1-2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

NABƲYƲ taa, ɖɩpɩzɩɣ nɛ ɖɩmaɣzɩ nɛ ɖiɖiɣzina se ɛyʋ wezuu caɣʋ tɩɖaɣlɩ nɛ kɩ-taa lɛ “kʋñɔŋ kɩlɩna.” (Yɔɔb 14:1) Nabʋyʋ taa piyeki nɛ pitiki-ɖʋ yɔɔɔ. Piitibi caanaʋ taa Yehowa sɛyaa nabɛyɛ yɔɔɔ ɖɔɖɔ. Halɩ pa-taa nabɛyɛ kaasɔɔlaa se pasɩ. (1 Aw. 19:2-4; Yɔɔb 3:1-3, 11; 7:15, 16) Ɛlɛ, Yehowa hɛzaɣ pa-laŋa nɛ ɛkpazɩɣ-wɛ ɖoŋ paa ɛzɩmtaa. Pama pɔ-tɔm Bibl taa se pɩsa nɛ ɖɩkalɩɣ-tʋ lɛ, pɩhɛzɩ ɖa-laŋa nɛ ɖɩkpɛlɩkɩ lɔŋ pɔ-cɔlɔ.—Roma 15:4.

² Tɔm ñʋʋ kʋnɛ kɩ-taa, ɖɩkaɣ yɔɔdʋʋ Yehowa sɛyaa nabɛyɛ tɔm, paaɖɔkɩ pa-tɩ kala wena ayekaɣ nɛ pitiki-wɛ yɔɔɔ yɔ a-taa. Mba yɔ: Yakɔɔb pɩyalʋ Yosɛɛfʋ, lelu Nawomii nɛ e-wolu Ruti, Leevi tʋ weyi ɛma Keɣa 72 yɔ nɛ apostoloo Pɩyɛɛrɩ. Ɛzɩma Yehowa kpazɩ-wɛ ɖoŋ? Nɛ ɛbɛ ɖɩpɩzɩɣ nɛ ɖɩkpɛlɩkɩ mbʋ pɩtalɩ-wɛ pe-wezuu caɣʋ taa yɔ pɩ-taa? Tɔm pɔzʋʋ mbʋ, pɩ-yɔɔ cosuu yeki se ɖa-taa ɛtɛ se “[Yehowa] ñɔtɩnɩ laŋa wena apɛlaa yɔ, nɛ ɛyakɩ ‘pɩɖɛmwaa’ ñʋʋ.”—Keɣa 33:19.

3-4. Ɛbɛ kaatalɩ Yosɛɛfʋ alɩwaatʋ ndʋ ɛɛkɛ evebu yɔ?

³ Yosɛɛfʋ kaawɛnɩ pɩnzɩ 17 mbʋ yɔ lɛ, Ɛsɔ yele nɛ eɖozi ɖoza naalɛ naayɛ. Ðoza ana awɩlaɣ se wiɖiyi Yosɛɛfʋ kaɣ wɛʋ lone sɔsɔɖɛ naɖɩyɛ taa, nɛ ɖɩkaɣ yebu nɛ ɛ-hɔʋ taa ñɩma ha-ɩ ñamtʋ. (Kiɖe 37:5-10) Ɛlɛ Yosɛɛfʋ ɖozi ɖoza ana nɛ pitileɖi lɛ, e-wezuu caɣʋ lɛɣzɩ kpɛlɩ. Alɩwaatʋ ndʋ tɩ-taa lɛ, ɛ-ɖalaa taañaŋɩ-ɩ paa ññɩɩ. Pʋyɔɔ pɛpɛdɩ-ɩ nɛ ɛpɩsɩ Ejipiti tʋ sɔsɔ nɔɔyʋ yom, payaɣ ɛlɛ se Potifaarɩ. (Kiɖe 37:21-28) Yosɛɛfʋ wezuu caɣʋ lɛɣzɩ siŋŋ alɩwaatʋ pazɩ taa. Ɛ nɛ ɛ-caa weyi ɛsɔɔlɩ-ɩ siŋŋ yɔ patɩtasɩ wɛʋ ɖɩɣa kʋɖʋmaɣ taa. Ɛpɩsɩ yom  weyi ɛtɩlɩɩ pʋyʋ yɔ Ejipiti, nɛ ɛlakɩ tʋmɩyɛ abalʋ weyi ɛɛsɩŋ Yehowa yɔ ɛ-tɛ.—Kiɖe 39:1.

