TƆM ÑƲƲ ŊGƲ ÐƖKPƐLƖKƖƔ YƆ 26
“Ɩpɩsɩ mɔn-cɔlɔ”
“Ɩpɩsɩ mɔn-cɔlɔ, nɛ mankaɣ pɩsʋʋ mɩ-cɔlɔ.”—MAL. 3:7.
HENDU 102 “Ðɩsɩnɩ ajamaa”
LƖMAƔZA SƆSƆNA *
1. Ye nɔɔyʋ kaaposini Yehowa nɛ ɛkɔɔ ɛɖaɣnɩ-ɩ paɣzʋʋ sɛʋ yɔ, ɛzɩma pɩlakɩ Yehowa?
ƐZƖ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, Yehowa kpakɩɣ ɛ-tɩ nɛ ɛmaɣzɩɣnɩ ninɖiɣyu kɩbanʋ weyi ɛcɔŋnɩ paa e-heu weyi lɛ ɛ-yɔɔ nɛ sɔɔlɩm yɔ. Nɛ ye nɔɔyʋ eleba yɔ, ɛñɩnɩɣ-ɩ. Yehowa heyi Izrayɛɛlɩ ñɩma mba paaposini-i yɔ se: “Ɩpɩsɩ mɔn-cɔlɔ, nɛ mankaɣ pɩsʋʋ mɩ-cɔlɔ.” Ðɩnawa se lɩmaɣza ana ɛwɛnɩ halɩ nɛ sɔnɔ, mbʋ pʋyɔɔ yɔ, ɛyɔɔdaa se: “Maalɛɣzɩɣ.” (Mal. 3:6, 7) Yesu yɔɔdaa se Yehowa nɛ Ɛsɔ tiyiyaa pa-taa lakɩ leleŋ siŋŋ alɩwaatʋ ndʋ Yehowa sɛyaa mba paaposini Ɛsɔ yɔ pa-taa kʋɖʋm maɣmaɣ pɩsɩɣ ɛ-cɔlɔ yɔ.—Luka 15:10, 32.
2. Ɛbɛ taa ɖɩkaɣ tazʋʋ ñʋʋ kʋnɛ kɩ-taa?
2 Iyele nɛ ɖɩtazɩ Yesu kɩɖaŋ naadozo nɩɩyɩ taa; ɩkpɛlɩkɩɣ-ɖʋ lɔŋ kɩbaŋ pɩlɩɩnɩ ɛzɩma ɖɩsɩnɩ mba paaposini Yehowa yɔ pɩ-yɔɔ. Ðɩkaɣ tazʋʋ wɛtʋ ndʋ ɖeyi ɖeyi pɩpɔzʋʋ-ɖʋ se pɩsa nɛ ɖɩsɩnɩ heŋ weyi ileba yɔ nɛ ɩpɩsɩ Yehowa cɔlɔ yɔ tɩ-taa. Nɛ ɖɩkaɣ naʋ ɖɔɖɔ mbʋ pʋyɔɔ pɩcɛyaa se ɖɩsɩnɩ mba papɩsɩ tɔm susuu yebiyaa yɔ.
PƆƆYAƔ KILEBAƔ ÑƖNƲƲ
3-4. Ɛbɛ yɔɔ halʋ weyi ɛ-tɔm pɔyɔɔdɩ Luka 15:8-10 taa yɔ, ɛwɛɛ nɛ ɛñɩnɩɣ ɛ-tɛ dɩrakɩm pɔɔyaɣ ŋga keleba yɔ camɩyɛ?
3 Pɩwɛɛ se ɖɩñaɣ pana siŋŋ nɛ ɖɩñɩnɩ mba pɔsɔɔlaa se papɩsɩ Yehowa cɔlɔ yɔ. Yesu yɔɔdɩ kɩɖaʋ nakʋyʋ tɔm nɛ pama-kʋ Luka tɛ Evaŋgilim taa. Ɛyɔɔdɩ kɩ-taa ɛzɩma halʋ nɔɔyʋ wɛɛ nɛ ɛñɩnɩɣ nabʋyʋ yɔ pɩ-tɔm. Mbʋ halʋ ɛnʋ ɛñɩnɩɣ yɔ, pɩmʋ ñɩm: Alɩwaatʋ ndʋ tɩ-taa liidiye pɔɔyaɣ ŋga payaɣ se Dɩrakɩm yɔ. Kɛdaɣ ŋga kɔ-hɔɔlʋʋ ŋgʋ kɩ-tɔm cɛyaa yɔ, ŋgʋ lɛ pɔɔyaɣ ŋga ka-ñɩnʋʋ.—Kalɩ Luka 15:8-10.
