TƆM ÑƲƲ ŊGƲ ÐƖKPƐLƖKƖƔ YƆ 6
HENDU 18 Ðɩwɛɛnɩ ɛsɩmɩyɛ Yesu kɩlaʋ yɔɔ
Ðɩwɛnɩ ɛsɩmɩyɛ siŋŋ se Yehowa kpeɣu-ɖʋ ɖa-kɩwɛɛkɩm
«Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ.»—YOH. 3:16.
LƖMAƔZƖYƐ SƆSƆÐƐ
Ðɩsɔɔlaa se ɛsɩmɩyɛ nɖɩ ɖɩwɛnɩ Yehowa kpaɣʋ nɛ kpeɣu yɔɔ yɔ ɖɩpaɣlɩ nɛ pɩkɩlɩ. Pɩsa nɛ ɖɛ-ɛsɩmɩyɛ paɣlɩ nɛ pɩkɩlɩ lɛ, ɖɩkaɣ naʋ mbʋ Yehowa laba se pɩsa nɛ ekpeɣ-ɖʋ ɖa-kɩwɛɛkɩm yɔ.
1-2. Ɛbɛ yɔɔ pɔtɔŋ se ɛyaa wɛtʋ nɩɣzɩnɩ evebu weyi pɔyɔɔdɩ ɛ-tɔm kajalaɣ tayʋʋ taa yɔ ɛ-wɛtʋ?
MAƔZƖ tɔm tʋnɛ tɩ-yɔɔ nɛ ŋna. Palʋlɩ evebu nɔɔyʋ hɔʋ ŋgʋ kɩwɛ ñɩm yɔ kɩ-taa. Ɛlɛ, kɩyakʋ nakʋyʋ lɛ, ɛ-lʋlɩyaa sɩ kɛgbɛdɩsaɣ nakɛyɛ taa. Pɩɩkɔnɩ-ɩ laŋwɛɛkɩyɛ siŋŋ. Ɛlɛ nabʋyʋ tasɩ labʋ nɛ pɩha-ɩ laŋwɛɛkɩyɛ nɛ pɩkɩlɩ. Ɛnɩwa se ɛ-lʋlɩyaa wɛɛkɩ pe-liidiye nɛ pɔtɔɔ kɩma sakɩyɛ. Lɛɛlɛɛyɔ, mbʋ ɛzɩ ɛ-lʋlɩyaa kaayebini-i ñɩm sakɩyɛ lɛ, kɩma peyebini-i; nɛ mba ɛ-lʋlɩyaa kaatɔɔ-wɛ kɩma yɔ, pɛwɛɛ nɛ pɔpɔzʋʋ se ɛhɛyɩ-wɛ pe-liidiye. Ɛɛkaɣ pɩzʋʋ kpa nɛ ɛhɛyɩ kɩma ana a-tɩŋa.
2 Wɛtʋ ndʋ tɩ-taa ɖɩwɛɛ yɔ, tɩnɩɣzɩnɩ evebu ɛnʋ ɛ-wɛtʋ. Ðɔ-cɔzɔnaa Aɖam nɛ Ɛva paatalɩ pilim nɛ paacaɣ wezuu paradisuu kɩbaŋʋ nakʋyʋ taa. (Kiɖe 1:27; 2:7-9) Papɩzaɣ se pacaɣ wezuu koboyaɣ taa tam. Ɛlɛ pʋwayɩ lɛ, pɩtɩŋa pɩlɛɣzɩ. Pelesi paradisuu nɛ lidaʋ ŋgʋ paawɛna se pacaɣ kɩ-taa tam yɔ. Ɛbɛ peyebini pe-piya? Bibl yɔɔdʋʋ se: «Kɩwɛɛkɩm tɩŋnɩ ɛyʋ kʋɖʋm [Aɖam] yɔɔ nɛ pɩlɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ, nɛ piyele nɛ sɩm wadɩ ɛyaa kpeekpe yɔɔ, mbʋ pʋyɔɔ yɔ pa-tɩŋa palabɩ kɩwɛɛkɩm.» (Roma 5:12) Kɩwɛɛkɩm Aɖam yebini-ɖʋ, nɛ kɩwɛɛkɩm ñɔkɔnɩ sɩm. Kɩwɛɛkɩm mbʋ Aɖam yebini-ɖʋ yɔ, pɩwɛ ɛzɩ kɩmɩyɛ sɔsɔɖɛ nɖɩ ɖa-taa nɔɔyʋ ɛɛpɩzɩɣ nɛ ɛhɛyɩ yɔ.—Keɣ. 49:8.