⁴ Wɛtʋ ndʋ tɩ-taa Yosɛɛfʋ kaawɛɛ yɔ, tɩɩwɛɛ nɛ tɩwɛɛkɩɣ wɛɛkʋʋ yɔɔ. Potifaarɩ halʋ cɛtɩnɩ Yosɛɛfʋ taa se ɛcaɣaɣ se ɛsʋʋnɩ-ɩ. Potifaarɩ tɩtazɩ se ɛna se pɩkɛ toovenim yaa cɛtɩm, ɛlɛ ɛkpa Yosɛɛfʋ nɛ ɛɖʋ salaka taa nɛ ɛlɛ wɛɛ kpasɩ taa peeɖe. (Kiɖe 39:14-20; Keɣa 104:17, 18) Yosɛɛfʋ kaakɛ evebu yem. Ye mbʋ maɣzɩ nɛ ŋna ɛzɩma pɩlakaɣ-ɩ alɩwaatʋ ndʋ pɛcɛtɩnɩ ɛ-taa se ɛñɩnaɣ se ɛkpa halʋ nɛ ɖoŋ nɛ ɛsʋʋnɩ-ɩ yɔ. Nɛ pɩtɩla ɛyaa yɔɔdaɣ tɔm kɩdɛkɛdɩtʋ Yosɛɛfʋ Ɛsɔ Yehowa yɔɔ alɩwaatʋ ndʋ panɩ tɔm ndʋ yɔ. Pɩtʋʋ fɛyɩ se Yosɛɛfʋ kaawɛnɩ toovenim se pitibi-i yɔɔɔ!

5. Ɛbɛ Yosɛɛfʋ laba se pɩsa nɛ pɩtaakɩlɩ-ɩ tibu yɔɔɔ?

⁵ Kpaɣnɩ alɩwaatʋ ndʋ Yosɛɛfʋ kaakɛ yom nɛ piwolo alɩwaatʋ ndʋ paɖʋ-ɩ salaka taa yɔ, ɛtaapɩzɩɣ se ɛla nabʋyʋ nɛ ɛlɛɣzɩ wɛtʋ ndʋ tɩ-taa ɛwɛɛ yɔ. Ɛbɛ kaasɩnɩ-ɩ nɛ ɛwɛɛnɩ lɩmaɣza kɩbana? Mbʋ ɛzɩ ɛɛkam ɛ-lɩmaɣza mbʋ ɛtaatasɩɣ pɩzʋʋ se ɛla yɔ pɩ-yɔɔ lɛ, ɛ-ɛsɩyɛ kaasɛnɩ tʋmɩyɛ nɖɩ paɖʋ-ɩ se ɛla yɔ. Kɔzɩ kɔzɩ lɛ, Yosɛɛfʋ ñɩnaɣ paa ɛzɩmtaa se ɛla mbʋ pɩkɛdɩnɩ Yehowa yɔ. Piyeba nɛ Yehowa wazɩ mbʋ payɩ Yosɛɛfʋ lakaɣ yɔ pɩ-yɔɔ.—Kiɖe 39:21-23.

6. Ðoza wena Yosɛɛfʋ kaaɖozaa yɔ, pɩtɩla ɛzɩma ahɛzɩ ɛ-laŋɩyɛ?

⁶ Pɩtɩla Yosɛɛfʋ ɖaɣnɩ maɣzʋʋ natʋ ɖoza wena eeɖozaa yɔ a-yɔɔ, nɛ pɩtasɩ-ɩ kpazʋʋ ɖoŋ. Awɩlaɣ se ɛkaɣ ɖaɣnʋʋ naʋ ɛ-hɔʋ taa ñɩma nɛ wɛtʋ ndʋ tɩ-taa ɛwɛɛ yɔ, tɩkaɣ ñɔɔzʋʋ. Nɛ mbʋ ɖeyi ɖeyi pɩkɔm nɛ pɩla. Alɩwaatʋ ndʋ Yosɛɛfʋ kaawɛnɩ pɩnzɩ 37 mbʋ yɔ lɛ, pɩtɩŋnɩ piti nakʋyʋ yɔɔ nɛ ɖoza wena eeɖozaa yɔ a-taa tɔm paɣzɩ labʋ!—Kiɖe 37:7, 9, 10; 42:6, 9.

