1-2. (a) Wɛtʋ ndʋ Yehowa sɛyaa sakɩyɛ katɩɣ? (b) Nɛ ɖoŋ weyi tɩpɩzɩɣ nɛ tɩwɛɛnɩ pɔ-yɔɔ?

MAƔZƖ kɩɖaŋ ɩnɛ i-naadozo ɩ-yɔɔ nɛ ŋna: Fɛɖʋ nɔɔyʋ heyi koobu pɩɣa evelaɣ nakɛyɛ se kɛwɛnɩ kʋdɔŋ sɔsɔʋ nakʋyʋ, nɛ kɩkaɣ-kɛ camʋʋ pazɩ pazɩ. Koobu abalɩñɩnʋ nɔɔyʋ cɛzɩ pɩnzɩ 50 nɛ ɛlakɩ tʋmɩyɛ nɛ kpekpeka; ɛlɛ elesi ɛ-tʋmɩyɛ, nɛ paa ɛɛñaɣ pana siŋŋ se ɛɖaɣnɩ hiɣu lɛɛɖɛ yɔ, ɛtɩpɩzɩ nɛ ehiɣ naɖɩyɛ. Koobu halɩñɩnʋ akpadɩyʋ siɣsiɣ tʋ nɔɔyʋ ɛɛtasɩɣ pɩzʋʋ se ɛla tʋma Yehowa sɛtʋ taa ɛzɩ ɖoo lɛ yɔ.

² Ye ŋwɛɛ nɛ ŋkatɩɣ wɛtʋ natʋyʋ ɛzɩ koobiya mba pɔ-tɔm ɖɩyɔɔdaa nɛ pɩɖɛɛ yɔ pa-taa nɔɔyʋ yɔ, pɩpɩzɩɣ nɛ pɩlabɩ-ŋ ɛzɩ ŋtɩtasɩ wɛʋ wazaɣ paa ññɩɩ yɔ. Wɛtʋ ndʋ, tɩpɩzɩɣ tiyele nɛ ŋlesi taa leleŋ weyi ŋŋwɛna yɔ, ŋwɛɛnɩ lɩmaɣza kɩdɛkɛda ña-maɣmaɣ ñɔ-yɔɔ, nɛ tɩpɩzɩɣ tɩwɛɛkɩ taabalɩyɛ nɖɩ ɖɩwɛ ña nɛ ɛyaa lalaa mɩ-hɛkʋ taa yɔ.

3. Lɩmaɣza wena Sataŋ nɛ mba pɔ-yɔɔ ɛwɛnɩ ɖoŋ yɔ, pɛwɛnɩ ɛyaa wezuu yɔɔ?

³ Lɩmaɣza wena Sataŋ wɛnɩ ɛyaa wezuu caɣʋ yɔɔ yɔ, ana ɛjaɖɛ ɖɩnɛ ɖɩwɛna. Paa ɛzɩmtaa lɛ, Sataŋ maɣzɩɣ se ɛyaa fɛyɩ wazaɣ nakɛyɛ. Ɛlabɩ kañatʋ nɛ eheyi Ɛva se ye ɛlɛ ɛtɩña Ɛsɔ yɔ, ɛkaɣ wɛʋ ɛ-tɩ yɔɔ. Ŋgʋ Sataŋ ɛɛnawa se kaañamtʋ lakasɩ nzɩ sɩ-kɩhɛyʋʋ kɛlɛ sɩm. Sataŋ ɖiyiɣni ɛjaɖɛ ɖɩnɛ ɖɩ-yɔɔ tadɩyɛ agbaa, politiki agbaa, nɛ cɛtɩm Ɛsɔ sɛtʋ agbaa paa ɛzɩmtaa. Ye mbʋ, pɩɩɖɩɣzɩɣ-ɖʋ se tadɩyɛ laɖaa, politiki laɖaa nɛ Ɛsɔ sɛtʋ agbaa ñʋndɩnaa sakɩyɛ fɛyɩnɩ ɖɔɖɔ ñamtʋ ɛyʋ wezuu yɔɔ nɛ pa-paa fɛyɩnɩ ɛzɩma pɩlakɩ ɛyaa yɔ.

4. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

⁴ Ɛlɛ Yehowa wɛ ndɩ nɛ Sataŋ. Ɛsɔɔlaa se ɖɩtɩlɩ se ɖɩmʋ ñɩm nɛ ɛsɩɣnɩ-ɖʋ alɩwaatʋ ndʋ ɖɩkatɩɣ wɛtʋ ndʋ tɩpɩzɩɣ  tiyele nɛ ɖɩmaɣzɩ se ɖɩfɛyɩ wazaɣ yɔ. (Keɣa 135:23; Roma 12:3) Tɔm ñʋʋ kʋnɛ, kɩkaɣ yɔɔdʋʋ ɛzɩma Yehowa sɩɣnɩ-ɖʋ wɛtʋ ndɩ ndɩ tʋnɛ tɩ-taa yɔ: (1) Alɩwaatʋ ndʋ ɖɩhɩnɩɣ kʋdɔŋ yɔ, (2) Alɩwaatʋ ndʋ ɖɩwɛɣ liidiye kɛdɛɖaɣ taa yɔ, nɛ (3) Alɩwaatʋ ndʋ ɖɩkpadɩyɩɣ nɛ pɩlakɩ-ɖʋ ɛzɩ ɖɩɩpɩzɩɣ nɛ ɖɩla mbʋ pɩwɛ wazaɣ Yehowa tʋmɩyɛ taa yɔ. Ɛlɛ kajalaɣ lɛ, iyele nɛ ɖɩna mbʋ pʋyɔɔ ɖa-taa pɩzɩɣ nɛ pɩtɛ se ɖa-taa paa anɩ mʋ ñɩm Yehowa ɛsɩndaa yɔ.

5. Ɛbɛ wɩlɩɣ-ŋ se ɛyaa mʋ ñɩm Yehowa ɛsɩndaa?

⁵ Paa tataa mʋzʋʋ pakpaɣaa nɛ palabɩnɩ-ɖʋ yɔ, ɖɩmʋ ñɩm siŋŋ nɛ pɩkpaɖɩ mʋzʋʋ yem. (Kiɖe 2:7) Yʋsɩ lɩmaɣza wena a-yɔɔ ɖɩnawa se ɖɩmʋ ñɩm Yehowa ɛsɩndaa yɔ, a-taa naayɛ. Ɛlɩzɩ ɛyaa se papɩzɩ nɛ pamaɣzɩnɩ ɛ-wɛtʋ, nɛ piyeba nɛ ɖɩkpaɖɩ wondu kɩlɩzɩtʋ lɛɛtʋ ndʋ panaɣnɩ ɛsa yɔ. (Kiɖe 1:27) Pɩtasɩ lɛ, ɛha-ɖʋ waɖɛ se ɖɩcɔnɩ tɛtʋ nɛ kpɩna pɔ-yɔɔ.—Keɣa 8:5-9.

6. Ɛbɛ wɩlɩɣ-ɖʋ ɖɔɖɔ se ɛyaa mantɩtalɩ pilimwaa mʋ ñɩm Yehowa ɛsɩndaa?

⁶ Halɩ Aɖam labɩ kɩwɛɛkɩm nɛ pɩtɛ lɛ, Yehowa wobi pɩ-yɔɔ nɛ ɛkpakɩɣ ɛyaa se pamʋ ñɩm ɛ-ɛsɩndaa. Ðɩmʋ ñɩm siŋŋ ɛ-ɛsɩndaa, nɛ pʋyɔɔ ɛcɛlɩ ɛ-Pɩyalʋ kʋsɔɔlʋ Yesu se pɩkɛ kɩhɛyʋʋ pʋ-ñʋʋ taa ɖa-kɩwɛɛkɩm yɔɔ. (1 Yoh. 4:9, 10) Pɩtɩŋnɩ kɩhɛyʋʋ pʋ-ñʋʋ taa yɔɔ lɛ, Yehowa kaɣ fezuu mba pasɩbɩ Aɖam kɩwɛɛkɩm yɔɔ yɔ, “siɣsiɣ tɩnaa nɛ mba pɛfɛyɩ siɣsiɣ yɔ.” (Tʋma 24:15) Ɛ-Tɔm wɩlɩɣ se ɖɩmʋ ñɩm ɛ-ɛsɩndaa paa ɖɩhɩnɩ kʋdɔŋ, ɖɩwɛ liidiye kɛdɛɖaɣ taa, yaa ɖɩkpadɩyaa yɔ.—Tʋma 10:34, 35.

