1-2. (a) Anɩ Eniisi kɛnaa, nɛ kaɖɛ nɖɩ ɛɛkataa alɩwaatʋ ndʋ ɛwɩlaɣ ɛ-pɩyalʋ Yehowa nɛ Yesu pɔ-yɔɔ tɔm yɔ? (b) Kɛdɩ takayaɣ huyuu yɔɔ kɩlɛmʋʋ tɔm.

 PAA Bibl ɛtɩyɔɔdɩ Timootee lɩm mɩyɩsʋʋ tɔm yɔ, ɖɩpɩzɩɣ ɖɩmaɣzɩ nɛ ɖɩna ɛzɩma e-ɖoo Eniisi taa kaalabɩ leleŋ kɩyakʋ ŋgʋ pamɩyɩsɩ Timootee lɩm yɔ. (Adu. 23:25) Maɣzɩ nɛ ŋna ɛzɩma pɩɩlabɩ-ɩ kpem alɩwaatʋ ndʋ ɛna Timootee ɛsɩŋ lɩm taa yɔ. Ɛwɛɛ nɛ ɛmʋʋyʋʋ, nɛ Timootee neze Loyiisi sɩŋ ɛ-cɔlɔ kpam nɛ ɛɖɔkɩ-ɩ. Eniisi fezi hɛɛɛ nɛ eli e-feziŋ alɩwaatʋ ndʋ Timootee tibi lɩm tɛɛ yɔ. Ɛlɩnɩ lɩm tɛɛ nɛ amʋʋya nɛ lɩm kaawɛɛ nɛ pikpeŋ ɛ-yɔɔ cɔɔɔ; Eniisi taapɩzɩɣ se ɛɖɔkɩ ɛ-tɩ nɛ eetisiɣ ɛsɩtɛɣlɩm. Paa pɩɩwɛ kaɖɛ yɔ, Eniisi pɩzaa nɛ ɛwɩlɩ ɛ-pɩyalʋ tɔm nɛ ɛlɛ sɔɔlɩ Yehowa nɛ Yesu Krɩstʋ. Kala wena ɛpɩzaa nɛ ɛlʋbɩna alɩwaatʋ ndʋ ɛñakaɣ pana se ɛwɩlɩ ɛ-pɩyalʋ tɔm yɔ?

² Timootee lʋlɩyaa taawɛɛ Ɛsɔ sɛtʋ ɛgbɛyɛ kʋɖʋmɖɩyɛ taa. Ɛ-caa kaakɛ Grɛɛkɩ tʋ, nɛ e-ɖoo nɛ e-neze paakɛ Yuuda mba. (Tʋma 16:1) Pɩtʋʋ fɛyɩ se Timootee kaakɛ pɩɣa evelaɣ alɩwaatʋ ndʋ Eniisi nɛ Loyisi papɩsɩ Krɩstʋ mba yɔ. Ɛlɛ, ɛ-caa taapɩsɩ Krɩstʋ tʋ. Timootee kaɣ lɩzʋʋ se ɛwɛɣ Ɛsɔ sɛtʋ ndʋ taa? Pɩtʋʋ fɛyɩ se ɛɛtalaa se ɛ-maɣmaɣ ɛkpaɣ ɛ-lɩmaɣza. Ɛkaɣ lɩzʋʋ se ɛwɛɣ ɛ-caa Ɛsɔ sɛtʋ taa? Ɛkaɣ lɩzʋʋ se ɛɖɔŋ Yuuda mba sɔnzɩ nzɩ pawɩlɩ-ɩ ɖooo ɛ-pɩjatʋ taa yɔ sɩ-yɔɔ? Yaa ɛkaɣ lɩzʋʋ se ɛpɩsɩɣ Yesu Krɩstʋ tɔmkpɛlɩkɩyʋ?

3. Ɛzɩ Aduwa 1:8, 9 yɔɔdʋʋ yɔ, lɩmaɣza wena Yehowa wɛnɩ tʋmɩyɛ nɖɩ ɖoonaa lakɩ se pasɩnɩ pe-piya nɛ sɩpɩsɩ ɛ-taabalaa yɔ ɖɩ-yɔɔ?

³ Mbʋ ɖɔɖɔ sɔnɔ, ɖoonaa Krɩstʋ ñɩma sɔɔlɩ pɔ-hɔŋ.  Pɔsɔɔlaa se pasɩnɩ pe-piya nɛ taabalɩyɛ kɩbanɖɛ wɛɛ sɩ nɛ Yehowa pɛ-hɛkʋ taa nɛ pɩkɩlɩ pɩtɩŋa. Nɛ pa-pana ñaɣʋ mʋ ñɩm siŋŋ ɖɛ-Ɛsɔ ɛsɩndaa. (Kalɩ Aduwa 1:8, 9.) Yehowa sɩnɩ ɖoonaa sakɩyɛ nɛ pasɩnɩ pe-piya nɛ sɩsɔɔlɩ-ɩ nɛ sɩsɛɣ-ɩ.

