1. (a) Paɣtʋ ndʋ Yehowa ɖʋ-ɖʋ Bibl taa? (b) Nɛ ye ɖɩɖɔŋ tɩ-yɔɔ, ɛzɩma pɩwazɩɣ-ɖʋ?

YEHOWA ɖʋ-ɖʋ paɣtʋ Bibl taa nɛ ɛwɩlɩ-ɖʋ mbʋ ɖeyi ɖeyi pɩwɛɛ se ɖɩla hɔɔlɩŋ nɩɩyɩ taa yɔ. Ɛpaɣ-ɖʋ se ɖikizi kʋzʋʋ kɩdɛkɛdʋʋ, sɩɩnaa laʋ, mɩlɩm, nɛ sʋlʋm kpaŋʋʋ. (1 Kɔrɛntɩ 6:9, 10) Pɩtasɩ lɛ, Yesu Krɩstʋ ɖʋ ɛ-wayɩ tɩŋɩyaa paɣtʋ tʋnɛ: “Iwolo ɩpɩsɩ ajɛɛ kpeekpe tɔm mʋyaa nɛ lɩm sɔʋ Caa nɛ Pɩyalʋ nɛ Fezuu kiɖeɖeu hɩɖɛ taa, nɛ ɩwɩlɩ-wɛ nɛ pɔɖɔ paɣtʋ ndʋ manɖʋ-mɩ yɔ tɩ-yɔɔ. Piyele nɛ mɛwɛ mɩ-cɔlɔ kɩyakɩŋ kpeekpe nɛ pɩkɔɔ pɩtalɩ ɛjaɖɛ tɛm wiye.” (Maatiyee 28:19, 20) Yehowa paɣtʋ kandɩyɩɣ ɖɔ-yɔɔ siŋŋ. Ye ɖɩɖɔŋ tɩ-yɔɔ kɔyɔ, piyeki nɛ ɖɩcɔnɩ ɖa-tɩ yɔɔ camɩyɛ, ɖɩwɛɛnɩ tɔnʋʋ taa alaafɩya, nɛ ɖihiɣ koboyaɣ ɖɔ-hɔʋ taa nɛ pɩkɩlɩ. Kɔzɩ kɔzɩ lɛ, ye ɖɩɖɔŋ Yehowa paɣtʋ yɔɔ nɛ pɩkpɛndɩnɩ ndʋ tɩtɔŋ se ɖisusi tɔm yɔ tɩ-yɔɔ kɔyɔ, ɖɔ-tɔm kɛdɩɣnɩ-ɩ nɛ ɛkaɣ-ɖʋ wazʋʋ.

2, 3. (a) Ɛbɛ yɔɔ Bibl ɛɛɖʋʋ paɣtʋ ɖe-wezuu hɔɔlɩŋ tɩŋa taa? (b) Tɔm ndʋ yɔɔ ɖɩkaɣ cosuu ñʋʋ kʋnɛ kɩ-taa? (Cɔnɩ kiɖe tɛɛ kɩlɛmʋʋ.)

² Ɛlɛ hɔɔlɩŋ sakɩyɛ wɛɛ lɛ, Bibl tɩɖʋ paɣtʋ natʋyʋ kpayɩ se kɩwɩlɩ-ɖʋ mbʋ pɩwɛɛ se ɖɩla yɔ. Paɣtʋ natʋyʋ fɛyɩ Bibl taa kpayɩ nɛ tɩwɩlɩɣ Krɩstʋ mba wondu ndʋ pɩwɛɛ se posuu yɔ.  Ɛzɩma tɔm ndʋ tɩwɩlɩɣ se Yehowa wɛnɩ lɔŋsɩnɖɛ? Ɛjaɖɛ hɔɔlɩŋ ndɩ ndɩ taa lɛ, ɛyaa wondu suu nɛ pɔ-sɔnzɩ pɩtɩta, nɛ alɩwaatʋ kaaɖɛɣ lɛ pɩlɛɣzɩɣ. Ye Bibl kaaɖʋ paɣtʋ nɛ kɩwɩlɩ wondu ndʋ ɖeyi ɖeyi pɩwɛɛ se Krɩstʋ mba isuu kɔyɔ, pʋtɔma sɔnɔ paɣtʋ ndʋ tɩtaatasɩ wɛnʋʋ wazaɣ. Pʋyɔɔ ɖɔɖɔ Bibl ɛɛɖʋʋ paɣtʋ natʋyʋ se kɩwɩlɩ Krɩstʋ tʋ tʋmɩyɛ nɖɩ pɩwɛɛ se ɛla, ɛzɩma ɛcɔnɩ e-tomnaɣ taa alaafɩya yɔɔ, nɛ aleɣya wena pɩwɛɛ se ɛlɩzɩ yɔ. Ye mbʋ, Yehowa ha hɔŋ ñʋndɩnaa nɛ paa anɩ waɖɛ se ɛ-maɣmaɣ ɛkpaɣ lɩmaɣza hɔɔlɩŋ ɛnɩ ɩ-taa.

