1-2. Ɛzɩ 1 Timootee 6:20 yɔɔdʋʋ yɔ, ɛbɛ pɩɩpɔzaa se Timootee ɛla?

ÐOŊ ÐOŊ lɛ, ɖɩcɛlɩɣ lalaa ɖo-wondu ndʋ tɩmʋ ñɩm yɔ se pɔcɔnɩ tɩ-yɔɔ. Ðɩpɩzɩɣ nɛ ɖiwoni ɖe-liidiye nɛ ɖɩsɩɩ liidiye koozaɣ nakɛyɛ taa. Ðɩlakɩ mbʋ lɛ, ɖɩtaɣ liu se pɔcɔŋnɩ ɖɩ-yɔɔ camɩyɛ nɛ ɖiileki yaa nɔɔyʋ ɛɛmɩlɩɣ-ɖɩ. Ye mbʋ, ye pɔtɔm se pɛcɛlɩ nɔɔyʋ ñɩm nabʋyʋ nɛ ɛcɔnɩ pɩ-yɔɔ yɔ, ɖɩnɩɣ pɩ-taa.

² Kalɩ 1 Timootee 6:20. Apostoloo Pɔɔlɩ tɔzɩ Timootee se pɛcɛlɩ-ɩ nabʋyʋ nɛ pɩmʋ ñɩm; mbʋ lɛ tamaɣ ŋga Ɛsɔ labɩ ɛyaa yɔ kɔ-yɔɔ toovenim sɩmtʋ. Yehowa ha Timootee waɖɛ ɖɔɖɔ se ‘esusi tɔm’ nɛ ‘ɛla tɔm kɩbandʋ susuyu tʋmɩyɛ.’ (2 Tim. 4:2, 5) Pɔɔlɩ seɣti Timootee se ɛɖɔkɩ mbʋ paɖʋzɩ e-nesi tɛɛ yɔ kpam. Ɛzɩ Timootee yɔ, ɖa ɖɔɖɔ paɖʋzɩ nabʋyʋ ɖe-nesi tɛɛ nɛ pɩmʋ ñɩm. Ɛbɛ paɖʋzɩ ɖe-nesi tɛɛ? Nɛ ɛbɛ yɔɔ pɩpɔzʋʋ se ɖɩcɔnɩ ñɩm mbʋ Yehowa ɖʋzɩ ɖe-nesi tɛɛ yɔ pɩ-yɔɔ camɩyɛ?

3-4. Lɩmaɣza wena a-yɔɔ Bibl taa toovenim tɔm mʋ ñɩm yɔ, a-taa naayɛ lɛ wena?

³ Yehowa sɔɔlɩ-ɖʋ nɛ eyele nɛ ɖɩtɩlɩ toovenim tɔm ndʋ tɩwɛ Bibl taa yɔ camɩyɛ. Toovenim tɔm ndʋ tɩmʋ ñɩm mbʋ pʋyɔɔ yɔ, tɩsɩɣnɩ-ɖʋ se ɖɩtɩlɩ ɛzɩma ɖɩla nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa yɔ. Tɩwɩlɩɣ-ɖʋ ɖɔɖɔ ɛzɩma ɖɩla nɛ ɖihiɣ taa leleŋ siŋŋ wezuu caɣʋ taa yɔ. Ye ɖɩtɩlɩ toovenim tɔm ndʋ nɛ ɖɩɖɔŋ tɩ-yɔɔ yɔ, piholuu-ɖʋ cɛtɩm wɩlɩtʋ nɛ wezuu kɩdɛkɛdʋʋ caɣʋ yomiye taa.—1 Kɔr. 6:9-11.