4. Kala wena ɖoonaa katɩɣ sɔnɔ?

⁴ Ðoyo nɔɔyʋ pɩzɩɣ nɛ ɛpɔzɩ ɛ-tɩ nabʋyʋ taa se ɛzɩ e-piya kaɣ lɩzʋʋ se sɩsɛɣ Yehowa ɛzɩ Timootee labʋ yɔ? Nɛ pɩmʋnɩ mbʋ. Lʋlɩyaa sɩm kala wena pe-piya katɩɣ Sataŋ ɛjaɖɛ ɖɩnɛ ɖɩ-taa yɔ. (1 Pɩy. 5:8) Pɩtasɩ lɛ, ɖoonaa sakɩyɛ cɔŋnɩ pe-piya yɔɔ pe-ɖeke yaa pa nɛ pa-walaa pɔcɔŋnɩnɩ sɩ-yɔɔ, ɛlɛ pa-walaa mba paasɛɣ Yehowa, nɛ pɩkɛnɩ-wɛ kaɖɛ wɛtʋ. Payaɣ Koobu halɩñɩnʋ nɔɔyʋ se Christine. * Ɛyɔɔdaa se: “Ma-walʋ kɛ caja kɩbanʋ nɛ hɔʋ ñʋʋdʋ kɩbanʋ, ɛlɛ ɛtɩsɔɔlɩ se manfalɩsɩ ɖe-piya nɛ sɩpɩsɩ Yehowa Aseɣɖe Tɩnaa. Mewi kpem pɩnzɩ sakɩyɛ, nɛ mɔnpɔzaɣ man-tɩ se wiɖiyi men-piya kaɣ pɩzʋʋ nɛ sɩsɛɛ Yehowa?”

5. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

⁵ Ye ŋkɛ ɖoyo Krɩstʋ tʋ yɔ, ɛzɩ Eniisi labʋ yɔ, ŋpɩzɩɣ nɛ ŋsɩnɩ ñe-piya nɛ sɩsɔɔlɩ Yehowa nɛ sɩsɛɛ-ɩ. Tɔm ñʋʋ kʋnɛ kɩ-taa, ɖɩkaɣ naʋ ɛzɩma ŋpɩzɩɣ nɛ ŋmaɣzɩnɩ Eniisi kɩɖaʋ nɛ ŋtɩŋnɩ ñɔ-yɔɔdaɣ nɛ ña-lakasɩ yɔɔ nɛ ŋwɩlɩ ñe-piya tɔm yɔ. Ðɩkaɣ naʋ ɖɔɖɔ ɛzɩma Yehowa kaɣ-ŋ sɩnʋʋ yɔ.

6. Ɛzɩ pɔyɔɔdʋʋ 2 Timootee 3:14, 15 taa yɔ, ɛzɩma pɩlaba nɛ Timootee pɩsɩ Krɩstʋ tʋ?

⁶ Alɩwaatʋ ndʋ Timootee kaakɛ pɩɣa ɛjam yɔ, e-ɖoo Eniisi kaalabɩ e-ɖoŋ ɖeɖe nɛ ɛwɩlɩ-ɩ “takayɩsɩ kiɖeɖesi” taa tɔm ɛzɩ Yuuda mba kaanɩʋ tɩ-taa yɔ. Pɩkɛ toovenim se Eniisi taatɩlɩ tɔm tɩŋa mbʋ pʋyɔɔ yɔ, ɛtaatɩlɩ se Yesu Krɩstʋ kɛnɩ Mesiya. Paa mbʋ yɔ, mbʋ Timootee kaakpɛlɩkɩ Masɩ taa yɔ, pɩpɩzaɣ se pɩsɩnɩ-ɩ nɛ ɛpɩsɩ Krɩstʋ tʋ. Ɛlɛ, ɛkaɣ pɩsʋʋ Krɩstʋ tʋ na? Timootee kaawɛnɩ waɖɛ se ɛlɩzɩ se ɛpɩsɩɣ Krɩstʋ tʋ yaa ɛɛpɩsɩɣ. Pɩtʋʋ fɛyɩ se hɔɔlʋʋ nakʋyʋ taa lɛ, Timootee ɖoo pana ñaɣʋ seɣtini-i se ‘etisi’ Yesu yɔɔ toovenim tɔm yɔɔ. (Kalɩ 2 Timootee 3:14, 15.) Eniisi taa kaawɛ leleŋ siŋŋ se paa pɩɩwɛ kaɖɛ yɔ, ɛpɩzaa nɛ ɛwɩlɩ ɛ-pɩyalʋ Yehowa nɛ Yesu pɔ-yɔɔ tɔm. Toovenim taa lɛ, Eniisi caɣ wezuu nɛ pɩla nɔɔ kʋɖʋmaɣ nɛ ɛ-hɩɖɛ, ɖɩ-tɔbʋʋ lɛ se “waɖʋ.”

