WIÐIYI pɩtɛmɩ-ŋ labʋ ɛzɩ ŋwɛɛ nɛ ŋlʋkɩnɩ kala wena ŋkatɩɣ yɔ ñe-ɖeke na? Ðɩwɛ «alɩwaatʋ kaɖɛ ñɩndʋ» taa ‘nɛ tɩ-lʋbɩnʋʋ wɛ kaɖɛ,’ pʋyɔɔ lɛ, pɩpɩzɩɣ nɛ pitibi-ɖʋ yɔɔɔ nɛ pɩlakɩ-ɖʋ ɛzɩ ɖɩwɛ ɖe-ɖeke yɔ. (2 Tim. 3:1) Paa mbʋ yɔ, pɩfɛyɩ se ɖɩlʋbɩnɩ kala wena ɖɩkatɩɣ ɖe-wezuu caɣʋ taa yɔ ɖe-ɖeke. Bibl wɩlɩɣ se pɩcɛyaa se ɖɩwɛɛnɩ taabalaa kɩbama «kʋñɔŋ alɩwaatʋ taa.»—Adu. 17:17.

Apostoloo Pɔɔlɩ taabalaa mba paasɩ-ɩ ɛ-nʋmɔʋ ɖɔm taa yɔ paasɩnɩ-ɩ. (Kol. 4:​7-11) Alɩwaatʋ ndʋ paaɖɩɣ Pɔɔlɩ salaka Roma yɔ, ɛ-taabalaa labɩ tʋma wena ɛtaapɩzɩɣ se ɛla ɛ-maɣmaɣ yɔ. Kɩɖaŋ nɩɩyɩ yɔ: Epafrodiiti woni Pɔɔlɩ wondu ndʋ Filiipi koobiya kaatiyini-i yɔ. (Filp. 4:18) Tisiiki woni agbaa takayɩsɩ nzɩ Pɔɔlɩ ma-yɛ yɔ. (Kol. 4:7) Paa Pɔɔlɩ kaawɛ ɖɩɣa ŋga ka-taa ɛtaapɩzɩɣ se ɛlɩɩ yɔ yaa salaka taa yɔ, ɛpɩzaa nɛ ɛkpazɩ agbaa ɖoŋ, mbʋ pʋyɔɔ yɔ ɛ-taabalaa sɩnɩ-ɩ. Ɛzɩma ŋpɩzɩɣ nɛ ŋkɛ taabalʋ kɩbanʋ sɔnɔ?

Ða-alɩwaatʋ taa kɩɖaŋ wɩlɩɣ se ye ɖɩwɛnɩ taabalʋ kɩbanʋ yɔ pɩwazɩɣ-ɖʋ siŋŋ. Payaɣ koobu halɩñɩnʋ nɔɔyʋ se Elisabet. Ɛkɛ nʋmɔʋ lɩzɩyʋ Ɛsɩpaañɩ ɛjaɖɛ taa. Iyele nɛ ɖɩna ɛzɩma koobu halɩñɩnʋ nɔɔyʋ wɩlaa se ɛkɛ-ɩ taabalʋ kɩbanʋ yɔ. Alɩwaatʋ ndʋ kansɛɛrɩ kʋdɔŋ kpa Elisabet ɖoo yɔ, koobu halɩñɩnʋ ɛnʋ etiyini Elisabet message waa sakɩyɛ mba pa-taa ɛlabɩnɩ tʋmɩyɛ Bibl masɩ yɔ se ɛkpazɩ-ɩ ɖoŋ. Elisabet yɔɔdaa se: «Message waa mba, pakpazɩ-m ɖoŋ nɛ malʋbɩnɩ kaɖɛ wɛtʋ ndʋ paa evemiye nɖɩ, nɛ pɩtaalakɩ-m ɛzɩ mɛwɛ men-ɖeke yɔ.»—Adu. 18:24.

Ðɩpɩzɩɣ nɛ ɖɩcɛyɩsɩ taabalɩyɛ nɖɩ ɖɩwɛ ɖa nɛ ɖo-koobiya ɖɛ-hɛkʋ taa yɔ ye ɖɩsɩɣnɩ-wɛ nɛ palakɩ ɛgbɛyɛ taa tʋma yɔ. Ŋpɩzɩɣ nɛ ŋkpaɣ koobiya akpadɩyaa nɛ ŋwoni kediɣzisi taa yaa tɔm susuu taa. Ye ŋlabɩ mbʋ yɔ, pɩpɩzɩɣ piyele nɛ ɩkpazɩ ɖama tisuu ɖoŋ. (Roma 1:12) Ɛlɛ koobiya nabɛyɛ ɩɩpɩzɩɣ se palɩɩnɩ awayɩ. Ɛzɩma ɖɩpɩzɩɣ nɛ ɖɩwɩlɩ se ɖɩkɛ koobiya mba pa-taabalaa kɩbama?