⁴ Lɩmaɣzɩyɛ lɛɛɖɛ nɖɩ ɖɩ-yɔɔ toovenim tɔm ndʋ tɩwɛ Ɛsɔtɔm taa yɔ tɩmʋ ñɩm yɔ, nɖɩ lɛ se Yehowa kuluu tɩ-yɔɔ nɛ ɛwɩlɩɣ-tʋ mba pɛwɛnɩ tɩ luzuu nɛ pɛwɛnɩ “laŋa kɩbana” yɔ  pe-ɖeke. (Tʋma 13:48) Ɛyaa mba pɛwɛnɩ tɩ luzuu yɔ, petisiɣ se yom siɣsiɣ tʋ nɛ lɔŋsɩnɖʋ wɩlɩɣnɩ-ɖʋ Bibl taa tɔm sɔnɔ. (Mat. 11:25; 24:45) Ye patɩsɩnɩ-ɖʋ yɔ, ɖɩɩpɩzɩɣ nɛ ɖɩnɩɩ Bibl taa; nɛ nabʋyʋ fɛyɩ se pɩmʋ ñɩm nɛ pɩkɩlɩ se ɖɩnɩɩ kɩ-taa.—Adu. 3:13, 15.

5. Waɖɛ nɖɩ ɖɔɖɔ Yehowa ha-ɖʋ?

⁵ Yehowa ha-ɖʋ waɖɛ ɖɔɖɔ se ɖɩwɩlɩ lalaa ɛ nɛ ɛ-tamasɩ pɔ-yɔɔ toovenim tɔm. (Mat. 24:14) Tɔm ndʋ ɖisusuu yɔ, tɩmʋ ñɩm pɩdɩɩfɛyɩ mbʋ pʋyɔɔ yɔ, tɩsɩɣnɩ ɛyaa se papɩzɩ nɛ pasʋʋ Yehowa hɔʋ taa, nɛ tɩhaɣ-wɛ waɖɛ se pehiɣ wezuu maatɛŋ. (1 Tim. 4:16) Paa ɖɩpɩzɩɣ se ɖisusi tɔm pazɩ yaa sakɩyɛ yɔ, ɖɩwɛɛ nɛ ɖɩɖʋʋ nesi tʋmɩyɛ nɖɩ ɖɩ-tɔm kɩlɩ cɛyʋʋ yɔ; peɖiɣni-ɖɩ labʋ sɔnɔ. (1 Tim. 2:3, 4) Waɖɛ sɔsɔɖɛ kpem pɩkɛnaa se ɖa nɛ Ɛsɔ ɖɩkpɛndaa nɛ ɖɩlakɩ tʋmɩyɛ!—1 Kɔr. 3:9.

6. Ɛbɛ kaatalɩ ɛyaa mba patɩpɩzɩ nɛ pɔcɔnɩ pa-tɩ yɔɔ camɩyɛ yɔ?

⁶ Timootee alɩwaatʋ taa, ɛyaa nabɛyɛ taawɩlɩ pɛ-ɛsɩmɩyɛ waɖɛ nɖɩ pɛwɛna se pa nɛ Ɛsɔ pɛkpɛndaa nɛ palakɩ tʋmɩyɛ yɔ ɖɩ-yɔɔ. Demaasɩ kaasɔɔlɩ ɛjaɖɛ yɔɔ ɖʋtʋ tʋnɛ, pʋyɔɔ eyebi waɖɛ nɖɩ ɛwɛna se ɛ nɛ Pɔɔlɩ pɛkpɛndaa nɛ palakɩ tʋmɩyɛ yɔ. (2 Tim. 4:10) Fiijɛɛlɩ nɛ Ɛrmoojɛɛnɩ paayebi tɔm susuu mbʋ pʋyɔɔ yɔ, sɔɔndʋ kpaɣaɣ-wɛ se ɛyaa ɩtaanazɩ-wɛ ɛzɩ paanazʋʋ Pɔɔlɩ yɔ. (2 Tim. 1:15) Imenee, Alɛkɩsandrɩ nɛ Filɛɛtɩ paapɩsɩ tisuu yebiyaa nɛ peyele Yehowa sɛʋ. (1 Tim. 1:19, 20; 2 Tim. 2:16-18) Ɛyaa panɛ pa-tɩŋa paasɔɔlɩ Yehowa ɛlɛ pʋwayɩ lɛ, pɔsɔɔ se mbʋ Yehowa ha-wɛ yɔ pɩmʋ ñɩm siŋŋ.