7. Ɛzɩ 1 Pɩyɛɛrɩ 5:10 yɔɔdʋʋ yɔ, ɛbɛ kaɣ-ɖʋ sɩnʋʋ nɛ ɖɩɖɔkɩ ɖa-tɩ kala taa?

⁷ Lɔŋ weyi pɩkpɛlɩkɩɣ-ɖʋ yɔ. Yosɛɛfʋ yɔɔ  kɛdaɣ tɔzʋʋ-ɖʋ se ɖɩwɛ ɛjaɖɛ kɩdɛkɛdɩyɛ taa nɛ ɛyaa kaɣ-ɖʋ muluu. Halɩ ɖo-koobu nɔɔyʋ pɩzɩɣ nɛ ɛɖʋ-ɖʋ ɖɩwɩzɩyɛ. Ɛlɛ ye ɖiyeba nɛ Yehowa kɛ ɖa-Kaaʋ yaa ɖa-Ðɩjɔzɩyɛ yɔ, pɩkaɣ yebu se pɩtaakɩlɩ-ɖʋ tibu yɔɔɔ nɛ ɖiyebi-i sɛʋ. (Keɣa 61:7, 8; kalɩ 1 Pɩyɛɛrɩ 5:10.) Tɔzɩ ɖɔɖɔ se pɩtɩla Yosɛɛfʋ kaawɛnɩ pɩnzɩ 17 mbʋ yɔ lɛ Yehowa yeba nɛ eɖozi ɖoza ana. Pɩwɩlɩɣ se Yehowa taɣ liu piya evelisi nzɩ sɩsɛɣ-ɩ yɔ. Sɔnɔ, piya evelisi sakɩyɛ wɛ ɛzɩ Yosɛɛfʋ yɔ. Nzɩ ɖɔɖɔ sɩwɛnɩ tisuu Yehowa yɔɔ. Pomuli sɩ-taa nasɩyɩ nɛ paɖʋ-sɩ salaka mbʋ pʋyɔɔ yɔ, sɩtɩsɔɔlɩ se silesi siɣsiɣ wɛtʋ ndʋ sɩwɛnɩ Ɛsɔ ɛsɩndaa yɔ.—Keɣa 109:3.

8. Ɛbɛ kaatalɩ Nawomii nɛ Ruti?

⁸ Ñɔɔsɩ sɔsɔsɩ nasɩyɩ kaalɩwa nɛ pʋyɔɔ lɛ, Nawomii nɛ ɛ-hɔʋ peyele pa-ɖɩɣa Yuuda nɛ papɩsɩ agɔma Mowaabʋ tɛtʋ taa. Patalɩ peeɖe lɛ, Nawomii walʋ Elimelɛɛkɩ sɩ nɛ pɩkazɩ ɛ nɛ ɛ-pɩyalaa naalɛ. Pʋwayɩ lɛ, pa-pɩyalaa mba pakpaɣ Mowaabʋ halaa nabɛyɛ, payaɣ-wɛ se Ruti nɛ Orpa. Pɩlabɩ pɩnzɩ hiu mbʋ yɔ pʋwayɩ lɛ, Nawomii pɩyalaa mba pasɩ nɛ peyele pa-halaa. Pataawɛɛnɩ piya. (Ruti 1:1-5) Maɣzɩ nɛ ŋna laŋwɛɛkɩyɛ sɔsɔɖɛ nɖɩ ɖɩ-taa halaa mba pa-naadozo paawɛ yɔ! Toovenim lɛ, Ruti nɛ Orpa papɩzaɣ se patasɩ walʋʋ. Ɛlɛ ye palabɩ mbʋ, akaɣ cɔnʋʋ Nawomii weyi ɛwɛɛ nɛ ɛkpadɩyɩɣ yɔ ɛ-yɔɔ? Piitibi Nawomii yɔɔɔ siŋŋ; nɛ pɩtalɩ alɩwaatʋ natʋyʋ lɛ ɛyɔɔdɩ se: “Ɩtaaya-m se Nawomii (pʋ-tɔbʋʋ se maɣzaɣ), ɛlɛ ɩya-m se Mara (pʋ-tɔbʋʋ se siziŋ nɩyʋ), mbʋ pʋyɔɔ yɔ Ðoŋ Tɩŋa Tʋ haɣzɩ-m ñaŋ.” Wɛtʋ kɩdɛkɛdɩtʋ ndʋ tɩ-tɩŋa payɩ tiyeba nɛ Nawomii kpaɣ lɩmaɣza se ɛpɩsɩɣ Bɛtɩlɛhɛm. Nɛ Ruti tɩŋɩ-ɩ nɛ papɩsɩ.—Ruti 1:7, 18-20.