7. Ɛzɩma Eniisi pɩzaɣ se ɛsɩnɩ ɛ-pɩyalʋ nɛ ɛɖɛɛnɩ ɛsɩndaa ɛ-lɩm mɩyɩsʋʋ wayɩ?

⁷ Alɩwaatʋ ndʋ pamɩyɩsɩ Timootee lɩm yɔ, ɛtalɩ e-wezuu caɣʋ taa kaɖʋwa sɔsɔɔ nakɛyɛ, ɛlɛ Eniisi sɔɔndʋ taasɩɩ tɩnaɣ. Ɛzɩma ɛ-pɩyalʋ kaɣ labɩnʋʋ tʋmɩyɛ e-wezuu caɣʋ alɩwaatʋ ndʋ tɩkazaa yɔ? Ɛkaɣ ɖʋʋ taabalɩyɛ kɩdɛkɛdɩyɛ na? Ɛkaɣ wobu sukuli Atɛɛnɩ nɛ ɛpaɣzɩ tisuu lɔŋsɩnɖaa mba pɛwɛ peeɖe nɛ pɛkɛ sɩɩnaa layaa yɔ pa-wɩlɩtʋ yɔɔ? Ɛkaɣ wɛɛkʋʋ ɛ-alɩwaatʋ, e-ɖoŋ nɛ e-evebitu se ɛla tʋmɩyɛ siŋŋ se ɛpɩsɩ ñɩm tʋ na? Eniisi taapɩzɩɣ se ɛkpaɣ lɩmaɣzɩyɛ Timootee lone taa, ɛlɛ ɛpɩzaɣ se ɛsɩnɩ-ɩ nɛ ɛkpaɣ lɩmaɣza kɩbana. Ɛzɩma tɩyɛ? Ɛpɩzaɣ se ewolo pɩ-yɔɔ nɛ ɛñaɣ pana siŋŋ nɛ ɛwɩlɩ ɛ-pɩyalʋ se ɛsɔɔlɩ Yehowa siŋŋ nɛ ɛwɛɛnɩ ɛsɩmɩyɛ siŋŋ mbʋ Yehowa nɛ Yesu palabɩ pɔ-hɔʋ yɔ pɩ-yɔɔ. Pɩtɩkɛ hɔŋ weyi ɩ-taa mba fɛyɩ Ɛsɔ sɛtʋ ɛgbɛyɛ kʋɖʋmɖɩyɛ taa yɔ, i-ɖeke ɩkatɩɣnɩ kala. Halɩ paa lʋlɩyaa mba pa-naalɛ pɛwɛ toovenim taa yɔ, pɩpɩzɩɣ nɛ pɩwɛɛ-wɛ kaɖɛ se papɩzɩ nɛ pasɩnɩ pe-piya nɛ sɩpɩsɩ Yehowa sɛyaa mba pɛwɛ siɣsiɣ yɔ. Ɛbɛ lʋlɩyaa pɩzɩɣ nɛ pɛkpɛlɩkɩ Eniisi kɩɖaʋ taa?

8. Ðoyo weyi ɛ-walʋ wɛ toovenim taa yɔ, ɛzɩma ɛpɩzɩɣ nɛ ɛsɩnɩ ɛ-walʋ nɛ pɔcɔnɩ pe-piya fezuu taa kɩcɛyɩm ɖeɖe?

 ⁸ Kpɛlɩkɩnɩ ñe-piya Bibl. Koobiya halɩñɩma, ye mɩ-walaa ɩwɛ toovenim taa yɔ, Yehowa sɔɔlaa se ɩsɩnɩ-wɛ nɛ mɩ-naalɛ ɩcɔnɩ mi-piya fezuu taa kɩcɛyɩm ɖeɖe. Nʋmɔŋ weyi ɩ-yɔɔ ɩpɩzɩɣ ɩtɩŋna nɛ ɩla mbʋ yɔ ɩ-taa nakʋyʋ lɛ se ɩɖʋʋ nesi hɔʋ taa Ɛsɔ sɛtʋ ɖʋtʋ ndʋ ɩlaba yɔ tam. Yɔɔdʋʋ tɔm kɩbandʋ hɔʋ taa Ɛsɔ sɛtʋ yɔɔ nɛ ŋmaɣzɩ mbʋ ŋpɩzɩɣ ŋla nɛ hɔʋ taa Ɛsɔ sɛtʋ ndʋ tɩkɛdɩnɩ paa anɩ nɛ ehiɣ taa leleŋ yɔ pɩ-yɔɔ. Pɩtɩla, ŋpɩzɩɣ nɛ ŋsɩnɩ ña-walʋ nɛ ɩla ŋgee Bibl kpɛlɩkʋʋ ɖʋtʋ natʋyʋ. Pɩtasɩ lɛ, ye mi-piya nasɩyɩ ɩtalaa se pɛkpɛlɩkɩnɩ-sɩ Nɩɩ wezuu leleŋ tam! takayaɣ yɔ, pɩtɩla ŋpɩzɩɣ nɛ ŋsɩnɩ ña-walʋ nɛ ɩkpɛlɩkɩnɩ-sɩ.