7. Nʋmɔŋ weyi yɔɔ Sataŋ tɩŋɩɣna se ɛtakɩ-ɖʋ?

⁷ Ɛzɩma Sataŋ ñakɩ pana se eyele nɛ ɖilesi ñɩm mbʋ Yehowa ɖʋzɩ ɖe-nesi tɛɛ yɔ? Na nʋmɔŋ weyi ɩ-yɔɔ Sataŋ tɩŋɩɣna yɔ ɩ-taa nɩɩyɩ: Ɛtɩŋɩɣnɩ aleɣya nɛ réseaux sociaux waa yɔɔ se eyele nɛ ɖɩmaɣzɩ nɛ ɖɩla mbʋ piyeki se ɖiyele Yehowa sɔɔlʋʋ yaa ɛ-paɣtʋ yɔɔ ɖɔm yɔ pazɩ pazɩ. Ɛñakɩ pana se ɛtɩŋnɩ tɔm ndʋ lalaa maɣzɩɣ ɖɔ-yɔɔ yɔ, yaa nazɩm yɔɔ nɛ eyele nɛ sɔɔndʋ kpa-ɖʋ nɛ ɖiyele tɔm susuu. Nɛ ɛñakɩ pana se epeɣzi-ɖʋ nɛ ɖiwelisi tisuu yebiyaa “tɔm hɔm mbʋ pɛcɛtɩɣ nɛ payaɣ se ‘sɩmtʋ’ yɔ” se pɩsa nɛ ɖikizi toovenim.—1 Tim. 6:20, 21.

8. Ɛbɛ koobu Daniel kɩɖaʋ kpɛlɩkɩɣ-ŋ?

⁸ Ye ɖɩtɩkpa ɖa-tɩ yɔ, pazɩ pazɩ lɛ, ɖɩpɩzɩɣ nɛ ɖiyele ñɔnʋʋ toovenim. Iyele nɛ ɖɩna Daniel * kɩɖaʋ. Ɛɛsɔɔlɩ video yɔɔ aleɣya naayɛ labʋ. Ɛyɔɔdaa se: “Manpaɣzɩ video yɔɔ aleɣya labʋ alɩwaatʋ ndʋ maawɛnɩ pɩnzɩ hiu mbʋ yɔ yɔ. Kajalaɣ lɛ, malakaɣ aleɣya  wena amaɣzɩ wɛʋ ɖeu yɔ. Ɛlɛ, pazɩ pazɩ lɛ, manpaɣzɩ labʋ aleɣya wena a-taa wɛ puuyaɣ lakasɩ nɛ feziŋ kɩdɛkɛdɩŋ yaʋ lakasɩ yɔ.” Alɩwaatʋ wɛɛ tɩɖɛɣ lɛ, ɛkpakaɣ ɛzɩ ñɩɣtʋ 15 mbʋ yɔ paa evemiye nɖɩ nɛ ɛlakɩnɩ video yɔɔ aleɣya. Daniel yɔɔdaa se: “Ma-maɣmaɣ maanawa se aleɣya wena malakaɣ yɔ, nɛ alɩwaatʋ ndʋ mankpakaɣ nɛ malakɩnɩ-yɛ yɔ, piyeba nɛ mɛwɛɛ nɛ monposuuni Yehowa. Ɛlɛ, ma-laŋɩyɛ kɔm nɛ ɖɩsʋʋ kpɩzɩŋ nɛ mamaɣzaɣ se Bibl paɣtʋ kila iitukuuni-m.” Ye mbʋ, ye ɖɩtɩkpa ɖa-tɩ yɔ, aleɣya pɩzɩɣ ayele nɛ pɩwɛɛ kɛlɛʋ se ɖiyele ñɔnʋʋ toovenim. Ye pɩlabɩ mbʋ yɔ, ɖɩpɩzɩɣ nɛ ɖilesi ñɩm mbʋ Yehowa ha-ɖʋ yɔ.

9. Ɛzɩ 1 Timootee 1:18, 19 yɔɔdʋʋ yɔ, anɩ Pɔɔlɩ kpaɣ Timootee nɛ ɛmaɣzɩna?

