1-2. Ɛbɛ pɩzɩɣ pɩsɩnɩ-ɖʋ nɛ ɖɩna ɛzɩma pɩlakɩ Yehowa alɩwaatʋ ndʋ pɔyɔɔdʋʋ cɛtɩm tɔm ɛ-yɔɔ yɔ?

 MAƔZƖ tɔm tʋnɛ tɩ-yɔɔ: Ɛyʋ weyi ŋmaɣzɩɣ ɛ-yɔɔ yɔ, ɛyɔɔdɩ tɔm kɩdɛkɛdɩtʋ natʋyʋ ñɔ-yɔɔ. Ŋnawa se tɔm ndʋ tɩkɛ cɛtɩm, paa mbʋ yɔ, ɛyaa nabɛyɛ tisi tɩ-yɔɔ. Mbʋ pɩtɛzɩ tɔm wɛɛkʋʋ yɔ lɛ se ɛyaa mba, papaɣzɩ yɛlɩnʋʋ cɛtɩm tɔm ndʋ nɛ ɛyaa lalaa sakɩyɛ tisi tɩ-yɔɔ ɖɔɖɔ. Ɛzɩma pɩlakɩ-ŋ? Ye ŋmaɣzɩɣ ɛyaa yɔɔ nɛ ña-hɩɖɛ kɩbanɖɛ yɔɔ yɔ, pɩtʋʋ fɛyɩ se cɛtɩm tɔm ndʋ, tɩhaɣ-ŋ laŋwɛɛkɩyɛ siŋŋ.—Adu. 22:1.

² Tɔm tʋnɛ tɩsɩɣnɩ-ɖʋ se ɖɩna ɛzɩma pɩɩlabɩ Yehowa alɩwaatʋ ndʋ pepisi ɛ-hɩɖɛ yɔ. E-tiyiyu nɔɔyʋ cɛtɩnɩ ɛ-taa tɔm nɛ eheyi Ɛva. Ɛva tisi cɛtɩm tɔm ndʋ tɩ-yɔɔ. Cɛtɩm tɔm ndʋ tiyeba nɛ Aɖam nɛ Ɛva pakaɖɩnɩ Yehowa. Mbʋ pɩlɩ pɩ-taa yɔ lɛ se ɛyaa kpeekpe wɛɛ palakɩ kɩwɛɛkɩm nɛ pa-taa sakɩyɛ sɩkɩ. (Kiɖe 3:​1-6; Roma 5:12) Tɩlasɩ nzɩ payɩ ɖɩnaɣ ɛjaɖɛ yɔɔ ɛzɩ sɩm, yoŋ nɛ kʋñɔmɩŋ mbʋ yɔ yɔ, sɩlɩnɩ cɛtɩm mbʋ Sataŋ paɣzɩ yɛlɩnʋʋ Edɛɛnɩ kaɖaɣ taa yɔ pɩ-cɔlɔ. Ɛzɩ Yehowa nɩɣ siziŋ cɛtɩm mbʋ nɛ kala wena pɩkɔnaa yɔ pɩ-yɔɔ? Pɩtʋʋ fɛyɩ se ɛnɩɣ siziŋ. Paa mbʋ yɔ Yehowa fɛyɩ pana taa nɛ ɛtɩcaɣnɩ nɔɔyʋ. Ɛlɛ, ɛkɛ «Ɛsɔ koboyaɣ tʋ» paa ɛzɩmtaa.—1 Tim. 1:11.

3. Waɖɛ nɖɩ ɖɩwɛna?

³ Ðɩwɛnɩ waɖɛ se ɖɩɖʋ nesi nɛ Yehowa hɩɖɛ yɔɔ ñalɩ. Ðɩpɩzɩɣ nɛ ɖɩla mbʋ ye ɖɩñaŋ paɣtʋ tʋnɛ yɔ: «Ɩsa Yehowa hɩɖɛ.» (Keɣ. 113:1) Ye ɖiheyiɣ ɛyaa lalaa tɔm kɩbandʋ ndʋ tɩyɔɔdʋʋ Yehowa tɔm yɔ, ɖɩwɩlɩɣ se ɖɩsaŋ ɛ-hɩɖɛ. Ŋkaɣ sam Yehowa hɩɖɛ na? Iyele nɛ ɖɩna lɩmaɣza sɔsɔna 3 wena akaɣ-ɖʋ sɩnʋʋ nɛ ɖɩsa Yehowa hɩɖɛ nɛ ɖa-laŋɩyɛ pilim yɔ.