4 Yesu yɔɔdɩ ɛzɩma pɩlakɩ halʋ ɛnʋ alɩwaatʋ ndʋ ɛnaɣ ɛ-tɛ dɩrakɩm pɔɔyaɣ ŋga kaaleba yɔ. Yesu alɩwaatʋ taa lɛ, alɩwaatʋ ndʋ Izrayɛɛlɩ halʋ nɔɔyʋ ɖɔkʋʋ nesi yɔ, nabʋyʋ taa e-ɖoo haɣ-ɩ dɩrakɩm pɔɔyɩsɩ hiu. Pɩtɩla, pɔɔyɩsɩ hiu nzɩ sɩ-taa lɛɛka lebina mbʋ yɔ. Halʋ ɛnʋ, ɛmaɣzɩɣ se taɣ yɔɔ pɔɔyaɣ ŋga kɔtɔlaa. Pʋyɔɔ ɛsɔbɩ kanɖʋ nɛ ɛñɩnɩɣ, ɛlɛ ɛɛnaɣ nabʋyʋ. Pɩtɩla, ɛ-kanɖʋ taa num eeyeki se kanɖʋ ɛñandɩ camɩyɛ nɛ ɛna sika pɔɔyaɣ cikpelaɣ ŋga. Pʋwayɩ lɛ, ɛwɛɛ nɛ ɛhazɩɣ ɖɩɣa kpeekpe nɛ ɛñɩnɩɣ camɩyɛ. Peeɖe ɛna ɛ-pɔɔyaɣ ñɩm ñɩŋga ŋga, kɛwɛ mʋzʋʋ ŋgʋ ekuwa yɔ kɩ-taa. Pɔɔyaɣ ŋga kɛwɛɛ nɛ kañɩlɩsɩɣ alɩwaatʋ ndʋ ɛkpazɩ ɛ-kanɖʋ yɔ. Ɛna-kɛ lɛ, ɛ-laŋɩyɛ hɛɛ nɛ ɛyaa ɛ-taabalaa nɛ ɛ-cɔlɔ mba nɛ ekpeɣli-wɛ, nɛ eheyi-wɛ tɔm kɩbandʋ ndʋ.
5. Ɛbɛ yɔɔ pɩpɩzɩɣ nɛ pɩwɛɛ kaɖɛ se ɖɩna mba pɛhɛ fezuu taa yɔ?
5 Ðɩkpɛlɩkɩɣ Yesu kɛdaɣ kanɛ ka-taa se alɩwaatʋ ndʋ ɖilesiɣ nabʋyʋ yɔ, pɩpɔzʋʋ-ɖʋ pana ñaɣʋ siŋŋ pʋcɔ nɛ ɖɩna-pʋ. Mbʋ ɖɔɖɔ pɩwɛ mba pɛhɛ fezuu taa yɔ pɔ-hɔɔlʋʋ taa. Pɩwɛɛ se ɖɩñaɣ pana siŋŋ pʋcɔ nɛ ɖɩna-wɛ. Pɩtɩla, peyebu kpɛndʋʋ ɖɔ-yɔɔ se ɖɩsɛɛ Yehowa yɔ, pɩlabɩ pɩnzɩ sakɩyɛ. Halɩ pɩtɩla, pakʋyaa nɛ powolo lona naayɛ taa, nɛ peeɖe koobiya ɩɩsɩŋ-wɛ. Ɛlɛ, ɖa-taa pɩzɩɣ nɛ pɩtɛ se lɛɛlɛɛyɔ lɛ, mba papɩsɩ tɔm susuu yebiyaa yɔ pa-taa nabɛyɛ sɔɔlaa siŋŋ se papɩsɩ Yehowa cɔlɔ. Pɔsɔɔlaa se paɖaɣnɩ kpɛndʋʋ po-koobiya yɔɔ nɛ pɛsɛɛ Yehowa. Ɛlɛ ye nɔɔyʋ ɛtɩsɩnɩ-wɛ yɔ, paapɩzɩɣ nɛ pala mbʋ.
6. Ɛzɩma ɛgbɛyɛ taa ñɩma tɩŋa pɩzɩɣ nɛ paɖʋ nesi nɛ pañɩnɩ mba papɩsɩ tɔm susuu yebiyaa yɔ?