⁹ Kalɩ 1 Timootee 1:18, 19. Pɔɔlɩ kpaɣ Timootee nɛ ɛmaɣzɩnɩ sɔɔja nɛ eseɣti-i se ‘ewolo you kɩbaŋʋ labʋ yɔɔ.’ You ŋgʋ, kɩtaakɛ tomnaɣ yɔɔ ñɩŋgʋ, ɛlɛ fezuu taa ñɩŋgʋ. Hɔɔlɩŋ weyi taa Krɩstʋ ñɩma wɛ ɛzɩ sɔɔjanaa mba pɛwɛ you taa yɔ? Wɛtʋ ndʋ pɩpɔzʋʋ se ɖa Krɩstʋ sɔɔjanaa ɖɩñaɣ pana nɛ ɖɩwɛɛna? Iyele nɛ ɖɩna lɔŋ kagbanzɩ weyi ɖɩpɩzɩɣ nɛ ɖɩkpɛlɩkɩ kɩɖaʋ ŋgʋ Pɔɔlɩ labɩnɩ tʋmɩyɛ yɔ kɩ-taa yɔ. Lɔŋ ɛnɩ, ɩpɩzɩɣ ɩsɩnɩ-ɖʋ nɛ ɖɩñɔɔnɩ toovenim kpam.

10. (a) Ye pɔtɔm se ɖɩñɔɔnɩ Ɛsɔ yɔ, pʋ-tɔbʋʋ lɛ suwe? (b) Nɛ ɛbɛ yɔɔ pɩpɔzʋʋ se ɖɩñɔɔnɩ-ɩ?

¹⁰ Ñaɣ pana nɛ ŋñɔɔnɩ Ɛsɔ. Sɔɔja kɩbanʋ wɛɣ siɣsiɣ. Ɛkaɣ lʋbʋ siŋŋ se ɛkandɩyɩ ɛyʋ weyi ɛsɔɔlɩ-ɩ yɔ ɛ-yɔɔ, yaa ɛkandɩyɩ mbʋ pɩmʋ ñɩm ɛ-ɛsɩndaa yɔ pɩ-yɔɔ. Pɔɔlɩ kaaseɣti Timootee se ɛñaɣ pana nɛ ɛñɔɔnɩ Ɛsɔ, pʋ-tɔbʋʋ se ɛwɛɛ siɣsiɣ Ɛsɔ ɛsɩndaa. (1 Tim. 4:7) Ye ɖɩñakɩ pana nɛ ɖɩsɔɔlʋʋ Ɛsɔ nɛ ɖɩñɔʋnɩ-ɩ nɛ pɩkɩlɩɣ yɔ, pɩkaɣ-ɖʋ seɣtuu se ɖɩñɔɔnɩ toovenim nɛ pɩkɩlɩ.—1 Tim. 4:8-10; 6:6.

11. Ɛbɛ yɔɔ pɩpɔzʋʋ se ɖɩfalɩsɩɣ ɖa-tɩ?

¹¹ Falɩsɩɣ ña-tɩ nɛ ŋlakɩ mbʋ pɩtʋʋzaa yɔ. Pɩsa nɛ sɔɔja nɔɔyʋ mʋna se ɛla you paa ɛzɩmtaa lɛ, pɩwɛɛ se ɛfalɩsɩɣ ɛ-tɩ. Timootee pɩzaa nɛ ɛlʋbɩnɩ Sataŋ mbʋ pʋyɔɔ yɔ, ɛɖɔm Pɔɔlɩ lɔŋ tasʋʋ yɔɔ. Pɔɔlɩ tasɩ-ɩ lɔŋ se ese evebitu kɔɖɛyɩ, ɛwɛɛnɩ wɛtʋ kɩbandʋ nɛ ɛkpakɩɣ alɩwaatʋ nɛ ɛ nɛ e-koobiya pacakɩ. (2 Tim. 2:22) Pʋcɔ nɛ Timootee pɩzɩ nɛ ɛla mbʋ lɛ, pɩɩpɔzaa se ɛfalɩsɩɣ ɛ-tɩ. Pɩpɔzʋʋ se ɖɩfalɩsɩɣ ɖa-tɩ nɛ pɩsa nɛ ɖɩlʋbɩnɩ ɖo-tomnaɣ kɔɖɛyɩ nɛ ɖɩwabɩ-kʋ. (Roma 7:21-25) Pɩtasɩ lɛ, pɩpɔzʋʋ se ɖɩfalɩsɩɣ ɖa-tɩ nɛ pɩsa nɛ ɖiwolo pɩ-yɔɔ nɛ ɖɩhɔzʋʋ ɛyʋtʋ kɩbɩndʋ nɛ ɖisuu ɛyʋtʋ kɩfatʋ. (Efɛz. 4:22, 24) Nɛ alɩwaatʋ ndʋ pɩnɩɣ-ɖʋ evemiye ɖɩdɛnɖɛ yɔ, pɩpɩzɩɣ nɛ pɩpɔzɩ se ɖɩñaɣ pana siŋŋ nɛ ɖiwolo kediɣzaɣ.—Ebr. 10:24, 25.