9. Ɛzɩ Ruti 1:16, 17, 22 yɔɔdʋʋ yɔ, ɛzɩma Ruti kpazɩ Nawomii ɖoŋ?

⁹ Ɛbɛ kaasɩnɩ Nawomii? Sɔɔlɩm siɣsiɣ ñɩmbʋ kaasɩnɩnɩ-ɩ. Ruti wɩlɩ Nawomii sɔɔlɩm siɣsiɣ ñɩmbʋ alɩwaatʋ ndʋ ɛñɔnɩ-ɩ kpam yɔ. (Kalɩ Ruti 1:16, 17, 22.) Patalɩ Bɛtɩlɛhɛm lɛ, Ruti lakaɣ tʋmɩyɛ nɛ kpekpeka nɛ ɛcazɩɣ tɔɔnaɣ nɛ ɛ nɛ Nawomii pɔtɔkɩ. Mbʋ pɩlɩ pɩ-taa yɔ lɛ se ɛyaa tɩŋa kaaɖiɣzinaa se Ruti kɛ tʋmlaɖʋ kɩbanʋ weyi ɛwɛ kpekpeka yɔ.—Ruti 3:11; 4:15.

10. Ɛzɩma tɩyɛ Yehowa wɩlɩ sɔɔlɩm kʋñɔndɩnaa ɛzɩ Nawomii nɛ Ruti mbʋ yɔ?

¹⁰ Yehowa kaaɖʋ Izrayɛɛlɩ mba paɣtʋ natʋyʋ, nɛ tɩwɩlɩɣ se ɛnaɣ kʋñɔndɩnaa ɛzɩ Nawomii nɛ Ruti mbʋ yɔ pa-pʋtɔdɩyɛ. Eheyi ɛ-samaɣ se alɩwaatʋ ndʋ kakʋŋ tɔɔnaɣ yɔ, pɩwɛɛ se kakazɩ ajaza nɛ pɩsa nɛ kʋñɔndɩnaa pɩzɩ nɛ pacazɩ. (Lev. 19:9, 10) Ye mbʋ, pɩtaapɔzɩ se Nawomii nɛ Ruti pasʋlʋmɩ pʋcɔ nɛ pehiɣ tɔɔnaɣ nɛ pɔtɔɔ.

11-12. Ɛzɩma Bowaazɩ yeba nɛ Nawomii nɛ Ruti pa-taa la leleŋ?

¹¹ Abalʋ weyi ɛ-hayɩm taa Ruti cazaɣ tɔɔnaɣ yɔ, ɛɛkɛ ñɩm tʋ nɛ payaɣ-ɩ se Bowaazɩ. Ɛzɩma Ruti wɩlɩ Nawomii sɔɔlɩm nɛ siɣsiɣ wɛtʋ yɔ, piitukuni Bowaazɩ siŋŋ. Pʋyɔɔ lɛ, pʋwayɩ Bowaazɩ kpaɣ Ruti nɛ ɛpɩsɩ ɛ-halʋ, nɛ ɛya hayɩm mbʋ pɩɩkɛ Nawomii hɔʋ taa ñɩma ñɩmbʋ yɔ se pɩpɩsɩ Ruti piya ñɩm. (Ruti 4:9-13) Bowaazɩ nɛ Ruti palʋlɩ abalɩbɩɣa nɛ payaa-kɛ se Obɛɛdɩ. Obɛɛdɩ kɔm nɛ ɛpɩsɩ Wiyaʋ Daviid cɔzɔ pʋwayɩ.—Ruti 4:17.