3. Ɛbɛ yɔɔ papɩzɩɣ nɛ pakpaɣ ɖa-kɩwɛɛkɩm nɛ pamaɣzɩnɩ «kɩma»?
3 Yesu kpaɣ kɩwɛɛkɩm nɛ ɛmaɣzɩnɩ «kɩma.» (Mat. 6:12; Luka 11:4) Alɩwaatʋ ndʋ ɖɩlakɩ kɩwɛɛkɩm yɔ, pɩwɛ ɛzɩ ɖɩtɔɔ Yehowa kɩmɩyɛ yɔ. Yehowa pɩzaɣ se ɛpɔzɩ-ɖʋ se ɖɩhɛyɩ kɩmɩyɛ nɖɩ. Ye Yehowa ɛtaala ɖʋtʋ natʋyʋ se pɩsa nɛ ekpeɣ-ɖʋ yɔ, pɩwɩlɩɣ se alɩwaatʋ ndʋ ɖɩsɩkɩ yɔ ɖɩhɛyɩɣ kɩmɩyɛ nɖɩ, nɛ ɖɩɩtasɩɣ wɛnʋʋ lidaʋ nakʋyʋ se ɖɩcaɣ wezuu cee wayɩ.—Roma 6:7, 23.
4. (a) Ye pataasɩnɩ kɩwɛɛkɩm laɖaa yɔ, ɛbɛ kaatalɩ pa-tɩŋa? (Keɣa 49:7-9) (b) Bibl taa lɛ, ɛbɛ tɔm piye «kɩwɛɛkɩm» wɩlɩɣ? (Kalɩ aɖakaɣ « Kɩwɛɛkɩm.»)
4 Ɛzɩ ɖɩpɩzɩɣ nɛ ɖɩɖaɣnɩ hiɣu mbʋ payɩ Aɖam nɛ Ɛva pelesaa yɔ? Ðɩɩpɩzɩɣ nɛ ɖɩɖaɣnɩ-pʋ hiɣu ɖa-maɣmaɣ ɖo-ɖoŋ taa. (Kalɩ Keɣa 49:7-9.) Ye pataasɩnɩ-ɖʋ yɔ, ɖɩtaawɛɛnɩ lidaʋ se ɖɩkaɣ hiɣu wezuu maatɛŋ cee wayɩ yaa ɖɩtaawɛɛnɩ sɩɖaa femtu lidaʋ. Ðɩɩsɩba ɛzɩ kpɩna sɩkʋʋ yɔ nɛ wiɖiyi ɖɩɩtasɩɣ caɣʋ wezuu.—Ekl. 3:19; 2 Pɩy. 2:12.
5. Ɛzɩma tɩyɛ ɖa-Caa sɔɔlɩm tʋ Yehowa sɩnɩ-ɖʋ se ɖɩhɛyɩ kɩwɛɛkɩm kɩmɩyɛ nɖɩ ɖɩtɔwaa yɔ? (Cɔnɩ yɔɔ kɩlɛmʋʋ.)
5 Ðɩɖaɣnɩ maɣzʋʋ evebu weyi ɖɩɩyɔɔdɩ ɛ-tɔm kiɖe tɛɛ yɔ ɛ-yɔɔ nɛ ɖɩna. Ye ñɩm tʋ nɔɔyʋ eheyi-i se ɛkaɣ hɛyʋʋ ɛ-kɩma tɩŋa yɔ, ɛzɩma pɩlakɩ-ɩ? Pɩtʋʋ fɛyɩ se ɛ-taa kaɣ labʋ leleŋ siŋŋ nɛ etisi se palabɩ-ɩ kʋjɔʋ kɩbaŋʋ ŋgʋ. Mbʋ ɖɔɖɔ ɖa-Caa sɔɔlɩm tʋ Yehowa labɩ-ɖʋ kʋjɔʋ nakʋyʋ, nɛ kʋjɔʋ ŋgʋ kiyeki se pekpeɣ-ɖʋ ɖa-kɩwɛɛkɩm yaa kɩmɩyɛ nɖɩ Aɖam yeba nɛ ɖɩtɔɔ yɔ. Yesu lɩzɩ tɔm ndʋ tɩ-taa ɛzʋnɔ: «Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ, se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.» (Yoh. 3:16) Pɩtasɩ lɛ, kʋjɔʋ ŋgʋ kɩhaɣ-ɖʋ waɖɛ se ɖiyele nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa.