³ Ye mbʋ, alɩwaatʋ ndʋ ɖɩcaɣ lɩmaɣzɩyɛ sɔsɔɖɛ naɖɩyɛ kpaɣʋ nɛ ɖitukuuni ɖe-wezuu caɣʋ ɛlɛ Bibl tɩɖʋ paɣtʋ natʋyʋ yɔ, ɖɩpɩzɩɣ ɖɩpɔzɩ ɖa-tɩ se: ‘Yehowa taa kaɣ labʋ leleŋ nɛ ma-lɩmaɣzɩyɛ nɖɩ?’ Paa pɩtɩɩkɛ lɩmaɣzɩyɛ nɖɩ mankpaɣ nɛ ɖɩɩkaɖɩɣnɩ Bibl paɣtʋ yɔ, pɩkaɣ-ɩ kɛdɩnʋʋ na? Ɛbɛ pɩzɩɣ pɩsɩnɩ-m nɛ mana se ɛ-taa kaɣ labʋ leleŋ nɛ lɩmaɣzɩyɛ nɖɩ mankpakɩɣ yɔ?

4, 5. Ɛzɩma tɩyɛ lɩmaɣza wena ɖɩkpakɩɣ yɔ, apɩzɩɣ nɛ atukuuni ɖa-maɣmaɣ nɛ atɛ atukuni ɛyaa lalaa?

⁴ Nabɛyɛ pɩzɩɣ nɛ pamaɣzɩ se paa pɩtɩɩkɛ lɩmaɣzɩyɛ nɖɩ pakpaɣ kɔyɔ, pɩtɩwɛɛkɩ nabʋyʋ. Ɛlɛ, pɩsa nɛ ɖɩkpaɣ lɩmaɣza kɩbana wena akɛdɩnɩ Yehowa yɔ lɛ, pɩwɛɛ se ɖɩtazɩ Bibl paɣtʋ nɛ paɣtʋ kila taa nɛ ɖɩkpaɣ-yɛ nɛ ɖɩlabɩnɩ tʋmɩyɛ. Ye ɖɩñɩnɩɣ se ɖɔ-tɔm ɛkɛdɩnɩ Ɛsɔ yɔ, pɩwɛɛ se ɖɩkpaɣ paɣtʋ ndʋ ɛɖʋ calɩm yɔɔ yɔ nɛ ɖɩlabɩnɩ tʋmɩyɛ. (Kiɖe Tɛɛ Tɔm 9:4; Tʋma Labʋ 15:28, 29) Ðɩpɩzɩɣ nɛ ɖɩtɩmnɩ Yehowa se ɛsɩnɩ-ɖʋ nɛ ɖɩkpaɣ lɩmaɣza wena akɛdɩɣnɩ-ɩ yɔ.

⁵ Lɩmaɣza sɔsɔna wena ɖɩkpakɩɣ yɔ, apɩzɩɣ nɛ awɛɛnɩ ɖoŋ ɖɔ-yɔɔ. Ye ɖɩkpaɣ lɩmaɣzɩyɛ kɩbanɖɛ yɔ, pɩkaɣ cɛyɩsʋʋ ɖa nɛ Yehowa ɖa-taabalɩyɛ. Ɛlɛ ye ɖɩkpaɣ lɩmaɣzɩyɛ kɩdɛkɛdɩyɛ yɔ, pɩpɩzɩɣ nɛ pɩwɛɛkɩ taabalɩyɛ nɖɩ. Pɩtasɩ lɛ, ye ɖɩkpaɣ lɩmaɣzɩyɛ kɩdɛkɛdɩyɛ kɔyɔ, pɩpɩzɩɣ nɛ pɩkɔnɩ lalaa kaɖɛ fezuu taa, yaa halɩ pɩcamɩ-wɛ, yaa pɩpɩzɩɣ nɛ pɩwɛɛkɩ nɔɔ kʋɖʋmaɣ ŋga kɛwɛ ɛgbɛyɛ taa yɔ. Ye mbʋ, pɩcɛyaa se ɖɩkpaɣ lɩmaɣza kɩbana.—Kalɩ Roma 14:19; Galaatɩ 6:7.

