OTIRISI tɛtʋ ndʋ payaɣ se Graz yɔ, tɩ-taa palʋlɩ-m. Mɔnkɔm nɛ mɛwɛɛnɩ pɩnzɩ lʋbɛ lɛ, powoni-m sɩsɩtaanaa sukuli. Ɛlɛ ɛzɩma manaɣaɣ fadanaa nɛ sɩsɩtaanaa pacakaɣ kʋzʋʋ kɩdɛkɛdʋʋ wezuu yɔ pʋyɔɔ lɛ, mon-ɖoo lɩzɩ-m sukuli ŋgʋ kɩ-taa pʋcɔ nɛ pɩnaɣ tɛ.

Pʋwayɩ lɛ powoni-m sukuli kɩfalʋʋ taa (sukulibiya sʋwaɣ sukuli ŋgʋ kɩ-taa). Ðoo naayɛ taa lɛ, man-caa kɔɔ sukuli taa peeɖe nɛ ɛkpaɣ-m nɛ ɖiwolo ɖɩɖʋ kʋyʋʋ Schladming tɛtʋ taa mbʋ pʋyɔɔ yɔ you kaasa miŋ Graz tɛtʋ taa. Ðɩtɩɩtɛzɩ kondoloko nɛ pitileɖi lɛ, pɔyɔkɩ-kʋ pʋʋ pʋʋ. Kɩyakʋ nakʋyʋ ma nɛ me-neze ɖɩɩwɛ ɖɩɣa kadaɣ taa lɛ, pɔtɔ-ɖʋ malɩfa nɛ ɛsɔdaa lɔɔɖɩyɛ naɖɩyɛ taa. You kɔm nɛ kɩtɛ lɛ, manɩɩ pɩ-taa kpayɩ kpayɩ se cooci ñʋndɩnaa nɛ komina pɔlɔ-ɖʋ.

Pɩnaɣ 1950 taa Yehowa Aseɣɖe Tʋ nɔɔyʋ paɣzɩ Bibl kpɛlɩkɩnʋʋ mon-ɖoo. Mowokaɣ nɛ mewelisiɣni-wɛ alɩwaatʋ ndʋ pɛkpɛlɩkaɣ yɔ, nɛ halɩ mantɩŋaɣ mon-ɖoo nɛ mowoki kediɣzisi nasɩyɩ. Mon-ɖoo taa kɔm nɛ pɩtɛ se Yehowa Aseɣɖe Tɩnaa wɩlɩɣnɩ toovenim lɛ, ɛha ɛ-tɩ nɛ pamɩyɩsɩ-ɩ lɩm pɩnaɣ 1952 taa.

Pʋbʋ taa lɛ, ɛgbɛyɛ nɖɩ ɖɩɩwɛ ɖe-egeetiye taa yɔ, halaa akpadɩyaa kaakɩlɩnɩ ɖɔʋ ɖɩ-taa. Pʋyɔɔ lɛ, pɩlakaɣ-m ɛzɩ halaa akpadɩyaa ɛgbɛyɛ pɩɩkɛna yɔ. Ɛlɛ pʋwayɩ mowobi ɛgbɛyɛ naɖɩyɛ taa lɛ, mana se evebiya nɛ pɛlaa paaɖɔ peeɖe kpem. Peeɖe manɩ pɩ-taa se ɛgbɛyɛ nɖɩ ɖɩ-taa mon-ɖoo kaawɛɛ yɔ, ɖɩtɩkɛ halaa akpadɩyaa ɛgbɛyɛ. Manpɩsɩ Graz tɛtʋ taa lɛ, manpaɣzɩ kediɣzisi tɩŋa wobu. Pitileɖi lɛ; ma ɖɔɖɔ menɖiɣzina se tɔm ndʋ mɛnkpɛlɩkaɣ yɔ tɩɩkɛ toovenim tɔm ndʋ tɩ-yɔɔ ndɛŋgbɛzaɣ fɛyɩ yɔ. Mɔnkɔm menɖiɣzina ɖɔɖɔ se Yehowa kɛ Ɛsɔ weyi ɛ-sɛyaa pɩzɩɣ nɛ pataa-ɩ liu paa ɛzɩmtaa se ɛsɩɣnɩ-wɛ yɔ. Ðɩpɩzɩɣ nɛ ɖɩtaa-ɩ liu halɩ pɩkpɛndɩnɩ alɩwaatʋ ndʋ pɩlakɩ-ɖʋ ɛzɩ kɩlabɩm nabʋyʋ fɛyɩ yɔ.—Keɣa 3:6, 7.