Yesu susi Yehowa kpaɣʋ nɛ kpeɣu yɔɔ tɔm kɩbandʋ; kɩhɛyʋʋ pʋ-ñʋʋ taa kɩlaʋ yɔɔ Yehowa tɩŋɩɣna nɛ ɛkpaɣ nɛ ekpeɣ-ɖʋ. (Yoh. 3:16) Pʋwayɩ lɛ, etisi faaa nɛ ɛkpaɣ e-wezuu nɛ ɛlaa se pɩkɛnɩ kɩhɛyʋʋ pʋ-ñʋʋ taa (Cɔnɩ tayʋʋ 5)
6. Bibl taa tɔm pee wena taa ɖɩkaɣ tazʋʋ tɔm ñʋʋ kʋnɛ kɩ-taa, nɛ ɛbɛ yɔɔ?
6 Ɛbɛ ɖɩpɩzɩɣ ɖɩla nɛ kʋjɔʋ kɩbaŋʋ ŋgʋ kiyeki se pekpeɣ-ɖʋ ɖa-kɩwɛɛkɩm yaa ‘ɖa-kɩma’ yɔ kɩwazɩ-ɖʋ? Pɩsa nɛ ɖicosi tɔm ndʋ tɩ-yɔɔ lɛ, iyele nɛ ɖɩna ɛzɩma Bibl labɩnɩ tʋmɩyɛ tɔm pee anɛ yɔ: ceɣu, kɩwɛɛkɩm yɔɔ huuzuu, kɩwɛɛkɩm hɩzʋʋ, kɩhɛyʋʋ pʋ-ñʋʋ taa, ñʋʋ yabʋ nɛ payaʋ ɛyʋ se siɣsiɣ tʋ yɔ. Ðɩkaɣ lɩzʋʋ tɔm pee ana a-tɔbʋʋ tɔm ñʋʋ kʋnɛ kɩ-taa. Ye ɖɩmaɣzɩɣ mbʋ Yehowa laba se pɩsa nɛ ekpeɣ-ɖʋ ɖa-kɩwɛɛkɩm yɔ pɩ-yɔɔ yɔ, pɩkaɣ yebu nɛ ɖɩwɛɛnɩ ɛsɩmɩyɛ ɛ-yɔɔ nɛ pɩkɩlɩ.
KAÐƲWA ŊGA YEHOWA WƐNA YƆ: CEƔU
7. (a) Ɛbɛ ɖɔɖɔ Aɖam nɛ Ɛva pelesaa? (b) Ða mba ɖɩkɛ Aɖam nɛ Ɛva pa-lʋlʋʋ taa mba yɔ ɛbɛ pɩpɔzʋʋ-ɖʋ? (Roma mba 5:10, 11)
7 Alɩwaatʋ ndʋ Aɖam nɛ Ɛva palabɩ kɩwɛɛkɩm yɔ, pɩtasɩna se pelesi wezuu maatɛŋ lidaʋ lɛ, pelesi ɖɔɖɔ taabalɩyɛ kɩbanɖɛ nɖɩ ɖɩɩwɛ pa nɛ pa-Caa Yehowa pɛ-hɛkʋ taa yɔ. Kiɖe tɛɛ lɛ, Aɖam nɛ Ɛva paakɛ Ɛsɔ hɔʋ taa mba. (Luka 3:38) Ɛlɛ pamanɩ Yehowa paɣtʋ yɔɔ lɛ, ɛɖɔɔnɩ-wɛ ɛ-hɔʋ taa pʋcɔ nɛ papaɣzɩ piya lʋlʋʋ. (Kiɖe 3:23, 24; 4:1) Ðɩkɛ pa-lʋlʋʋ taa mba, pʋyɔɔ lɛ pɩpɔzʋʋ se ɖa nɛ Yehowa ɖiceɣ. (Kalɩ Roma mba 5:10, 11.) Pʋ-tɔbʋʋ lɛ se pɩpɔzʋʋ se ɖɩñaɣ pana nɛ taabalɩyɛ kɩbanɖɛ wɛɛ ɖa nɛ ɩ ɖɛ-hɛkʋ taa. Takayaɣ nakɛyɛ yɔɔdaa se Grɛɛkɩ tɔm piye nɖɩ pɛɖɛzaa se «ceɣu» yɔ, papɩzɩɣ nɛ palɩzɩ ɖɩ-taa se «ɛyʋ eyele nɛ weyi ɛkɛ e-koyindu yɔ ɛpɩsɩ ɛ-taabalʋ.» Mbʋ pɩwɛ piti yɔ lɛ se Yehowa calɩnɩ kpɛzʋʋ nɩŋgbaŋaɣ se eyele nɛ ɖa nɛ ɩ ɖiceɣ. Ɛzɩma tɩyɛ?