7. Lɩmaɣza lɛɛna wena yɔɔ Ɛsɔ sɛyaa tisiɣ se pamʋ ñɩm Yehowa ɛsɩndaa?

⁷ Ðɩwɛnɩ lɩmaɣza lɛɛna wena a-yɔɔ ɖitisiɣ se ɖɩmʋ ñɩm Yehowa ɛsɩndaa yɔ. Ɛhɔm-ɖʋ nɛ ɛkɔnɩ ɛ-cɔlɔ, nɛ ɛyʋsɩ ɛzɩma ɖɩmʋ tɔm kɩbandʋ yɔ. (Yoh. 6:44) Alɩwaatʋ ndʋ ɖɩpaɣzɩ ñɔtɩnʋʋ Yehowa yɔ, ɛnʋ ɖɔɖɔ ɛñɔtɩnɩ-ɖʋ. (Yak. 4:8) Yehowa kpakɩɣ ɛ-alɩwaatʋ nɛ e-ɖoŋ nɛ ɛfalɩsɩɣnɩ-ɖʋ, nɛ pɩwɩlɩɣ se ɖɩmʋ ñɩm ɛ-ɛsɩndaa. Ɛsɩm ɛyaa mba ɖɩkɛnɩ lɛɛlɛɛyɔ yɔ, nɛ ɛyaa mba ɖɩpɩzɩɣ nɛ ɖɩpɩsɩ yɔ. Nɛ ɛsɩɣzɩɣ-ɖʋ lɔŋ mbʋ pʋyɔɔ yɔ, ɛsɔɔlɩ-ɖʋ. (Adu. 3:11, 12) Pɩnaɣ kpayɩ kpayɩ se ɖɩmʋ ñɩm Yehowa ɛsɩndaa!

8. Tɔm ndʋ tɩwɛ Keɣa 17:28-30 taa yɔ, ɛzɩma tɩpɩzɩɣ nɛ tɩwɛɛnɩ ɖoŋ lɩmaɣza wena ɖɩwɛnɩ kala wena ɖɩkatɩɣ yɔ a-yɔɔ?

⁸ Nabɛyɛ kaamaɣzaa se Wiyaʋ Daviid fɛyɩ wazaɣ, ɛlɛ eeɖiɣzinaa se Yehowa sɔɔlɩ-ɩ nɛ ɛɖʋʋ-ɩ nesi. Daviid tɩlʋʋ tɔm ndʋ yɔ, pɩsɩnɩ-ɩ nɛ ɛlʋbɩnɩ wɛtʋ ndʋ tɩ-taa ɛɛwɛɛ yɔ nɛ lɩmaɣza kɩbana. (2 Sam. 16:5-7) Alɩwaatʋ ndʋ pitiki-ɖʋ yɔɔɔ, yaa alɩwaatʋ ndʋ ɖɩkatɩɣ kala yɔ, Yehowa pɩzɩɣ ɛsɩnɩ-ɖʋ nɛ ɖɩwɛɛnɩ lɩmaɣza kɩbana, nɛ ɛpɩzɩɣ ɛsɩnɩ-ɖʋ nɛ ɖɩwa paa kaɖɛ nɖɩ. (Kalɩ Keɣa 17:28-30.) Alɩwaatʋ ndʋ Yehowa sɩɣnɩ-ɖʋ yɔ, nabʋyʋ ɛɛpɩzɩɣ nɛ pɩɖɩɣ-ɖʋ nʋmɔʋ se ɖɩtaasɛɛ-ɩ nɛ taa leleŋ. (Roma 8:31) Iyele nɛ ɖɩna lɛɛlɛɛyɔ wɛtʋ naadozo ndʋ tɩ-taa ɖeyi ɖeyi pɩpɔzʋʋ se ɖɩtɔzɩ se Yehowa sɔɔlɩ-ɖʋ nɛ ɖɩmʋ ñɩm ɛ-ɛsɩndaa yɔ.