6 Apɩzɩɣ nɛ ɛɖʋ nesi nɛ pañɩnɩ mba pɛhɛ fezuu taa yɔ? Ða-tɩŋa, pʋ-tɔbʋʋ se ɛzʋtʋyaa, nʋmɔʋ lɩzɩyaa, hɔʋ taa ñɩma nɛ ɛgbɛyɛ taa tɔm susuyaa; ɖɩpɩzɩɣ nɛ ɖɩɖʋ nesi nɛ ɖɩñɩnɩ-wɛ. Ña-taabalʋ yaa ñɔ-hɔʋ taa tʋ nɔɔyʋ kɔm nɛ ɛpɩsɩ tɔm susuu yebiyu na? Ye ŋwɛɛ nɛ ŋsusuu tɔm kpaɣ ɖɩɣa nɛ ŋwolo ɖɩɣa yaa samaɣ taa nɛ ŋkatɩ ɛyʋ weyi ɛpɩsɩ tɔm susuu yebiyu yɔ, ɛbɛ pɩpɔzʋʋ se ŋla? Lɩzɩ ɛyʋ ɛnʋ pɩ-taa se ye ɛsɔɔlaa se nɔɔyʋ ewolo nɛ ɛna-ɩ yɔ, pɩkɛdɩɣnɩ-ŋ se ŋcɛlɩ ɛ-tɛ adɖɛɛsɩ yaa ɛ-kaŋgalaafu mayaɣ ɛgbɛyɛ taa ɛzʋtʋyaa.
7. Tɔm ndʋ ɛgbɛyɛ taa ɛzʋtʋyʋ weyi payaɣ se Thomas yɔ ɛyɔɔdaa yɔ, ɛbɛ tɩkpɛlɩkɩɣ-ŋ?
7 Nɩŋgbanzɩ nzɩ ɖeyi ɖeyi ɛzʋtʋyaa pɩzɩɣ pɛkpɛzɩ nɛ pana mba pɔsɔɔlaa se papɩsɩ Yehowa cɔlɔ yɔ? Payaɣ ɛgbɛyɛ taa ɛzʋtʋyʋ nɔɔyʋ se Thomas. * Ɛwɛ Ɛsɩpaañɩ ɛjaɖɛ taa nɛ Aseɣɖe Tɩnaa mba ɛsɩnaa nɛ papɩsɩ ɛgbɛyɛ taa yɔ, pɛcɛzɩ 40. Yʋsɩ tɔm ndʋ ɛyɔɔdaa yɔ; ɛyɔɔdaa se: “Kajalaɣ lɛ, mɔnpɔzʋʋ koobiya ndɩ ndɩ se mana se pasɩm ɖenɖe ɖɛ-ɛgbɛyɛ taa ñɩma mba papɩsɩ tɔm susuu yebiyaa yɔ pɛwɛ lɛɛlɛɛyɔ yɔ yaa we. Yaa mɔnpɔzʋʋ tɔm susuyaa se mana se pɔtɔzʋʋ nɔɔyʋ yɔɔ se eyebi kediɣzisi wobu na. Ɛgbɛyɛ taa ñɩma sakɩyɛ sɔɔlɩ siŋŋ se paɖʋ nesi mbʋ pʋyɔɔ yɔ, pamaɣzɩɣ se pa-tʋmɩyɛ pɩkɛnaa ɖɔɖɔ. Pʋwayɩ, alɩwaatʋ ndʋ mowoki koobiya halaa yaa abalaa mba papɩsɩ tɔm susuu yebiyaa yɔ pɔ-cɔlɔ yɔ, mɔnpɔzʋʋ-wɛ pe-piya nɛ pɔ-hɔʋ taa ñɩma lalaa yɔɔ. Mba papɩsɩ tɔm susuu yebiyaa yɔ, pa-taa nabɛyɛ wokaɣni pe-piya kediɣzisi, nɛ pɩtɩla piya nzɩ sɩɩkɛ tɔm susuyaa alɩwaatʋ natʋyʋ. Papɩzɩɣ nɛ pasɩnɩ piya nzɩ ɖɔɖɔ nɛ sɩpɩsɩ Yehowa cɔlɔ.”