6. Ɛbɛ pɩpɩzɩɣ pɩsɩnɩ-ɖʋ nɛ ɖɩkpaɣ lɩmaɣza kɩbana?

⁶ Ye pɩpɔzʋʋ se ɖɩkpaɣ lɩmaɣzɩyɛ naɖɩyɛ hɔɔlɩŋ weyi ɩ-taa Bibl tɩɖʋ paɣtʋ natʋyʋ kpayɩ yɔ, ɛbɛ pɩwɛɛ se ɖɩla? Pɩwɛɛ se ɖa-maɣmaɣ ɖɩtazɩ tɔm taa camɩyɛ nɛ pɩsɩnɩ-ɖʋ nɛ ɖɩtaakpaɣ lɩmaɣza wena ɖɩmaɣzɩɣ se awɛ ɖeu ɖɛ-ɛzɩdaa yɔ, ɛlɛ ɖɩkpaɣ lɩmaɣza wena akɛdɩɣnɩ Yehowa nɛ ayeki se ɛwazɩ-ɖʋ yɔ.—Kalɩ Keɣa 36:5.

7. Ye Bibl ɛtɩɖʋ paɣtʋ natʋyʋ kpayɩ hɔɔlʋʋ nakʋyʋ taa, ɛbɛ pɩzɩɣ pɩsɩnɩ-ɖʋ nɛ ɖɩtɩlɩ mbʋ Yehowa sɔɔlaa se ɖɩla yɔ?

⁷ Pʋtɔma yɔ, ŋpɔzʋʋ ña-tɩ se: ‘Ye Bibl ɛtɩɖʋ paɣtʋ natʋyʋ kpayɩ hɔɔlʋʋ nakʋyʋ taa, ɛzɩma ɖɩpɩzɩɣ nɛ ɖɩtɩlɩ mbʋ pɩkɛdɩɣnɩ Yehowa yɔ?’ Efɛɛzɩ 5:17 tɔŋ se: “Ɩtɩlɩ [Yehowa] sɔɔlɩ mbʋ yɔ.” Ye mbʋ, ɛbɛ pɩzɩɣ pɩsɩnɩ-ɖʋ nɛ ɖɩtɩlɩ mbʋ Yehowa sɔɔlaa yɔ? Pɩwɛɛ se ɖɩtɩmnɩ-ɩ nɛ ɖitisi nɛ ɛtɩŋnɩ fezuu kiɖeɖeu yɔɔ nɛ eɖiyi-ɖʋ.

8. Ɛbɛ kaasɩnɩ Yesu nɛ ɛtɩlɩ mbʋ Yehowa sɔɔlaa se ɛla yɔ? Ha kɩɖaʋ nakʋyʋ.

⁸ Iyele nɛ ɖɩna mbʋ pɩɩsɩnɩ Yesu nɛ ɛtɩlɩ mbʋ ɛ-Caa sɔɔlaa se ɛla yɔ. Tam nabʋlɛ taa, Yesu calɩnɩ adɩma labʋ nɛ pʋwayɩ lɛ ɛtɩŋnɩ maamaaci lakasɩ yɔɔ nɛ  ɛha ɛyaa sakɩyɛ tɔɔnaɣ. (Maatiyee 14:17-20; 15:34-37) Ɛlɛ alɩwaatʋ ndʋ ñɔɔsɩ wɩɣaɣ Yesu kañɩmbusuu taa nɛ Sataŋ takɩ-ɩ se ɛla nɛ pɛɛ pɩsɩ kpɔnʋnaa lɛ, etitisi nɛ ɛla mbʋ. (Kalɩ Maatiyee 4:2-4.) Yesu kaasɩm ɛ-Caa lɩmaɣza camɩyɛ, piyeba nɛ ɛna se pɩtɩpɔzɩ se ɛla nɛ pɛɛ pɩsɩ kpɔnʋnaa. Ɛɛnawa se ye ɛkpaɣ ɖoŋ weyi Ɛsɔ ha-ɩ yɔ nɛ ɛñɩnɩnɩ ɛ-maɣmaɣ ɛ-kɛzɛɣa yɔ pɩɩkɛdɩɣnɩ-ɩ. Ɛwɩlaa se ɛtaɣ Yehowa liu se ɛkaɣ-ɩ ɖiyuu nɛ ɛha-ɩ tɔɔnaɣ alɩwaatʋ ndʋ pɩpɔzʋʋ yɔ.