 ALƖWAATƲ NDƲ ÐƖSAŊ YEHOWA HƖÐƐ YƆ, Ɛ-TAA LAKƖ LELEŊ

4. Ye ɖɩsaŋ Yehowa yɔ, ɛbɛ yɔɔ ɛ-taa lakɩ leleŋ? Ha kɩɖaʋ nakʋyʋ. (Cɔnɩ ɖɔɖɔ kɩlɛmʋʋ.)

⁴ Alɩwaatʋ ndʋ ɖɩsaŋ ɖa-Caa weyi ɛwɛ ɛsɔdaa yɔ ɛ-hɩɖɛ yɔ, ɛ-taa lakɩ leleŋ. (Keɣ. 119:108) Ɛlɛ ɛzɩ pɩwɩlɩɣ se Ɛsɔ ɖoŋ tɩŋa tʋ wɛ ɛzɩ ɛyaa mantɩtalɩ pilimwaa mba pɔsɔɔlaa se pasam-wɛ nɛ pɩkpazɩ-wɛ ɖoŋ yɔ? Aayɩ. Iyele nɛ ɖɩkpaɣ kɩɖaʋ kʋnɛ. Maɣzɩ se halɩbɩɣa cikpelaɣ nakɛyɛ sewa nɛ kowolo ka-caa cɔlɔ nɛ kekpibi-i nɛ kɔyɔɔdɩ se: «Baaba, ɛjaɖɛ kpeekpe yɔɔ cajanaa taa lɛ, ñakpaɖɩnɩ ɖeu!» Halɩbɩɣa cikpelaɣ ŋga, ka-lakasɩ nzɩ siyeki nɛ ka-caa taa la leleŋ, halɩ pitukuuni ɛ-laŋɩyɛ. Ɛbɛ yɔɔ? Ɛzɩ pɩwɛɛ se ɖɩmaɣzɩ se pɩcɛyaa kpem se ɛ-pɩɣa ɛsamɩ-ɩ nɛ kakpazɩ-ɩ ɖoŋ pʋcɔ nɛ ehiɣ taa leleŋ na? Aayɩ. Ɛlɛ ɛsɔɔlɩ ɛ-pɛlɛ nɛ ɛ-taa labɩ leleŋ se ɛlɛ lɩzɩ sɔɔlɩm nɛ ɛsɩmɩyɛ nɛ ɛwɩlɩ-ɩ. Ɛnawa se ɛ-pɛlɛ kaapaɣlɩɣ lɛ, wɛtʋ kɩbandʋ ndʋ, tɩkaɣ-ɩ sɩnʋʋ nɛ ehiɣ taa leleŋ. Lɩmaɣza ana a-yɔɔ ɖɔɖɔ lɛ, ɖa-Caa sɔsɔ Yehowa taa lakɩ leleŋ alɩwaatʋ ndʋ ɖɩsaŋɩ-ɩ yɔ.

5. Ye ɖɩsaŋ Yehowa hɩɖɛ yɔ, tɔm ndʋ ɖɩwɩlɩɣ se tɩkɛ cɛtɩm?

⁵ Alɩwaatʋ ndʋ ɖɩsaŋ ɖa-Caa weyi ɛwɛ ɛsɔdaa yɔ, ɖɩwɩlɩɣ se tɔm ndʋ Sataŋ yɔɔdɩ ɖa-taa paa weyi ɛ-yɔɔ yɔ, tɩkɛ cɛtɩm. Sataŋ yɔɔdaa se ɛyʋ nɔɔyʋ ɛɛpɩzɩɣ nɛ ɛɖɔkɩ e-siɣsiɣ wɛtʋ nɛ ɛlʋ Ɛsɔ hɩɖɛ yɔɔ, nɛ ɖa-taa nɔɔyʋ ɛɛpɩzɩɣ nɛ ɛɖɔkɩ ɛ-cɩŋgɩlɩm wɛtʋ takɩm taa. Ɛyɔɔdaa se ye ɖɩnawa se ɖiyebi Ɛsɔ sɛʋ yɔ pɩwazɩɣ-ɖʋ nɛ pɩkɩlɩ yɔ, ɖa-tɩŋa payɩ ɖiyeki Ɛsɔ sɛʋ. (Yɔɔb 1:​9-11; 2:4) Ɛlɛ Yɔɔb wɩlaa se Sataŋ kɛ cɛtɩyʋ, mbʋ pʋyɔɔ yɔ ɛɖɔkɩ e-siɣsiɣ wɛtʋ Ɛsɔ ɛsɩndaa alɩwaatʋ ndʋ ɛkatɩ kala yɔ. Ña yɔ? Ða-taa paa weyi wɛnɩ waɖɛ se ɛlʋ Yehowa hɩɖɛ yɔɔ nɛ eyele nɛ ɛ-taa la leleŋ ye ɛɖɔkɩ e-siɣsiɣ wɛtʋ ɛ-sɛtʋ taa yɔ. (Adu. 27:11) Pɩkɛnɩ-ɖʋ hɩɖɛ ɖʋʋ siŋŋ se ɖɩla mbʋ.