ÐƲTƲ NDƲ YEHOWA LABA YƆ: KƖWƐƐKƖM YƆƆ HUUZUU
8. (a) Ɛbɛ kɩwɛɛkɩm yɔɔ huuzuu kɛnaa? (b) Ɛbɛ kɩwɛɛkɩm hɩzʋʋ kɛnaa?
8 Kɩwɛɛkɩm yɔɔ huuzuu kɛnɩ ɖʋtʋ ndʋ Yehowa laba se pɩsa nɛ taabalɩyɛ kɩbanɖɛ ɖaɣnɩ wɛʋ ɛ nɛ kɩwɛɛkɩm laɖaa pɛ-hɛkʋ taa yɔ. Ðʋtʋ ndʋ tɩ-tɔbʋʋ ɖɔɖɔ lɛ se pakpaɣ nabʋyʋ nɛ pɛlɛɣzɩ lɛɛbʋ lone taa nɛ pɩmʋnɩ ɖeyi ɖeyi. Ðɩnɛ ɛlɛ, mbʋ pileba yaa mbʋ pɩwɛɛkaa yɔ, papɩzɩɣ nɛ paɖaɣnɩ-pʋ hiɣu yaa pɛlɛɣzɩ pi-lone taa. Krɩstʋ Mba Grɛɛkɩ Masɩ taa, palabɩnɩ tɔm piye naɖɩyɛ tʋmɩyɛ nɛ ɖɩnɩɣzɩnɩ «kɩwɛɛkɩm yɔɔ huuzuu,» nɖɩ lɛ kɩwɛɛkɩm hɩzʋʋ. (Roma 3:25) Kɩwɛɛkɩm hɩzʋʋ kɛ ɖʋtʋ ndʋ tɩhaɣ ɛyʋ waɖɛ se laŋhɛzɩyɛ nɛ taabalɩyɛ kɩbanɖɛ ɛwɛɛ ɛ nɛ Ɛsɔ pɛ-hɛkʋ taa yɔ.
9. Ðʋtʋ ndʋ Yehowa kaalaba se pɩsa nɛ ekpeɣ Izrayɛɛlɩ mba pa-kɩwɛɛkɩm?
9 Pɩsa nɛ taabalɩyɛ kɩbanɖɛ wɛɛ Yehowa nɛ Izrayɛɛlɩ mba pɛ-hɛkʋ taa lɛ, ɛlabɩ ɖʋtʋ natʋyʋ se pɩsa nɛ ekpeɣ-wɛ pa-kɩwɛɛkɩm. Izrayɛɛlɩ mba tɔkaɣ kazandʋ natʋyʋ paa pɩnaɣ ŋga. Payaɣ-tʋ se Kɩwɛɛkɩm yɔɔ Huuzuu Kɩyakʋ. Kɩyakʋ ŋgʋ ki-wiye, cɔjɔ kɩlɩm laɣaɣ kpɩna samaɣ yɔɔ. Pɩkɛ toovenim se kpɩna kɩlaŋ taapɩzɩɣ se ihuuzi ɛyaa kɩwɛɛkɩm yɔɔ caɣ caɣ, mbʋ pʋyɔɔ yɔ ɛyaa kɩlɩ kpɩna. Ɛlɛ Izrayɛɛlɩ ñɩma mba pekpiɖi pa-kɩwɛɛkɩm yɔɔ yɔ, ye pala kɩlaŋ ɛzɩ Yehowa sɔɔlʋʋ yɔ, etisiɣ faaa nɛ ekpeɣ-wɛ pa-kɩwɛɛkɩm. (Ebr. 10:1-4) Pɩtasɩ lɛ, kɩlaŋ weyi Izrayɛɛlɩ mba laɣaɣ kɩyakʋ ŋgʋ ki-wiye nɛ alɩwaatʋ lɛɛtʋ yɔɔ yɔ, ɩsɩɣaɣnɩ-wɛ se pana se pɛkɛ kɩwɛɛkɩm laɖaa nɛ ɩɩsɩnɩ-wɛ ɖɔɖɔ se pana se pɩpɔzʋʋ-wɛ mbʋ pɩkpaɖɩ mbʋ yɔ nɛ pɩsa nɛ pihuuzi pa-kɩwɛɛkɩm yɔɔ caɣ caɣ.