9, 10. Ɛbɛ kaɣ-ɖʋ sɩnʋʋ nɛ ɖɩkpaɣ lɩmaɣza kɩbana? Ha kɩɖaʋ nakʋyʋ.

⁹ Ɛzɩ Yesu yɔ, ye ɖɩsɔɔlaa se ɖɩkpaɣ lɩmaɣza kɩbana yɔ, pɩwɛɛ se ɖiyele nɛ Yehowa ɖiyi-ɖʋ. Pɩwɛɛ se ɖɩɖɔ lɔŋ tasʋʋ kɩbam pʋnɛ pɩ-yɔɔ: “Taa [Yehowa] liu nɛ ña-laŋɩyɛ pilim nɛ taataa ña-maɣmaɣ ñɔ-lɔŋ liu. Ña-nʋmɔŋ kpeekpe taa lɛ, maɣzɩ ɛ-yɔɔ, nɛ ɛ-maɣmaɣ ɛkaɣ ña-naataŋ wɩlʋʋ nʋmɔʋ. Taawɛɛ lɔŋ ña-maɣmaɣ ñɛ-ɛzɩdaa; se [Yehowa] sɔɔndʋ nɛ ŋposi ña-tɩ nɛ kɩdɛkɛdɩm.” (Aduwa 3:5-7) Ye ɖɩñakɩ pana se ɖɩtɩŋnɩ Bibl kpɛlɩkʋʋ yɔɔ nɛ ɖɩtɩlɩ Yehowa lɩmaɣza yɔ, pɩpɩzɩɣ pɩsɩnɩ-ɖʋ nɛ ɖɩtɩlɩ mbʋ ɛsɔɔlaa se ɖɩla wɛtʋ natʋyʋ taa yɔ. Ye ɖɩtɩlɩ Ɛsɔ lɩmaɣza nɛ pɩkɩlɩ yɔ, ɖa-laŋɩyɛ kaɣ-ɖʋ seɣtuu se ɖiyele nɛ eɖiyi-ɖʋ.—Keɣa 118:11, 12.

¹⁰ Kpaɣ se halʋ nɔɔyʋ wobi faɣɖɛ naɖɩyɛ taa. Ɛna naataŋgbala naayɛ nɛ alabɩ-ɩ liu se ɛyabɩ-yɛ, ɛlɛ awɛ liidiye siŋŋ. Peeɖe ɛpɔzɩ ɛ-tɩ se: ‘Ye mankpaɣ liidiye sɔsɔɖɛ nɛ mayabɩ-yɛ, suwe ma-walʋ kaɣ maɣzʋʋ?’ Paa ɛ-walʋ ɛfɛyɩ ɛ-cɔlɔ peeɖe yɔ, pɩtʋʋ fɛyɩ se ɛsɩm ndʋ ɛ-walʋ kaɣ maɣzʋʋ yɔ. Ɛbɛ yɔɔ? Mbʋ pʋyɔɔ yɔ ɛ nɛ ɩ pɛwɛʋ ɖama cɔlɔ yɔ pɩlabɩ alɩwaatʋ cabɩ, nɛ pʋyɔɔ lɛ ɛsɩm ɛzɩma ɛ-walʋ ñɩnɩɣ se palabɩnɩ pe-liidiye tʋmɩyɛ yɔ. Mbʋ ɖɔɖɔ alɩwaatʋ ndʋ ɖɩwɛɣ nɛ ɖɩtɩlɩɣ Yehowa lɩmaɣza nɛ ɛ-nʋmɔŋ yɔ, pɩsɩɣnɩ-ɖʋ nɛ ɖɩtɩlɩ mbʋ ɛñɩnɩɣ se ɖɩla wɛtʋ ndɩ ndɩ taa yɔ nɛ pɩkɩlɩ.

11. Alɩwaatʋ ndʋ ɖɩkalɩɣ Bibl yaa ɖɩkpɛlɩkɩɣ-kʋ yɔ, tɔm ndʋ ɖɩpɩzɩɣ nɛ ɖɩpɔzɩ ɖa-tɩ? (Cɔnɩ aɖakaɣ “Alɩwaatʋ ndʋ ŋkalɩɣ Bibl yɔ, pɔzɩ ña-tɩ se.”)

