Yereemii 44:1-30
44 Tɔm ndʋ tɩtalɩ Yereemii se eheyi-tʋ Yuuda ñɩma kpeekpe mba pɛwɛ Ejipiti ɛjaɖɛ taa yɔ,+ mba pɛwɛ Migɩdɔl+ taa, Tapanɛɛsɩ+ taa, Nof*+ taa, nɛ Patroosɩ+ ɛjaɖɛ taa yɔ, ndʋ yɔ:
2 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɩna asɛyʋʋ ŋgʋ mɔnkɔnɩ Yeruzalɛm yɔɔ+ nɛ Yuuda tɛtʋ ndɩ ndɩ kpeekpe yɔɔ yɔ kɩ-tɩŋa, nɛ sɔnɔ tɩpɩsɩ njaa nɛ nɔɔyʋ fɛyɩ tɩ-taa.+
3 Lakasɩ kɩdɛkɛdɩsɩ nzɩ palaba se paɖʋnɩ-m ɖɩwɩzɩyɛ yɔ sɩ-yɔɔ pɩlabɩ mbʋ: Powokaɣ nɛ palaɣ kɩlaŋ+ nɛ pɛsɛɣ ɛsɔnaa lalaa mba pataasɩm-wɛ yɔ; ɛsɔnaa mba mɩ-maɣmaɣ ɩtaasɩm-wɛ nɛ mɩ-cɔzɔnaa taasɩm-wɛ ɖɔɖɔ yɔ.+
4 Maawɛɛ nɛ mentiyiɣ ma-lɩmɖʋyaa mba payɩ pɛkɛ nayaa yɔ mɩ-cɔlɔ, mentiyaɣ-wɛ nɛ mɛlɛlɩɣ tam sakɩyɛ* se peheyi-mɩ se: ‘Mentendi-mɩ, ɩtaala kʋzɔɔtʋ lakasɩ sɩnɛ, nzɩ manpaɖɩɣ yɔ.’+
5 Ɛlɛ patiwelisi yaa patɩkʋ nɩŋgbaŋʋʋ se peyele labʋ pa-lakasɩ kɩdɛkɛdɩsɩ. Powobi pɩ-yɔɔ nɛ palaɣ kɩlaŋ ɛsɔnaa lalaa.+
6 Pʋyɔɔ manpɩyɩ man-ɖɩwɩzɩyɛ nɛ man-pana nɛ amʋ ɛzɩ miŋ yɔ Yuuda tɛtʋ ndɩ ndɩ taa nɛ Yeruzalɛm habɛɛ yɔɔ, nɛ pɩpɩsɩ njɛyɛ nɛ tɛtʋ ndʋ peyebi-tʋ yɔ, ɛzɩ pɩwɛʋ sɔnɔ yɔ.”+
7 «Nɛ lɛɛlɛɛyɔ lɛ, tɔm tʋnɛ Yehowa, yoyaa tɛ Ɛsɔ, Izrayɛɛlɩ tɛ Ɛsɔ yɔɔdʋʋ: “Ɛbɛ yɔɔ ɩwɛɛ nɛ ɩkɔŋnɩ asɛyʋʋ sɔsɔʋ mɩ-maɣmaɣ mɩ-yɔɔ,* se piyele nɛ paa abalʋ weyi nɛ paa halʋ weyi, paa pɩɣa ŋga nɛ paa pɩɣa cɩɩɩ ŋga lɛ, pamʋʋ Yuuda taa, nɛ pɩtaakazɩ-mɩ nɔɔyʋ?
