feŋuu pɔ-yɔɔ ɛzɩ ninɖiɣyu feŋuu e-heŋ yɔɔ yɔ.+
11 Mbʋ pʋyɔɔ yɔ Yehowa kaɣ Yakɔɔb ñʋʋ yabʋ+Nɛ eholi-i* weyi ɛkɩlɩ-ɩ ɖoŋ yɔ e-nesi tɛɛ.+
12 Pakaɣ kɔm nɛ pama kubusi nɛ taa leleŋ Siyɔŋ Pʋʋ yɔɔ+Nɛ pañɩlɩsɩɣ Yehowa kɩbandʋ lakasɩ yɔɔ,*Tɔɔnaɣ pee nɛ vɛɛ kɩfalʋʋ+ nɛ num yɔɔ,Nɛ heɣsi nɛ newee yɔɔ.+
Pakaɣ* pɩsʋʋ ɛzɩ kaɖaɣ ŋga pamɩzɩ-kɛ lɩm camɩyɛ yɔ,+Nɛ paakaɣ tasʋʋ tɛɖʋʋ nabʋyʋ kpa.»+
13 «Alɩwaatʋ ndʋ tɩ-taa lɛ, pɛlɛ weyi ɛtɩtɩlɩ abalʋ yɔ ɛkaɣ paʋ nɛ taa leleŋ,Pɩkpɛndɩnɩ evebiya nɛ akpadɩyaa ɖɔɖɔ.+
Mankaɣ yebu nɛ pa-kʋñɔwiye pɩsɩ amɛya.+
Mankaɣ hɛzʋʋ pa-laŋɩyɛ nɛ maha-wɛ taa leleŋ pa-laŋwɛɛkɩyɛ lone taa.+
14 Mankaɣ haʋ cɔjɔnaa* tɔɔnasɩ sakɩyɛ,*Nɛ mankaɣ man-samaɣ haɣzʋʋ man-kɩbandʋ lakasɩ,»+ Yehowa yɔɔdʋʋna.
15 «Tɔm tʋnɛ Yehowa yɔɔdʋʋ:
“Panɩɣ Raamaa+ taa nɔɔ nakɛyɛ, peenduu nɛ wiluu siŋŋ:
Rasɛɛlɩ wɛɛ nɛ ewiɣ ɛ-pɩyalaa.*+
Ekizaa se pataahɛzɩ ɛ-laŋɩyɛ ɛ-pɩyalaa yɔɔ,Mbʋ pʋyɔɔ yɔ patɩtasɩ wɛʋ.”»+
16 Tɔm tʋnɛ Yehowa yɔɔdʋʋ:
«“Ñɔ-nɔɔ eyele wiu nɛ ñɛ-ɛsa iyele ɛsɩtɛɣlɩm tisuu,Mbʋ pʋyɔɔ yɔ ña-tʋmɩyɛ wɛnɩ kɩhɛyʋʋ,Pakaɣ lɩnʋʋ koyindu ɛjaɖɛ taa nɛ papɩsɩ,”+ Yehowa yɔɔdʋʋna.
17 “Nɛ ŋwɛnɩ lidaʋ nakʋyʋ cee wayɩ,+Ña-pɩyalaa kaɣ pɩsʋʋ pa-maɣmaɣ pe-egeetiye taa,”+ Yehowa yɔɔdʋʋna.»
18 «Toovenim taa lɛ, manɩ Efrayim mɔla:
“Ŋsɩɣzɩ-m lɔŋ, nɛ mala lɛɣzɩtʋ,Ɛzɩ neɣye nɖɩ patɩfalɩsɩ-ɖɩ yɔ.
Pɩsɩnɩ-m, nɛ mankaɣ pɩsʋʋ faaa.
Mbʋ pʋyɔɔ yɔ ŋkɛ mɛ-Ɛsɔ Yehowa.
19 Mbʋ pʋyɔɔ yɔ mɛntɛm pɩsʋʋ lɛ, menkpiɖi mbʋ maalaba yɔ pɩ-yɔɔ;+Pasɩnɩ-m nɛ menɖiɣzini mbʋ malaba yɔ lɛ, manɩɩ siziŋ nɛ mama man-taɖɩyɛ taa.