¹¹ Pɩsa nɛ ɖɩtɩlɩ Yehowa lɩmaɣza lɛ, pɩwɛɛ se ɖitaaleɣyini tɩ-yɔɔ kpɛlɩkʋʋ. Alɩwaatʋ ndʋ ɖɩkalɩɣ yaa ɖɩkpɛlɩkɩɣ Bibl yɔ, ɖɩpɩzɩɣ nɛ ɖɩpɔzɩ ɖa-tɩ tɔm tʋnɛ: ‘Ɛbɛ tɔm ndʋ tɩkpɛlɩkɩɣ-m Yehowa yɔɔ? Ɛbɛ tɩkpɛlɩkɩɣ-m ɖɔɖɔ ɛ-nʋmɔŋ siɣsiɣ ñɩŋ nɛ ɛ-lɩmaɣza yɔɔ?’ Pɩwɛɛ se ɖɩwɛɛnɩ lɩmaɣza wena keɣa maɖʋ Daviid kaawɛna yɔ. Ete hendu se: “[Yehowa] wɩlɩ-m ña-nʋmɔŋ; yele mantɩlɩ nʋmɔŋ weyi ŋtɩŋɩɣ yɔ; ña-tʋtʋyɛ ɛwɩlɩnɩ-m nʋmɔʋ, mbʋ yɔ ŋkɛ Ɛsɔ, ma-ñʋʋ yaɖʋ, ña mantaɣ liu avema tɩŋa.” (Keɣa 24:4, 5) Ŋŋmaɣzɩɣ Bibl taa tɔm natʋyʋ yɔɔ lɛ, ŋpɩzɩɣ nɛ ŋpɔzɩ ña-tɩ tɔm tʋnɛ: ‘Ɛzɩma manpɩzɩɣ nɛ mankpaɣ tɔm ndʋ nɛ malabɩnɩ tʋmɩyɛ mɔ-hɔʋ taa? Le manpɩzɩɣ nɛ mankpaɣ-tʋ nɛ malabɩnɩ tʋmɩyɛ? Ðɩɣa na? Tʋmɩyɛ taa? Sukuli taa? Tɔm susuu taa?’ Ye ɖɩna ɖenɖe ɖɩpɩzɩɣ nɛ ɖɩkpaɣ-tʋ nɛ ɖɩlabɩnɩ tʋmɩyɛ yɔ, pɩpɩzɩɣ nɛ pɩwɛɛ-ɖʋ kɛlɛʋ se ɖɩtɩlɩ ɛzɩma ɖɩkpaɣ-tʋ nɛ ɖɩlabɩnɩ tʋmɩyɛ yɔ.

12. Ɛzɩma ɛgbɛyɛ takayɩsɩ nɛ kediɣzisi pɩzɩɣ pɩsɩnɩ-ɖʋ nɛ ɖɩtɩlɩ Yehowa lɩmaɣza camɩyɛ hɔɔlɩŋ ndɩ ndɩ taa?

¹² Nʋmɔʋ lɛɛkʋ ŋgʋ kɩpɩzɩɣ kɩsɩnɩ-ɖʋ nɛ ɖɩtɩlɩ Yehowa lɩmaɣza yɔ lɛ se ɖɩlabɩnɩ tʋmɩyɛ ɛgbɛyɛ takayɩsɩ camɩyɛ. Alɩwaatʋ ndʋ ɖɩñɩnɩɣ se ɖɩkpaɣ lɩmaɣzɩyɛ naɖɩyɛ yɔ, ɛgbɛyɛ lɩzɩ Index  des publications des Témoins de Jéhovah nɛ Guide de recherche pour les Témoins de Jéhovah se pɩsɩnɩ-ɖʋ nɛ ɖɩtɩlɩ Yehowa lɩmaɣza. Pɩtasɩ lɛ, ye ɖiwoki kediɣzisi, ɖiwelisiɣ camɩyɛ nɛ ɖɩmaɣzɩɣ tɔm ndʋ ɖɩnɩɣ yɔ tɩ-yɔɔ kɔyɔ, pɩsɩɣnɩ-ɖʋ nɛ ɖɩtɩlɩ Yehowa lɩmaɣza. Piyeki nɛ ɖɩkpaɣ lɩmaɣza wena akɛdɩɣnɩ Yehowa yɔ nɛ ɛwazɩ-ɖʋ.