9. Le ɖoyo weyi ɛ-walʋ tɩkɛ Yehowa Aseɣɖe Tʋ yɔ ɛpɩzɩɣ nɛ ehiɣ sɩnʋʋ?

⁹ Pɩpɔzʋʋ se ɖoonaa nabɛyɛ ɩkpɛlɩkɩnɩ pe-piya Bibl mbʋ pʋyɔɔ yɔ, pe-ɖeke pɔcɔŋnɩnɩ pe-piya yɔɔ yaa pa-walʋ tɩkɛ Yehowa Aseɣɖe Tʋ. Ye pɩwɛ mbʋ ñɔ-hɔʋ taa yɔ, taakɩlɩ nɩɣzʋʋ. Yehowa kaɣ-ŋ sɩnʋʋ. Labɩnɩ tʋmɩyɛ tɔm wɩlʋʋ wondu kɩbandʋ ndʋ ɛgbɛyɛ lɩzaa yɔ nɛ ŋkpɛlɩkɩnɩ ñe-piya. Ŋpɩzɩɣ nɛ ŋpɔzɩ lʋlɩyaa mba pɛwɛ niye yɔ lɔŋ tasʋʋ nɛ ŋna ɛzɩma palakɩnɩ tʋmɩyɛ wondu ndʋ pɛ-tɛ hɔʋ taa Ɛsɔ sɛtʋ taa yɔ. * (Adu. 11:14) Yehowa pɩzɩɣ ɛsɩnɩ-ŋ ɖɔɖɔ nɛ ña nɛ ñe-piya ɩyɔɔdʋʋnɩ ɖama camɩyɛ. Pɔzɩ-ɩ se ɛsɩnɩ-ŋ nɛ ŋna mbʋ pɩwɛ sɩ-lɩmaɣza taa nɛ sɩ-laŋa taa yɔ. (Adu. 20:5) Ŋpɩzɩɣ nɛ ŋpɔzɩ-sɩ kɛlɛʋ yem se: ‘Kaɖɛ nɖɩ ɩkɩlɩɣ katʋʋ sukuli taa?’ Pɩpɩzɩɣ piyele nɛ ña nɛ sɩ ɩpaɣzɩ labʋ kɛdaɣ kɩbaŋa.

10. Nʋmɔʋ lɛɛkʋ ŋgʋ yɔɔ ŋpɩzɩɣ ŋtɩŋna nɛ ŋsɩnɩ ñe-piya nɛ sɩkpɛlɩkɩ Yehowa tɔm?

¹⁰ Ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋwɩlɩ ñe-piya Yehowa tɔm yɔ. Kɛdɩ-sɩ Yehowa nɛ kɩbam sakɩyɛ mbʋ ɛlabɩ-ŋ yɔ pɩ-tɔm. (Wp. 6:6, 7; Iza. 63:7) Pɩcɛyɩ siŋŋ se ŋla mbʋ, kɔzɩ kɔzɩ ye ŋŋpɩzɩɣ nɛ ŋkpɛlɩkɩɣnɩ ñe-piya ɖoŋ ɖoŋ ɖɩɣa yɔ. Christine weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: “Maahikiɣ wala sakɩyɛ se mɛnkɛdɩ men-piya Yehowa tɔm; pʋyɔɔ lɛ ye mehiɣ waɖɛ naɖɩyɛ yɔ, malakɩnɩ-ɖɩ tʋmɩyɛ camɩyɛ. Ðɩlɩɣ nɛ ɖɩyɛlɩɣ yaa ɖɩkpaɣ kpɩyʋʋ taa nɛ ɖɩsaɣ-kʋ nɛ ɖɩɖɔŋ teŋgu nɔɔ kpɛɛɛ nɛ mɛnkɛdɩɣ-sɩ Yehowa wondu kɩlɩzɩtʋ kɩbandʋ nɛ fezuu taa wondu sakɩyɛ tɔm. Alɩwaatʋ ndʋ men-piya paɣlɩ pazɩ yɔ, menseɣti-sɩ se sɩkpɛlɩkɩ Bibl sɩ-tɩ yɔɔ.” Pɩtasɩ lɛ, yɔɔdʋʋ tɔm kɩbandʋ Yehowa ɛgbɛyɛ nɛ koobiya yɔɔ. Taayɔɔdʋʋ tɔm kɩdɛkɛdɩtʋ ɛgbɛyɛ taa ɛzʋtʋyaa yɔɔ. Tɔm ndʋ ŋyɔɔdʋʋ pɔ-yɔɔ yɔ, pɩpɩzɩɣ nɛ pɩsɩnɩ ñe-piya nɛ sɩyɔɔdɩnɩ-wɛ alɩwaatʋ ndʋ pɩpɔzʋʋ se pasɩnɩ-sɩ yɔ.