6. Ɛzɩma ɖɩpɩzɩɣ nɛ ɖɩmaɣzɩnɩ Wiyaʋ Daviid nɛ Leevi mba? (Nehemiya 9:5)

⁶ Mba pɔsɔɔlɩ Yehowa yɔ, pɔsɔɔlaa se pasa ɛ-hɩɖɛ nɛ pa-laŋɩyɛ pilim. Wiyaʋ Daviid mawa se: «Mansaŋ Yehowa; mbʋ payɩ pɩwɛ man-taa yɔ, pɩsa ɛ-hɩɖɛ kiɖeɖeye.» (Keɣ. 103:1) Daviid nɩ pɩ-taa se ye ɖɩsaŋ Yehowa hɩɖɛ yɔ, Yehowa maɣmaɣ ɖɩwɛɛ nɛ ɖɩsaŋ. Alɩwaatʋ ndʋ ɖɩnɩɣ Yehowa hɩɖɛ yɔ, ɖɩmaɣzɩɣ mbʋ ɛ-maɣmaɣ ɛkɛnaa yɔ pɩ-yɔɔ, ɖɩmaɣzɩɣ ɛ-wɛtʋ kɩbandʋ yɔɔ nɛ tʋma sɔsɔna wena ɛlaba yɔ a-yɔɔ. Daviid kaasɔɔlaa se ɛkpaɣ ɛ-Caa hɩɖɛ se ɖɩkɛ kiɖeɖeye nɛ ɛsam-ɖɩ. Ɛɛsɔɔlaa se ‘mbʋ payɩ pɩwɛ ɛ-taa yɔ’ pɩla mbʋ, pʋ-tɔbʋʋ se ɛɛsɔɔlaa se ɛla mbʋ nɛ ɛ-laŋɩyɛ pilim. Mbʋ ɖɔɖɔ Leevi mba kaaɖɛ  nɔɔ nɛ pasaŋ Yehowa. Paaɖiɣzinaa se pɔ-tɔm pee ɩɩpɩzɩɣ kpa nɛ asa Yehowa hɩɖɛ kiɖeɖeye kiya ɛzɩ pɩpɔzʋʋ yɔ. (Kalɩ Nehemiya 9:5.) Pɩtʋʋ fɛyɩ se samtʋ ndʋ pɛcɛlɩ Yehowa nɛ tɩ luzuu nɛ pa-laŋɩyɛ pilim yɔ, tɩha-ɩ taa leleŋ.

7. Ɛzɩma ɖɩpɩzɩɣ nɛ ɖɩsa Yehowa ɖɔ-tɔm susuu taa nɛ ɖe-wezuu caɣʋ taa paa evemiye nɖɩ?

⁷ Sɔnɔ, ye ɖɩyɔɔdʋʋ Yehowa tɔm nɛ pɩwɩlɩɣ se ɖɩwɛnɩ ɛsɩmɩyɛ siŋŋ ɛ-yɔɔ nɛ ɖɩsɔɔlɩ-ɩ siŋŋ yɔ, piyeki nɛ ɖɩla nɛ Yehowa taa la leleŋ. Alɩwaatʋ ndʋ ɖisusuu tɔm yɔ, ɖa-kaɖʋwa sɔsɔɔ lɛ se ɖɩsɩnɩ ɛyaa lalaa nɛ pɔñɔtɩnɩ Yehowa nɛ pɛwɛɛnɩ lɩmaɣza wena ɖɩwɛnɩ ɛ-yɔɔ yɔ. (Yak. 4:8) Ðɩsɔɔlɩ siŋŋ se ɖɩwɩlɩ ɛyaa ndʋ Bibl yɔɔdʋʋ Yehowa yɔɔ yɔ; kɩwɩlɩɣ ɛ-sɔɔlɩm, e-siɣsiɣ wɛtʋ, ɛ-lɔŋsɩnɖɛ, e-ɖoŋ nɛ ɛ-wɛtʋ kɩbandʋ lɛɛtʋ. Ye ɖɩñakɩ pana se ɖɩmaɣzɩnɩ Yehowa yɔ, ɖɩwɩlɩɣ ɖɔɖɔ se ɖɩsaŋɩ-ɩ nɛ ɖiyeki se ɛ-taa ɛla leleŋ. (Efɛz. 5:1) Alɩwaatʋ ndʋ ɖɩlakɩ mbʋ yɔ, ɛyaa lalaa kaɣ naʋ se ɖɩwɛ ndɩ nɛ ɛjaɖɛ kɩdɛkɛdɩyɛ ɖɩnɛ ɖɩ-taa mba nɛ papɩzɩɣ nɛ pɔpɔzɩ pa-tɩ se ɛbɛ yɔɔ ɖɩwɛ mbʋ. (Mat. 5:​14-16) Alɩwaatʋ ndʋ ɖa nɛ wɛ ɖɩkpɛndɩɣ nɛ ɖɩlakɩ nabʋyʋ yɔ, ɖɩpɩzɩɣ nɛ ɖɩlɩzɩ-wɛ mbʋ pʋyɔɔ ɖɩlakɩ lakasɩ nasɩyɩ yɔ pɩ-taa. Nɛ mbʋ pɩlɩɣ pɩ-taa yɔ lɛ se laŋa kɩbana tɩnaa ñɔtʋʋnɩ ɖɛ-Ɛsɔ Yehowa. Alɩwaatʋ ndʋ ɖɩlakɩ mbʋ nɛ ɖɩsaŋ Yehowa yɔ, ɛ-taa lakɩ leleŋ siŋŋ.—1 Tim. 2:​3, 4.