9. Ɛzɩma kʋdɔŋ pɩzɩɣ nɛ kɩwɛɛnɩ ɖoŋ lɩmaɣza wena ɖɩwɛnɩ ɖa-maɣmaɣ ɖɔ-yɔɔ yɔ a-yɔɔ?

⁹ Kʋdɔŋ pɩzɩɣ nɛ kɩwɛɛnɩ ɖoŋ ɖa-maɣzɩm yɔɔ, nɛ kɩpɩzɩɣ kiyele nɛ pɩlakɩ-ɖʋ ɛzɩ ɖɩtɩtasɩ wɛʋ nɔɔyʋ wazaɣ yɔ. Alɩwaatʋ ndʋ ɖɩnaɣ se ɛyaa yʋsʋʋ se ɖɩɩtasɩɣ pɩzʋʋ nɛ ɖɩlakɩ mbʋ ɖɩlakaɣ yɔ, yaa alɩwaatʋ ndʋ pɩpɔzʋʋ se ɖɩtaa lalaa liu se pasɩnɩ-ɖʋ yɔ, pɩpɩzɩɣ nɛ pɩcɛyɩ-ɖʋ siŋŋ. Halɩ paa lalaa itiɖiɣzina se pɩwɩɣ-ɖʋ yɔ, ɖɩpɩzɩɣ nɛ  ɖɩlʋkɩnɩ fɛyɛ mbʋ pʋyɔɔ yɔ, ɖɩɩtasɩɣ pɩzʋʋ nɛ ɖɩlakɩ mbʋ ɖɩlakaɣ ɖooo lɛ yɔ. Alɩwaatʋ kaɖɛ ñɩndʋ ndʋ tɩ-taa, Yehowa kpazɩɣ-ɖʋ ɖoŋ. Ɛzɩma tɩyɛ?

10. Ɛzɩ Aduwa 12:25 yɔɔdʋʋ yɔ, ɛbɛ pɩzɩɣ nɛ pɩsɩnɩ-ɖʋ alɩwaatʋ ndʋ ɖɩwɛɣ kʋdɔŋ taa yɔ?

¹⁰ Alɩwaatʋ ndʋ ɖɩwɛɣ kʋdɔŋ taa yɔ, “tɔm kɩbandʋ” pɩzɩɣ nɛ tɩkpazɩ-ɖʋ ɖoŋ. (Kalɩ Aduwa 12:25.) Yehowa yeba nɛ pama tɔm kɩbandʋ sakɩyɛ Bibl taa, nɛ tɩtɔzʋʋ-ɖʋ se paa pɩwɩɣ-ɖʋ yɔ, ɖɩmʋ ñɩm ɛ-ɛsɩndaa. (Keɣa 30:20; 40:4) Ye ɖɩkalɩɣ nɛ halɩ ɖɩlɛlɩɣ tɔm ndʋ Ɛsɔ tɩŋnɩ e-fezuu kiɖeɖeu yɔɔ nɛ eyele nɛ pama yɔ, Yehowa kaɣ-ɖʋ sɩnʋʋ nɛ ɖɩlʋbɩnɩ lɩmaɣza kɩdɛkɛda wena kʋdɔŋ yeba nɛ ɖɩwɛɛna yɔ.

11. Ɛzɩma Yehowa sɩnɩ koobu abalɩñɩnʋ nɔɔyʋ?