YELE NƐ YEHOWA PƖYALAA NƐ Ɛ-PƐLAA MBA PELEBA YƆ PAPƖSƖ ƐGBƐYƐ TAA
8. Pɩyalʋ kilebu kɩɖaʋ ŋgʋ kɩwɛ Luka 15:17-24 taa yɔ kɩ-taa, wɛtʋ ndʋ caja kaawɛnɩ ɛ-pɩyalʋ weyi ekpiɖaa yɔ ɛ-yɔɔ?
8 Wɛtʋ ndʋ pɩpɔzʋʋ se ɖɩwɛɛna nɛ pɩsa nɛ ɖɩsɩnɩ mba pɔsɔɔlaa se papɩsɩ Yehowa cɔlɔ yɔ? Yʋsɩ lɔŋ weyi ɖɩpɩzɩɣ nɛ ɖɩkpɛlɩkɩ tɔm ndʋ Yesu yɔɔdɩ pɩyalʋ weyi ɛlɩ ɖɩɣa yɔ ɛ-yɔɔ yɔ, ɩ-taa nɩɩyɩ. (Kalɩ Luka 15:17-24.) Yesu lɩzɩ pɩ-taa se pɩyalʋ ɛnʋ ɛkɔm nɛ eɖiɣzina se ɛlabɩ kɩmɛlɛndʋ, nɛ ɛkpaɣ lɩmaɣza se ɛpɩsɩɣ ɖɩɣa. Yesu yɔɔdaa se Caja na ɛ-pɩyalʋ lɛ, ese nɛ ɛkatɩ-ɩ nɛ ekpibi-i nɛ taa leleŋ nɛ ɛwɩlɩ-ɩ se ɛsɔɔlɩ-ɩ. Pɩyalʋ ɛhʋyɛ kaawɛ nɛ ɖɩcɛyɩɣ-ɩ nɛ pɩlakɩ-ɩ ɛzɩ ɛtɩmʋna se patasɩ-ɩ yaʋ se pɩyalʋ yɔ. Caja na ɛ-pɩyalʋ pʋtɔdɩyɛ, nɛ pɩyalʋ heyi-i ɛzɩma ɖeyi ɖeyi pɩlakaɣ-ɩ yɔ. Nɛ caja kpɛzɩ nɩŋgbanzɩ nasɩyɩ ɖeyi ɖeyi se ɛwɩlɩ ɛ-pɩyalʋ se ɛtɩmʋ-ɩ ɛzɩ tʋmlaɖʋ yɔ, ɛlɛ ɛmʋ-ɩ ɛzɩ hɔʋ taa tʋ kʋsɔɔlʋ yɔ. Pɩsa nɛ caja wɩlɩ ɛ-pɩyalʋ se ɛsɔɔlɩ-ɩ nɛ ɛ-taa labɩ leleŋ se ɛpɩsɩ ɖɩɣa lɛ, ɛlabɩ ɖʋtʋ se pala kazandʋ nɛ ɛcɛlɩ wondu kɩbandʋ se posuu ɛ-pɩyalʋ weyi ekpiɖaa yɔ.
9. Wɛtʋ ndʋ pɩpɔzʋʋ se ɖɩwɛɛna nɛ pɩsa nɛ ɖɩsɩnɩ mba pɛhɛ fezuu taa yɔ nɛ papɩsɩ Yehowa cɔlɔ? (Kalɩ aɖakaɣ “ Ɛzɩma ɖɩpɩzɩɣ nɛ ɖɩsɩnɩ mba pɛhɛ fezuu taa nɛ pɔsɔɔlaa se paɖaɣnɩ sɛʋ Yehowa yɔ.”)
9 Yehowa wɛ ɛzɩ caja weyi ɛ-tɔm pɔyɔɔdɩ kɩɖaʋ ŋgʋ kɩ-taa yɔ. Ɛsɔɔlɩ ɖo-koobiya mba pɛhɛ fezuu taa yɔ nɛ ɛsɔɔlaa se papɩsɩ ɛ-cɔlɔ. Ye ɖɩmaɣzɩɣnɩ Yehowa yɔ, ɖɩpɩzɩɣ ɖɩsɩnɩ-wɛ nɛ papɩsɩ. Pɩsa nɛ ɖɩla mbʋ lɛ, pɩpɔzʋʋ se ɖɩwɛɛnɩ suuɖu, pʋtɔdɩyɛ naʋ nɛ sɔɔlɩm. Ɛbɛ yɔɔ pɩpɔzʋʋ se ɖɩwɛɛnɩ wɛtʋ ndʋ, nɛ ɛzɩma ɖɩpɩzɩɣ nɛ ɖɩla nɛ ɖɩwɛɛnɩ wɛtʋ ndʋ?
10. Ɛbɛ yɔɔ pɩpɔzʋʋ se ɖɩwɛɛnɩ suuɖu nɛ pɩsa nɛ ɖɩsɩnɩ nɔɔyʋ nɛ ɛɖaɣnɩ kpaʋ ɖoŋ fezuu taa?