¹² Maɣzɩ nɛ ŋna taa leleŋ weyi ɛ-taa Nawomii kaawɛ, alɩwaatʋ ndʋ ɛɖɔkɩ Obɛɛdɩ nɔkɔyʋʋ taa nɛ ɛtɩmɩɣnɩ Yehowa se ɛwɩlɩ-ɩ ɛ-ɛsɩmɩyɛ yɔ. Ɛlɛ, wazasɩ kɩbanzɩ lɛɛsɩ ɖaŋ Nawomii nɛ Ruti nɛ ɛsɩndaa. Alɩwaatʋ ndʋ pefeziɣ-wɛ yɔ, pa-taa kaɣ labʋ leleŋ nɛ pɩkpaɖɩ, alɩwaatʋ ndʋ panɩɣ se Obɛɛdɩ kaakɛ  Yesu Krɩstʋ, Mesiya weyi ɛ-tɔm paayɔɔdaa se ɛkɔŋ yɔ ɛ-cɔzɔ nɔɔyʋ yɔ.

13. Lɔŋ kɩbaŋ weyi ɖɩpɩzɩɣ nɛ ɖɩkpɛlɩkɩ Nawomii nɛ Ruti pɛ-kɛdaɣ taa?

¹³ Lɔŋ weyi pɩkpɛlɩkɩɣ-ɖʋ yɔ. Alɩwaatʋ ndʋ ɖɩkatɩɣ kala yɔ, pɩpɩzɩɣ nɛ pitibi-ɖʋ yɔɔɔ nɛ halɩ pɩkɔnɩ-ɖʋ laŋwɛɛkɩyɛ. Pɩtɩla, ɖɩmaɣzɩɣ se ɖɩɩkaɣ lɩʋ kala ana a-taa. Alɩwaatʋ ndʋ tɩ-taa lɛ, pɩpɔzʋʋ se ɖɩtaa liu ɖa-Caa weyi ɛwɛ ɛsɔdaa yɔ nɛ ɖa-laŋɩyɛ pilim nɛ ɖɩñɔtɩnɩ ɖo-koobiya Krɩstʋ ñɩma. Toovenim taa lɛ, pɩtɩla Yehowa eeyeki se kaɖɛ nɖɩ ɖɩwɛɛ nɛ ɖɩkatɩɣ yɔ ɖɩsɩɩ tɩnaɣ. Nawomii hɔɔlʋʋ taa lɛ, etaafezi ɛ-walʋ nɛ ɛ-pɩyalaa. Ɛlɛ, ɛkaɣ-ɖʋ sɩnʋʋ nɛ ɖɩɖɔkɩ ɖa-tɩ. Nabʋyʋ taa, ɛpɩzɩɣ nɛ ɛtɩŋnɩ ɖo-koobiya camɩyɛ lakasɩ yɔɔ nɛ ɛsɩnɩ-ɖʋ.—Adu. 17:17.

14. Ɛbɛ kaayeba nɛ pitii Leevi tʋ nɔɔyʋ yɔɔɔ siŋŋ?

¹⁴ Leevi tʋ nɔɔyʋ manɩ Keɣa 72. Ye mbʋ, ɛɛwɛnɩ waɖɛ sɔsɔɖɛ nɛ ɛlakɩ tʋmɩyɛ lone nɖɩ ɖɩ-taa pɛsɛɣaɣ Yehowa yɔ ɖɩ-taa. Paa mbʋ yɔ, pɩtalɩ e-wezuu caɣʋ alɩwaatʋ natʋyʋ taa lɛ, pitibi-i yɔɔɔ siŋŋ. Ɛbɛ yɔɔ? Mbʋ pʋyɔɔ yɔ, ɛpaɣzɩ sʋsʋʋ kañatʋ tɩnaa nɛ tɩ kpazɩyaa. Pɩtɩkɛ pa-kɩdɛkɛdɩm yebina nɛ ɛsʋsʋʋ-wɛ, ɛlɛ pɩlakaɣ-ɩ ɛzɩ pɩwɛɛ nɛ piɖeɣni-wɛ yɔ. (Keɣa 72:2-9, 11-14) Pɩɩwɛ ɛzɩ pɩɖɔŋaɣnɩ-wɛ camɩyɛ yɔ; paakɛ ñɩm tɩnaa, panɩɣ leleŋ pe-wezuu caɣʋ taa nɛ pataanɩɣzɩɣ nabʋyʋ yɔɔ. Leevi tʋ ɛnʋ ɛna mbʋ lɛ, pitibi-i yɔɔɔ siŋŋ nɛ ɛyɔɔdɩ se: “Paazɩyɔɔ mɔnɖɔkɩ laŋɩyɛ kele kele, nɛ menseɣ se mantaapisi me-nesi kɩdɛkɛdɩm nabʋyʋ taa.” Pɩwɩlɩɣ kpayɩ kpayɩ se pɩpɩzaɣ se piyele nɛ eyele Yehowa sɛʋ.