Fɛyɛ kaakpa-m siŋŋ.+
Mbʋ pʋyɔɔ yɔ me-evebitu taa fɛyɛ kaawɛ mɔ-yɔɔ.”»
20 «Ɛzɩ Efrayim tɩkɛ abalɩbɩɣa ŋga kɔ-tɔm cɛyɩ mɛ-ɛsɩndaa siŋŋ yɔ? Ɛzɩ ɛtɩkɛ pɩɣa kʋsɔɔlaɣ na?+
Mbʋ pʋyɔɔ yɔ alɩwaatʋ ndʋ payɩ mankalɩɣ-ɩ yɔ, mɛwɛɣ nɛ mɔntɔzʋʋ ɛ-yɔɔ.
Pʋyɔɔ me-liu wɛ-ɩ siŋŋ.+
Nɛ paa pɩɩlabɩ ɛzɩma yɔ mankaɣ naʋ ɛ-pʋtɔdɩyɛ,» Yehowa yɔɔdʋʋna.+
21 «Siɣ ña-tɩ habɩyɛ yɔɔ tilima,Nɛ ŋsiɣ yʋsasɩ sizikasɩ.+
Cɔnɩ habɩyɛ sɔsɔɖɛ camɩyɛ, nʋmɔʋ ŋgʋ pɩwɛɛ se ŋtɩŋ yɔ.+
Oo Izrayɛɛlɩ pɛlɛ weyi ɛtɩtɩlɩ abalʋ yɔ, pɩsɩ; pɩsɩ tɛtʋ ndɩ ndɩ tʋnɛ tɩ-taa, ndʋ tɩkɛ ña-ñɩndʋ yɔ.
22 Oo ña pɛlɛ weyi ɛfɛyɩ siɣsiɣ yɔ, ŋwɛɣ nɛ ŋcɔʋ ña-taa kiii nɛ pɩkɔɔ nɛ pɩsɩɩnɩ ɖooye?
Mbʋ pʋyɔɔ yɔ Yehowa lɩzɩ pʋyʋ kɩfalʋ tɛtʋ yɔɔ:
Halʋ kaɣ ɖʋʋ abalʋ wayɩ siŋŋ.»
23 Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: «Pakaɣ tasʋʋ yɔɔdʋʋ tɔm tʋnɛ Yuuda ɛjaɖɛ taa nɛ kɩ-tɛtʋ ndɩ ndɩ taa alɩwaatʋ ndʋ menkpeɣliɣ po-yomaa nɛ manpɩsɩnɩ-wɛ yɔ: “Yehowa ɛwazɩ-ŋ, Oo ɖɩjaɣyɛ siɣsiɣ ñɩnɖɛ,+ Oo pʋʋ kiɖeɖeu.”+
24 Nɛ Yuuda nɛ kɩ-tɛtʋ ndɩ ndɩ tɩŋa pakaɣ kpɛndʋʋ nɛ pacaɣ peeɖe, haɖaa nɛ mba peɖiyiɣ kpɩna yɔ.+
25 Mbʋ pʋyɔɔ yɔ weyi pɩɖɛ-ɩ yɔ,* mankaɣ-ɩ haɣzʋʋ mbʋ pɩtɛɖɩɣ-ɩ yɔ, nɛ mahaɣzɩ weyi ɛwɛ kɛdɛɖaɣ taa yɔ ɖɔɖɔ.»*+
26 Peeɖe menfema nɛ monkuli mɛ-ɛsa, nɛ mon-ɖom kaawɛ-m leleŋ.
27 «Ɩna! Kɩyakɩŋ ɖiɣni kɔm, nɛ alɩwaatʋ ndʋ lɛ, mankaɣ kpaɣʋ ɛyʋ ɖomaɣ* nɛ kpɩna ɖomaɣ nɛ monɖuu Izrayɛɛlɩ ɖɩɣa taa nɛ Yuuda ɖɩɣa taa,»+ Yehowa yɔɔdʋʋna.