10 Pɩpɔzʋʋ se ɖɩwɛɛnɩ suuɖu mbʋ pʋyɔɔ yɔ, pʋcɔ nɛ nɔɔyʋ ɖaɣnɩ kpaʋ ɖoŋ fezuu taa lɛ, pɩkpakɩɣ alɩwaatʋ. Ɛyaa mba paapɩsɩ tɔm susuu yebiyaa nɛ pɩɖɛɛ yɔ, pa-taa sakɩyɛ yɔɔdaa se pɩɩpɔzaa se ɛzʋtʋyaa nɛ ɛgbɛyɛ taa ñɩma lalaa powolo nɛ pana-wɛ tam sakɩyɛ pʋcɔ nɛ paɖaɣnɩ paɣzʋʋ sɛʋ Yehowa. Payaɣ koobu halɩñɩnʋ nɔɔyʋ se Nancy, nɛ ɛwɛ Aazii ɛjaɖɛ naɖɩyɛ taa. Ɛmawa se: “Ɛgbɛyɛ taa taabalʋ kɩbanʋ nɔɔyʋ sɩnɩ-m siŋŋ. Mankpadɩyaa, paa mbʋ yɔ ɛɛsɔɔlɩ-m. Ɛtɔzɩ-m alɩwaatʋ kɩbandʋ ndʋ ma nɛ ɩ ɖɩkpɛndaa nɛ ɖɩla tʋmɩyɛ nɛ pɩɖɛɛ yɔ tɩ-yɔɔ. Ewelisaɣni-m camɩyɛ alɩwaatʋ ndʋ meheyaɣ-ɩ ɛzɩma pɩlakɩ-m yɔ, nɛ ɛtasaɣ-m lɔŋ alɩwaatʋ ndʋ pɩpɔzʋʋ yɔ. Ɛwɩlaa se ɛkɛ taabalʋ kɩbanʋ weyi ɛsɔɔlaa se ɛsɩnɩ-m paa alɩwaatʋ ndʋ lɛ yɔ.”
11. Ɛbɛ yɔɔ pɩpɔzʋʋ se ɖɩwɛɛnɩ pʋtɔdɩyɛ naʋ nɛ pɩsa nɛ ɖɩsɩnɩ weyi ɛmʋ pana yɔ?
11 Alɩwaatʋ ndʋ nɔɔyʋ mʋʋ pana yɔ, ɛpɩzɩɣ nɛ ɛnɩɩ siziŋ ɛzɩ heŋ lakʋʋ ɛyʋ yɔɔ nɛ ɛnɩɣ siziŋ yɔ. Pʋtɔdɩyɛ naʋ wɛ ɛzɩ kɔyɛ kɩbanɖɛ nɖɩ ɖɩpɩzɩɣ ɖɩsɩnɩ ɛyʋ ɛnʋ nɛ pɩlabɩ-ɩ weewee yɔ. Mba pɛhɛ fezuu taa yɔ, pa-taa nabɛyɛ lʋbɩnɩ lɩmaɣza kɩdɛkɛda pɩnzɩ sakɩyɛ mbʋ pʋyɔɔ yɔ ɛgbɛyɛ taa tʋ nɔɔyʋ ɖʋ-wɛ ɖɩwɩzɩyɛ. Pʋyɔɔ lɛ, pe-liu fɛyɩ se papɩsɩ Yehowa cɔlɔ. Nabɛyɛ pɩzɩɣ nɛ pamaɣzɩ se pomuli-wɛ. Pɩpɩzɩɣ nɛ pɩpɔzɩ se nɔɔyʋ ewelisini-wɛ nɛ ɛnɩɩ pɔ-tɔm taa. (Yak. 1:19) María kaahɛ fezuu taa alɩwaatʋ natʋyʋ. Ɛyɔɔdaa se: “Pɩɩpɔzɩ-m ɛyʋ nɔɔyʋ, weyi ewelisiɣni-m camɩyɛ, ɛhɛzɩ ma-laŋɩyɛ, ɛtasɩ-m lɔŋ kɩbaŋ nɛ ɛsɩnɩ-m yɔ.”
12. Ɛzɩma tɩyɛ Yehowa sɔɔlɩm wɛ ɛzɩ nimiye yɔ?
12 Bibl yɔɔdʋʋ se sɔɔlɩm mbʋ Yehowa wɛnɩ ɛ-samaɣ yɔɔ yɔ, pɩwɛ ɛzɩ nimiye yɔ. Ɛzɩma tɩyɛ Ɛsɔ sɔɔlɩm wɛ ɛzɩ nimiye yɔ? Ðɩkpaɣ kɩɖaʋ kʋnɛ. Kpaɣ se ŋtɔlɩ pɔʋ sɔsɔʋ nakʋyʋ taa. Pɔʋ ŋgʋ kilimi siŋŋ nɛ ŋŋpɩzɩɣ se ŋlɩɩ kɩ-taa ña-maɣmaɣ. Nʋmɔʋ ŋgʋ kɩ-yɔɔ papɩzɩɣ patɩŋna nɛ paya ña-ñʋʋ kaɖɛ wɛtʋ ndʋ tɩ-taa yɔ, ŋgʋ lɛ se pɩwɛɛ se nɔɔyʋ etisi nimiye nɛ ɛhɔmɩ-ŋ nɛ ɛlɩzɩ. Yehowa yɔɔdɩ Izrayɛɛlɩ piya nzɩ sileba yɔ sɩ-tɔm se: “Mɔhɔŋaɣ-wɛ . . . nɛ sɔɔlɩm taŋgbaka nimaɣ.” (Ozee 11:4) Sɔnɔ, lɩmaɣza ana ɖɔɖɔ Ɛsɔ wɛnɩ mba peyebi-i sɛʋ, nɛ pakatɩɣ kala nɛ nɩɣzɛ siŋŋ yɔ pɔ-yɔɔ. Pɩwɛ ɛzɩ pɛwɛ pɔʋ sɔsɔʋ nakʋyʋ taa yɔ. Ɛñɩnɩɣ se patɩlɩ se ɛsɔɔlɩ-wɛ, nɛ ɛsɔɔlaa se ɛhɔm-wɛ nɛ ɛkɔnɩ ɛ-cɔlɔ. Nɛ Yehowa pɩzɩɣ nɛ ɛtɩŋnɩ ñɔ-yɔɔ nɛ ɛwɩlɩ-wɛ ɛ-sɔɔlɩm.
