KƖYAKƲ nakʋyʋ, halaa naalɛ nabɛyɛ ɖɔŋaɣ Baguio tɛtʋ taa Filipiini ɛjaɖɛ taa lɛ, pana pasɩ présentoir nakʋyʋ, ɛlɛ patɩñɔtɩnɩ-kʋ. Koobu halɩñɩnʋ weyi ɛɛsɩŋ présentoir ŋgʋ kɩ-cɔlɔ yɔ, payaɣ-ɩ se Helen. Ɛna-wɛ lɛ, ɛcɔnɩ-wɛ nɛ ɛmʋʋyɩ. Halaa mba, paawobi pa-nʋmɔʋ ɖɔm yɔɔ, ɛlɛ ɛzɩma Helen kaamʋʋyɩnɩ-wɛ camɩyɛ yɔ, piitukini-wɛ siŋŋ.

Pʋwayɩ, halaa mba pasʋ lɔɔɖɩyɛ nɛ pekpeŋ lɛ, pana Kewiyaɣ Kpaaŋ nakʋyʋ nʋmɔʋ taa, pama kɩ-yɔɔ jw.org mayaɣ. Peeɖe pɔtɔzaa se mayaɣ kʋɖʋmaɣ ŋga paana présentoir yɔɔ. Pa-naalɛ petii lɔɔɖɩyɛ taa nɛ powolo Kewiyaɣ Kpaaŋ cɔlɔ. Powoba lɛ, pana Kediɣzisi nzɩ payɩ palakɩ Kewiyaɣ Kpaaŋ ŋgʋ kɩ-taa yɔ, sɩ-ɖʋtʋ.

Halaa mba, pa-naalɛ powolo kediɣzisi nzɩ palabɩ pʋwayɩ yɔ, sɩ-taa nakɛyɛ. Nɛ pɔɖɔm nɛ pasʋʋ kewiyaɣ Kpaaŋ taa lɛ, anɩ panawa? Helen! Pana-ɩ lɛ, pɔtɔzɩ kpaagbaa se ɛnʋ kaamʋʋyɩnɩnɩ-wɛ. Helen yɔɔdaa se: “Pɔɖɔm nɛ pɔñɔtʋʋnɩ-m lɛ, sɔɔndʋ kpa-m pazɩ. Mamaɣzaa se pɩtɩla malabɩ nabʋyʋ nɛ pɩfɛyɩ ɖeu.” Ɛlɛ halaa mba, palɩzɩ Helen pɩ-taa se mba kaana-ɩ présentoir cɔlɔ.

Halaa mba, pa-taa kaalabɩ leleŋ nɛ kediɣzaɣ ŋga nɛ sɔɔlɩm mbʋ koobiya wɩlɩ-wɛ yɔ; nɛ pɩɩwɛ-wɛ ɛzɩ pɛ-tɛ pɛwɛɛ yɔ. Kediɣzaɣ tɛma nɛ pana lalaa wɛɛ nɛ pɔñɔɔzʋʋ Kewiyaɣ kpaaŋ taa lɛ, pɔpɔzɩ se paha-wɛ nʋmɔʋ nɛ pasɩnɩ-wɛ. Halaa mba pa-taa lɛlʋ tɩtasɩ wɛʋ Filipiini ɛjaɖɛ taa, ɛlɛ lɛlʋ ñɛwɛɛ nɛ ewoki kediɣzisi nɛ ɛpaɣzɩ Bibl kpɛlɩkʋʋ. Amʋʋya yebina nɛ pɩlʋlɩ pee kɩbana ana!