12. Nʋmɔŋ weyi yɔɔ ɖɩpɩzɩɣ ɖɩtɩŋna nɛ ɖɩwɛɛ niye ɛzɩma ɖɩlakɩnɩ Bibl tʋmɩyɛ yɔ pɩ-hɔɔlʋʋ taa nɛ pɩkɩlɩ?

¹² Pɩpɔzʋʋ se sɔɔja ɛkpɛlɩkɩ ɛzɩma ɛlabɩnɩ e-you wondu tʋmɩyɛ yɔ. Pɩsa nɛ ɛwɛɛ niye lɛ, pɩpɔzʋʋ se ɛlakɩ mbʋ ɖoŋ ɖoŋ. Mbʋ ɖɔɖɔ pɩpɔzʋʋ se ɖɩwɛɛ niye ɛzɩma ɖɩlakɩnɩ tʋmɩyɛ Ɛsɔtɔm yɔ pɩ-hɔɔlʋʋ taa. (2 Tim. 2:15) Ðɩpɩzɩɣ nɛ ɖɩkpɛlɩkɩ ɛzɩma ɖɩwɛɛ niye hɔɔlɩŋ nɩɩyɩ taa yɔ kediɣzisi taa. Ɛlɛ ye ɖɩsɔɔlaa se ɖɩsɩnɩ lalaa nɛ petisi se Bibl taa toovenim tɔm pɩzɩɣ nɛ tɩwazɩ-wɛ yɔ, pɩpɔzʋʋ se ɖɩkpɛlɩkɩɣ-kʋ ɖoŋ ɖoŋ. Pɩpɔzʋʋ se ɖɩlabɩnɩ tʋmɩyɛ Ɛsɔtɔm nɛ ɖɩkpazɩ ɖe-tisuu ɖoŋ. Pɩwɩlɩɣ se Bibl kalʋʋ ɖeke tɩmaɣ. Pɩpɔzʋʋ se ɖɩmaɣzɩ tɔm ndʋ ɖɩkalɩɣ yɔ tɩ-yɔɔ nɛ ɖɩñɩnɩ ɛgbɛyɛ takayɩsɩ taa nɛ pɩsa nɛ ɖɩnɩɩ Masɩ taa camɩyɛ nɛ ɖɩlabɩnɩ-sɩ tʋmɩyɛ. (1 Tim. 4:13-15) Ye ɖɩlakɩ mbʋ yɔ, ɖɩkaɣ pɩzʋʋ nɛ ɖɩlabɩnɩ Ɛsɔtɔm tʋmɩyɛ nɛ ɖɩwɩlɩ tɔm lalaa. Pɩwɩlɩɣ se pɩtɩkɛ Bibl taa masɩ ɖeke  ɖɩkalɩɣ-wɛ. Ðɩsɔɔlaa se ɖɩsɩnɩ ɖɔ-tɔm welisiyaa nɛ panɩɩ mayaɣ ŋga ɖɩkalɩ-wɛ yɔ ka-taa nɛ patɩlɩ ɛzɩma kotukuuni-wɛ yɔ. Ye ɖɩkpɛlɩkɩɣ Bibl ɖa-tɩ yɔɔ ɖoŋ ɖoŋ yɔ, piyeki nɛ ɖɩwɛɛ niye Ɛsɔtɔm wɩlʋʋ taa nɛ pɩkɩlɩ.—2 Tim. 3:16, 17.