8 Ɛbɛ yɔɔ pɩwɛɛ se ɩtɩŋnɩ mi-nesi tɛɛ tʋma yɔɔ nɛ ɩɖʋ-m ɖɩwɩzɩyɛ ɛzɩma ɩlaɣ kɩlaŋ ɛsɔnaa lalaa Ejipiti ɛjaɖɛ taa ɖenɖe iwoba se ɩcaɣ yɔ? Ɩkaɣ mʋʋʋ nɛ ɩpɩsɩ nɔɔ kɩdɛkɛdaɣ lɔʋ pʋyʋ nɛ fɛyɛ pʋyʋ tɛtʋ yɔɔ ajɛɛ kpeekpe taa.+
9 Ɛzɩ ɩsɔ mɩ-cɔzɔnaa lakasɩ kɩdɛkɛdɩsɩ yɔɔ nɛ Yuuda awiya lakasɩ kɩdɛkɛdɩsɩ yɔɔ+ nɛ pa-halaa lakasɩ kɩdɛkɛdɩsɩ yɔɔ,+ nɛ mɩ-maɣmaɣ mɩ-lakasɩ kɩdɛkɛdɩsɩ yɔɔ nɛ mɩ-halaa lakasɩ kɩdɛkɛdɩsɩ yɔɔ,+ nzɩ paalabɩ Yuuda ɛjaɖɛ taa nɛ Yeruzalɛm habɛɛ yɔɔ yɔ sɩ-yɔɔ?
10 Halɩ nɛ sɔnɔ patiluzi pa-tɩ,* patise sɔɔndʋ,+ nɛ patɩɖɔ ɖɔɖɔ man-paɣtʋ nɛ man-kpalɩtʋ ndʋ manɖʋ mɩ nɛ mɩ-cɔzɔnaa yɔ tɩ-yɔɔ.”+
11 «Pʋyɔɔ lɛ, tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɩna! Mɛntɛm man-taa se mɔnkɔŋnɩ asɛyʋʋ mɩ-yɔɔ, se manɖɩzɩɣ Yuuda kpeekpe.
12 Nɛ mankaɣ kpaɣʋ Yuuda ɛyaa mba pɩkazaa, mba pɛtɛm pa-taa se powoki Ejipiti nɛ pacaɣ peeɖe yɔ, nɛ pa-tɩŋa pakaɣ sɩbʋ Ejipiti ɛjaɖɛ taa.+ Pakaɣ-wɛ kʋʋ nɛ laɣɖɛ nɛ ñɔɔsɩ kaɣ-wɛ kʋʋ nɛ pasɩ; kpaɣnɩ weyi pɩtɔyɩnaa yɔ nɛ piwolo weyi ɛkpaɖaa yɔ, pakaɣ-wɛ kʋʋ nɛ laɣɖɛ nɛ ñɔɔsɩ kaɣ-wɛ kʋʋ nɛ pasɩ. Nɛ pakaɣ pɩsʋʋ mbʋ pɔlɔ pɩ-yɔɔ nɔɔ kɩdɛkɛdaɣ yɔ, sɔɔndʋ pʋyʋ, nɔɔ kɩdɛkɛdaɣ lɔʋ, nɛ fɛyɛ pʋyʋ.+
13 Mankaɣ hɔm mba pɛwɛ Ejipiti ɛjaɖɛ taa yɔ pa-nɩŋgbaaŋ ɛzɩ maahɔm Yeruzalɛm nɩŋgbaaŋ nɛ laɣɖɛ, ñɔɔsɩ nɛ kɩzɩkʋ* yɔ.+
14 Nɛ Yuuda ñɩma mba pɩkazaa, mba powoba se pacaɣ Ejipiti ɛjaɖɛ taa yɔ, paakaɣ lɩʋ pɩ-taa yaa paakaɣ hiɣu ñʋʋ yabʋ se papɩsɩ Yuuda ɛjaɖɛ taa. Pakaɣ sɔɔlʋʋ siŋŋ se papɩsɩ nɛ pacaɣ peeɖe, paa mbʋ yɔ paakaɣ pɩsʋʋ, ɛlɛ ɛyaa cabɩ mba palɩ pɩ-taa yɔ pe-ɖeke.”»