28 «Nɛ ɛzɩ mɛ-ɛsɩyɛ kaawɛʋ pɔ-yɔɔ se mɛnkpɛzɩ-wɛ, se montuzi-wɛ nɛ mɛnpɛɖɩ, se mɔyɔkɩ-wɛ, se manɖɩzɩ-wɛ, nɛ mawɩlɩ-wɛ kʋñɔŋ yɔ,+ mbʋ ɖɔɖɔ mɛ-ɛsɩyɛ kaɣ wɛʋ pɔ-yɔɔ se mama-wɛ nɛ mankam-wɛ,»+ Yehowa yɔɔdʋʋna.
29 «Kɩyakɩŋ ɛnɩ ɩ-taa lɛ, paakaɣ tasʋʋ yɔɔdʋʋ se: “Caanaa tɔɔ viiñi pee wena awɛ ñɩmɩŋ yɔ, ɛlɛ pa-pɩyalaa kela ñɩŋna.”*+
30 Ɛlɛ paa weyi ɛkaɣ sɩbʋ ɛ-maɣmaɣ ɛ-kɩdɛkɛdɩm yɔɔ. Ɛyʋ weyi ɛtɔkɩ viiñi pee wena awɛ ñɩmɩŋ yɔ ɛ-maɣmaɣ e-kela kaɣnɩ ñɩŋʋʋ.»
31 «Ɩna! Kɩyakɩŋ ɖiɣni kɔm, nɛ alɩwaatʋ ndʋ lɛ, mankaɣ ɛgbɛyɛ kɩfaɖɛ naɖɩyɛ ɖʋʋ ma nɛ Izrayɛɛlɩ ɖɩɣa nɛ Yuuda ɖɩɣa ɖɛ-hɛkʋ taa,»+ Yehowa yɔɔdʋʋna.
32 «Ðɩɩkaɣ wɛʋ ɛzɩ ɛgbɛyɛ nɖɩ maaɖʋ ma nɛ pɔ-cɔzɔnaa ɖɛ-hɛkʋ taa kɩyakʋ ŋgʋ mɔnɖɔkɩ pe-nesi tɛɛ nɛ malɩzɩ-wɛ Ejipiti ɛjaɖɛ taa yɔ,+ “mɛ-ɛgbɛyɛ nɖɩ pɛcɛbɩ-ɖɩ,+ paa maakɛ pa-ñʋʋdʋ maɣmaɣ* yɔ,” Yehowa yɔɔdʋʋna.»
33 «Mbʋ pʋyɔɔ yɔ ɛgbɛyɛ ɖɩnɛ mankaɣ ɖʋnʋʋ Izrayɛɛlɩ ɖɩɣa kɩyakɩŋ ɛnɩ ɩ-wayɩ. Mankaɣ ɖʋʋ man-paɣtʋ pa-taa,+ nɛ mankaɣ-tʋ maʋ pa-laŋa taa.+ Nɛ mankaɣ pɩsʋʋ pɛ-Ɛsɔ, nɛ pakaɣ pɩsʋʋ man-samaɣ,»+ Yehowa yɔɔdʋʋna.
34 «Nɛ nɔɔyʋ ɛɛkaɣ tasʋʋ tɔm wɩlʋʋ ɛ-taabalʋ nɛ e-koobu nɛ ɛtɔ se: “Ɩtɩlɩ Yehowa!”+ mbʋ pʋyɔɔ yɔ pa-tɩŋa pakaɣ-m tɩlʋʋ, kpaɣnɩ pa-taa weyi pɩtɔyɩnaa yɔ nɛ piwolo weyi ɛkpaɖaa yɔ.+ Mbʋ pʋyɔɔ yɔ mankaɣ-wɛ kpeɣu pa-kɩdɛkɛdɩm, nɛ maakaɣ tasʋʋ tɔzʋʋ pa-kɩwɛɛkɩm yɔɔ,»+ Yehowa yɔɔdʋʋna.