13. Tɩŋnɩ kɩɖaʋ nakʋyʋ yɔɔ nɛ ŋwɩlɩ se ye ɖɩtɩlɩ Yehowa lɩmaɣza yɔ, pɩpɩzɩɣ pɩsɩnɩ-ɖʋ nɛ ɖɩkpaɣ lɩmaɣza kɩbana.

¹³ Iyele nɛ ɖɩna kɩɖaʋ nakʋyʋ ŋgʋ kɩwɩlɩɣ se ye ɖɩtɩlɩ Yehowa lɩmaɣza yɔ, pɩpɩzɩɣ pɩsɩnɩ-ɖʋ nɛ ɖɩkpaɣ lɩmaɣza kɩbana yɔ. Pʋtɔma yɔ ŋsɔɔlaa se ŋla paa ɖooye nʋmɔʋ lɩzʋʋ tʋmɩyɛ. Pɩsa nɛ ŋtalɩ kaɖʋwa ŋga lɛ, ŋpaɣzɩ labʋ lɛɣzɩtʋ se ñe-wezuu caɣʋ ɛwɛɛ kɛlɛʋ. Alɩwaatʋ kʋɖʋmtʋ ndʋ tɩ-taa lɛ, pʋtɔma yɔ sɔɔndʋ wɛɛ nɛ pɩkpaɣ-ŋ se ye ŋyeba nɛ ñe-wezuu caɣʋ wɛɛ kɛlɛʋ kɔyɔ, ŋŋpɩzɩɣ nɛ ŋhiɣ koboyaɣ siŋŋ. Toovenim lɛ, Bibl tɩɖʋ paɣtʋ natʋyʋ se ɛyʋ ɛkɛ nʋmɔʋ lɩzɩyʋ nɛ pʋcɔ ɛpɩzɩ ɛsɛɛ Yehowa siɣsiɣ. Ɛlɛ Yesu ha-ɖʋ lidaʋ se mba palaɣ kɩlaŋ Ɛsɔ Kewiyaɣ yɔɔ yɔ, pakaɣ hiɣu wazasɩ sakɩyɛ. (Kalɩ Luka 18:29, 30.) Pɩtasɩ lɛ, Bibl wɩlɩɣ se ye ‘ɖɩlaɣ sɛtʋ kɩlaʋ’ Ɛsɔ nɛ ɖɩlakɩ mbʋ payɩ ɖɩpɩzɩɣ yɔ se toovenim Ɛsɔ sɛtʋ ɛɖɛɛnɩ ɛzɩdaa kɔyɔ, pɩkɛdɩɣnɩ-ɩ. (Keɣa 49:23; 2 Kɔrɛntɩ 9:7) Ye ɖɩmaɣzɩɣ masɩ nzɩ sɩ-yɔɔ nɛ ɖɩlakɩ adɩma se Yehowa ɛsɩnɩ-ɖʋ yɔ, pɩpɩzɩɣ pɩsɩnɩ-ɖʋ nɛ ɖɩtɩlɩ ɛ-lɩmaɣza. Nɛ pɩkaɣ-ɖʋ sɩnʋʋ nɛ ɖɩkpaɣ lɩmaɣza kɩbana nɛ ɛwazɩ-ɖʋ.

14. Ɛbɛ pɩzɩɣ pɩsɩnɩ-ŋ nɛ ŋna se wondu natʋyʋ suu kɛdɩnɩ Yehowa yaa pɩtɩkɛdɩnɩ-ɩ?