¹¹ Iyele nɛ ɖɩna Jorge kɩɖaʋ. Ɛɛkɛ pɩɣa evelaɣ lɛ, ɛhɩnɩ kʋdɔŋ nakʋyʋ, nɛ kʋdɔŋ ŋgʋ kɩkpa ɖoŋ lɛɛ lɛɛ nɛ kiyele nɛ pɩlakɩ-ɩ ɛzɩ ɛfɛyɩ wazaɣ yɔ. Jorge yɔɔdaa se: “Mantaañɔɔzɩ ma-tɩ nɛ manɖaŋ lɩmaɣza wena man-kʋdɔŋ yeba nɛ mɛwɛɛna yɔ, yaa ɛzɩma fɛyɛ kpaɣaɣ-m se kʋdɔŋ yeba nɛ ɛyaa lɩmaɣza wɛɛ mɔ-yɔɔ yɔ. Man-kʋdɔŋ wɛɛ nɛ kɩkpaɣ ɖoŋ lɛ, mamaɣzaɣ ɛzɩma me-wezuu kaɣ lɛɣzʋʋ yɔ pɩ-yɔɔ. Piitibi-m yɔɔɔ nɛ mentendi Yehowa se ɛsɩnɩ-m.” Ɛzɩma Yehowa sɩnɩ-ɩ? Ɛyɔɔdaa se: “Pɩɩwɛ-m kaɖɛ se manka ma-lɩmaɣza tɔm ndʋ mankalɩɣ yɔ tɩ-yɔɔ; pʋyɔɔ lɛ, pɩɩwɛɛ se mankalɩ Keɣa takayaɣ taa masɩ nasɩyɩ pazɩ, nzɩ sɩwɩlɩɣ se Yehowa cɔŋnɩ ɛ-sɛyaa yɔɔ yɔ alɩwaatʋ natʋyʋ. Paa ɖooye lɛ, mankalaɣ masɩ nzɩ nɛ mɛlɛlɩɣ nɛ sɩɩhɛzɩ ma-laŋɩyɛ. Alɩwaatʋ wɛɛ tɩɖɛɣ lɛ, ɛyaa lalaa paɣzɩ yʋsʋʋ se mamʋʋyʋʋ nɛ pɩkpaɖɩɣ. Halɩ pɔyɔɔdaa se lɩmaɣza kɩbana wena maawɛnɩ wɛtʋ ndʋ tɩ-taa mɛwɛɛ yɔ tɩ-yɔɔ yɔ, pɩkpazɩ-wɛ ɖoŋ. Mayʋsaa se Yehowa cosi ma-adɩma yɔɔ!  Ɛsɩnɩ-m nɛ mɛlɛɣzɩ lɩmaɣza wena maawɛnɩ ma-maɣmaɣ man-tɩ yɔɔ yɔ. Manpaɣzɩ kam ma-lɩmaɣza ndʋ ɛ-Tɔm yɔɔdʋʋ pɩlɩɩnɩ ɛzɩma ɛnaɣ-m paa mɛwɛ kʋdɔŋ taa yɔ tɩ-yɔɔ.”

12. Alɩwaatʋ ndʋ ŋlʋkɩnɩ kʋdɔŋ nakʋyʋ yɔ, ɛbɛ ŋpɩzɩɣ ŋla nɛ ŋhiɣ Yehowa sɩnʋʋ?

¹² Ye ŋwɛɛ nɛ ŋlʋkɩnɩ kʋdɔŋ nakʋyʋ yɔ, ña-taa ɛtɛ se Yehowa sɩm mbʋ pɩ-taa ŋwɛɛ yɔ. Tendi-i se ɛsɩnɩ-ŋ nɛ pɩsa nɛ ŋwɛɛnɩ lɩmaɣza wena amʋnaa yɔ wɛtʋ ndʋ tɩ-taa ŋwɛɛ yɔ tɩ-yɔɔ. Pʋwayɩ lɛ, ñɩnɩ Bibl taa tɔm ndʋ tɩhɛzɩɣ laŋa yɔ, ndʋ Yehowa yeba nɛ pama se tɩwazɩ-ŋ yɔ. Ka ña-lɩmaɣza masɩ nzɩ sɩwɩlɩɣ ɛzɩma Yehowa sɛyaa mʋ ñɩm siŋŋ ɛ-ɛsɩndaa yɔ sɩ-yɔɔ. Ye ŋlabɩ mbʋ yɔ, ŋkaɣ naʋ se Yehowa lakɩ camɩyɛ mba payɩ pɛsɛɣ-ɩ nɛ siɣsiɣ wɛtʋ yɔ.—Keɣa 83:12.