13. Ɛzɩma Pablo kɩɖaʋ wɩlɩɣ se ɖɔ-sɔɔlɩm pɩzɩɣ nɛ pɩsɩnɩ lalaa nɛ papɩsɩ Yehowa cɔlɔ?
13 Pɩcɛyaa se ɖiyele nɛ mba pɛhɛ fezuu taa yɔ, pa-taa tɛ se Yehowa sɔɔlɩ-wɛ nɛ ɖa ɖɔɖɔ ɖɩsɔɔlɩ-wɛ. Pablo weyi ɛ-tɔm ɖɩyɔɔdɩ tɔm ñʋʋ ŋgʋ kɩɖɛwa yɔ kɩ-taa yɔ, ɛɛhɛ fezuu taa nɛ pɩcɛzɩ pɩnzɩ 30 yɔɔ. Ɛyɔɔdaa se: “Tanaŋ nakʋyʋ tɛɛ, malɩɣaɣ ɖɩɣa lɛ, koobu halɩñɩnʋ akpadɩyʋ kɩbanʋ nɔɔyʋ katɩ-m nɛ ɛyɔɔdɩnɩ-m nɛ sɔɔlɩm. Peeɖe manpaɣzɩ wiluu ɛzɩ pɩɣa yɔ. Meheyi-i se pɩwɛ ɛzɩ Yehowa tiyini-i se ɛyɔɔdɩnɩ-m yɔ. Alɩwaatʋ ndʋ tɩ-taa ɖeyi ɖeyi maakpaɣ lɩmaɣza se manpɩsɩɣ Yehowa cɔlɔ.”
SƖNƖ AJAMAA NƐ SƆƆLƖM
14. Ɛzɩ kɩɖaʋ ŋgʋ kɩwɛ Luka 15:4, 5 taa yɔ kɩwɩlʋʋ yɔ, ninɖiɣyu naɣ heu kilebu nɛ pɩtɛ lɛ, ɛbɛ ɛlakɩ?
14 Ðɩnaɣ mba papɩsɩ tɔm susuu yebiyaa yɔ nɛ pɩtɛ lɛ, pɩpɔzʋʋ se ɖiwolo pɩ-yɔɔ nɛ ɖɩsɩɣnɩ-wɛ nɛ ɖɩkpazɩɣ-wɛ ɖoŋ. Ɛzɩ pɩyalʋ kilebu weyi ɛ-tɔm Yesu yɔɔdɩ ɛ-kɩɖaʋ taa yɔ, pɩtɩla pɛwɛɛ nɛ panɩɣ siziŋ pa-maɣzɩm taa, nɛ pɩkaɣ kpaɣʋ alɩwaatʋ sakɩyɛ pʋcɔ nɛ pɔ-yɔɔ cɛ. Mbʋ pɩtalɩ-wɛ Sataŋ ɛjaɖɛ taa yɔ pʋyɔɔ lɛ, pɩtʋʋ fɛyɩ se patɩtasɩ wɛʋ ɖoŋ fezuu taa ɛzɩ ɖooo lɛ yɔ. Pɩpɔzʋʋ se ɖɩsɩnɩ-wɛ nɛ pakpazɩ ɖoŋ tisuu mbʋ pɛwɛnɩ Yehowa yɔɔ yɔ. Heu kilebu kɩɖaʋ taa, Yesu yɔɔdɩ ɛzɩma ninɖiɣyu hɔɔlʋʋ heu ɛ-hazasɩ yɔɔ nɛ ɛpɩsɩɣnɩ-ɩ ewiɖe cɔlɔ yɔ pɩ-tɔm. Ninɖiɣyu tɛm kpaɣʋ alɩwaatʋ nɛ ɖoŋ nɛ ɛñɩnɩnɩ heu kilebu. Ɛlɛ, eɖiɣzinaa se pɩkaɣ pɔzʋʋ se ɛkpaɣ heu ɛnʋ nɛ ɛpɩsɩnɩ kalakʋ taa mbʋ pʋyɔɔ yɔ, ɛlɛ ɛɛkaɣ wɛnʋʋ ɖoŋ se ɛpɩsɩ ɛ-maɣmaɣ.—Kalɩ Luka 15:4, 5.