13. Ɛzɩ Ebree mba 5:14 yɔɔdʋʋ yɔ, ɛbɛ yɔɔ pɩwɛɛ se ɖɩwɛɛ lɛɣtʋ?

¹³ Wɛɛ lɛɣtʋ. Pɩwɛɛ se sɔɔja ɛtɩlɩ kaɖɛ nɖɩ ɖɩwɛ ɛsɩndaa yɔ nɛ ɛfɛɛ-ɖɩ. Pɩwɛɛ se ɖa ɖɔɖɔ ɖɩñaɣ pana nɛ ɖɩtɩlɩ wɛtʋ ndʋ tɩpɩzɩɣ nɛ tɩkɔnɩ-ɖʋ kaɖɛ yɔ nɛ pʋwayɩ lɛ ɖɩla nabʋyʋ nɛ ɖɩfɛɛ kaɖɛ nɖɩ. (Adu. 22:3; kalɩ Ebree mba 5:14.) Pɩpɔzʋʋ se ɖɩlɩzɩ aleɣya wena ɖɩlakɩ yɔ nɛ lɛɣtʋ. Ðoŋ ɖoŋ lɛ, pawɩlɩɣ wezuu kɩdɛkɛdʋʋ caɣʋ lakasɩ teelee yɔɔ nɛ filimwaa taa. Lakasɩ nzɩ, sɩɖʋʋ Ɛsɔ ɖɩwɩzɩyɛ nɛ sɩkɔŋnɩ ɛyʋ kaɖɛ. Pʋyɔɔ lɛ, ɖikiziɣ aleɣya ana mbʋ pʋyɔɔ yɔ, apɩzɩɣ nɛ acamɩ sɔɔlɩm mbʋ ɖɩwɛnɩ Ɛsɔ yɔɔ yɔ pazɩ pazɩ.—Efɛz. 5:5, 6.

14. Ɛzɩma lɛɣtʋ sɩnɩ Daniel?

¹⁴ Daniel weyi ɛ-tɔm ɖɩyɔɔdaa nɛ pɩɖɛɛ yɔ, ɛkɔm nɛ eɖiɣzina se ɛkpaɣ alɩwaatʋ nɛ ɛlakɩ aleɣya wena a-taa wɛ puuyaɣ nɛ feziŋ kɩdɛkɛdɩŋ yaʋ lakasɩ yɔ lɛ, pɩkɔnɩ-ɩ kaɖɛ. Peeɖe ɛñɩnɩ Watchtower Library taa mbʋ pɩpɩzɩɣ pɩsɩnɩ-ɩ se ɛcɔnɩ kaɖɛ nɖɩ ɖi-ɖeɖe yɔ. Ðoŋ weyi pɩɩwɛnɩ ɛ-yɔɔ? Pɩɩsɩnɩ-ɩ nɛ eyele video yɔɔ aleɣya wena afɛyɩ ɖeu yɔ a-labʋ. Eyebi aleɣya wena ɛlakaɣ intɛrnɛɛtɩ yɔɔ yɔ a-labʋ, nɛ ɛcɛ ɛ nɛ mba palakaɣ aleɣya ana yɔ pa-taabalɩyɛ. Daniel yɔɔdaa se: “Mbʋ ɛzɩ maakpaɣ alɩwaatʋ nɛ malakɩ video yɔɔ aleɣya lɛ, manpaɣzɩ kpaɣʋ alɩwaatʋ nɛ ma nɛ ɛgbɛyɛ taa taabalaa ɖɩlakɩ tʋma lɛɛna.” Lɛɛlɛɛyɔ, Daniel kɛ nʋmɔʋ lɩzɩyʋ nɛ ɛgbɛyɛ taa ɛzʋtʋyʋ.

15. Ɛbɛ yɔɔ cɛtɩm tɔm fɛyɩ ɖeu?