15. Ɛzɩ Keɣa 72:16-19, 22-25 yɔɔdʋʋ yɔ, ɛbɛ sɩnɩ Leevi tʋ weyi ɛma-kɛ yɔ nɛ piyebi-i tibu yɔɔɔ?

¹⁵ Kalɩ Keɣa 72:16-19, 22-25. Leevi tʋ ɛnʋ ɛsʋ “Ɛsɔ ɖɩɣa taa.” Ɛwɛ peeɖe Yehowa sɛyaa lalaa hɛkʋ taa lɛ, ɛ-laŋɩyɛ hɛɛ, ɛmaɣzɩ camɩyɛ nɛ ɛtɩmɩ wɛtʋ ndʋ tɩ-taa ɛwɛɛ yɔ tɩ-yɔɔ. Piyeba nɛ ɛpaɣzɩ naʋ se pɩkɛnɩ kɩmɛlɛndʋ se ɛwɛɛnɩ lɩmaɣza ana, nɛ pɩpɩzɩɣ piyele nɛ ɛ nɛ Yehowa pa-taabalɩyɛ cɛ. Ɛnɩ pɩ-taa ɖɔɖɔ se kañatʋ tɩnaa wɛ “ɖenɖe pikpilaa yɔ” nɛ pakaɣ ‘tɛŋɛlʋʋ.’ Pɩɩwɛɛ  se Leevi tʋ ɛnʋ ɛwɛɛnɩ Yehowa lɩmaɣza nɛ pɩsa nɛ eyele sʋsʋʋ ɛyaa kɩdɛkɛdaa nɛ pɩtaatasɩ-ɩ tibu yɔɔɔ. Ɛlabɩ mbʋ lɛ, ɛɖaɣnɩ hiɣu laŋhɛzɩyɛ nɛ ɛ-taa wɛɛ leleŋ. Ɛyɔɔdaa se: “Ye ma nɛ [Yehowa] ɖɩwɛɛ, nabʋyʋ tɩtasɩ-m wɛʋ liu tataa cɩnɛ!”

16. Lɔŋ weyi ɖɩpɩzɩɣ nɛ ɖɩkpɛlɩkɩ Leevi tʋ nɔɔyʋ cɔlɔ?

¹⁶ Lɔŋ weyi pɩkpɛlɩkɩɣ-ɖʋ yɔ. Ðɩtaasʋsɩ ɛyaa kɩdɛkɛdaa mba pɩwɛ ɛzɩ piɖeɣni-wɛ yɔ kpa. Pɛfɛyɩ taa leleŋ taa siŋŋ, nɛ taa leleŋ ɛnɩ eeleɖiɣ. Paakaɣ caɣʋ wezuu tam tam. (Ekl. 8:12, 13) Ye ɖɩsʋsʋʋ-wɛ yɔ, pitiki-ɖʋ yɔɔɔ nɛ pɩkɔnɩ-ɖʋ kaɖɛ fezuu taa. Pʋyɔɔ lɛ, ye wiɖiyi ŋpaɣzɩ wɛnʋʋ lɩmaɣza wena Leevi tʋ kaawɛna yɔ a-ɖɔndɩ yɔ, la ɛzɩ ɛɛlabʋ yɔ. Ðɔ lɔŋ weyi Ɛsɔ tasɩɣ-ŋ nɛ sɔɔlɩm yɔ ɩ-yɔɔ, nɛ ŋɖʋ taabalɩyɛ nɛ ɛyaa lalaa mba palakɩ Yehowa sɔɔlɩm yɔ. Ye ŋsɔɔlɩ Yehowa nɛ pɩkpaɖɩ pɩtɩŋa yɔ, ŋkaɣ hiɣu taa leleŋ siŋŋ. Nɛ ŋkaɣ wɛʋ “wezuu siŋŋ” nʋmɔʋ taa.—1 Tim. 6:19.