Maasɔɔlaa se mawɩlɩ toovenim tɔm ɛyaa lalaa. Mɔ-hɔʋ taa mba manpaɣzɩnaa. Pʋbʋ taa lɛ, Mon-kɔɔnaa naanza kaatɛm kɛʋ wɩlɩyaa nɛ  pataatasɩ wɛʋ ɖɩɣa. Ɛzɩma palakaɣ tʋma tɛtʋ ndɩ ndɩ taa yɔ, mɛyɛlaɣ nɛ mowoki pɛ-tɛ nɛ menseɣtiɣ-wɛ se pɛkpɛlɩkɩ Bibl. Mbʋ pɩlɩ pɩ-taa yɔ lɛ se mɔn-kɔɔnaa mba pa-naanza, man-ɖalʋ nɛ me-neu pa-tɩŋa papɩsɩ Yehowa Aseɣɖe Tɩnaa.

Manpaɣzɩ tɔm susuu kpaɣ ɖɩɣa nɛ ŋwolo ɖɩɣa nɛ pɩla kpɩtaŋ naalɛ lɛ, mankatɩ halʋ nɔɔyʋ nɛ ɛpaɣzɩ Bibl kpɛlɩkʋʋ. Ɛɖɛnɩ ɛsɩndaa nɛ ɛha ɛ-tɩ nɛ pamɩyɩsɩ-ɩ lɩm. Nɛ pʋwayɩ lɛ, ɛ-walʋ nɛ ɛ-pɩyalaa naalɛ patɩŋ ɛ-nɩŋgbanzɩ taa. Ɛzɩma mɛnkpɛlɩkaɣnɩ Bibl halʋ ɛnʋ yɔ, pɩɩsɩnɩ-m fezuu taa kpem. Ɛbɛ yɔɔ? Mbʋ pʋyɔɔ yɔ toovenim taa lɛ, nɔɔyʋ taakpɛlɩkɩnɩ-m Bibl wiɖiyi. Pʋyɔɔ lɛ, pɩɩpɔzaa se mɔñɔɔzʋʋ man-tɩ camɩyɛ pʋcɔ nɛ mowolo ɛ-cɔlɔ nɛ ɖɩkpɛlɩkɩ. Tobi lɛ, mancalaɣnɩ man-tɩ kpɛlɩkɩnʋʋ nɛ pʋwayɩ lɛ, mowoki mɛnkpɛlɩkɩɣnɩ men-Bibl kpɛlɩkɩyʋ. Toovenim taa lɛ, pɩɩsɩnɩ-m nɛ manɩɩ toovenim tɔm taa camɩyɛ nɛ pɩkpaɖɩ. Pɩtalɩ ɖomaɣ fenaɣ Pɩnaɣ 1954 taa lɛ, mankpaɣ man-tɩ nɛ maha Yehowa nɛ pamɩyɩsɩ-m lɩm.