Kʋdɔŋ yaa wɛtʋ natʋyʋ yɔɔ lɛ, koobiya nabɛyɛ ɩɩpɩzɩɣ se powolo kediɣzisi Kewiyaɣ kpaaŋ taa. Payaɣ koobu nɔɔyʋ se David, ɛwɛnɩ kansɛɛrɩ kʋdɔŋ. Palabɩ-ɩ kansɛɛrɩ kɔyɛ nɛ pɩcɛzɩ fenasɩ 6. Alɩwaatʋ ndʋ palakaɣ David kɔyɛ yɔ, ɛ nɛ ɛ-halʋ Lidia patɩŋaɣnɩ visioconférence yɔɔ nɛ palakɩ kediɣzisi.

Ɛzɩma pɛ-ɛgbɛyɛ taa koobiya sɩnɩ-wɛ? Paa kediɣzaɣ ŋga ka-wayɩ lɛ, koobiya mba powobi kediɣzaɣ Kewiyaɣ kpaaŋ taa yɔ, pa-taa nabɛyɛ ñakaɣ pana nɛ patɩŋɩɣnɩ visioconférence yɔɔ nɛ pɔyɔɔdʋʋnɩ David nɛ Lidia. Pɩtasɩ lɛ, alɩwaatʋ ndʋ David nɛ Lidia pocosuu tɔm kediɣzisi taa yɔ, koobiya tiyaɣni-wɛ message waa pʋwayɩ nɛ pasaŋ-wɛ. Ɛbɛ lɩ pɩ-taa? Pɩtaakɩlɩ labʋ David nɛ Lidia ɛzɩ pɛwɛ pe-ɖeke yɔ.

 Ðɩpɩzɩɣ nɛ ɖɩla ɖʋtʋ nɛ ɖa nɛ koobiya mba paapɩzɩɣ se palɩɩnɩ awayɩ yɔ ɖisusi tɔm. Ye ɖɩlabɩ lɛɣzɩtʋ pazɩ yɔ, ɖɩpɩzɩɣ nɛ ɖɩwɩlɩ mba pakatɩɣ kala ana yɔ se ɖɩtɩsɔɔ pɔ-yɔɔ. (Adu. 3:27) Pɩtɩla, ɖa nɛ wɛ ɖɩpɩzɩɣ ɖɩkpɛndɩ nɛ ɖɩtɩŋnɩ takayɩsɩ maʋ yaa kaŋgalaafu yɔɔ nɛ ɖisusi tɔm. Ɛgbɛyɛ taa ɛzʋtʋyaa pɩzɩɣ ɖɔɖɔ nɛ pala ɖʋtʋ nɛ koobiya mba paapɩzɩɣ se palɩɩnɩ awayɩ yɔ patɩŋnɩ visioconférence yɔɔ nɛ pala tɔm susuu kediɣzisi. David nɛ Lidia pa-taa kaalabɩ leleŋ nɛ ɖʋtʋ ndʋ. David yɔɔdaa se: «Alɩwaatʋ pazɩ ndʋ ɖa nɛ ɖɔ-tɔm susuu ɛgbɛyɛ ɖɩkpɛndɩɣ nɛ ɖɩlakɩ tɔm susuu kediɣzaɣ nɛ adɩma yɔ, pɩkpazɩɣ-ɖʋ ɖoŋ pɩdɩɩfɛyɩ.» Pɩtasɩ lɛ ye pɩsaŋ yɔ, nabʋyʋ taa ɖɩpɩzɩɣ ɖɩla ɖʋtʋ nɛ ɖa nɛ ɖe-Bibl kpɛlɩkɩyʋ nɔɔyʋ ɖiwoki koobu weyi ɛɛpɩzɩɣ se ɛlɩɩnɩ awayɩ yɔ ɛ-tɛ nɛ ɖa nɛ koobu ɛnʋ ɖɩkpɛlɩkɩnɩ-ɩ Bibl.