¹⁴ Iyele nɛ ɖɩkpaɣ kɩɖaʋ lɛɛkʋ. Ðɩkpaɣ se wondu natʋyʋ wɛɛ nɛ tɩlakɩ-ŋ liu, ɛlɛ ŋnawa se ye ŋsu-tʋ yɔ, pɩcɛyɩɣ koobiya nabɛyɛ ɛgbɛyɛ taa. Ɛlɛ, pɩtɩla yɔ ŋnawa se Bibl tɩɖʋ paɣtʋ natʋyʋ kpayɩ wondu ndʋ ti-suu yɔɔ. Paa mbʋ yɔ, suwe Yehowa ñamaɣzɩɣ wondu ndʋ ti-suu yɔɔ? Apostoloo Pɔɔlɩ tasɩ lɔŋ ɛnɛ: “Halaa ɩtɔɔlɩ tɔɔla kɩbana; pa-tɩ sandʋʋ ɛmaɣna, pɩtaakɛ ñɔsɩ lʋʋ, sika, ñɩɣlɩm pɛɛ, yaa ñɩɣlɩm wondu pɔ-yɔɔ, ɛlɛ pɩkɛ tʋma kɩbana labʋ, ɛzɩ halaa mba pañaŋ Ɛsɔ nɛ palakɩ ɛ-tʋmɩyɛ siŋŋ yɔ.” (1 Timootee 2:9, 10) Toovenim taa lɛ, pɩwɛɛ se abalaa ɩɖɔ lɔŋ  tasʋʋ mbʋ pɩ-yɔɔ ɖɔɖɔ. Ðiisuu wondu yaa ɖɩɩñɔɔzʋʋ ɖa-tɩ lɛ, ɖɩɩmaɣzɩɣ mbʋ pɩkɛdɩɣnɩ-ɖʋ yɔ pi-ɖeke pɩ-yɔɔ na; ɛlɛ ɖɩmaɣzɩɣ ɖɔɖɔ ɖoŋ weyi pɩpɩzɩɣ nɛ pɩwɛɛnɩ lalaa yɔɔ yɔ ɩ-yɔɔ. Ye ɖɩwɛnɩ sɔɔlɩm nɛ ɖisuu wondu camɩyɛ yɔ, pɩwɩlɩɣ se ɖɩmaɣzɩɣ koobiya yɔɔ nɛ ɖɩtɩsɔɔlɩ se ɖɩla nabʋyʋ nɛ piyiɣdi pa-lɩmaɣza yaa pɩɖʋ-wɛ ɖɩwɩzɩyɛ. (1 Kɔrɛntɩ 10:23, 24; Filiipu 3:17) Ye ɖɩsɩm tɔm ndʋ masɩ yɔɔdʋʋ yɔ, pɩsɩɣnɩ-ɖʋ nɛ ɖɩtɩlɩ ndʋ Yehowa maɣzɩɣ yɔ nɛ ɖɩkpaɣ lɩmaɣza wena akɛdɩɣnɩ-ɩ yɔ.

15, 16. (a) Ye ɖɩwɛɛ nɛ ɖɩmaɣzɩɣ kʋzʋʋ kɩdɛkɛdʋʋ yɔɔ, ɛzɩma pɩlakɩ Yehowa? (b) Alɩwaatʋ ndʋ ɖɩlɩzɩɣ aleɣya naayɛ yɔ, ɛbɛ pɩzɩɣ pɩsɩnɩ-ɖʋ nɛ ɖɩtɩlɩ mbʋ pɩkɛdɩɣnɩ Yehowa yɔ? (c) Pʋcɔ nɛ ɖɩkpaɣ lɩmaɣza sɔsɔna naayɛ lɛ, ɛbɛ pɩwɛɛ se ɖɩla?

¹⁵ Bibl wɩlɩɣ se alɩwaatʋ ndʋ ɛyaa kpakɩɣ nʋmɔʋ kɩdɛkɛdʋʋ nɛ ‘pa-laŋa maɣzɩɣ lɩmaɣza kɩdɛkɛda yeke’ yɔ, pɩɖʋʋ Yehowa ɖɩwɩzɩyɛ. (Kalɩ Kiɖe Tɛɛ Tɔm 6:5, 6.) Pɩwɩlɩɣ kaɣlaa se Yehowa tɩsɔɔlɩ se ɖɩmaɣzɩɣ kʋzʋʋ kɩdɛkɛdʋʋ yɔɔ, mbʋ pʋyɔɔ yɔ pɩpɩzɩɣ piyele nɛ ɖɩmaanɩ Bibl paɣtʋ yɔɔ nɛ ɖɩla kɩdɛkɛdɩm sɔsɔm. Yakubu mawa se: “Lɔŋ weyi ɩlɩnɩ hayo yɔ, ɩcalɩnɩ wɛʋ kele kele nɛ pʋwayɩ lɛ, ɩkɛ laŋhɛzɩyɛ, kpeɣu, tɔbʋʋ nɩʋ; ɩ-taa nɛ pʋtɔdɩyɛ naʋ ɖo, nɛ camɩyɛ lakasɩ lɩɣnɩ ɩ-taa, pɩtɩkɛ ɛsɩmɩyɛ, ɛsɩmɩyɛ lakasɩ fɛyɩ, pɩ-tɛɛ nɛ pɩ-yɔɔ lakasɩ fɛyɩ.” (Yakubu 3:17) Ye mbʋ, pɩwɛɛ se ɖikizi aleɣya wena aseɣtiɣ-ɖʋ se ɖɩwɛɛnɩ lɩmaɣza kɩdɛkɛda yɔ. Krɩstʋ ñɩma mba papɩ fezuu taa yɔ, paakalɩɣ takayɩsɩ, paacɔŋnɩ filimwaa nɛ paalakɩ aleɣya wena Yehowa tɩsɔɔlɩ yɔ. Bibl sɩnɩ-wɛ nɛ patɩlɩ Yehowa lɩmaɣza lakasɩ nzɩ sɩ-yɔɔ kpayɩ kpayɩ.