Pɩnaɣ 1955 taa lɛ, mowobi ajɛɛ kigbeɣliŋ Caama, Fransɩ nɛ Aŋgletɛɛrɩ ajɛɛ taa. Maawobi kigbeɣluu taa Lɔndrɩ lɛ, mankatɩ Albert Schroeder. Ɛɛkɛ Gileyaadɩ sukuli taa wɩlɩyʋ nɛ pʋwayɩ lɛ ɛkɔɔ nɛ ɛla tʋmɩyɛ Nɔɔɖɛyaa Ɛgbɛyɛ taa. Kɩyakʋ nakʋyʋ ɖiwoba se ɖikilimi wondu ɖɩzɩyɛ nɖɩ payaɣ se British Museum yɔ lɛ, koobu Schroeder wɩlɩ-ɖʋ Bibl takayɩsɩ kɩbɩnzɩ nasɩyɩ. Paama Ɛsɔ hɩɖɛ sɩ-taa nɛ Ebree masɩ. Koobu Schroeder kaawɩlɩ-ɖʋ ɖɔɖɔ mbʋ pʋyɔɔ takayɩsɩ nzɩ sɩ-tɔm kaacɛyaa yɔ. Piitukuni-m siŋŋ nɛ manɖʋ man-taa se mañakɩ pana nɛ pɩkpaɖɩ nɛ mawɩlɩ ɛyaa toovenim tɔm ndʋ tɩwɛ Bibl taa yɔ.

Pɩtalɩ Kɔlaɣ fenaɣ kɩyakʋ kajalaɣ ñɩŋgʋ wiye pɩnaɣ 1956 taa lɛ, manpaɣzɩ paa ɖooye nʋmɔʋ lɩzʋʋ tʋmɩyɛ. Pɩlabɩ fenasɩ naanza lɛ, paha-m waɖɛ se manpaɣzɩ nʋmɔʋ lɩzʋʋ kiya tʋmɩyɛ Mistelbach tɛtʋ taa Otirisi ɛjaɖɛ taa. Pʋbʋ taa lɛ, Yehowa Aseɣɖe Tʋ nɔɔyʋ taawɛ peeɖe. Pɩtaawɛɛ kɛlɛʋ. Ɛbɛ yɔɔ? Koobu weyi paatiyi ma nɛ ɩ peeɖe yɔ, ɛ-wɛtʋ kaawɛ ndɩ kpem nɛ ma-ñɩndʋ. Maawɛnɩ pɩnzɩ 19 nɛ maalɩnɩ tɛtʋ sɔsɔtʋ taa ɛlɛ ɛnʋ ñaawɛnɩ pɩnzɩ 25 nɛ ɛɛlɩnɩ kɔfɩ taa. Ɛɛsɔɔlɩ kʋyʋʋ lɔŋ kpem tanamɩŋ tɛɛ. Ɛlɛ ma lɛ, maasɔɔlɩ tanamɩŋ tɛɛ ɖom. Ðoo yuu lɛ, mantaasɔɔlɩ ɖou lɔŋ, ŋgʋ ɛnʋ ñaasɔɔlɩ ɖou lɔŋ. Ɛlɛ ɛzɩma ɖɩlakaɣnɩ Bibl lɔŋ tasʋʋ tʋmɩyɛ yɔ, pɩsɩnɩ-ɖʋ nɛ wɛtʋ ndɩ ndɩ ndʋ ɖɩɩwɛna yɔ tɩtɩkɔnɩ tɔm ɖɛ-hɛkʋ taa, ɛlɛ ɖɩkpɛndaa nɛ ɖɩla nʋmɔʋ lɩzʋʋ tʋmɩyɛ camɩyɛ.