11. Ɛzɩ Yakubu 3:18 yɔɔdʋʋ yɔ, ɛbɛ yɔɔ pɩcɛyaa se ɖiyele nɛ laŋhɛzɩyɛ wɛɛ ɖɩɣa taa?

¹¹ Yele nɛ laŋhɛzɩyɛ wɛɛ ɖɩɣa. Wɩlɩɣ ña-walʋ nɛ ñe-piya sɔɔlɩm ɖoŋ ɖoŋ. Yɔɔdʋʋnɩ ña-walʋ nɛ nɔɔ kɩbaŋa nɛ ñamtʋ, nɛ ŋsɩnɩ ñe-piya nɛ sɩla mbʋ ɖɔɖɔ. Ye ŋlakɩ mbʋ yɔ, ŋyeki se laŋhɛzɩyɛ ɛwɛɛ, nɛ pɩpɩzɩɣ nɛ pɩwɛɛ ñe-piya kɛlɛʋ se sɩkpɛlɩkɩ Yehowa yɔɔ tɔm. (Kalɩ Yakubu 3:18.) Iyele nɛ ɖɩna Jozsef kɩɖaʋ, ɛkɛ nʋmɔʋ lɩzɩyʋ kiya Rumaanii ɛjaɖɛ taa. Alɩwaatʋ ndʋ ɛɛwɛɛ nɛ ɛpaɣlɩɣ yɔ, ɛ-caa kaayeba nɛ pɩwɛɛ ɛ nɛ e-ɖoo, ɛ-kɔɔ nɛ e-newaa kaɖɛ se pɛsɛɛ Yehowa. Jozsef yɔɔdaa se: “Mon-ɖoo kaañaɣ pana siŋŋ se laŋhɛzɩyɛ ɛwɛɛ ɖɩɣa taa. Man-caa kaawɛɛ nɛ ɛkpaɣ ñaŋ nɛ pɩkɩlɩɣ lɛ, mon-ɖoo wɛɛ nɛ ɛlakɩ camɩyɛ  lakasɩ nɛ pɩkɩlɩɣ. Alɩwaatʋ ndʋ ɛnaɣ se pɩwɛ-ɖʋ kaɖɛ se ɖɩña ɖa-caa lɛ, ɛkalɩɣ-ɖʋ Efɛɛzɩ mba 6:1-3 nɛ ɖa nɛ ɩ ɖɩtazɩɣ pɩ-taa. Pʋwayɩ lɛ, eheyiɣ-ɖʋ ɖa-caa wɛtʋ kɩbandʋ tɔm nɛ ɛsɩɣnɩ-ɖʋ se ɖɩna mbʋ pʋyɔɔ pɩwɛɛ se ɖɩsɔɔlɩ-ɩ yɔ. Piiyeba nɛ laŋhɛzɩyɛ wɛɛ ɖɔ-hɔʋ taa.”

12. Ɛzɩ 2 Timootee 1:5 yɔɔdʋʋ yɔ, ɖoŋ weyi Eniisi kɩɖaʋ kaawɛnɩ Timootee yɔɔ?

¹² Kalɩ 2 Timootee 1:5. Eniisi ha Timootee kɩɖaʋ kɩbaŋʋ. Pɩtʋʋ fɛyɩ se ɛwɩlɩ-ɩ se alɩwaatʋ ndʋ ɖɩwɛɣnɩ tisuu siŋŋ yɔ, ɖɩtɩŋɩɣnɩ ɖa-lakasɩ yɔɔ nɛ ɖɩwɩlɩɣ-pʋ. (Yak. 2:26) Pɩtʋʋ fɛyɩ se Timootee kaanawa se sɔɔlɩm sɔsɔm mbʋ e-ɖoo kaawɛnɩ Yehowa yɔɔ yɔ, mbʋ seɣtaɣni-i ɛ-lakasɩ taa. Pɩtʋʋ fɛyɩ se Timootee kaanawa se Yehowa sɛtʋ kaayebina nɛ e-ɖoo taa wɛɛ leleŋ. Ðoŋ weyi Eniisi tisuu wɛnɩ Timootee yɔɔ? Ɛzɩ Pɔɔlɩ yɔɔdʋʋ yɔ, Timootee kaawɛnɩ tisuu sɔsɔm mbʋ e-ɖoo kaawɛna yɔ. Timootee tɩcaɣ yem nɛ ɛwɛɛnɩ tisuu sɔsɔm. Timootee kaana e-ɖoo kɩɖaʋ nɛ ɛkpaɣ lɩmaɣzɩyɛ se ɛmaɣzɩɣnɩ-ɩ. Mbʋ ɖɔɖɔ sɔnɔ, ɖoonaa sakɩyɛ tɩŋnɩ pa-kɩɖaŋ yɔɔ nɛ pasɩnɩ pɔ-hɔʋ taa mba sakɩyɛ nɛ pɛsɛɛ Yehowa, patɩtɩŋnɩ “yɔɔdaɣ” yɔɔ. (1 Pɩy. 3:1, 2) Ña ɖɔɖɔ ŋpɩzɩɣ nɛ ŋla mbʋ. Ɛzɩma tɩyɛ?