YESU TAA LAKƖ LELEŊ ALƖWAATƲ NDƲ ÐƖSAŊ YEHOWA HƖÐƐ YƆ

8. Ɛzɩma tɩyɛ Yesu ɖɛ nɔɔ Yehowa hɩɖɛ sam hɔɔlʋʋ taa?

⁸ Wondu kɩlɩzɩtʋ ndʋ payɩ tɩwɛ ɛsɔdaa nɛ tɛtʋ yɔɔ yɔ, tɩ-taa natʋyʋ ɛɛsɩŋ Yehowa nɛ pɩtalɩ Yesu. (Mat. 11:27) Yesu sɔɔlɩ ɛ-Caa, nɛ ɛnʋ ɖɛnɩ nɔɔ Yehowa hɩɖɛ sam hɔɔlʋʋ taa. (Yoh. 14:31) Ðoo wena aɖɛwa pʋcɔ nɛ Yesu sɩkɩ yɔ a-taa, ɛlabɩ adɩma naayɛ; nɛ a-taa lɛ ɛyɔɔdɩ tʋmɩyɛ nɖɩ ɛlabɩ tɛtʋ yɔɔ yɔ ɖɩ-tɔm tobi ɛzʋnɔ: «Meyeba nɛ patɩlɩ ña-hɩɖɛ.» (Yoh. 17:26) Suwe ɛcaɣ yɔɔdʋʋ?

9. Eduuye nɖɩ Yesu labɩnɩ tʋmɩyɛ nɛ ɛwɩlɩ weyi ɛ-Caa kɛnɩ ɖeyi ɖeyi yɔ?

⁹ Yesu tiheyi ɛyaa yem se Ɛsɔ hɩɖɛ lɛ Yehowa. Yuuda ñɩma mba Yesu wɩlaɣ tɔm yɔ, paatɛm sɩm Ɛsɔ hɩɖɛ. Ɛlɛ Yesu kaawɩlɩ-wɛ «weyi Ɛsɔ kɛnaa yɔ.» (Yoh. 1:​17, 18) Ebree Masɩ wɩlɩɣ se Yehowa naɣ ɛyaa pʋtɔdɩyɛ nɛ ɛnɩɣ pa-wɩzasɩ. (Ejl. 34:​5-7) Yesu yeba nɛ toovenim tɔm ndʋ, tɩ-taa tʋ kpayɩ kpayɩ alɩwaatʋ ndʋ ɛyɔɔdɩ pɩɣa kilebaɣ nɛ ka-caa pɔ-tɔm eduuye naɖɩyɛ taa yɔ. Alɩwaatʋ ndʋ ɖɩkalɩɣ caja ɛnʋ ɛ-tɔm se ‘elosi ɛ-pɩyalʋ poliŋ taa’ nɛ ese nɛ ɛkatɩ-ɩ, ekpibi-i nɛ ekpeɣ-i nɛ ɛ-laŋɩyɛ pilim yɔ, ɖɩnaɣ kpayɩ kpayɩ ɛzɩma Yehowa naɣ ɛyaa pʋtɔdɩyɛ nɛ ɛnɩɣ pa-wɩzasɩ yɔ. (Luka 15:​11-32) Yesu sɩnɩ ɛyaa lalaa nɛ patɩlɩ weyi ɖeyi ɖeyi ɛ-Caa kɛnaa yɔ.

10. (a) Ɛzɩma ɖɩlaba nɛ ɖɩna se Yesu labɩnɩ tʋmɩyɛ ɛ-Caa hɩɖɛ nɛ ɛsɔɔlaa se lalaa ɖɔɖɔ ɩla mbʋ? (Maarɩkɩ 5:19) (Cɔnɩ ɖɔɖɔ kɩlɛmʋʋ.) (b) Sɔnɔ, ɛbɛ Yesu sɔɔlaa se ɖɩla?