Toovenim taa lɛ, kala lɛɛna kaawɛnɩ ɛsɩndaa. Ɛyaa nazɩ-ɖʋ nabʋyʋ taa, ɛlɛ Ɛsɔ tɩlɔ-ɖʋ. (2 Kɔr. 4:7-9) Kɩyakʋ nakʋyʋ ɖiwobi tɛtʋ cikpetu natʋyʋ taa se ɖisusuu tɔm lɛ, tɛtʋ taa mba hɛɖɩ pa-hasɩ kpasɩ nɛ peyebi-sɩ. Peeɖe peeɖe lɛ, hasɩ kɔɔ nɛ sɩcɔɔ ma nɛ man-taabalʋ sɩta nɛ sikpeziɣ-ɖʋ nɛ sɩñɩzɩɣ. Peeɖe ma nɛ man-taabalʋ ɖɩɖɔkɩ ɖama nesi nɛ mantɩmnɩ Ɛsɔ se: “Hayɩ Yehowa ɖitendi-ŋ, hasɩ sɩnɛ sɩɩcɩyɩɣ-ɖʋ lɛ, yele nɛ ɖɩsɩ kpaagbaa!” Hasɩ ñɔtɩnɩ-ɖʋ kpam lɛ, sɩsɩŋ nɛ sɩsa-ɖʋ suŋ nɛ piyele sɩɖɛɛ. Piiyeba nɛ ɖɩna kaɣlaa se Yehowa kandɩyɩnɩ ɖɔ-yɔɔ. Pʋwayɩ lɛ ɖɩsʋʋ tɛtʋ ndʋ tɩ-taa nɛ ɖisusi tɔm. Tɔm susuu tʋmɩyɛ kaaha-ɖʋ taa leleŋ siŋŋ peeɖe, mbʋ pʋyɔɔ yɔ ɛyaa kaamʋ-ɖʋ camɩyɛ kpem. Pɩtɩla ɛzɩma hasɩ taalabɩ-ɖʋ kɩdɛkɛdɩm nabʋyʋ, yaa ɛzɩma ɖɩɩlabɩ abalɩtʋ wɛtʋ ndʋ tɩ-taa yɔ mbʋ ɖɩɣzɩnɩ-wɛ. Pʋwayɩ pa-taa nabɛyɛ kɔm papɩsɩ Yehowa Aseɣɖe Tɩnaa.

Ɛlɛ pɩɩkazɩ kaɖɛ lɛɛɖɛ ɖɔɖɔ. Kɩyakʋ nakʋyʋ lɛ, ɖɩɣdʋ weyi ɛ-tɛ ɖɩɩlabɩ haya yɔ, ɛhaɣ sʋlʋm lɛ, ɛkɔɔ nɛ ɛpaɣzɩ-ɖʋ ñazʋʋ se ɛkʋʋ-ɖʋ mbʋ pʋyɔɔ yɔ ɖɩwɛɛ ɖɩcɛyɩɣ egeetiye taa mba.  Ɛ-halʋ ñaɣ pana se ɛkpa-ɩ se ɛtaala mbʋ ɛlɛ ɛtɩpɩzɩ. Ɛɛwɛɛ nɛ eholuu lɛ, ɖɩɩwɛ ɖɛ-ɛsɔdaa kuduyuu tɛɛ nɛ ɖɩnɩɣ ɛ-taŋ. Peeɖe ɖɩɖɩɣ nɔnɔɔ nɛ ɖɩpaɣzɩ ɖo-wondu kpeɣluu. Alɩwaatʋ ndʋ ɖɩtʋlɩ nɔnɔɔ lɛ, ɖɩna-ɩ ɛɛɖɔkɩ sɩɣa sɔsɔɔ nakɛyɛ nɛ ɛsɩŋ escalier yɔɔ nɔnɔɔ cɔlɔ kpam. Ðɩna-ɩ mbʋ lɛ, ɖɩkpaɣ ɖo-wondu tɩŋa payɩ nɛ ɖɩlɩɩnɩ nɔnɔɔ lɛɛka ŋga kaawɛnɩnɩ ɖaŋ wayɩ kiŋ yɔ nɛ wiɖiyi ɖɩtɩtasɩ pɩsʋʋ kaaʋ.

Ðɩɖɛɛ nɛ ɖiwolo agɔma ɖɩɣa nakɛyɛ taa nɛ ɖɩla haya nʋmʋʋ. Pʋwayɩ ɖɩlabɩ ɛzɩ pɩnaɣ kʋɖʋmaɣ mbʋ yɔ agɔma ɖɩɣa taa peeɖe. Halɩ piiyeba nɛ ɖɔ-tɔm susuu tʋmɩyɛ ɖɛɛnɩ ɛsɩndaa. Ɛzɩma tɩyɛ? Agɔma ɖɩɣa ŋga, kaawɛ tɛtʋ hɛkʋ taa nɛ ɖe-Bibl kpɛlɩkɩyaa nabɛyɛ kaasɔɔlaa se pɔkɔŋ peeɖe nɛ ɖɩkpɛlɩkɩɣ. Pitileɖi lɛ ɖɩpaɣzɩ kediɣzaɣ ŋga payaɣaɣ se Takayaɣ kpɛlɩkʋʋ yɔ nɛ Feŋuu Tilimiye ɖɔɖɔ kpɛlɩkʋʋ paa kpɩtaʋ ŋgʋ. Ða-nʋmʋʋ tɛɛ ɖɩlakaɣ kediɣzisi nzɩ nɛ ɛyaa ɛzɩ 15 mbʋ kɔŋaɣna.