13. Ye hɔʋ ñʋʋdʋ nɔɔyʋ elesi ɛ-tʋmɩyɛ, lɩmaɣza wena ɛpɩzɩɣ nɛ ɛwɛɛna?

¹³ Paa hɔʋ ñʋʋdʋ weyi lɛ, ɛsɔɔlaa se ɛcɔnɩ ɛ-hɔʋ wezuu caɣʋ taa kɩcɛyɩm ɖeɖe. Ɛlɛ, kpaɣ se koobu abalɩñɩnʋ nɔɔyʋ lesi ɛ-tʋmɩyɛ, paa pɩtɩkɛ ɛ-cɔlɔ pɩlɩnaa yɔ. Ɛwɛɛ nɛ ɛñakɩ pana siŋŋ se ehiɣ tʋmɩyɛ lɛɛɖɛ ɛlɛ etihiɣ naɖɩyɛ. Ɛwɛʋ nɛ ɛkatɩɣ wɛtʋ ndʋ yɔ, pɩpɩzɩɣ nɛ piyele nɛ ɛmaɣzɩ se ɛfɛyɩ wazaɣ. Ye ɛkam ɛ-lɩmaɣza Yehowa tamasɩ yɔɔ yɔ, ɛzɩma pɩpɩzɩɣ nɛ pɩsɩnɩ-ɩ?

14. Lɩmaɣza wena yɔɔ Yehowa ɖɔŋ ɛ-tɔm yɔɔ?

¹⁴ Yehowa ɖɔŋ ɛ-tɔm yɔɔ paa ɛzɩmtaa. (Yoz. 21:45; 23:14) Lɩmaɣza sakɩyɛ yɔɔ ɛlakɩ mbʋ. Kajalaɣ lɛ, pitukuuni ɛ-hɩɖɛ. Yehowa labɩ tamaɣ se ɛkaɣ cɔnʋʋ ɛ-sɛyaa siɣsiɣ ñɩma yɔɔ, nɛ ɛmaɣzɩɣ se pɩkɛnɩ-ɩ kɩjɛyʋʋ se ɛɖɔ tɔm ndʋ tɩ-yɔɔ. (Keɣa 30:2-4) Pɩtasɩ lɛ, Yehowa nawa se ye ɛtɩcɔnɩ mba pɛkɛ ɛ-hɔʋ taa ñɩma yɔ pɔ-yɔɔ yɔ, pɩpɩzɩɣ nɛ pitibi-ɖʋ  yɔɔɔ. Ɛlabɩ tamaɣ se ɛcɔŋnɩ ɖo-tomnaɣ yɔɔ nɛ ɖe-fezuu taa kɩcɛyɩm ɖeɖe, nɛ nabʋyʋ ɛɛkaɣ-ɩ ɖɩɣʋ nʋmɔʋ se ɛtaaɖɔ tɔm ndʋ tɩ-yɔɔ!—Mat. 6:30-33; 24:45.

15. (a) Kaɖɛ nɖɩ kajalaɣ pɩnzɩ mɩnʋʋ taa Krɩstʋ ñɩma kataa? (b) Keɣa 36:18, 19 sɩɣnɩ-ɖʋ se ɖa-taa ɛtɛmnɩ tɔm ndʋ?

¹⁵ Ye ɖɩtɔzʋʋ mbʋ pʋyɔɔ Yehowa ɖɔŋ ɛ-tɔm yɔɔ yɔ pɩ-yɔɔ yɔ, ɖa-taa pɩzɩɣ nɛ pɩtɛ se ɛkaɣ-ɖʋ sɩnʋʋ alɩwaatʋ ndʋ ɖɩwɛɣ liidiye kɛdɛɖaɣ taa yɔ. Iyele nɛ ɖɩna kajalaɣ pɩnzɩ mɩnʋʋ taa Krɩstʋ ñɩma kɩɖaʋ. Alɩwaatʋ ndʋ nazɩm sɔsɔm nabʋyʋ lɩ ɛgbɛyɛ nɖɩ ɖɩwɛ Yeruzalɛm yɔ ɖɩ-yɔɔ yɔ, “pa-tɩŋa pamɩzɩ ɖama . . . nɛ pɩkazɩ apostoloowaa ɖeke.” (Tʋma 8:1) Maɣzɩ nɛ ŋna wɛtʋ ndʋ papɩzaɣ se pakatɩ yɔ. Liidiye kɛdɛɖaɣ! Pɩtɩla, Krɩstʋ ñɩma mba pelesi pa-ɖɩsɩ nɛ pa-tʋma. Ɛlɛ Yehowa tɩlɔ-wɛ; nɛ patilesi taa leleŋ weyi paawɛna yɔ. (Tʋma 8:4; Ebr. 13:5, 6; Yak. 1:2, 3) Yehowa kaasɩnɩ Krɩstʋ ñɩma siɣsiɣ ñɩma mba, nɛ ɛkaɣ-ɖʋ sɩnʋʋ ɖɔɖɔ.—Kalɩ Keɣa 36:18, 19.