¹⁶ Hɔɔlɩŋ sakɩyɛ taa lɛ, ɛyʋ pɩzɩɣ nɛ ɛkpaɣ lɩmaɣza ndɩ ndɩ, ɛlɛ a-tɩŋa akɛdɩɣnɩ Yehowa. Nabʋyʋ taa lɛ, pʋcɔ nɛ ɖɩkpaɣ lɩmaɣza sɔsɔna naayɛ lɛ, pɩwɛɣ ɖeu se ɖɩyɔɔdɩnɩ ɛgbɛyɛ taa ɛzʋtʋyaa yaa Krɩstʋ ñɩma mba papɩ fezuu taa yɔ nɛ patasɩ-ɖʋ lɔŋ. (Tiiti 2:3-5; Yakubu 5:13-15) Ɛlɛ pɩtɩmʋna se ɖɩpɔzɩ lalaa se pakpaɣ lɩmaɣza ɖo-lone taa. Pɩwɛɛ se Krɩstʋ mba ɩfalɩsɩ pa-tɩ nɛ patɩlɩ kɩbam nɛ kɩdɛkɛdɩm. (Ebree 5:14) Pɩwɛɛ ɖɔɖɔ se Krɩstʋ mba tɩŋa ɩɖɔ Pɔɔlɩ tɔm tʋnɛ tɩ-yɔɔ: “Paa weyi lɛ, ɛsɩɣlɩ ɛ-sʋʋtʋ ɛ-maɣmaɣ.”—Galaatɩ 6:5.

17. Ye ɖɩkpaɣ lɩmaɣza wena alakɩ nɔɔ kʋyʋmaɣ nɛ Yehowa ñɩna yɔ, wazasɩ nzɩ ɖihikiɣ?

¹⁷ Ye ɖɩkpakɩɣ lɩmaɣza wena alakɩ nɔɔ kʋyʋmaɣ nɛ Yehowa ñɩna yɔ, piyeki nɛ ɖɩñɔtɩnɩ-ɩ nɛ pɩkɩlɩ. (Yakubu 4:8) Ðɔ-tɔm kɛdɩɣnɩ-ɩ nɛ ɛwazɩ-ɖʋ. Piyeki ɖɔɖɔ nɛ ɖe-tisuu kpa ɖoŋ. Ye mbʋ, ɖiyele nɛ Bibl paɣtʋ nɛ kɩ-paɣtʋ kila ɖiyi-ɖʋ, mbʋ pʋyɔɔ yɔ piyeki se ɖɩtɩlɩ Ɛsɔ lɩmaɣza hɔɔlɩŋ ndɩ ndɩ taa. Toovenim taa lɛ, ɖɩɩpɩzɩɣ nɛ ɖɩkpɛlɩkɩ Yehowa yɔɔ tɔm nɛ pɩtɛ. (Yɔb 26:14) Ɛlɛ, ye ɖɩñaɣ pana nɛ ɖɩkpɛlɩkɩ nɛ ɖɩtɩlɩ Yehowa yɔ, ɖɩpɩzɩɣ nɛ ɖɩwɛɛnɩ lɔŋsɩnɖɛ, sɩmtʋ nɛ lɛɣtʋ ndʋ tɩsɩɣnɩ-ɖʋ se ɖɩkpaɣ lɩmaɣza kɩbana yɔ. (Aduwa 2:1-5) Ɛyaa ɖʋtʋ nɛ pa-lɩmaɣza kɔŋ nɛ pɩɖɛɣ, ɛlɛ keɣa maɖʋ tɔzɩ-ɖʋ toovenim tɔm tʋnɛ: “Mbʋ [Yehowa] ɖʋʋ yɔ, pɩwɛɣ tam; nɛ ɛ-laŋɩyɛ taa lɩmaɣza wɛɣ waasɩ nɛ waasɩ.” (Keɣa 32:11) Pɩnaɣ kpayɩ kpayɩ se ye ɖa-lɩmaɣza nɛ ɖa-lakasɩ ɩlakɩ nɔɔ kʋyʋmaɣ nɛ Yehowa ñɩna yɔ, pɩsɩɣnɩ-ɖʋ nɛ ɖɩkpaɣ lɩmaɣza kɩbana.