10. Tamtam ɖʋtʋ ndʋ Yehowa laba se pɩsa nɛ ekpeɣ ɛyaa pa-kɩwɛɛkɩm?
10 Yehowa labɩ tamtam ɖʋtʋ natʋyʋ se pɩsa nɛ ekpeɣ ɛyaa pa-kɩwɛɛkɩm. Eyeba nɛ ɛ-Pɩyalʋ kʋsɔɔlʋ laa «ɛ-tɩ tam kʋɖʋm nɛ pɩkpaɣ pɩɖɛɛ se ɛsɩɣlɩ ɛyaa sakɩyɛ kɩwɛɛkɩm.» (Ebr. 9:28) Yesu cɛlɩ «e-wezuu se pɩkɛ kɩhɛyʋʋ ɛyaa sakɩyɛ ñʋʋ taa.» (Mat. 20:28) Ɛbɛ kɩhɛyʋʋ pʋ-ñʋʋ taa kɛnaa?
MBƲ PƐHƐYƖƔ YƆ: KƖHƐYƲƲ PƲ-ÑƲƲ TAA
11. (a) Bibl taa lɛ, ɛbɛ kɩhɛyʋʋ pʋ-ñʋʋ taa kɛnaa? (b) Anɩ pɩɩpɔzaa se ɛhɛyɩ kɩhɛyʋʋ pʋ-ñʋʋ taa?
11 Bibl taa lɛ, kɩhɛyʋʋ pʋ-ñʋʋ taa kɛnɩ mbʋ pɛhɛyɩɣ se pohuuzi nɔɔyʋ kɩwɛɛkɩm yɔɔ nɛ ɛ nɛ Ɛsɔ peceɣ yɔ. a Yehowa labɩ ɖʋtʋ se pɛhɛyɩ kɩhɛyʋʋ pʋ-ñʋʋ taa se pɩsa nɛ ɛɖaɣnɩ pɩsɩnʋʋ mbʋ payɩ piileba yɔ. Ɛzɩma tɩyɛ? Tɔzɩ se Aɖam nɛ Ɛva paalesi pe-wezuu ŋgʋ kɩtalɩ pilim yɔ nɛ wezuu maatɛŋ lidaʋ. Ye mbʋ, pɩɩpɔzaa se kɩhɛyʋʋ pʋ-ñʋʋ taa ɛmʋnɩ mbʋ ɖeyi ɖeyi piileba yɔ. (1 Tim. 2:6) Ɛyʋ weyi pɩɩpɔzaa se ɛhɛyɩ kɩhɛyʋʋ ŋgʋ yɔ, pɩɩwɛɛ se (1) ɛkɛ weyi ɛtalɩ pilim yɔ; (2) ɛkɛ weyi ɛpɩzɩɣ nɛ ɛcaɣ wezuu tam tam tɛtʋ yɔɔ yɔ; nɛ (3) ɛkɛ weyi etisiɣ faaa nɛ ɛkpaɣ e-wezuu nɛ ɛlaa ɖɔ-yɔɔ yɔ. Ðɩnɛ ɛlɛ, ɛyʋ ɛnʋ e-wezuu pɩzɩɣ nɛ kɩlɛɣzɩ wezuu ŋgʋ kileba yɔ ki-lone taa.
12. Ɛbɛ yɔɔ Yesu kaamʋnɩna se ɛhɛyɩ kɩhɛyʋʋ pʋ-ñʋʋ taa?
12 Iyele nɛ ɖɩna lɩmaɣza 3 wena a-yɔɔ ɖa-taa pɩzɩɣ nɛ pɩtɛ se Yesu kaamʋnɩna se ɛhɛyɩ kɩhɛyʋʋ pʋ-ñʋʋ taa yɔ. (1) Ɛɛtalɩ pilim, «ɛtɩla kɩwɛɛkɩm nabʋyʋ.» (1 Pɩy. 2:22) (2) Pʋyɔɔ lɛ, ɛpɩzaɣ se ɛcaɣ wezuu tam tam tɛtʋ yɔɔ. (3) Ɛɛsɔɔlɩ faaa se ɛsɩ nɛ ɛlaa e-wezuu ɖɔ-yɔɔ. (Ebr. 10:9, 10) Yesu talɩ pilim ɛzɩ kajalaɣ abalʋ Aɖam kaatalʋʋ pilim pʋcɔ nɛ ɛla kɩwɛɛkɩm yɔ. (1 Kɔr. 15:45) Ye mbʋ, Yesu sɩbʋ ɖɔ-yɔɔ yɔ, ɛpɩzaa nɛ ɛhɛyɩ mbʋ pɩɩpɔzaa se pɛhɛyɩ Aɖam kɩwɛɛkɩm yɔɔ yɔ, pʋ-tɔbʋʋ se ɛpɩzaa nɛ ɛpɩsɩnɩ mbʋ Aɖam kaalesaa yɔ. (Roma 5:19) Pʋyɔɔ Yesu pɩsɩ «kɛdɛzaɣ Aɖam.» Pɩtɩtasɩ cɛyʋʋ se ɛyʋ pilim tʋ nɔɔyʋ ɛkɔɔ nɛ ɛhɛyɩ mbʋ Aɖam kaalesaa yɔ. Yesu sɩbɩ «tam kʋɖʋm nɛ pɩkpaɣ pɩɖɛɛ.»—Ebr. 7:27; 10:12.