16. Ɛbɛ pɩzɩɣ piyele nɛ ɖɩmaɣzɩ se pɩtɩla sɛtʋ ndʋ ɖɩcɛlɩɣ Yehowa yɔ, tɩtɩmʋ ñɩm ɛ-ɛsɩndaa?

¹⁶ Ðɩwɛɣ nɛ ɖɩkpadɩyɩɣ lɛ, ɖɩpɩzɩɣ nɛ ɖɩpaɣzɩ maɣzʋʋ se mbʋ ɖɩwɛna se ɖɩhaɣ Yehowa yɔ pɩtɩɖɔɔ. Pɩtɩla lɩmaɣza kʋɖʋma ana Wiyaʋ Daviid kaalʋbɩnaa, alɩwaatʋ ndʋ ɛɛwɛɛ nɛ ɛkpadɩyɩɣ yɔ. (Keɣa 70:9) Ɛzɩma Yehowa pɩzɩɣ nɛ ɛsɩnɩ-ɖʋ?

17. Ɛbɛ koobu halɩñɩnʋ Jheri kɩɖaʋ pɩzɩɣ nɛ kɩkpɛlɩkɩ-ɖʋ?

¹⁷ Yele nɛ ɖɩna koobu halɩñɩnʋ Jheri kɩɖaʋ. Paya-ɩ se ewolo Kewiyaɣ Kpaaŋ taa nɛ ɛmʋ falɩsʋʋ nɛ ɛcɔnɩ Yehowa sɛtʋ lona yɔɔ, ɛlɛ ɛtaasɔɔlɩ se ewolo. Ɛyɔɔdaa se: “Mankpadɩyaa, mɛnkɛ lelu nɛ mɛnfɛyɩ niye  hɔɔlʋʋ nakʋyʋ taa se pɩpɩzɩɣ nɛ pɩwazɩ Yehowa. Mɛnfɛyɩ wazaɣ.” Tɛʋ feŋaɣ se pala falɩsʋʋ kediɣzaɣ ŋga lɛ, koobu halɩñɩnʋ ɛnʋ, ɛtɩmnɩ Yehowa nɛ eheyi-i ndʋ payɩ tɩɩwɛ ɛ-laŋɩyɛ taa yɔ. Ɛtalɩ Kewiyaɣ Kpaaŋ taa tɛʋ kifemuu lɛ, ɛɛwɛɛ nɛ ɛnɩɣzɩɣ se ɛzɩ toovenim taa lɛ, pɩɩpɔzaa kpem se ewolo yaa we. Pɛwɛɛ nɛ palakɩ kediɣzaɣ ŋga lɛ, tɔm yɔɔdɩyaa taa lɛlʋ ñɩɣ niye se hɔɔlʋʋ ŋgʋ kɩ-taa ɖɩwɛ niye nɛ kɩ-tɔm cɛyaa nɛ pɩkɩlɩ yɔ, ŋgʋ lɛ ɛzɩma ɖitisiɣ faaa se Yehowa ɛwɩlɩ-ɖʋ tɔm yɔ. Jheri tɔzaa nɛ ɛyɔɔdɩ se: “Maaɖiɣzinaa se, ‘mɛwɛ niye hɔɔlʋʋ ŋgʋ kɩ-taa!’ Peeɖe manpaɣzɩ wiluu, mbʋ pʋyɔɔ yɔ manawa se Yehowa kaawɛɛ nɛ ecosuu ma-adɩma yɔɔ. Ɛwɛɛ nɛ eyeki se man-taa ɛtɛ se mɛwɛnɩ nabʋyʋ mbʋ pɩmʋ ñɩm yɔ se manpɩzɩɣ nɛ maha, nɛ etisi faaa se ɛwɩlɩ-m tɔm!” Jheri maɣzɩ pɩnzɩ nzɩ sɩɖɛwa yɔ sɩ-yɔɔ lɛ ɛyɔɔdɩ se: “Mowokaɣ kediɣzaɣ ŋga ka-taa lɛ, man-taa taawɛɛ leleŋ, nɛ piitibi-m yɔɔɔ. Ɛlɛ malɩɣaɣ lɛ, man-taa kaatɛma, maahiɣ ɖoŋ kpazʋʋ nɛ maawɛ wazaɣ!”