17. Ɛbɛ yɔɔ Pɩyɛɛrɩ kaawɛnɩ toovenim se pitibi-i yɔɔɔ?

¹⁷ Pɩyɛɛrɩ kaakɛ abalʋ weyi ɛwɛ kpekpeka yɔ. Ɛlɛ nabʋyʋ taa ɛyɔɔdɩ tɔm natʋyʋ yaa ɛlabɩ nabʋyʋ nɛ ɛtɩmaɣzɩ, nɛ pʋwayɩ lɛ ekpiɖi pɩ-yɔɔ siŋŋ. Kɩɖaʋ nakʋyʋ yɔ: Alɩwaatʋ ndʋ Yesu heyi ɛ-apostoloowaa se ɛkaɣ nɩʋ siziŋ nɛ ɛsɩ yɔ, Pɩyɛɛrɩ kalɩ-ɩ nɛ ɛyɔɔdɩ se: “Pɩɩkaɣ-ŋ talʋʋ mbʋ kpa.” (Mat. 16:21-23) Peeɖe Yesu ñɔɔzɩ Pɩyɛɛrɩ lɩmaɣza. Alɩwaatʋ ndʋ samaɣ nakɛyɛ kɔma se kakpa Yesu yɔ, Pɩyɛɛrɩ labɩ nabʋyʋ nɛ ɛtɩmaɣzɩ; ɛsɛtɩ cɔjɔ sɔsɔ yom nɔɔyʋ nɩŋgbaŋʋʋ. (Yoh. 18:10, 11) Lɛɛlɛɛyɔ ɖɔɖɔ, Yesu ñɔɔzɩ Pɩyɛɛrɩ lɩmaɣza. Pɩtasɩ lɛ, Pɩyɛɛrɩ kpazɩ ɛ-tɩ nɛ ɛyɔɔdɩ se paa apostoloowaa lalaa ɩɖɛɣ se peyele Yesu yɔ, ɛnʋ ɛɛkaɣ ɖɛʋ kpa nɛ eyebi-i! (Mat. 26:33) Pɩyɛɛrɩ kaata ɛ-tɩ liu siŋŋ, ɛlɛ ɛkɔm nɛ ese ɛyaa sɔɔndʋ nɛ ɛkpɛzɩ tam nabudozo se ɛnʋ ɛɛsɩŋ Yesu. Piitibi Pɩyɛɛrɩ yɔɔɔ siŋŋ nɛ “ɛlɩɩ awayɩ nɛ ewii siŋŋ.” (Mat. 26:69-75) Pɩtʋʋ fɛyɩ se  ɛɛwɛɛ nɛ ɛnɩɣzɩɣ se ɛzɩ Yesu kaɣ-ɩ tasʋʋ kpeɣu na.

18. Ɛzɩma Yesu sɩnɩ Pɩyɛɛrɩ nɛ ɛɖaɣnɩ hiɣu taa leleŋ?