15 Abalaa mba payɩ paanawa se pa-halaa laɣaɣ kɩlaŋ ɛsɔnaa lalaa yɔ nɛ halaa mba payɩ paasɩŋ peeɖe yɔ, mba paakpɛndaa nɛ pɛkɛ tindimiye sɔsɔɖɛ yɔ, nɛ ɛyaa mba payɩ paawɛ Ejipiti ɛjaɖɛ taa,+ Patroosɩ taa yɔ,+ pocosi Yereemii se:
16 «Ðɩɩkaɣ welisuu tɔm ndʋ ŋheyi-ɖʋ Yehowa hɩɖɛ taa yɔ.
17 Ɛlɛ pɩtʋʋ fɛyɩ se ɖɩkaɣ ɖɔm tɔm ndʋ payɩ tɩlɩnɩ ɖɔ-nɔsɩ taa yɔ tɩ-yɔɔ, nɛ ɖɩlaa kɩlaŋ Ɛsɔdaa Abiɖe* nɛ ɖilizi-ɖɩ kilizasɩ+ ɛzɩ ɖa-maɣmaɣ nɛ ɖɔ-cɔzɔnaa nɛ ɖa-awiya nɛ ɖa-awumbiya ɖɩɩlabʋ Yuuda tɛtʋ ndɩ ndɩ taa nɛ Yeruzalɛm habɛɛ yɔɔ alɩwaatʋ ndʋ ɖɩtɔkaɣ tɔɔnaɣ* nɛ ɖɩhakɩ nɛ piɖeɣni-ɖʋ camɩyɛ, alɩwaatʋ ndʋ ɖɩtaanaɣ asɛyʋʋ nakʋyʋ paa ññɩɩ yɔ.
18 Kpaɣnɩ alɩwaatʋ ndʋ ɖiyebi laʋ kɩlaŋ Ɛsɔdaa Abiɖe* nɛ ɖiyebi-ɖɩ lizuu ɖɔɖɔ kilizasɩ yɔ, pɩtɩŋa payɩ pɩtɛɖɩ-ɖʋ nɛ laɣɖɛ nɛ ñɔɔsɩ pakʋ-ɖʋ nɛ ɖɩsɩ.»
19 Halaa sɔzɩ se: «Nɛ alɩwaatʋ ndʋ ɖɩlaɣaɣ kɩlaŋ Ɛsɔdaa Abiɖe* nɛ ɖiliziɣ-ɖɩ kilizasɩ yɔ, ɛzɩ pɩtɩkɛ ɖa-walaa kaahanɩ-ɖʋ nʋmɔʋ nɛ ɖɩla kɩlaŋ kakayɩsɩ nzɩ palabɩ-sɩ abiɖe nɖɩ ɖɩ-lɛzʋʋ yɔ, nɛ ɖilizi-ɖɩ kilizasɩ na?»