¹⁰ Ɛzɩ Yesu kaasɔɔlaa ɖɔɖɔ se ɛyaa lalaa ɩlabɩnɩ tʋmɩyɛ ɛ-caa hɩɖɛ na? Pɩtʋʋ fɛyɩ se ɛsɔɔlaa. Yesu alɩwaatʋ taa Ɛsɔ sɛtʋ ñʋndɩnaa nabɛyɛ maɣzaɣ se ye paya Ɛsɔ nɛ ɛ-hɩɖɛ yɔ, pɩkɛɣnɩ kaañamtʋ. Ɛlɛ Yesu tɩha nʋmɔʋ se pa-lɩmaɣza ana aɖɩɣ-ɩ nʋmɔʋ nɛ eyele sam ɛ-Caa hɩɖɛ kaaʋ, mbʋ pʋyɔɔ yɔ atɩlɩɩnɩ Masɩ taa. Maɣzɩ alɩwaatʋ ndʋ ɛɛɖɔɔnɩ aleewaa abalʋ nɔɔyʋ taa Jeraazaa mba egeetiye taa yɔ tɩ-yɔɔ. Sɔɔndʋ kpa samaɣ nɛ ketendi Yesu se ɛlɩɩ pe-egeetiye taa nɛ ɛɖɛɛ, piyeba nɛ Yesu tɩcaɣ egeetiye nɖɩ ɖɩ-taa. (Mark. 5:​16, 17) Paa mbʋ yɔ, Yesu kaasɔɔlaa se ɛyaa ɩtɩlɩ Yehowa hɩɖɛ egeetiye nɖɩ ɖɩ-taa. Pʋyɔɔ eheyi abalʋ weyi ɛ-taa ɛɖɔɔnɩ aleewaa yɔ se ewolo nɛ eheyi ɛyaa mbʋ Yehowa labɩ-ɩ yɔ pɩ-tɔm, ɛlɛ pɩtaakɛ mbʋ Yesu labɩ-ɩ yɔ pɩ-tɔm.  (Kalɩ Maarɩkɩ 5:19.) a Sɔnɔ, mbʋ ɖɔɖɔ Yesu sɔɔlaa se ɖɩla; ɛsɔɔlaa se ɖiyele nɛ ɛyaa tɩlɩ ɛ-Caa hɩɖɛ ɛjaɖɛ kpeekpe yɔɔ. (Mat. 24:14; 28:​19, 20) Ye ɖɩlabɩ mbʋ yɔ, ɖe-Wiyaʋ Yesu taa lakɩ leleŋ.

11. Yesu heyi ɛ-tɔmkpɛlɩkɩyaa se patɩmɩ ɛbɛ yɔɔ? Nɛ ɛbɛ yɔɔ pɩ-tɔm cɛyaa? (Ezekɩyɛɛlɩ 36:23)

¹¹ Yesu nawa se Yehowa kaɖʋwa lɛ se Ɛ-hɩɖɛ yɔɔ ɛñalɩ nɛ paa weyi ɛtɩlɩ se tɔm ndʋ payɩ Sataŋ yɔɔdɩ ɛ-yɔɔ yɔ tɩkɛ cɛtɩm tɔm. Pʋyɔɔ ɖa-Ñʋʋdʋ wɩlɩ ɛ-tɔmkpɛlɩkɩyaa se patɩmɩ se: «Ða-Caa ña weyi ŋwɛ ɛsɔdaa yɔ, ña-hɩɖɛ yɔɔ ɛñalɩ.» (Mat. 6:9) Yesu nɩ pɩ-taa se tɔm ndʋ, tɩ-tɔm kɩlɩnɩ cɛyʋʋ wondu kɩlɩzɩtʋ kpeekpe ɛsɩndaa. (Kalɩ Ezekɩyɛɛlɩ 36:23.) Wondu kɩlɩzɩtʋ ndʋ tɩwɛnɩ lɔŋsɩnɖɛ yɔ tɩ-taa nakʋyʋ tɩla se Yehowa hɩɖɛ yɔɔ ɛñalɩ nɛ pɩtalɩ Yesu. Ɛlɛ, alɩwaatʋ ndʋ pakpa Yesu yɔ, kɩwɛɛkɩm mbʋ e-koyindinaa tɔma se ɛlaba? Pakʋ ɛ-tɔm se ɛyɔɔdɩ tɔm kɩdɛkɛdɩtʋ Ɛsɔ yɔɔ. Pɩtʋʋ fɛyɩ se Yesu kaaɖiɣzinaa se ye ɛyʋ ɛyɔɔdɩ tɔm kɩdɛkɛdɩtʋ ɛ-Caa hɩɖɛ kiɖeɖeye yɔɔ yɔ, pɩkɛ kɩwɛɛkɩm sɔsɔm siŋŋ. Pɩɩcɛyɩ-ɩ siŋŋ se pakʋ ɛ-tɔm se ɛlabɩ kɩwɛɛkɩm sɔsɔm mbʋ. Pʋyɔɔ Yesu kaawɛɛ nɛ «ɛnɩɣ siziŋ pɩdɩɩfɛyɩ» kɛdɛzaɣ ñɩɣtʋ ndʋ tɩɖɛwa pʋcɔ nɛ pakpa-ɩ yɔ tɩ-taa.—Luka 22:​41-44.