¹⁵ Ɛzɩ Timootee yɔ, pɩwɛɛ se ɖa ɖɔɖɔ ɖɩmaɣzɩ nɛ ɖɩna kaɖɛ nɖɩ tisuu yebiyaa cɛtɩm tɔm pɩzɩɣ nɛ tɩkɔna yɔ. (1 Tim. 4:1, 7; 2 Tim. 2:16) Papɩzɩɣ nɛ pañaɣ pana se pɔyɔɔdɩ cɛtɩm tɔm ɖo-koobiya yɔɔ, yaa peyele nɛ ɖɩpaɣzɩ pɩtʋʋ Yehowa ɛgbɛyɛ yɔɔ. Cɛtɩm tɔm ndʋ, tɩpɩzɩɣ nɛ tɩcamɩ ɖe-tisuu. Pɩwɛɛ se ɖɩkpa ɖa-tɩ nɛ cɛtɩm tɔm ndʋ titaapeɣzi-ɖʋ. Ɛbɛ yɔɔ? Mbʋ pʋyɔɔ yɔ, “ɛyaa mba pa-lɩmaɣza wɛɛkaa nɛ pɛfɛyɩnɩ toovenim yɔ,” mba susuuni tɔm ndʋ. Pa-kaɖʋwa lɛ se pa nɛ ɛyaa papaɣzɩ “tɔm hɔm nɛ [papaɣzɩ you] tɔm pee yɔɔ.” (1 Tim. 6:4, 5) Pañɩnɩɣ se ɖitisi pɛ-cɛtɩm tɔm yɔɔ nɛ ɖɩtaatasɩ ɖo-koobiya taʋ liu.

16. Pɩwɛɛ se ɖɩkpa ɖa-tɩ nɛ ɛbɛ ɛtaakɛzɩ ɖa-lɩmaɣza?

 ¹⁶ Taayele nɛ nabʋyʋ kɛzɩ ña-lɩmaɣza. Timootee kaakɛ “Krɩstʋ Yesu sɔɔja kɩbanʋ,” pʋyɔɔ lɛ, pɩɩwɛɛ se ɛka ɛ-lɩmaɣza Ɛsɔ sɛtʋ tʋmɩyɛ yɔɔ nɛ etaayele nɛ tomnaɣ yɔɔ wondu nɛ wezuu caɣʋ taa kaɖʋsɩ lɛɛsɩ kɛzɩ ɛ-lɩmaɣza. (2 Tim. 2:3, 4) Ɛzɩ Timootee yɔ, pɩtɩpɔzɩ se ɖɩkɩlɩ sɔɔlʋʋ tomnaɣ yɔɔ wondu. “Ðoŋ weyi ñɩm wɛna” yɔ, ɩpɩzɩɣ nɛ iyele nɛ ɖilesi sɔɔlɩm mbʋ ɖɩwɛnɩ Yehowa yɔɔ yɔ. Ɩpɩzɩɣ iyele ɖɔɖɔ se ɖɩtaatasɩ wɛnʋʋ ɛsɩmɩyɛ Ɛsɔtɔm yɔɔ nɛ piyele nɛ pɩɩtasɩɣ-ɖʋ labʋ liu se ɖisusi-tʋ ɛyaa lalaa. (Mat. 13:22) Pɩwɛɛ se ɖɩcaɣ wezuu kɛlɛʋ nɛ ɖɩkpaɣ ɖa-alɩwaatʋ nɛ ɖo-ɖoŋ nɛ ‘ɖiwolo pɩ-yɔɔ nɛ ɖɩcalɩnɩ ñɩnʋʋ Kewiyaɣ.’—Mat. 6:22-25, 33.

17-18. Ɛbɛ ɖɩpɩzɩɣ ɖɩla nɛ ɖɩkandɩyɩ ɖa nɛ Yehowa ɖa-taabalɩyɛ yɔɔ?