Alɩwaatʋ ndʋ ɖɩkpaɣaa nɛ ɖɩlabɩnɩ tʋmɩyɛ Mistelbach tɛtʋ taa yɔ, tɩcɛzɩ pɩnaɣ kʋɖʋmaɣ. Pʋwayɩ lɛ petiyini-m Graz nɛ hadɛ kiŋ tɛtʋ ndʋ payaɣ se Feldbach yɔ tɩ-taa. Paalɛɣzɩ-m koobu weyi pɩɩwɛ se ma nɛ ɩ ɖɩkpɛdɩ nɛ ɖisusi tɔm yɔ. Ɛgbɛyɛ naɖɩyɛ taawɛɛ peeɖe ɖɔɖɔ. Ɛsɔdaa kuduyuu cikpeluu nakʋyʋ tɛɛ ɖɩɩwɛɛ. Ðasɩ paamanɩ ɖɩɣa ŋga. Helim tɩŋaɣnɩ ɖasɩ hɛkɩŋ taa nɛ pɩsʋʋ kuduyuu tɛɛ; pʋyɔɔ ɖɩñɩnɩ takayɩsɩ hatʋ nɛ ɖɩɖɩɣnɩ pɔŋ ɛnɩ. Lɔkɔ taa ɖiluwaɣ lɩm. Ɛlɛ ɖiikpiɖiɣ kɩlaŋ weyi ɖɩlabɩ alɩwaatʋ ndʋ yɔ ɩ-yɔɔ. Ðɩlabɩ tʋmɩyɛ peeɖe fenasɩ pazɩ yem lɛ, ɛgbɛyɛ cikpeɖe naɖɩyɛ ñɔ. Ðɩkpɛlɩkaɣnɩ hɔʋ nakʋyʋ. Pʋwayɩ lɛ, kɩ-taa ɛyaa ɛzɩ 30 mbʋ yɔ kɔm nɛ pamʋ toovenim.

Pɩɩkpazɩ ɛsɩmɩyɛ nɖɩ mɛwɛnɩ Yehowa yɔɔ yɔ ɖoŋ, mbʋ pʋyɔɔ yɔ paa ɛzɩmtaa lɛ, ɛsɩɣnɩ mba pasɩɣ Kewiyaɣ tʋma kajalaɣ lone taa pe-wezuu caɣʋ taa yɔ. Paa ɖɩwɛ wɛtʋ natʋyʋ taa nɛ ɛyʋ nɔɔyʋ ɛɛpɩzɩɣ se ɛla nabʋyʋ nɛ ɛsɩnɩ-ɖʋ yɔ, Yehowa ñapɩzɩɣ.—Keɣa 120:1-3.

Pɩnaɣ 1958 taa, paaɖʋwa se palakɩ ajɛɛ kigbeɣluu nakʋyʋ Niyuu Yɔrɩkɩ tɛtʋ taa Yankee Stadium nɛ Polo Grounds. Peeɖe mɔnpɔzaa se mowoki kigbeɣluu ŋgʋ. Pʋwayɩ lɛ Otirisi ɛgbɛyɛ piliŋa pɔzɩ-m se mɔnsɔɔlaa se mowolo Gileyaadɩ Sukuli ɖaŋ 32 ñɩŋgʋ yaa we? Ɛzɩma manpɩzɩɣ nɛ menkizi waɖɛ sɔsɔyɛ nɖɩ? Kpaagbaa mbʋ lɛ, moncosi-wɛ se “ɛɛɛ mɔnsɔɔlaa!”