20 Peeɖe Yereemii heyi samaɣ kpeekpe, abalaa nɛ pa-halaa nɛ ɛyaa mba payɩ paawɛɛ nɛ pɔyɔɔdʋʋnɩ-ɩ yɔ se:
21 «Kɩlaŋ weyi mɩ-maɣmaɣ, mɩ-cɔzɔnaa, mɩ-awiya, mɩ-awumbiya nɛ ɛjaɖɛ taa ɛyaa la Yuuda tɛtʋ ndɩ ndɩ taa nɛ Yeruzalɛm habɛɛ yɔɔ yɔ,+ Yehowa tɔzɩ ɩ-yɔɔ nɛ ɛtɩsɔɔ ɩ-yɔɔ!*
22 Pɩtɛmna se Yehowa taapɩzɩɣ se ɛtasɩ ɖɔkʋʋ ɛ-tɩ mɩ-lakasɩ kɩdɛkɛdɩsɩ yɔɔ nɛ kʋzɔɔtʋ lakasɩ nzɩ ɩɩlaba yɔ sɩ-yɔɔ, nɛ mɩ-ɛjaɖɛ pɩsɩ njɛyɛ, sɔɔndʋ pʋyʋ, nɛ mbʋ pɩ-yɔɔ pɔlɔ nɔɔ kɩdɛkɛdaɣ yɔ, nɛ nɔɔyʋ fɛyɩ ɖɩ-taa, ɛzɩ pɩwɛʋ sɔnɔ yɔ.+
23 Ɩla kɩlaŋ ɛnɩ nɛ ɩyʋsɩnɩ Yehowa nɛ ɩtɩña Yehowa nɔɔ taa tɔm nɛ ɩtɩɖɔ ɛ-paɣtʋ, ɛ-kpalɩtʋ, nɛ ɛ-tɔm kɩtɔzɩtʋ yɔɔ; pʋyɔɔ asɛyʋʋ kʋnɛ kɩtalɩ-mɩ, ɛzɩ pɩwɛʋ sɔnɔ yɔ.»+
24 Yereemii wolo pɩ-yɔɔ nɛ eheyi samaɣ kpeekpe nɛ halaa kpeekpe se: «Ɩnɩɩ Yehowa tɔm, mɩ Yuuda ñɩma mba payɩ ɩwɛ Ejipiti ɛjaɖɛ taa yɔ.
25 Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Tɔm ndʋ mɩ nɛ mɩ-halaa ɩyɔɔdɩnɩ mɩ-nɔsɩ yɔ, ɩlabɩ-tʋ nɛ mi-nesi, mbʋ pʋyɔɔ yɔ ɩyɔɔdaa se: ‘Paa pɩɩla ɛzɩma ɖɩkaɣ ɖɔm ɖo-ɖuutu yɔɔ nɛ ɖɩlaa kɩlaŋ Ɛsɔdaa Abiɖe* nɛ ɖilizi-ɖɩ kilizasɩ.’+ Mɩ halaa lɛ, paa pɩɩla ɛzɩma yɔ ɩkaɣ ɖɔm mi-ɖuutu yɔɔ nɛ ɩla ɛzɩ iɖuuu yɔ.”
26 «Pʋyɔɔ lɛ, mɩ Yuuda ñɩma mba payɩ ɩwɛ Ejipiti ɛjaɖɛ taa yɔ, ɩnɩɩ Yehowa tɔm: “‘Ɩna, monɖukini ma-maɣmaɣ ma-hɩɖɛ sɔsɔɖɛ se Yuuda tʋ nɔɔyʋ ɛɛkaɣ tasʋʋ yaʋ ma-hɩɖɛ ɖuutu natʋyʋ taa+ Ejipiti ɛjaɖɛ kpeekpe taa nɛ ɛtɔ se: “Kɩbaɣlʋ Kɩlɩm Yehowa ñɩtʋʋ nɛ ɛwɛɛ wezuu yɔ!”+ Yehowa yɔɔdʋʋna.
27 Lɛɛlɛɛyɔ lɛ, menɖiɣni feŋuu pɔ-yɔɔ se mɔnkɔnɩ asɛyʋʋ nɛ pɩtɩkɛ pʋyʋ kɩbanʋ mɔnkɔŋna;+ Yuuda ñɩma mba payɩ pɛwɛ Ejipiti ɛjaɖɛ taa yɔ laɣɖɛ nɛ ñɔɔsɩ kaɣ-wɛ kʋʋ nɛ pasɩ, pɩkɔɔ nɛ pɩsɩɩnɩ alɩwaatʋ ndʋ paatasɩɣ wɛʋ yɔ.+
28 Ɛyaa pazɩ yem kaɣnɩ lɩʋ laɣɖɛ nesi tɛɛ nɛ pakʋyɩnɩ Ejipiti ɛjaɖɛ taa nɛ papɩsɩ Yuuda ɛjaɖɛ taa.+ Ðɩnɛ ɛlɛ Yuuda ñɩma mba payɩ pɩkazaa, mba powobi Ejipiti ɛjaɖɛ taa se pacaɣ peeɖe yɔ, pakaɣ ɖiɣzinuu weyi ɛ-tɔm laba yɔ, mɔn-tɔm yaa pa-ñɩndʋ!’”»