¹⁷ Ñɔɔzɩ ña-tɩ nɛ ŋpɩzɩ nɛ ŋkpaɣ lɩmaɣza kpɛdɛyɛ. Pɩwɛɛ se sɔɔja ɛñɔɔzɩ ɛ-tɩ nɛ ɛtɩlɩ mbʋ ɛkaɣ labʋ se ɛkandɩyɩ ɛ-tɩ yɔɔ yɔ. Ye ɖɩsɔɔlaa se ɖɩkandɩyɩ mbʋ Yehowa ɖʋzɩ ɖe-nesi tɛɛ yɔ pɩ-yɔɔ yɔ, pɩwɛɛ se alɩwaatʋ ndʋ ɖɩnaɣ kaɖɛ naɖɩyɛ yɔ, ɖɩla nabʋyʋ kpɛdɛyɛ. Ɛbɛ pɩzɩɣ pɩsɩnɩ-ɖʋ nɛ ɖɩla mbʋ? Pɩwɛɛ se ɖɩñɔɔzɩ ɖa-tɩ nɛ ɖɩtɩlɩ ɛzɩma ɖɩkaɣ labʋ alɩwaatʋ ndʋ ɖɩkatɩɣ kaɖɛ wɛtʋ natʋyʋ yɔ.

¹⁸ Kɩɖaʋ nakʋyʋ yɔ: Ajɛɛ naayɛ taa, alɩwaatʋ ndʋ ɛyaa kpeɣliɣ se pala nabʋyʋ yɔ, ɖoŋ ɖoŋ lɛ peheyiɣ-wɛ se pɔcɔna nɛ pana se ye pɩsa miŋ yɔ, le papɩzɩɣ patɩŋna nɛ palɩɩ kɛlɛʋ. Ɛbɛ yɔɔ? Peheyiɣ-wɛ se pala mbʋ nɛ ye asɛyʋʋ nakʋyʋ ɛlakɩ yɔ, pese lɛɛ lɛɛ nɛ palɩɩ. Ða ɖɔɖɔ, ɖɩpɩzɩɣ nɛ ɖɩñɔɔzɩ ɖa-tɩ nɛ ɖɩtɩlɩ mbʋ ɖɩkaɣ labʋ ye ɖɩlɩ kʋzʋʋ kɩdɛkɛdʋʋ lakasɩ, puuyaɣ lakasɩ yaa tisuu yebiyaa tɔm natʋyʋ yɔɔ tuda intɛrnɛɛtɩ yɔɔ, filim nakʋyʋ taa yaa teelee yɔɔ yɔ. Ye ɖɩñɔɔzɩ ɖa-tɩ nɛ ɖɩɖaŋ mbʋ ɖɩpɩzɩɣ nɛ ɖɩkatɩnɩ ɛsɩndaa yɔ, ɖɩpɩzɩɣ nɛ ɖɩla nabʋyʋ kpɛdɛyɛ nɛ ɖɩkandɩyɩ ɖa nɛ Yehowa ɖa-taabalɩyɛ yɔɔ, nɛ ɖɩwɛɛ kele kele ɛ-ɛsɩndaa tam.—Keɣa 100:3; 1 Tim. 4:12.

19. Ye ɖɩkandɩyɩ ñɩm mbʋ Yehowa ha-ɖʋ yɔ pɩ-yɔɔ yɔ, wazasɩ nzɩ ɖɩkaɣ hiɣu?

¹⁹ Pɩwɛɛ se ɖɩkandɩyɩ ñɩm mbʋ Yehowa ha-ɖʋ yɔ pɩ-yɔɔ. Mbʋ yɔ: Toovenim tɔm ndʋ tɩwɛ Bibl taa yɔ, nɛ waɖɛ nɖɩ ɖɩwɛna se ɖɩwɩlɩ-tʋ lalaa yɔ. Ye ɖɩlabɩ mbʋ yɔ, ɖɩkaɣ wɛnʋʋ ɛhʋyɛ kele kele ñɩnɖɛ, ɖe-wezuu caɣʋ wɛɛnɩ tɔbʋʋ nɩʋ nɛ ɖihiɣ taa leleŋ alɩwaatʋ ndʋ ɖɩsɩɣnɩ lalaa se patɩlɩ Yehowa yɔ. Yehowa sɩɣnɩ-ɖʋ nɛ ɖɩpɩzɩ nɛ ɖɩɖɔkɩ mbʋ ɛɖʋzɩ ɖe-nesi tɛɛ yɔ kpam.—1 Tim. 6:12, 19.