18. Ɛzɩma Bibl wɩlɩɣ se alɩwaatʋ ndʋ ɖɩwɛɣ nɛ ɖɩkpadɩyɩɣ yɔ ɖɛ-Ɛsɔ sɛtʋ mʋʋ ñɩm Yehowa ɛsɩndaa mbʋ?

¹⁸ Ðɩwɛɣ nɛ ɖɩkpadɩyɩɣ lɛ, ɖa-taa pɩzɩɣ nɛ pɩtɛ se Yehowa wɛnɩ tʋmɩyɛ se ɛɖʋʋ-ɖʋ nɛ ɖɩla. (Keɣa 91:13-16) Yesu wɩlɩ-ɖʋ se paa pɩlakɩ-ɖʋ ɛzɩ mbʋ ɖɩpɩzɩɣ labʋ yɔ pɩ-tɔm tɩcɛyɩ yɔ, mbʋ ɖɩpɩzɩɣ labʋ Yehowa tʋmɩyɛ taa yɔ, pɩmʋ ñɩm ɛ-ɛsɩndaa. (Luka 21:2-4) Pʋyɔɔ lɛ, ka ña-lɩmaɣza mbʋ ŋpɩzɩɣ labʋ yɔ pɩ-yɔɔ. Ŋpɩzɩɣ nɛ ŋyɔɔdɩ Yehowa yɔɔ tɔm, ŋtɩmɩ ño-koobiya yɔɔ, nɛ ŋkpazɩ lalaa ɖoŋ se pɔɖɔkɩ pe-siɣsiɣ wɛtʋ. Pɩtɩkɛ mbʋ ŋpɩzɩɣ labʋ yɔ, pɩ-yɔɔ Yehowa kpakɩɣ-ŋ ɛzɩ ŋkɛ weyi ɛ nɛ ɩ palakɩ tʋmɩyɛ yɔ, ɛlɛ ɛzɩma ŋtisiɣ faaa nɛ ŋñaŋɩ-ɩ yɔ, pʋyɔɔ ɛkpakɩɣ-ŋ mbʋ.—1 Kɔr. 3:5-9.

19. Tɔm ndʋ Roma mba 8:38, 39 yeki se ɖa-taa ɛtɛmna?

¹⁹ Ða-taa wɛ leleŋ siŋŋ se ɖɩsɛɣ Yehowa, Ɛsɔ weyi ɛkpakɩɣ mba pɛsɛɣ-ɩ yɔ se pamʋ ñɩm ɛ-ɛsɩndaa siŋŋ yɔ! Ɛlɩzɩ-ɖʋ se ɖɩla ɛ-sɔɔlɩm, nɛ toovenim Ɛsɔ sɛtʋ yekina nɛ ɖe-wezuu caɣʋ wɛɣnɩ tɔbʋʋ nɩʋ siŋŋ nɛ pɩkpaɖɩɣ. (Natʋ 4:11) Ɛjaɖɛ pɩzɩɣ nɛ ɖɩcɔŋnɩ-ɖʋ ɛzɩ ɖɩfɛyɩ wazaɣ yɔ, ɛlɛ pɩtɩkɛ mbʋ Yehowa ñanaɣ-ɖʋ. (Ebr. 11:16, 38) Alɩwaatʋ ndʋ kʋdɔŋ, liidiye kɛdɛɖaɣ yaa akpadɩyɩtʋ yeki nɛ pitiki-ɖʋ yɔɔɔ yɔ, pɩwɛɛ se ɖɩtɔzɩ se nabʋyʋ ɛɛpɩzɩɣ nɛ pɩyasɩ-ɖʋ nɛ ɖa-Caa weyi ɛwɛ ɛsɔdaa yɔ ɛ-sɔɔlɩm.—Kalɩ Roma mba 8:38, 39.