Ðɩlakaɣ sukuli ŋgʋ lɛ, koobu Martin Poetzinger cɔlɔ kpam mancakaɣ. Ɛɛɖɔkɩ ɛ-tɩ kʋñɔmɩŋ sakɩyɛ taa Naazii mba salaka tʋma ɖɩlaɖɛ taa. Pʋwayɩ ɛnʋ ɖɔɖɔ ɛkɔm nɛ ɛla tʋmɩyɛ Nɔɔɖɛyaa Ɛgbɛyɛ taa. Ðɩwɛɣ sukuli ɖaŋ taa nɛ pɔyɔɔdɩ  natʋyʋ nɛ ɛtɩnɩɩ tɩ-taa camɩyɛ lɛ, ɛwɛɛtɩ-m se: “Erika, Caama kʋnʋŋ taa lɛ, pɩ-tɔbʋʋ lɛ suwe?”

Ðɩtayɩ sukuli kɩmaŋ lɛ, koobu Nathan Knorr kɔɔ nɛ eheyi-ɖʋ ajɛɛ wena a-taa pakaɣ-ɖʋ tiyuu alɩwaatʋ ndʋ ɖɩtɛŋ sukuli yɔ. Paɖʋwa se petiyiɣ-m Paraguwee. Pʋbʋ taa lɛ, maakɛ pɩɣa evelaɣ nɛ pʋyɔɔ lɛ pɩɩpɔzaa se manpɩsɩ nɛ man-caa ha-m nʋmɔʋ nɛ pʋcɔ mowolo ɛjaɖɛ nɖɩ ɖɩ-taa. Man-caa ha-m nʋmɔʋ lɛ, mankʋyɩ nɛ mɛnɖɛ ɛjaɖɛ nɖɩ ɖɩ-taa pɩnaɣ 1959 Lakɩŋ fenaɣ taa. Kpaɣnɩ alɩwaatʋ ndʋ lɛ, manɖaɣnɩ wɛnʋʋ taabalʋ kɩfalʋ mɛ-Ɛsɔ sɛtʋ tʋmɩyɛ taa. Ɛsɔtɔm tiyiyaa ɖɩɣa ŋga kaawɛ Asunción tɛtʋ taa yɔ, ka-taa ɖɩsʋwaɣ.

Pitileɖi lɛ, mankatɩ Walter Bright. Ɛɛkɛ Ɛsɔtɔm tiyiyu weyi ɛlabɩ Gileyaadɩ Sukuli ɖaŋ 30 ñɩŋgʋ yɔ. Pɩɖɛnɩ ɛsɩndaa lɛ, ma nɛ ɩ ɖɩɖɔkɩ nesi. Ma nɛ ɩ ɖɩɖʋwaɣ ɖama nesi nɛ ɖɩlʋkɩnɩ kʋñɔmɩŋ weyi ɖɩkataɣ yɔ. Nɛ paa ɛzɩmtaa ɖɩkatɩɣ kaɖɛ naɖɩyɛ lɛ ɖɩkalɩɣ lidaʋ tɔm ndʋ Yehowa yɔɔdɩ Izaayii 41:10 taa yɔ: “Ña-laŋɩyɛ ɛtaalɩɩ, mbʋ yɔ mɛwɛ ñɔ-cɔlɔ; taahʋʋ, mbʋ yɔ mɛnkɛ ñɛ-Ɛsɔ: Mankaɣ-ŋ kpazʋʋ ɖoŋ.” Tɔm tʋnɛ tiyeba nɛ ɖa-taa tɛ se ye ɖɩɖɔkɩ ɖe-siɣsiɣ wɛtʋ kpam nɛ ɖɩsɩɣ Kewiyaɣ kajalaɣ lone taa kɔyɔ, Ɛsɔ ɛkaɣ-ɖʋ lɔʋ wiɖiyi kaaʋ.