13. Ɛbɛ yeki se taabalɩyɛ kɩbanɖɛ ɛwɛɛ ɖa nɛ Yehowa ɖɛ-hɛkʋ taa?
13 Ɛbɛ yeki se taabalɩyɛ kɩbanɖɛ ɛwɛɛ ɖa nɛ Yehowa ɖɛ-hɛkʋ taa? Yehowa tɩŋnɩ nʋmɔʋ nakʋyʋ yɔɔ se pɩsa nɛ ekpeɣ-ɖʋ ɖa-kɩwɛɛkɩm. Yesu la e-wezuu ŋgʋ kɩtalɩ pilim yɔ se pɩsa nɛ ɛhɛyɩ mbʋ pɩpɔzʋʋ ɖeyi ɖeyi yɔ ɖa-kɩwɛɛkɩm yɔɔ.—Efɛz. 1:7; Ebr. 9:14.
MBƲ PƖLƖ PƖ-TAA YƆ: YEHOWA YABƖ ÐA-ÑƲƲ NƐ ƐYAA-ÐƲ SE SIƔSIƔ TƖNAA
14. Ɛbɛ ɖɩkaɣ naʋ lɛɛlɛɛyɔ, nɛ ɛbɛ yɔɔ?
14 Ɛbɛ lɩ kɩwɛɛkɩm yɔɔ huuzuu ɖʋtʋ ndʋ Yehowa laba yɔ tɩ-taa? Bibl labɩnɩ tʋmɩyɛ tɔm pee sakɩyɛ se kɩyɔɔdɩ wazasɩ nzɩ ɖʋtʋ ndʋ tɩkɔŋna yɔ sɩ-tɔm. Paa tɔm pee ana a-tɔbʋʋ nɩʋ ɛnɩɣzɩnɩ ɖama yɔ, a-taa paa nɖɩ lɛ ɖɩñɩkɩɣ niye kɩwɛɛkɩm yɔɔ huuzuu ɖʋtʋ ndʋ Yehowa laba se pɩsa nɛ ekpeɣ-ɖʋ ɖa-kɩwɛɛkɩm yɔ tɩ-hɔɔlʋʋ nakʋyʋ yɔɔ. Ðɩɩtazɩɣ tɔm pee ana a-taa lɛ, ɖɩkaɣ naʋ ɖɔɖɔ ɛzɩma atukuuni ɖa-taa paa anɩ yɔ.
15-16. (a) Bibl taa lɛ, ye pɔtɔm se payabɩ ɖa-ñʋʋ yɔ, pʋ-tɔbʋʋ lɛ suwe? (b) Ðɩmaɣzɩɣ pɩ-yɔɔ lɛ, ɛzɩma pɩlakɩ-ɖʋ?
15 Bibl taa lɛ, ye pɔtɔm se payabɩ ɖa-ñʋʋ yɔ, pʋ-tɔbʋʋ lɛ se poholi-ɖʋ; mbʋ pʋyɔɔ yɔ pɛhɛyɩ kɩhɛyʋʋ ɖa-ñʋʋ taa. Apostoloo Pɩyɛɛrɩ yɔɔdaa se: «Ɩsɩm mbʋ se pɩtɩkɛ wondu ndʋ tɩwɛɛkɩɣ yɔ, liidiye yaa sika poholini-mɩ [piye piye, “pɛhɛyɩnɩ mɩ-ñʋʋ taa; palɩzɩnɩ-mɩ”] mi-wezuu caɣʋ ŋgʋ kɩɩkɛ falaa yɔ kɩ-taa, ŋgʋ mɩ-cɔzɔnaa yebini-mɩ yɔ. Ɛlɛ poholi-mɩ nɛ calɩm mbʋ pɩwɛ ñɩm yɔ, ɛzɩ heɣa ŋga kɛfɛyɩnɩ kɩwɛɛkɩtʋ natʋyʋ nɛ azuluma naayɛ yɔ ka-calɩm, Krɩstʋ calɩm.»—1 Pɩy. 1:18, 19; pɩ-tɛɛ tɔm.