13. Ɛbɛ yɔɔ pɩpɔzʋʋ se taabalɩyɛ nɖɩ ɖɩwɛ ɖoyo nɔɔyʋ nɛ Yehowa pɛ-hɛkʋ taa yɔ, ɖɩ-tɔm ɛcɛyɩ ɛ-ɛsɩndaa nɛ pɩkpaɖɩ pɩtɩŋa?

¹³ Yele nɛ ña nɛ Yehowa mɩ-taabalɩyɛ tɔm cɛyɩ ñɛ-ɛsɩndaa nɛ pɩkɩlɩ pɩtɩŋa. (Wp. 6:5, 6) Ɛzɩ ɖoonaa sakɩyɛ yɔ, ŋlaɣ kɩlaŋ sakɩyɛ. Ŋpɛŋ ña-tɩ alɩwaatʋ, liidiye, ɖom nɛ wondu lɛɛtʋ sakɩyɛ se pɩsa nɛ ŋpɩzɩ nɛ ŋcɔnɩ ñe-piya tomnaɣ yɔɔ kɩcɛyɩm ɖeɖe. Ɛlɛ pɩtɩpɔzɩ kpa se kɩcɛyɩm mbʋ pi-ɖeɖe cɔnʋʋ eyele nɛ pɩkɩlɩ-ŋ ɖɔkɩnʋʋ nɛ ŋŋtasɩɣ wɛnʋʋ alɩwaatʋ se ŋcɛyɩsɩ ña-nɛ Yehowa mɩ-taabalɩyɛ. Ñɩnɩɣ alɩwaatʋ ɖoŋ ɖoŋ nɛ ŋtɩmɩɣ ñe-ɖeke, ŋkpɛlɩkɩɣ Bibl ña-tɩ yɔɔ, nɛ ŋwoki kediɣzisi. Ye ŋlakɩ mbʋ yɔ, ŋkaɣ kpaʋ ɖoŋ fezuu taa nɛ ŋkaɣ haʋ kɩɖaʋ kɩbaŋʋ ñɔ-hɔʋ taa ñɩma nɛ ɛyaa lalaa.

14-15. Ɛbɛ ŋkpɛlɩkɩ Leanne, Maria, nɛ João pa-kɩɖaŋ taa?

¹⁴ Iyele nɛ ɖɩna piya evelisi nasɩyɩ kɩɖaŋ. Sɩkpɛlɩkɩ ɛzɩma sɩsɔɔlɩ Yehowa nɛ sɩtaa-ɩ liu yɔ si-ɖoonaa cɔlɔ. Christine pɛlɛ Leanne yɔɔdaa se: “Ðɩtaapɩzɩɣ se ɖɩkpɛlɩkɩ Bibl alɩwaatʋ ndʋ ɖa-caa wɛɣ ɖɩɣa yɔ. Ɛlɛ paa ɛzɩmtaa ɖo-ɖoo wokaɣ kediɣzisi. Paa ɖɩtaatɩlɩ tɔm sakɩyɛ Bibl yɔɔ yɔ, ɛ-lakasɩ sɩnɩ-ɖʋ nɛ ɖɩwɛɛnɩ tisuu sɔsɔm. Ðɩɩnawa se Yehowa Aseɣɖe Tɩnaa wɩlɩɣ toovenim pʋcɔ nɛ ɖɩkɔɔ nɛ ɖɩpaɣzɩ kediɣzisi wobu.”

¹⁵ Maria caa nazaɣ ɛ-hɔʋ taa mba nabʋyʋ taa se pʋyɔɔ powoki kediɣzisi. Maria yɔɔdaa se: “Mon-ɖoo kɛ koobiya halɩñɩma mba mansɩma se pakɩlɩ wɛʋ abalɩtʋ yɔ pa-taa lɛlʋ. Alɩwaatʋ ndʋ maakɛ pɩɣa yɔ, nabʋyʋ taa menkizaɣ se maalakɩ nabʋyʋ mbʋ pʋyɔɔ yɔ menseɣ lalaa sɔɔndʋ. Ɛlɛ manaɣaɣ ɛzɩma ɛɛwɛ abalɩtʋ nɛ ɛzɩma ɛsɩɣaɣ Yehowa kajalaɣ ɖeɖe e-wezuu caɣʋ taa paa ɛzɩmtaa yɔ lɛ, pɩsɩnɩ-m nɛ mawa mɔn-sɔɔndʋ.” João caa ɖaŋaɣ ɛ-hɔʋ taa mba se pataakɛdɩɣ Yehowa yaa Bibl tɔm ɖɩɣa. João yɔɔdaa se: “Mbʋ pɩsɩnɩ-m nɛ pɩkɩlɩ yɔ mbʋ lɛ se mon-ɖoo tisaɣ faaa se ekizi pɩtɩŋa payɩ nɛ ɛ-tɔm kɛdɩnɩ ɖa-caa, ɛlɛ etaatisiɣ se ekizi ɛ nɛ Yehowa pa-taabalɩyɛ.”