12. Ɛzɩma tɩyɛ Yesu tɩŋnɩ nʋmɔʋ ŋgʋ kɩkpaɖaa yɔ kɩ-yɔɔ nɛ eyele se ɛ-Caa hɩɖɛ yɔɔ ɛñalɩ?

¹² Pɩsa nɛ Yesu la nɛ ɛ-Caa hɩɖɛ yɔɔ ñalɩ lɛ, ɛɖɔkɩ ɛ-laŋɩyɛ nazɩm, tʋtʋ nɛ cɛtɩm tɔm ndʋ payɩ pɔyɔɔdɩ ɛ-yɔɔ yɔ tɩ-taa. Ɛɛnawa se ɛñam ɛ-Caa pɩtɩŋa pɩ-taa nɛ fɛyɛ taakpaɣ-ɩ nɛ nabʋyʋ. (Ebr. 12:2) Ɛɛnawa ɖɔɖɔ se Sataŋ kaawɛna nɛ ɛkʋyʋʋ ɛ-yɔɔ kaɖɛ alɩwaatʋ ndʋ tɩ-taa. (Luka 22:​2-4; 23:​33, 34) Sataŋ ñɩnaɣ kpem se ɛla nɛ Yesu lesi ɛ-cɩŋgɩlɩm wɛtʋ, ɛlɛ ɛtɩpɩzɩ. Yesu wɩlɩ kpayɩ kpayɩ se Sataŋ kɛ cɛtɩyʋ sɔsɔ nɛ ɛwɩlaa ɖɔɖɔ se ɛyaa pɩzɩɣ nɛ pɔɖɔkɩ pa-cɩŋgɩlɩm wɛtʋ nɛ pɛwɛɛ siɣsiɣ Yehowa ɛsɩndaa paa pakatɩɣ kala siŋŋ yɔ.

13. Ɛzɩma ŋpɩzɩɣ ŋyele nɛ ñe-Wiyaʋ weyi eɖiɣni kewiyitu tɔɔʋ yɔ ɛ-taa la leleŋ?

¹³ Ŋsɔɔlaa se ñe-Wiyaʋ weyi eɖiɣni kewiyitu tɔɔʋ yɔ ɛ-taa ɛla leleŋ na? Ye ɛɛɛ yɔ, wolo pɩ-yɔɔ nɛ ŋsaŋ Yehowa hɩɖɛ, sɩnɩ ɛyaa lalaa nɛ pɛkpɛlɩkɩ nɛ patɩlɩ ɖɛ-Ɛsɔ wɛtʋ kɩbandʋ  tɩŋa. Ye ŋlakɩ mbʋ yɔ, ŋwɛɛ nɛ ŋmaɣzɩɣnɩ Yesu. (1 Pɩy. 2:21) Ɛzɩ Yesu yɔ, ŋwɛɛ nɛ ŋyeki nɛ Yehowa taa lakɩ leleŋ nɛ ŋwɛɛ ŋwɩlɩɣ se E-koyindu Sataŋ kɛ cɛtɩyʋ weyi ɛfɛyɩ fɛyɛ yɔ.

ALƖWAATƲ NDƲ ÐƖSAŊ YEHOWA HƖÐƐ YƆ, ÐƖSƖƔNA SE PAYA ƐYAA WEZIŊ

14-15. Alɩwaatʋ ndʋ ɖɩwɩlɩɣ ɛyaa Yehowa tɔm yɔ, pee kɩbana wena pɩpɩzɩɣ nɛ pɩlʋlɩ?