15. Ɛzɩma ɖɩpɩzɩɣ nɛ ɖɩsɩnɩ ajamaa mba pɔsɔɔlaa se papɩsɩ Yehowa cɔlɔ yɔ? (Kalɩ aɖakaɣ “ Wonuu ŋgʋ kɩwɛ wazaɣ siŋŋ yɔ.”)
15 Pɩpɩzɩɣ nɛ pɩpɔzɩ se ɖɩkpaɣ alɩwaatʋ sakɩyɛ nɛ ɖoŋ nɛ ɖɩsɩnɩ mba pɛhɛ fezuu taa yɔ nɛ pawa kaɖɛ nɖɩ ɖɩɖɩkɩ-wɛ nʋmɔʋ se pataaɖaɣnɩ paɣzʋʋ Yehowa sɛʋ yɔ. Ɛlɛ pɩtɩŋnɩ Yehowa fezuu, ɛ-Tɔm nɛ ɛgbɛyɛ takayɩsɩ yɔɔ lɛ, ɖɩpɩzɩɣ nɛ ɖɩsɩnɩ-wɛ nɛ paɖaɣnɩ kpaʋ ɖoŋ fezuu taa. (Roma 15:1) Ɛzɩma ɖɩpɩzɩɣ nɛ ɖɩla mbʋ? Ɛgbɛyɛ taa ɛzʋtʋyʋ nɔɔyʋ wɛ niye, nɛ ɛyɔɔdaa se: “Mba pɛhɛ fezuu taa nɛ pakpakɩɣ lɩmaɣza se paɖaɣnɩɣ paɣzʋʋ Yehowa sɛʋ yɔ, pɩpɔzʋʋ se pɛkpɛlɩkɩnɩ pa-taa sakɩyɛ Bibl.” * Pʋyɔɔ lɛ, ye ɛzʋtʋyʋ nɔɔyʋ ɛpɔzɩ-ŋ se ŋkpɛlɩkɩnɩ pa-taa nɔɔyʋ Bibl yɔ, pɩpɔzʋʋ se ŋtisi waɖɛ nɖɩ nɛ taa leleŋ, ye ŋpɩzɩɣ yɔ. Ɛzʋtʋyʋ ɛnʋ, ɛyɔɔdaa ɖɔɖɔ se: “Pɩpɔzʋʋ se tɔm susuyu weyi ɛkpɛlɩkɩɣnɩ ɛyʋ weyi ɛhɛ fezuu taa yɔ, ɛkɛ taabalʋ kɩbanʋ nɛ eyele nɛ pɩwɛɛ ɛlɛ kɛlɛʋ se eheyi-i ɛ-taa tɔm.”
TAA LELEŊ ƐSƆDAA NƐ TAA LELEŊ TATAA
16. Ɛzɩma ɖɩlaba nɛ ɖɩna se Ɛsɔ tiyiyaa kaɣ-ɖʋ sɩnʋʋ?
16 Kɩɖaŋ sakɩyɛ wɛɛ nɛ ɩwɩlɩɣ se Ɛsɔ tiyiyaa wɛɛ nɛ pasɩɣnɩ-ɖʋ se ɖɩna mba pɛhɛ fezuu taa nɛ pɔsɔɔlɩ se papɩsɩ Yehowa cɔlɔ yɔ. (Natʋ 14:6) Kɩɖaʋ nakʋyʋ yɔ. Payaɣ koobu abalɩñɩnʋ nɔɔyʋ se Silvio nɛ ɛwɛ Ekʋwatɛɛrɩ ɛjaɖɛ taa; ɛɛhɛ fezuu taa nɛ etendi Yehowa se etiyi nɔɔyʋ nɛ ɛsɩnɩ-ɩ nɛ ɛpɩsɩ ɛgbɛyɛ taa. Ɛwɛɛ nɛ ɛtɩmɩɣ lɛ, ɛzʋtʋyaa naalɛ talɩ ɛ-ɖɩɣa. Patalɩ ɛ-cɔlɔ mbʋ lɛ, pa-taa kaawɛ leleŋ se papaɣzɩ-ɩ sɩnʋʋ.