16 Pɩtɩŋnɩ kɩhɛyʋʋ pʋ-ñʋʋ taa kɩlaʋ yɔɔ lɛ, papɩzɩɣ nɛ poholi-ɖʋ kɩwɛɛkɩm nɛ sɩm mbʋ pɩkɔŋnɩ-ɖʋ kʋñɔmɩŋ yɔ pi-nesi tɛɛ. (Roma 5:21) Ðɩwɛnɩ ɛsɩmɩyɛ siŋŋ Yehowa nɛ Yesu pɔ-yɔɔ, mbʋ pʋyɔɔ yɔ patɩŋnɩ Yesu calɩm yaa e-wezuu ŋgʋ kɩmʋ ñɩm yɔ kɩ-yɔɔ nɛ paya ɖa-ñʋʋ.—1 Kɔr. 15:22.
17-18. (a) Bibl yɔɔdʋʋ se Yehowa yaɣ ɛ-sɛyaa se siɣsiɣ tɩnaa yɔ, pʋ-tɔbʋʋ lɛ suwe? (b) Ɛzɩma pɩwazɩɣ-ɖʋ?
17 Bibl yɔɔdʋʋ se Yehowa yaɣ ɛ-sɛyaa se siɣsiɣ tɩnaa. Pʋ-tɔbʋʋ lɛ se ɛɛpɔzʋʋ-ɖʋ se ɖɩhɛyɩ ɖa-kɩwɛɛkɩm yɔɔ. Paa Yehowa ɛlakɩ mbʋ yɔ, ɛɛmaɣnɩ e-siɣsiɣ wɛtʋ paɣtʋ kila yɔɔ. Ɛtɩyaa-ɖʋ se siɣsiɣ tɩnaa mbʋ pʋyɔɔ yɔ ɖɩmʋnaa se payaa-ɖʋ se siɣsiɣ tɩnaa. Pɩtasɩ lɛ, ɖa-kɩwɛɛkɩm ɛɛkɛdɩɣnɩ Yehowa. Ɛlɛ Yehowa sɔɔlɩ faaa se ɛkpaɣ ɖa-kɩwɛɛkɩm nɛ ekpeɣ-ɖʋ, mbʋ pʋyɔɔ yɔ mbʋ ɛ nɛ Yesu palaba nɛ pɛhɛyɩ kɩhɛyʋʋ ɖa-ñʋʋ taa yɔ, ɖɩwɛnɩ tisuu pɩ-yɔɔ.—Roma 3:24; Gal. 2:16.
18 Yehowa yaʋ-ɖʋ se siɣsiɣ tɩnaa yɔ, ɛzɩma pɩwazɩɣ-ɖʋ? Mba paya-wɛ se siɣsiɣ tɩnaa yɔ, palɩzɩ pa-taa nabɛyɛ se pa nɛ Yesu pɔtɔɔ kewiyitu ɛsɔdaa nɛ payaa-wɛ se Ɛsɔ piya. (Tiiti 3:7; 1 Yoh. 3:1) Pekpeɣ-wɛ pa-kɩwɛɛkɩm. Pɩwɛ ɛzɩ wiɖiyi patɩla kɩwɛɛkɩm mbʋ nɛ pana yɔ, nɛ piyeba nɛ pamʋna se pakpa ɛsɔdaa. (Roma 8:1, 2, 30) Mba pɛwɛnɩ lidaʋ se pacakɩ wezuu tɛtʋ yɔɔ yɔ, pekpeɣ-wɛ pa-kɩwɛɛkɩm nɛ payaa-wɛ se siɣsiɣ tɩnaa nɛ papɩsɩ Ɛsɔ taabalaa. (Yak. 2:21-23) Samaɣ sɔsɔɔ ŋga kakaɣ hiɣu ñʋʋ yabʋ Armaagedɔɔ wiye yɔ, kɛwɛnɩ lidaʋ se kaakaɣ sɩbʋ wiɖiyi kpa. (Yoh. 11:26) Mba pasɩba nɛ pɛkɛ «ɛyaa siɣsiɣ tɩnaa» nɛ «mba pɛfɛyɩ siɣsiɣ yɔ,» pakaɣ-wɛ fezuu. (Tʋma 24:15; Yoh. 5:28, 29) Kɛdɛzaɣ ɖeɖe lɛ, Yehowa sɛyaa mba pɛwɛ tɛtʋ yɔɔ nɛ pañaŋɩ-ɩ yɔ, pakaɣ wɛnʋʋ «Ɛsɔ piya tɩ-yɔɔ wɛʋ sɔsɔm.» (Roma 8:21) Ðɩɖaŋ alɩwaatʋ ndʋ ɖɩkaɣ ɖaɣnʋʋ pɩsʋʋ ɖa-Caa Yehowa piya nzɩ sɩtalɩ pilim yɔ kpam.