35 Tɔm tʋnɛ Yehowa yɔɔdʋʋ,Ɛnʋ weyi ɛhaɣ wɩsɩ se sɩñandɩ wɩsɩ taa,Nɛ ɛɖʋʋ paɣtʋ* fenaɣ nɛ tɩɩnzɩ se sɩñandɩ ɖoo taa yɔ,Ɛnʋ weyi ɛcʋʋdʋʋ teŋgu nɛ eyeki nɛ ki-hola lakɩ kɔkɔɖɛ yɔ,Ɛnʋ weyi payaɣ-ɩ se yoyaa tɛ Yehowa yɔ:+
36 «“Ye pɩlaba se ɖʋtʋ ndʋ tiyebi labʋ wiɖiyi yɔ,“Kalɩpiyeke Izrayɛɛlɩ lʋlʋʋ taa mba yeki kɛʋ ɛjaɖɛ mɛ-ɛsɩndaa tam,” Yehowa yɔɔdʋʋna.»+
37 Tɔm tʋnɛ Yehowa yɔɔdʋʋ: «“Ye paapɩzaɣ se pamaɣzɩ ɛsɔdaa nɛ ye paapɩzaɣ se pañɩnɩ nɛ patɩlɩ tɛtʋ tigila yɔ, kalɩpiyeke manpɩzaɣ se mɔlɔ Izrayɛɛlɩ lʋlʋʋ taa mba kpeekpe mbʋ payɩ palaba yɔ pɩ-yɔɔ,” Yehowa yɔɔdʋʋna.»+
38 «Ɩna! Kɩyakɩŋ ɖiɣni kɔm, nɛ alɩwaatʋ ndʋ lɛ, pakaɣ Yehowa maʋ tɛtʋ ndʋ,+ kpaɣnɩ Hananɛlɩ Tilimiye+ nɛ piwolo Kɔna taa Nɔnɔɔ;+ Yehowa yɔɔdʋʋna.
39 Nɛ nimaɣ ŋga pamaɣzɩɣna yɔ+ kakaɣ lɩʋ nɛ kɛɖɛɛ kpaagbaa Garɛɛbɩ piyaɣ yɔɔ, nɛ kakaɣ pɩsʋʋ nɛ Gowa yɔɔ kiŋ.
40 Nɛ sɩɖaa tomnasɩ fɛɛʋ* nɛ tɔlɩma* fɛɛʋ kpeekpe nɛ kamaŋ kpeekpe nɛ pɩtalɩ ɖooo Kidrɔɔnɩ Fɛɛʋ,+ nɛ piwolo pɩtalɩ Kpaŋnaŋ Nɔnɔɔ+ kɔna taa wɩsɩ ɖɩlɩyɛ hɔɔlʋʋ taa, pɩkaɣ kɛʋ pʋyʋ kiɖeɖeu Yehowa ɛsɩndaa.+ Wiɖiyi paakaɣ-tʋ tasʋʋ kpɛzʋʋ yaa yɔkʋʋ kpa.»
Pɩ-tɛɛ tɔm
^ Yaa «Pʋyɔɔ mowobi pɩ-yɔɔ nɛ mawɩlɩɣ-ŋ sɔɔlɩm siɣsiɣ ñɩmbʋ.»
^ Pɩkɛ soo cikpena wena pɔɖɔkʋʋ nesi tɛɛ nɛ pamakɩ yɔ.
^ Yaa «Nɛ ŋsʋʋ mba peɖiɣni woŋuu yɔ pa-payɛ taa.»
^ Yaa «pakaɣ kɛʋ ɛgbɛyɛ sɔsɔɖɛ.»
^ Yaa «Nɛ ɛmʋ-ɩ.»
^ Yaa «Nɛ pañɩlɩsɩɣ wondu kɩbandʋ ndʋ tɩlɩnɩ Yehowa cɔlɔ yɔ tɩ-yɔɔ.»
^ Yaa «Pa-kalɩzaɣ kaɣ.»
^ Yaa «cɔjɔnaa kalɩzaɣ.»
^ Piye piye, «num.»
^ Yaa «e-piya.»
^ Yaa «kalɩzaɣ ŋga kɛwɛ kɛdɛɖaɣ taa yɔ ɖɔɖɔ.»
^ Yaa «kalɩzaɣ ŋga pɩɖɛ-kɛ yɔ.»
^ Yaa «lʋlʋʋ taa mba.»
^ Piye piye, «pa-pɩyalaa kela lɔŋ sɩbɩna.»
^ Pɩpɩzɩɣ pɩkɛ, «pa-walʋ.»
^ Yaa «kpalɩtʋ.»
^ Yaa «kɛdɛɛŋa.»
^ Yaa «num tɔlɩma,» pʋ-tɔbʋʋ se tɔlɩma wena a-taa kɩlaŋ num sidaa yɔ.