17. Ye ɖɩsɩɣnɩ mba pɛhɛ fezuu taa yɔ, ɛzɩma pɩkaɣ-ɖʋ labʋ?
17 Ye ɖɩsɩɣnɩ mba pɛhɛ fezuu taa yɔ se papɩsɩ Yehowa cɔlɔ yɔ, ɖɩkaɣ hiu taa leleŋ siŋŋ. Koobu abalɩñɩnʋ nʋmɔʋ lɩzɩyʋ nɔɔyʋ keŋni mba pɛhɛ fezuu taa yɔ siŋŋ, yʋsɩ tɔm ndʋ ɛyɔɔdaa yɔ. Ɛyɔɔdaa se: “Nabʋyʋ taa pɩwɛ-m kaɖɛ se mankpa man-tɩ nɛ mantaatisi taa leleŋ ɛsɩtɛɣlɩm. Man-taa wɛ leleŋ siŋŋ se ma nɛ Yehowa ɖɩlabɩ tʋmɩyɛ nɛ ɖɩsɩnɩ ɛ-sɛyaa kʋsɔɔlaa taa nɔɔyʋ nɛ ɛlɩɩ Sataŋ ɛjaɖɛ taa nɛ ɛpɩsɩ ɛgbɛyɛ taa.”—Tʋma 20:35.
18. Ye ŋkɛ weyi ɛhɛ fezuu taa yɔ, ɛbɛ ña-taa pɩzɩɣ nɛ pɩtɛmna?
18 Ye ŋkɛ weyi ɛhɛ fezuu taa yɔ, ña-taa pɩzɩɣ nɛ pɩtɛ se Yehowa sɔɔlɩ-ŋ mbʋ. Ɛsɔɔlaa se ŋpɩsɩ ɛ-cɔlɔ. Pɩkaɣ pɔzʋʋ se ŋkpɛzɩ nɩŋgbanzɩ nasɩyɩ nɛ pɩsa nɛ ŋpɩsɩ ɛ-cɔlɔ. Ɛlɛ, ɛzɩ caja weyi ɛ-tɔm Yesu yɔɔdɩ ɛ-kɩɖaʋ taa yɔ, Yehowa ɖaŋ kpam se ŋpɩsɩ, nɛ ɛkaɣ-ŋ mʋʋ nɛ taa leleŋ.
HENDU 103 Ɛzʋtʋyaa kɛnɩ Ɛsɔ kʋjɔʋ
^ tay. 5 Yehowa sɔɔlaa se mba peyebi tɔm susuu nɛ kediɣzisi wobu yɔ, papɩsɩ ɛ-cɔlɔ. Ðɩpɩzɩɣ nɛ ɖɩñaɣ pana nɛ ɖɩkpazɩ ɖoŋ mba pɛhɛ fezuu taa nɛ pɔsɔɔlɩ se petisi nɛ pɔɖɔ Yehowa tɔm tʋnɛ tɩ-yɔɔ yɔ. Ɛtɔm se: “Ɩpɩsɩ mɔn-cɔlɔ.” Tɔm ñʋʋ kʋnɛ kɩ-taa, ɖɩkaɣ yɔɔdʋʋ ɛzɩma ɖɩpɩzɩɣ nɛ ɖɩsɩnɩ-wɛ yɔ pɩ-tɔm.
^ tay. 7 Pɛlɛɣzɩ hɩla naayɛ.
^ tay. 15 Pɩtɩla, Ɛbɛ ɖɩla nɛ ɖɩwɛɛ Ɛsɔ sɔɔlɩm taa? takayaɣ hɔɔlɩŋ nɩɩyɩ kpɛlɩkʋʋ kaasɩnɩ mba pɛhɛ fezuu taa yɔ pa-taa nabɛyɛ, ɛlɛ lalaa lɛ, paɖaɣnɩ kpɛlɩkʋʋ Approchez-vous de Jéhovah takayaɣ taa ñʋŋ nɩɩyɩ nɛ pɩsɩnɩ-wɛ. Ɛgbɛyɛ taa Ɛsɔ sɛtʋ kɔɔmiite kaɣnɩ naʋ weyi ɛmʋnaa se ɛkpɛlɩkɩnɩ weyi ɛhɛ fezuu taa yɔ.
^ tay. 68 KƖLƐMƖŊ YƆƆ TƆM: Koobiya abalɩñɩma ndɩ ndɩ naadozo wɛɛ nɛ pasɩɣnɩ koobu nɔɔyʋ weyi ɛsɔɔlaa se ɛpɩsɩ yɔ. Payaɣ-ɩ kaŋgalaafu yɔɔ yaa powoki ɛ-cɔlɔ ɖoŋ ɖoŋ, pawɩlɩɣ-ɩ se pɔsɔɔlɩ-ɩ, nɛ pewelisiɣni-i camɩyɛ nɛ pɩwɩlɩɣ se panɩɣ ɛ-tɔm taa yɔ.