29 «“Nɛ pʋnɛ pɩkɛnɩ-mɩ yʋsaɣ, se mankaɣ mɩ-nɩŋgbaaŋ hɔm lone ɖɩnɛ ɖɩ-taa, nɛ pɩsa nɛ ɩtɩlɩ se tɔm ndʋ mɔyɔɔdaa se mankaɣ kɔnʋʋ asɛyʋʋ mɩ-yɔɔ yɔ, paa pɩɩla ɛzɩma tɩkaɣ labʋ, Yehowa yɔɔdʋʋna.
30 Tɔm tʋnɛ Yehowa yɔɔdʋʋ: ‘Ɩna, menɖiɣni ɖʋzʋʋ Ejipiti wiyaʋ Farawɔɔ Hɔfɩra e-koyindinaa nɛ mba pɛwɛɛ nɛ pañɩnɩɣ se palɩzɩ e-wezuu yɔ* pe-nesi tɛɛ, ɛzɩ maaɖʋzʋʋ Yuuda wiyaʋ Zedekiya Babilɔɔnɩ wiyaʋ Nabukodonozɔɔrɩ* nesi tɛɛ yɔ, ɛnʋ weyi ɛɛkɛ e-koyindu nɛ ɛñɩnaɣ se ɛlɩzɩ e-wezuu yɔ.’”»*+
Pɩ-tɛɛ tɔm
^ Yaa «Mɛmfiis.»
^ Piye piye, «mankʋyaɣ tanaŋ tɛɛ lɔŋ nɛ mentiyiɣ-wɛ.»
^ Yaa «mɩ-kalɩzasɩ yɔɔ.»
^ Yaa «pɩtɩyɔbɩ-wɛ.»
^ Yaa «kʋdɔŋ.»
^ Pɩkɛ hɩɖɛ kɩsɛsɛyɛ nɖɩ payaɣaɣnɩ ɛsɔ halɩñɩnʋ weyi Izrayɛɛlɩ mba tisuu yebiyaa sɛɣaɣ yɔ; pʋtɔma pɩkɛɣnɩ lʋlʋʋ tɛ ɛsɔ.
^ Piye piye, «kpɔnɔ.»
^ Pɩkɛ hɩɖɛ kɩsɛsɛyɛ nɖɩ payaɣaɣnɩ ɛsɔ halɩñɩnʋ weyi Izrayɛɛlɩ mba tisuu yebiyaa sɛɣaɣ yɔ; pʋtɔma pɩkɛɣnɩ lʋlʋʋ tɛ ɛsɔ.
^ Pɩkɛ hɩɖɛ kɩsɛsɛyɛ nɖɩ payaɣaɣnɩ ɛsɔ halɩñɩnʋ weyi Izrayɛɛlɩ mba tisuu yebiyaa sɛɣaɣ yɔ; pʋtɔma pɩkɛɣnɩ lʋlʋʋ tɛ ɛsɔ.
^ Piye piye, «nɛ ɩkpa ɛ-laŋɩyɛ taa.»
^ Pɩkɛ hɩɖɛ kɩsɛsɛyɛ nɖɩ payaɣaɣnɩ ɛsɔ halɩñɩnʋ weyi Izrayɛɛlɩ mba tisuu yebiyaa sɛɣaɣ yɔ; pʋtɔma pɩkɛɣnɩ lʋlʋʋ tɛ ɛsɔ.
^ Yaa «pañɩnɩɣ ɛ-kalɩzaɣ yɔ.»
^ Piye piye, «Nebukadɩrezaarɩ,» mbʋ pamaɣ ɛ-hɩɖɛ ɖɔɖɔ.
^ Yaa «nɛ ɛñɩnaɣ ɛ-kalɩzaɣ yɔ.»