Pɩtalɩ alɩwaatʋ natʋyʋ lɛ, petiyi-ɖʋ egeetiye naɖɩyɛ taa; egeetiye nɖɩ, ɖɩñɔtɩnɩ Preeziili ɛjaɖɛ kpam. Ɛsɔ sɛtʋ agbaa ñʋndɩnaa seɣtaɣ evebiya se pɔlɔʋ kaaŋ Ɛsɔtɔm tiyiyaa ɖɩɣa yɔɔ, ŋgʋ ɖɩɣa ŋga kataawɛɛ fɩya. Pʋwayɩ lɛ, ma-walʋ paɣzɩ Bibl kpɛlɩkɩnʋʋ polisinaa ñʋʋdʋ. Pɩlabɩ mbʋ lɛ, polisinaa kandɩyɩ ɖa-ɖɩɣa yɔɔ kpɩtaʋ kʋɖʋmʋʋ; piyeba nɛ nɔɔyʋ tɩtasɩ-ɖʋ cɛyʋʋ. Pitileɖi lɛ, ɖɩmaa tɛtʋ kamaɣ nɛ ɖɩsʋʋ Preeziili tɛtʋ cikpetu ndʋ tɩɩñɔtɩnɩ kamaɣ kpam yɔ tɩ-taa nɛ lone kɩfaɖɛ nɖɩ ɖɩɖɩ kaawɛ weewee. Pɩɩwazɩ ɖɔ-tɔm susuu tʋmɩyɛ pɩŋŋ mbʋ pʋyɔɔ yɔ kpaɣnɩ alɩwaatʋ ndʋ lɛ, pɩtasɩnɩ Paraguwee lɛ ɖɩpɩzaɣ se ɖisusi tɔm nɛ ɖɩla kediɣzisi ɖɔɖɔ Preeziili. Pʋcɔ nɛ ɖɩkʋyɩ egeetiye nɖɩ ɖɩ-taa lɛ, agbaa cikpena naalɛ kaatɛm ñɔʋ.

Ðɔkɔtɔnaa kaaheyi-m se maakaɣ pɩzɩɣ nɛ mɛwɛɛnɩ pɩɣa. Pʋyɔɔ lɛ, pɩɩɖɩɣzɩ-ɖʋ kpem se pɩnaɣ 1962 taa lɛ, fenaɣ ɖɛ mɔ-yɔɔ! Pɩlabɩ mbʋ lɛ, ɖiwolo nɛ ɖɩcaɣ Hollywood tɛtʋ taa Floride ɛjaɖɛ taa. Tɛtʋ ndʋ tɩɩñɔtɩnɩ ɖenɖe ma-walʋ hɔʋ taa ñɩma kaawɛ yɔ. Pɩnzɩ cabɩ, ma nɛ ma-walʋ ɖɩtaapɩzɩɣ se ɖɩtasɩ nʋmɔʋ lɩzʋʋ tʋmɩyɛ labʋ. Pɩɩpɔzaa se ɖɩcɔnɩ ɖɔ-hɔʋ yɔɔ, ɛlɛ ɖɩñakaɣ pana nɛ ɖɩsɩɣ kewiyaɣ kajalaɣ lone taa ɛzɩ ɖɩɩtɛm paɣzʋʋ labʋ ɖooo kiɖe tɛɛ yɔ.—Mat. 6:33.

Ðɩtalɩ Floride Kamɩŋ fenaɣ taa, pɩnaɣ 1962 lɛ, pɩlabɩ-ɖʋ piti se tɛ yɔɔ tɛ yɔɔ lakasɩ nzɩ ɛyaa kaawɛnɩ ɛjaɖɛ nɖɩ ɖɩ-taa yɔ, sɩɩwɛnɩ ɖoŋ koobiya yɔɔ ɖɔɖɔ nɛ pʋyɔɔ lɛ, anasaayɩwaa lakɩ pe-kediɣzisi nɛ hɔɔlʋʋ, posusuu tɔm nɛ hɔɔlʋʋ nɛ ɛyaa kɩkpɛdaa ñalakɩ ɖɔɖɔ mbʋ nɛ pɔ-hɔɔlʋʋ. Ɛlɛ Yehowa ɛɛɖʋʋ tʋkaɣ ɛyaa hɛkʋ taa po-tomnaɣ tɔlɩm yɔɔ, pʋyɔɔ lɛ, pitileɖi lɛ, wɛtʋ ndʋ tɩlɛɣzɩ nɛ koobiya la nɔɔ kʋyʋmaɣ. Pɩnaɣaɣ kaɣlaa se Yehowa wazɩ pɩ-yɔɔ, mbʋ pʋyɔɔ yɔ, lɛɛlɛɛyɔ agbaa hiŋ cabɩ wɛnɩ egeetiye nɖɩ ɖɩ-taa.