¹⁴ Alɩwaatʋ ndʋ ɖɩsaŋ Yehowa hɩɖɛ yɔ, ɖɩsɩɣna se paya ɛyaa weziŋ. Ɛzɩma tɩyɛ? Sataŋ «yʋlʋsɩ [mba pɛfɛyɩnɩ tisuu yɔ] pa-maɣzɩm.» (2 Kɔr. 4:4) Piyeba nɛ petisiɣ Sataŋ cɛtɩm tɔm tʋnɛ tɩ-yɔɔ: Ɛsɔ fɛyɩ, Ɛsɔ posini-ɖʋ nɛ ɛ-paa fɛyɩnɩ ɛyaa, Ɛsɔ kɛ kañatʋ tʋ nɛ ɛnazɩɣ kɩwɛɛkɩm laɖaa tam. Cɛtɩm tɔm ndʋ tɩ-kaɖʋwa lɛ se tipisi Yehowa hɩɖɛ nɛ pɩsa nɛ ɛyaa ɩtaasɔɔlɩ se pɔñɔtɩnɩ-ɩ. Ɛlɛ alɩwaatʋ ndʋ ɖisusuu tɔm yɔ, ɖɩɖɩkɩ Sataŋ nʋmɔʋ se ɛtaatalɩ ɛ-kaɖʋwa. Ðɩwɩlɩɣ ɛyaa ɖa-Caa yɔɔ toovenim tɔm nɛ ɖɩsaŋ ɛ-hɩɖɛ kiɖeɖeye. Ɛbɛ lɩɣ pɩ-taa?

¹⁵ Toovenim tɔm ndʋ tɩwɛ Ɛsɔtɔm taa yɔ, tɩwɛnɩ ɖoŋ siŋŋ. Alɩwaatʋ ndʋ ɖɩwɩlɩɣ ɛyaa Yehowa tɔm nɛ weyi ɖeyi ɖeyi ɛkɛnaa yɔ, ɖɩnaɣ se pɩlʋlʋʋ pee kɩbana. Sataŋ cɛtɩm tɔm ɛɛtasɩɣ yʋlʋsʋʋ ɛyaa, nɛ papaɣzɩɣ naʋ ɖa-Caa wɛtʋ kɩbandʋ. Panaɣ se ɛwɛnɩ ɖoŋ weyi ɛfɛyɩnɩ kamaɣ yɔ lɛ, pɩɖɩɣzɩɣ-wɛ kpem. (Iza. 40:26) Pataɣ-ɩ liu mbʋ pʋyɔɔ yɔ e-siɣsiɣ wɛtʋ talɩ pilim. (Wp. 32:4) Pɛkpɛlɩkɩɣ tɔm sakɩyɛ ɛ-lɔŋsɩnɖɛ sɔsɔɖɛ taa. (Iza. 55:9; Roma 11:33) Nɛ patɩlɩɣ se ɛkɛ sɔɔlɩm lɛ, pɩhɛzɩɣ pa-laŋa. (1 Yoh. 4:8) Pɛwɛɣ nɛ pɔñɔtʋʋnɩ Yehowa lɛ, lidaʋ ŋgʋ pɛwɛna se pakaɣ pɩsʋʋ Ɛsɔ piya nɛ pacaɣ wezuu maatɛŋ yɔ kɩcɛyɩsɩɣ nɛ pɩkɩlɩ. Pɩkɛnɩ-ɖʋ waɖɛ sɔsɔɖɛ siŋŋ se ɖɩsɩnɩ ɛyaa nɛ pɔñɔtɩnɩ pa-Caa Yehowa. Alɩwaatʋ ndʋ ɖɩlakɩ mbʋ yɔ, Yehowa kpakɩɣ-ɖʋ se ɖɩkɛ mba pa nɛ ɩ «pɛkpɛndɩɣ nɛ palakɩ tʋmɩyɛ yɔ.»—1 Kɔr. 3:​5, 9.

16. Ɛzɩma pɩlakɩ nabɛyɛ alɩwaatʋ ndʋ patɩlɩɣ se Ɛsɔ wɛnɩ hɩɖɛ yɔ? Ha kɩɖaŋ nɩɩyɩ.