¹⁸ Paa mbʋ yɔ, Pɩyɛɛrɩ tiyele nɛ pɩkɩlɩ-ɩ tibu yɔɔɔ nɛ eyele Yehowa sɛʋ. Picoɖi-i nɛ pɩtɛ lɛ, ewobi pɩ-yɔɔ nɛ ɛ nɛ apostoloowaa lalaa pɛsɛɣ Yehowa. (Yoh. 21:1-3; Tʋma 1:15, 16) Ɛbɛ sɩnɩ-ɩ nɛ ɛɖaɣnɩ hiɣu taa leleŋ? Pɩyɛɛrɩ tɔzaa se Yesu kaatɩmaa se ɛnʋ tisuu ɛtaahɛɛ, nɛ eseɣti-i se ɛpɩsɩ nɛ ɛkpazɩ e-koobiya ɖoŋ. Yehowa cosi adɩma wena Yesu labɩnɩ ɛ-laŋɩyɛ pilim mbʋ yɔ a-yɔɔ. Pʋwayɩ, Yesu wɩlɩ ɛ-tɩ Pɩyɛɛrɩ, nɛ pɩtʋʋ fɛyɩ se ɛlabɩ mbʋ se ɛkpazɩ-ɩ ɖoŋ. (Luka 22:32; 24:33, 34; 1 Kɔr. 15:5) Pitibi apostoloowaa yɔɔɔ mbʋ pʋyɔɔ yɔ pakpaɣ ɖoo kpeekpe nɛ pɔlɔ piyiŋ nɛ patɩkpa kpakpasɩ lɛ, Yesu wɩlɩ-wɛ ɛ-tɩ. Alɩwaatʋ ndʋ tɩ-taa, Yesu ɖaɣnɩ haʋ Pɩyɛɛrɩ waɖɛ se ɛlɛ ɛwɩlɩ se ɛsɔɔlɩ-ɩ. Yesu kpeɣ ɛ-taabalʋ kʋsɔɔlʋ ɛnʋ nɛ ɛsɔzɩ-ɩ tʋmɩyɛ.—Yoh. 21:15-17.

19. Ɛzɩma Keɣa 102:13, 14 sɩɣnɩ-ɖʋ se ɖɩwɛɛnɩ Yehowa lɩmaɣza ɖa-kɩwɛɛkɩm yɔɔ?

¹⁹ Lɔŋ weyi pɩkpɛlɩkɩɣ-ɖʋ yɔ. Wɛtʋ ndʋ Yesu wɩlɩ Pɩyɛɛrɩ yɔ, tɩwɩlɩɣ se ɛnaɣ ɛyaa pʋtɔdɩyɛ siŋŋ ɛzɩ ɛ-Caa yɔ. Pʋyɔɔ lɛ, alɩwaatʋ ndʋ picoɖuu-ɖʋ yɔ, pɩfɛyɩ se ɖɩmaɣzɩ se Yehowa ɛɛkaɣ-ɖʋ kpeɣu kpa. Pɩwɛɛ se ɖɩtɔzɩ se lɩmaɣza ana Sataŋ ñɩnɩɣ se ɖɩwɛɛna. Ɛlɛ pɩwɛɛ se ɖɩtɔzɩ ɖɔɖɔ se Yehowa sɔɔlɩ-ɖʋ siŋŋ, ɛnawa se ɖo-ɖoŋ wɛnɩ kamaɣ nɛ ɛsɔɔlaa se ekpeɣ-ɖʋ. Nɛ pɩwɛɛ se ɖɩmaɣzɩnɩ-ɩ alɩwaatʋ ndʋ lalaa lakɩ nabʋyʋ nɛ pɩɖʋ-ɖʋ ɖɩwɩzɩyɛ yɔ.—Kalɩ Keɣa 102:13, 14.

20. Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

²⁰ Yosɛɛfʋ, Nawomii, Ruti, Leevi tʋ, nɛ Pɩyɛɛrɩ pa-kɩɖaŋ yeki se ɖa-taa ɛtɛ se “[Yehowa] ñɔtɩnɩ laŋa wena apɛlaa yɔ.” (Keɣa 33:19) Ɛhaɣ nʋmɔʋ se ɖɩkatɩ kala nɛ pitibi-ɖʋ yɔɔɔ nabʋyʋ taa. Paa mbʋ yɔ, alɩwaatʋ ndʋ Yehowa sɩɣnɩ-ɖʋ nɛ ɖɩɖɔkɩ ɖa-tɩ nɛ ɖɩwa kala ana yɔ, pɩkpazɩɣ ɖe-tisuu ɖoŋ. (1 Pɩy. 1:6, 7) Tɔm ñʋʋ ŋgʋ kɩkɔŋ yɔ kɩ-taa, ɖɩkaɣ tasʋʋ naʋ ɛzɩma Yehowa sɩɣnɩ ɛ-sɛyaa siɣsiɣ ñɩma mba pɩtɩla pɛ-ɛjandʋ yaa kala wena a-taa pɛwɛɛ yɔ ayeba nɛ pitibi-wɛ yɔɔɔ yɔ.