19. Mbʋ Yehowa nɛ Yesu palabɩ-ɖʋ yɔ, ɛzɩma piyeba nɛ ɖɛ-wɛtʋ ñɔɔzɩ nɛ pɩkɩlɩ? (Kalɩ ɖɔɖɔ aɖakaɣ « Ɛzɩma Yehowa kpaɣʋ nɛ kpeɣu wazɩɣ-ɖʋ?»)
19 Toovenim taa lɛ, ɖɛ-wɛtʋ kaanɩɣzɩnɩ evebu weyi ɖɩɩyɔɔdɩ ɛ-tɔm kiɖe tɛɛ se elesi pɩtɩŋa payɩ nɛ ɛ-lʋlɩyaa yebini-i kɩmɩyɛ sɔsɔɖɛ naɖɩyɛ nɛ ɛtaapɩzɩɣ kpa se ɛhɛyɩ-ɖɩ yɔ. Ɛlɛ Yehowa sɩnɩ-ɖʋ. Ðɛ-wɛtʋ lɛɣzaa mbʋ pʋyɔɔ yɔ Yehowa tɩŋnɩ nʋmɔʋ nakʋyʋ yɔɔ nɛ ekpeɣ-ɖʋ ɖa-kɩwɛɛkɩm, nɛ Yesu hɛyɩ kɩhɛyʋʋ ɖa-ñʋʋ taa. Ye ɖɩwɛnɩ tisuu Yesu Krɩstʋ yɔɔ yɔ, piyeki nɛ poholi-ɖʋ kɩwɛɛkɩm nɛ sɩm nesi tɛɛ. Alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, pɩwɛɣ ɛzɩ wiɖiyi ɖɩtɩla kɩwɛɛkɩm mbʋ nɛ ɖɩna yɔ. Ɛlɛ mbʋ pɩkɩlɩ labʋ ɖeu yɔ lɛ se lɛɛlɛɛyɔ lɛ, taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ ɖa-Caa sɔɔlɩm tʋ Yehowa ɖɛ-hɛkʋ taa.
20. Tɔm ndʋ yɔɔ ɖɩkaɣ cosuu tɔm ñʋʋ ŋgʋ kɩkɔŋ yɔ kɩ-taa?
20 Ye ɖɩmaɣzɩɣ mbʋ Yehowa nɛ Yesu palabɩ-ɖʋ yɔ pɩ-yɔɔ yɔ, ɖɩkaɣ wɛnʋʋ ɛsɩmɩyɛ siŋŋ pɔ-yɔɔ. (2 Kɔr. 5:15) Ye pataasɩnɩ-ɖʋ yɔ, ɖɩtaawɛɛnɩ lidaʋ nakʋyʋ paa ññɩɩ! Ɛlɛ ɛzɩma tɩyɛ Yehowa kpaɣʋ nɛ kpeɣu wazɩɣ ɖa-taa paa anɩ? Ðɩkaɣ cosuu tɔm ndʋ tɩ-yɔɔ tɔm ñʋʋ ŋgʋ kɩkɔŋ yɔ kɩ-taa.
HENDU 10 Ɩɖɛyɩ Yehowa, ɖɛ-Ɛsɔ!
a Kʋnʋmɩŋ nɩɩyɩ taa lɛ, papɩzɩɣ nɛ pɛɖɛzɩ «kɩhɛyʋʋ pʋ-ñʋʋ taa» ɖɔɖɔ se «mbʋ pɛhɛyɩɣ wezuu yɔɔ yɔ» yaa «mbʋ pɛhɛyɩɣ nabʋyʋ yɔɔ yɔ.»