16. Ðoŋ weyi ɖoyo nɔɔyʋ kɩɖaʋ pɩzɩɣ nɛ kɩwɛɛnɩ ɛyaa lalaa yɔɔ?

¹⁶ Ðoonaa, ɩtɔzɩ se mɩ-kɩɖaʋ wɛnɩ ɖoŋ lalaa yɔɔ. Ɛzɩma tɩyɛ? Iyele nɛ ɖɩna ɖoŋ weyi Eniisi kɩɖaʋ kaawɛnɩ apostoloo Pɔɔlɩ  yɔɔ yɔ. Ɛmawa se Timootee tisuu mbʋ pɩ-taa fɛyɩ pɩ-tɛɛ nɛ pɩ-yɔɔ lakasɩ yɔ, ‘pɩcalɩ wɛʋ Eniisi taa.’ (2 Tim. 1:5) Alɩwaatʋ ndʋ Pɔɔlɩ calɩ naʋ Eniisi tisuu? Pɩtʋʋ fɛyɩ se pɩkɛɣnɩ alɩwaatʋ ndʋ ɛɖɔm Ɛsɔtɔm tiyiyu nʋmɔʋ kajalaɣ ɖeɖe nɛ ewolo Lisɩtrɩ yɔ ɛkatɩ Eniisi nɛ Loyiisi, nɛ pɩtala yɔ alɩwaatʋ ndʋ ɛsɩnɩ-wɛ nɛ papɩsɩ Krɩstʋ ñɩma. (Tʋma 14:4-18) Maɣzɩ pazɩ nɛ ŋna: Alɩwaatʋ ndʋ Pɔɔlɩ ma Timootee takayaɣ pɩnzɩ 15 wayɩ yɔ, ɛɛwɛɛ nɛ ɛtɔzʋʋ Eniisi lakasɩ kɩbanzɩ yɔɔ nɛ ɛkpaɣ-ɩ ɛzɩ kɩɖaʋ ŋgʋ pɩmʋnaa se pamaɣzɩna yɔ! Pɩwɩlɩɣ kpayɩ kpayɩ se Eniisi kɩɖaʋ kaakpazɩ ɖoŋ apostoloo Pɔɔlɩ siŋŋ, nɛ pɩtʋʋ fɛyɩ se kɩɩkpazɩ ɖoŋ ɖɔɖɔ Krɩstʋ ñɩma mba paawɛ alɩwaatʋ ndʋ tɩ-taa yɔ pa-taa sakɩyɛ. Ye ŋwɛɛ nɛ ŋcɔŋnɩ ña-pɩɣa yɔɔ nɛ ñɔ-hɔʋ taa mba tɩŋa ɩfɛyɩ Ɛsɔ sɛtʋ ɛgbɛyɛ kʋɖʋmɖɩyɛ taa yɔ, ña-taa ɛtɛ se ñe-siɣsiɣ wɛtʋ kɩɖaʋ kpazɩɣ ɖoŋ nɛ kiseɣtiɣ mba pɔcɔŋ nɛ pata yɔ.

17. Ye ŋñakɩ pana siŋŋ se ŋfalɩsɩ ña-pɩɣa, ɛlɛ pɩwɛɛ ɛzɩ katɩsɔɔlɩ se kɛsɛɛ Yehowa yɔ, ɛbɛ pɩpɔzʋʋ se ŋla?

¹⁷ Ye ŋñakɩ pana siŋŋ ɛlɛ pɩwɛɛ ɛzɩ ña-pɩɣa eewelisiɣni-ŋ yɔ, ɛbɛ ŋpɩzɩɣ nɛ ŋla? Tɔzɩ se pɩɣa falɩsʋʋ kpakɩɣ alɩwaatʋ. Ɛzɩ kɩlɛmʋʋ wɩlʋʋ yɔ, alɩwaatʋ ndʋ ŋɖuu ɖomaɣ nakɛyɛ yɔ, pɩtɩla ŋpɔzʋʋ ña-tɩ nabʋyʋ taa se ɛzɩ wiɖiyi ɖomaɣ ŋga kakaɣ paɣlʋʋ nɛ kalʋlɩ pee na? Paa ŋfɛyɩnɩ ɖoŋ nɩɩyɩ ɖomaɣ ŋga kɔ-yɔɔ yɔ, ŋwoki pɩ-yɔɔ nɛ ŋmɩzɩɣ-kɛ lɩm se pɩha-kɛ waɖɛ nɛ kowolo pɩ-yɔɔ nɛ kapaɣlɩɣ. (Mark. 4:26-29) Mbʋ ɖɔɖɔ, ɖoyo nɔɔyʋ pɩzɩɣ nɛ ɛpɔzɩ  ɛ-tɩ nabʋyʋ taa se ɛzɩ pana wena ɛwɛɛ nɛ ɛñakɩ yɔ, toovenim taa lɛ asɩɣnɩ ɛ-pɩɣa se kɔsɔɔlɩ Yehowa? Ŋfɛyɩnɩ ɖoŋ lɩmaɣza wena ñe-piya kpakɩɣ yɔ a-yɔɔ; ɛlɛ ye ŋwobi pɩ-yɔɔ nɛ ŋlakɩ mbʋ payɩ ŋpɩzɩɣ yɔ nɛ ŋfalɩsɩɣ-sɩ yɔ, ŋhaɣ-sɩ waɖɛ se sɩpɩsɩ Ɛsɔ taabalaa.—Adu. 22:6.