Alɩwaatʋ ndʋ ɖa nɛ koobiya mba paapɩzɩɣ se palɩɩnɩ awayɩ yɔ ɖɩkpɛndɩɣ nɛ ɖɩlakɩ tʋma yɔ, ɖɩtɩlɩɣ-wɛ camɩyɛ nɛ ɖɩnaɣ pɛ-wɛtʋ kɩbandʋ, piyeki nɛ ɖa nɛ wɛ ɖa-taabalɩyɛ cɛyɩsɩ. Alɩwaatʋ ndʋ ɖa nɛ wɛ ɖɩkpɛndɩɣ nɛ ɖisusuu tɔm nɛ ɖɩnaɣ ɛzɩma palakɩnɩ tʋmɩyɛ Bibl camɩyɛ nɛ potukuuni ɛyaa laŋa yɔ, pɩtʋʋ fɛyɩ se pɩsɩɣnɩ-ɖʋ nɛ ɖɩñɔtɩnɩ-wɛ nɛ pɩkɩlɩ. Ye ŋsɩɣnɩ ño-koobiya nɛ palakɩ fezuu taa tʋma yɔ, ŋpɩzɩɣ nɛ ŋhiɣ taabalaa kɩfama.—2 Kɔr. 6:13.

Pɔɔlɩ kaawɛ kaɖɛ alɩwaatʋ taa lɛ, ɛ-taabalʋ Tituusi woba nɛ ɛna-ɩ, nɛ pɩɩkpazɩ Pɔɔlɩ ɖoŋ. (2 Kɔr. 7:​5-7) Kɛdaɣ ŋga kɔtɔzʋʋ-ɖʋ se pɩtasɩna se ɖɩpɩzɩɣ ɖɩtɩŋnɩ ɖɔ-yɔɔdaɣ yɔɔ nɛ ɖɩkpazɩ nabɛyɛ ɖoŋ lɛ, ɖɩpɩzɩɣ ɖɔɖɔ nɛ ɖɩkpaɣ alɩwaatʋ nɛ ɖɩcakɩ pɔ-cɔlɔ nɛ ɖɩla nabʋyʋ nɛ ɖɩsɩnɩ-wɛ.—1 Yoh. 3:18.

Ðo-koobiya mba pɛwɛ Rusii ɛjaɖɛ taa yɔ, paha-ɖʋ kɩɖaʋ kɩbaŋʋ ɖama sɩnʋʋ hɔɔlʋʋ taa. Iyele nɛ ɖɩna Sergey nɛ ɛ-halʋ Tatyana pa-kɩɖaʋ. Polisinaa woba nɛ pewili pa-ɖɩɣa taa nɛ pɩtɛ lɛ, pakpaɣ-wɛ nɛ powoni polisinaa tʋmɩyɛ ɖɩlaɖɛ se pɔpɔzɩ-wɛ tɔm. Tatyana pacalɩ yebu nɛ ɛpɩsɩ ɖɩɣa. Sergey yɔɔdaa se: «[Tatyana] tɩɩtalɩ ɖɩɣa lɛ, koobu halɩñɩnʋ nɔɔyʋ kɔɔ se ekilimi ɛ-yɔɔ. Koobu ɛnʋ ɛɛwɛ abalɩtʋ pɩdɩɩfɛyɩ. Pitileɖi lɛ, koobiya lalaa kɔɔ nɛ pasɩnɩ-ɖʋ nɛ ɖɩñɔɔzɩ wondu ɖa-ɖɩɣa taa.»

Sergey tasɩ yɔɔdʋʋ se: «Mɔnsɔɔlɩ Aduwa 17:17 kpem. Pɔyɔɔdɩ mayaɣ ŋga ka-taa se: “Taabalʋ kɩbanʋ wɩlɩɣ sɔɔlɩm paa ɛzɩmtaa, nɛ ɛkɛ koobu weyi palʋlɩ-ɩ se ɛsɩna kʋñɔŋ alɩwaatʋ taa yɔ.” Nazɩm alɩwaatʋ ndʋ tɩ-taa, manɩ mayaɣ ŋga ka-taa nɛ pɩkɩlɩ mbʋ pʋyɔɔ yɔ mantaapɩzɩɣ se malʋbɩnɩ nazɩm mbʋ men-ɖeke, pɩɩwɛɛ se man-taabalaa ɩsɩnɩ-m. Yehowa ha-m taabalaa mba palabɩ abalɩtʋ nɛ pasɩnɩ-m yɔ.» a

Lɛɛlɛɛyɔ, ɖɩkatɩɣ kaɖɛ wɛtʋ nɛ pɩkɩlɩɣ nɛ pʋyɔɔ lɛ, pɩpɔzʋʋ-ɖʋ taabalaa mba papɩzɩɣ nɛ pasɩnɩ-ɖʋ yɔ. Kʋñɔŋ sɔsɔʋ alɩwaatʋ taa, pɩkaɣ pɔzʋʋ se ɖa-taabalaa ɩsɩnɩ-ɖʋ nɛ pɩkɩlɩ. Ye mbʋ, lɛɛlɛɛyɔ pɩpɔzʋʋ se ɖɩla mbʋ payɩ ɖɩpɩzɩɣ yɔ nɛ ɖɩkɛ taabalaa kɩbama.—1 Pɩy. 4:​7, 8.