Pɩlabɩ pʋtɔdɩyɛ se kansɛɛrɩ kʋdɔŋ kpa ma-walʋ nɛ ɛsɩ pɩnaɣ 2015 taa. Ɛɛsɔɔlɩ Yehowa nɛ ɛsɔɔlɩ ɖɔɖɔ koobiya sɩnʋʋ. Pɩnzɩ 55 nzɩ sɩ-taa ma nɛ ɩ ɖɩɩwɛ ɖama cɔlɔ yɔ, ɛɛkɛ-m walʋ kɩbanʋ siŋŋ. Manɖaŋ kpam alɩwaatʋ ndʋ pefeziɣ-i nɛ ɛ-alaafɩya camɩyɛ yɔ.—Tʋma 24:15.

Man-taa hʋlʋmɩ kpem, mbʋ pʋyɔɔ yɔ pɩnzɩ nzɩ mankpaɣ nɛ malabɩnɩ alɩwaatʋ tɩŋa Ɛsɔ sɛtʋ tʋmɩyɛ yɔ sɩcɛzɩ pɩnzɩ 40, nɛ piyeba nɛ mehiɣ taa leleŋ nɛ wazasɩ sakɩyɛ. Kɩɖaʋ nakʋyʋ yɔ: Ma nɛ ma-walʋ ɖɩsɩnɩ ɛyaa 136 nɛ paha pa-tɩ Yehowa nɛ pamɩyɩsɩ-wɛ lɩm. Toovenim taa lɛ ɖɩɩkatɩ tɩlasɩ nasɩyɩ. Ɛlɛ ɖɩtɩha nʋmɔʋ sɩ-taa nakɛyɛ se kaɖɩɣ-ɖʋ nʋmɔʋ nɛ ɖiyele ɖɛ-Ɛsɔ siɣsiɣ tʋ sɛʋ. Halɩ piyeba nɛ ɖɩtɛzɩ-ɩ ñɔtɩnʋʋ kpam nɛ ɖɩtaɣaɣ-ɩ liu paa ɛzɩmtaa se ɛ-alɩwaatʋ talɩɣ lɛ, ɛkaɣ tɩŋnʋʋ nʋmɔʋ ŋgʋ ɛsɔɔlaa yɔ kɩ-yɔɔ nɛ ɛsɩnɩ-ɖʋ paa kʋñɔŋ ŋgʋ kɩ-taa. Nɛ mbʋ ɖeyi ɖeyi ɛlaba.—2 Tim. 4:16, 17.

Ɛzɩma ma-walʋ tɩtasɩ wɛʋ yɔ, pɩfɛyɩ-m kɛlɛʋ, ɛlɛ nʋmɔʋ lɩzʋʋ tʋmɩyɛ wɛɛ nɛ ɖɩsɩɣnɩ-m nɛ malʋkɩnɩ kaɖɛ nɖɩ. Alɩwaatʋ ndʋ meheyiɣ lalaa toovenim tɔm, kɔzɩ kɔzɩ sɩɖaa femtu lidaʋ tɔm lɛ, pɩsɩɣnɩ-m pɩdɩɩfɛyɩ. Maapɩzɩɣ nɛ mɛnkɛdɩ mbʋ pʋyɔɔ mɔyɔɔdʋʋ se Yehowa tɩlɔ-m wiɖiyi kaaʋ yɔ, pɩtɩŋa pɩ-tɔm. Yehowa labɩ ɛzɩ ɛɛyɔɔdʋʋ yɔ; ɛsɩnɩ-m, ɛkpazɩ-m ɖoŋ nɛ ɛɖɔkɩ-m kpam nɛ ‘e-toovenim nɩwaŋ.’—Iza. 41:10.