¹⁶ Kiɖe tɛɛ lɛ, ɖɩpɩzɩɣ nɛ ɖɩwɩlɩ ɛyaa kɛlɛʋ yem se payaɣ Ɛsɔ se Yehowa. Pɩpɩzɩɣ nɛ pɩlɛɣzɩ ɛyaa mba pɛwɛnɩ laŋa kɩbana yɔ pe-wezuu siŋŋ. Payaɣ asɛyʋ nɔɔyʋ se Aaliyah. b  Kpaɣnɩ ɖooo ɛ-pɩjatʋ taa ɛɛwɛ Ɛsɔ sɛtʋ ɛgbɛyɛ naɖɩyɛ taa, ɛlɛ ɛtaakɛ Krɩstʋ tʋ. Ɛlɛ, ɛ-taa taatɛmnɩ mbʋ palakaɣ Ɛsɔ sɛtʋ ɛgbɛyɛ nɖɩ ɖɩ-taa yɔ nɛ ɛnaɣaɣ se ɛtaañɔtɩnɩ Ɛsɔ. Ɛ nɛ Yehowa Aseɣɖe Tɩnaa papaɣzɩ Bibl kpɛlɩkʋʋ lɛ, pɩtɩŋa pɩlɛɣzɩ. Ɛpaɣzɩ naʋ Ɛsɔ ɛzɩ ɛ-taabalʋ yɔ. Nɛ pɩɖɩɣzɩ-ɩ alɩwaatʋ ndʋ eɖiɣzinaa se pahɩzɩ Ɛsɔ hɩɖɛ Biblwaa sakɩyɛ taa nɛ pɛlɛɣzɩ ɖi-lone taa hɩla kɩsɛsɛna ɛzɩ Kɩbaɣlʋ mbʋ yɔ. Alɩwaatʋ ndʋ ɛkpɛlɩkaa nɛ ɛtɩlɩ Yehowa hɩɖɛ yɔ, pɩlɛɣzɩ e-wezuu caɣʋ. Ɛyɔɔdaa se: «Man-Taabalʋ kɩbanʋ wɛnɩ hɩɖɛ!» Ɛbɛ lɩ pɩ-taa? Ɛyɔɔdaa se: «Mɛwɛ laŋhɛzɩyɛ taa siŋŋ lɛɛlɛɛyɔ. Pɩkɛnɩ-m hɩɖɛ ɖʋʋ siŋŋ!» Payaɣ abalʋ nɔɔyʋ se Steve, ɛkɛ minziiki maɖʋ. Yuuda ñɩma mba pɔñɔnɩ Yuuda Ɛsɔ sɛtʋ cɩŋ cɩŋ yɔ, pa-taa ɛcaɣaa nɛ ɛpaɣlɩ. Ɛtaasɔɔlɩ se ɛsʋʋ Ɛsɔ sɛtʋ ɛgbɛyɛ naɖɩyɛ taa mbʋ pʋyɔɔ yɔ ɛna pɩ-tɛɛ nɛ pɩ-yɔɔ lakasɩ sakɩyɛ Ɛsɔ sɛtʋ agbaa taa. Ɛlɛ e-ɖoo sɩba nɛ pɩla alɩwaatʋ pazɩ pʋwayɩ lɛ, etisi se ɛcakɩ nɛ ɛna ɛzɩma Yehowa Aseɣɖe Tʋ nɔɔyʋ kpɛlɩkɩɣnɩ nɔɔyʋ Bibl yɔ. Alɩwaatʋ ndʋ ɛnɩwa se Ɛsɔ wɛnɩ hɩɖɛ yɔ, piitukuni-i siŋŋ. Ɛyɔɔdaa se: «Mantaatɩlɩ kpa se Ɛsɔ wɛnɩ hɩɖɛ.» Ɛsɔzaa se: «Kajalaɣ ɖeɖe lɛ manɩʋ pɩ-taa se toovenim taa lɛ Ɛsɔ wɛɛ yɔ. Mankpakaɣ-ɩ ɛzɩ ɛyʋ keekee yɔ. Kpaɣnɩ mbʋ lɛ, manawa se mehiɣ Taabalʋ.»

17. Ɛbɛ yɔɔ ŋtɛm ña-taa se ŋwoki pɩ-yɔɔ nɛ ŋsaŋ Yehowa hɩɖɛ? (Cɔnɩ ɖɔɖɔ kɩlɛmʋʋ.)

¹⁷ Alɩwaatʋ ndʋ ŋsusuu tɔm nɛ ŋwɩlɩɣ tɔm yɔ, ŋwɩlɩɣ ɛyaa Ɛsɔ hɩɖɛ kiɖeɖeye Yehowa? Ŋsɩɣnɩ-wɛ se patɩlɩ weyi ɖeyi ɖeyi ɖɛ-Ɛsɔ kɛnaa yɔ? Ye ŋlakɩ mbʋ yɔ, ŋwɛɛ nɛ ŋsaŋ Ɛsɔ hɩɖɛ. Tɛtɛ nɛ ŋwolo pɩ-yɔɔ nɛ ŋsaŋ Yehowa hɩɖɛ kiɖeɖeye nɛ ŋsɩɣnɩ ɛyaa se patɩlɩ weyi ɖeyi ɖeyi ɛkɛnaa yɔ. Ye ŋlakɩ mbʋ yɔ, ŋkaɣ yabʋ ɛyaa weziŋ. Ŋkaɣ maɣzɩnʋʋ ñe-Wiyaʋ Yesu Krɩstʋ. Nɛ kɔzɩ kɔzɩ lɛ, ŋkaɣ yebu nɛ ña-Caa sɔɔlɩm tʋ Yehowa taa la leleŋ. Tɛtɛ nɛ ‘ŋsa ɛ-hɩɖɛ tam!’—Keɣ. 145:2.