18. Ɛzɩma Yehowa pɩzɩɣ nɛ ɛsɩnɩ ñe-piya nɛ siwobini ɛsɩndaa fezuu taa?

¹⁸ Kpaɣnɩ ɖooo Bibl alɩwaatʋ taa, Yehowa sɩnɩ piya sakɩyɛ nɛ sɩpɩsɩ ɛ-taabalaa. (Keɣa 21:10, 11) Ɛpɩzɩɣ ɖɔɖɔ nɛ ɛsɩnɩ ñe-piya nɛ siwobini ɛsɩndaa ye sɩsɔɔlaa yɔ. (1 Kɔr. 3:6, 7) Halɩ paa ñe-piya ɩɩsɛɣ Yehowa nɛ sɩ-laŋɩyɛ pilim yɔ, Yehowa kaɣ wobu pɩ-yɔɔ nɛ ɛsɔɔlʋʋ-sɩ. (Keɣa 10:4) Alɩwaatʋ ndʋ sɩwɩlɩɣ pazɩ se sɩsɔɔlaa se sɩ-tɔm ɛkɛdɩnɩ-ɩ yɔ, ɛkaɣ-sɩ sɩnʋʋ nɛ sɩpɩsɩ ɛ-taabalaa. (Tʋma 13:48; 4 Aw. 16:9) Ɛpɩzɩɣ ɛsɩnɩ-ŋ nɛ ŋyɔɔdɩ tɔm ndʋ pɩpɔzʋʋ yɔ alɩwaatʋ kɩbandʋ yɔɔ, alɩwaatʋ ndʋ pɩpɔzʋʋ se ñe-piya iwelisi-tʋ nɛ pɩkɩlɩ yɔ. (Adu. 15:23) Yaa ɛpɩzɩɣ nɛ eseɣti ɛgbɛyɛ taa koobu abalɩñɩnʋ nɔɔyʋ yaa koobu halɩñɩnʋ nɔɔyʋ nɛ ekemni-sɩ camɩyɛ. Halɩ alɩwaatʋ ndʋ ñe-piya paɣlɩɣ nɛ sɩpɩsɩ ɛyaa sɔsaa yɔ, Yehowa pɩzɩɣ eyele nɛ sɩtɔzɩ tɔm ndʋ ŋwɩlɩ-sɩ nɛ pɩɖɛɛ yɔ tɩ-yɔɔ. (Yoh. 14:26) Ye ŋwobi pɩ-yɔɔ nɛ ŋtɩŋɩɣnɩ ñɔ-yɔɔdaɣ nɛ ña-lakasɩ yɔɔ nɛ ŋwɩlɩɣ ñe-piya tɔm yɔ, ŋwɛɛ nɛ ŋhaɣ Yehowa sakɩyɛ se ɛwazɩ pɩ-yɔɔ.

19. Ɛbɛ yɔɔ ña-taa pɩzɩɣ nɛ pɩtɛ se ñɔ-tɔm kɛdɩɣnɩ Yehowa?

¹⁹ Pɩtɩkɛ lɩmaɣza wena ñe-piya kpakɩɣ yɔ a-cɔlɔ pɩlɩɣna nɛ Yehowa sɔɔlɩ-ŋ. Ɛsɔɔlɩ-ŋ mbʋ pʋyɔɔ yɔ ŋsɔɔlɩ-ɩ. Ye ñe-ɖeke ŋwɛna nɛ ŋcɔŋnɩ ñe-piya yɔɔ yɔ, Yehowa labɩ-ŋ tamaɣ se ɛkɛ ñe-piya caa nɛ ñɔ-yɔɔ kandɩyʋ. (Keɣa 67:6) Ŋfɛyɩnɩ ɖoŋ lɩmaɣza wena ñe-piya kpakɩɣ se sɩsɛɣ Yehowa yaa sɩɩsɛɣ-ɩ yɔ a-yɔɔ. Ɛlɛ ye ŋwobi pɩ-yɔɔ nɛ ŋtaɣ liu Yehowa se ɛsɩnɩ-ŋ nɛ ŋlakɩ ño-ɖoŋ ɖeɖe yɔ, ñɔ-tɔm kaɣ-ɩ kɛdɩnʋʋ.