ABALAA mba ‘pɛkɛ ɛyaa ɛzɩ ɖa yɔ,’ pɔyɔɔdɩ tɔm ndʋ tɩlɩnɩ pa-laŋɩyɛ taa yɔ nɛ tɩwɛɛ Bibl taa. (Yak. 5:17) Kɩɖaʋ nakʋyʋ yɔ: Pɔɔlɩ yɔɔdɩ tɔm ndʋ Roma mba 7:21-24 taa yɔ, ɖɩpɩzɩɣ nɛ ɖɩnɩɩ tɩ-taa kɛlɛʋ. Ɛyɔɔdaa se: “Alɩwaatʋ ndʋ mancaɣ se mala mbʋ pɩtʋʋzaa yɔ lɛ, mbʋ pɩfɛyɩ ɖeu yɔ, pɩwɛ mɔn-cɔlɔ. . . . Mɛnkɛ ɛyʋ weyi ɛcaɣ pʋtɔdɩyɛ kpem yɔ!” Toovenim tɔm ndʋ tɩhɛzɩɣ ɖa-laŋa alɩwaatʋ ndʋ ɖɩlʋkɩnɩ ɖa-maɣmaɣ ɖɛ-ɛjandʋ yɔ.

Pɔɔlɩ tasɩ yɔɔdʋʋ lɩmaɣza lɛɛna wena ɛɛwɛna yɔ a-tɔm ɖɔɖɔ. Ɛyɔɔdaa se: “Ɛsɔ Pɩyalʋ . . . sɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ.” (Gal. 2:20) Pɔɔlɩ taa kaatɛmnɩ tɔm ndʋ. Ña ɖɔɖɔ pɩlakɩ-ŋ mbʋ? Pɩtɩla pɩtɩkɛ paa ɛzɩmtaa pɩlakɩ-ŋ mbʋ.

Ye kɩdɛkɛdɩm mbʋ ɖɩlaba nɛ pɩɖɛɛ yɔ pɩ-yɔɔ lɛ, pɩlakɩ-ɖʋ ɛzɩ ɖɩtɩlɩɩ pʋyʋ yɔ, pɩpɩzɩɣ nɛ pɩwɛɛ-ɖʋ kaɖɛ nabʋyʋ taa se ɖitisi se Yehowa sɔɔlɩ-ɖʋ nɛ ekpeɣu-ɖʋ ɖa-kɩwɛɛkɩm. Nɛ pɩpɩzɩɣ ɖɔɖɔ nɛ pɩwɛɛ ɖa-taa paa anɩ kaɖɛ se etisi se kɩhɛyʋʋ pʋ-ñʋʋ taa kɛnɩ-ɩ kʋjɔʋ. Toovenim taa lɛ, Yesu sɔɔlaa se ɖɩnɩɩ pɩ-taa se kɩhɛyʋʋ pʋ-ñʋʋ taa kɛnɩ-ɖʋ kʋjɔʋ na? Ye ɛɛɛ, ɛbɛ pɩzɩɣ nɛ pɩsɩnɩ-ɖʋ nɛ ɖɩnɩɩ pɩ-taa mbʋ? Iyele nɛ ɖɩtazɩ tɔm pɔzʋʋ mbʋ pɩ-naalɛ pɩ-taa.

Yesu sɔɔlaa se ɖɩnɩɩ pɩ-taa se ɛ-kɩlaʋ kɛnɩ ɖa-taa paa anɩ kʋjɔʋ. Ɛbɛ yɔɔ ɖa-taa pɩzɩɣ nɛ pɩtɛmnɩ tɔm ndʋ? Maɣzɩ tɔm ndʋ tɩwɛ Luka 23:39-43 taa yɔ tɩ-yɔɔ nɛ ŋna. Pakam abalʋ nɔɔyʋ nazɩm sizika yɔɔ Yesu cɔlɔ kpam. Abalʋ ɛnʋ etisaa se mbʋ ɛlaba yɔ, pɩkɛ kɩdɛkɛdɩm. Pɩkɛɣnɩ kɩdɛkɛdɩm sɔsɔm mbʋ pʋyɔɔ yɔ mba palakaɣ-pʋ yɔ, pe-ɖeke pakaŋaɣ nazɩm sizika yɔɔ. Abalʋ ɛnʋ ɛɛwɛ nɩɣzɛ taa siŋŋ nɛ pʋyɔɔ etendi Yesu nɛ eheyi-i: “Tɔzɩ mɔ-yɔɔ alɩwaatʋ ndʋ ŋsʋʋ ñe-Kewiyaɣ taa yɔ.”

Ɛzɩma Yesu laba? Maɣzɩ nɛ ŋna ɛzɩma ɛɛwɛɛ nɛ ɛnɩɣ siziŋ alɩwaatʋ ndʋ ɛkɛzɩ ɛ-ñʋʋ nɛ ɛcɔnɩ kɩwɛɛkɩm laɖʋ ɛnʋ yɔ. Paa ɛɛwɛɛ nɛ ɛnɩɣ siziŋ siŋŋ yɔ, ɛmʋʋyaa nɛ ɛhɛzɩ abalʋ ɛnʋ ɛ-laŋɩyɛ. Ɛyɔɔdaa se: “Toovenim taa lɛ sɔnɔ meheyiɣ-ŋ se, ma nɛ ŋ ɖɩkaɣ wɛʋ Paradisuu taa.” Yesu pɩzaɣ se ɛtɔzɩ abalʋ ɛnʋ kɛlɛʋ yem se: ‘Ɛyʋ Pɩyalʋ kɔm se ɛcɛlɩ e-wezuu se pɩkɛ kɩhɛyʋʋ pʋ-ñʋʋ taa ɛyaa sakɩyɛ yɔɔ.’ (Mat. 20:28) Ɛlɛ Yesu lɩzɩ abalʋ ɛnʋ pɩ-taa nɛ sɔɔlɩm se ɛ-yɔɔ ɛnʋ laɣ ɛ-tɩ. Ɛzɩma ɛlabɩnɩ tʋmɩyɛ tɔm pee “ma” nɛ “ŋ” yɔ, pɩwɩlɩɣ se ɛsɔɔlɩ abalʋ ɛnʋ. Nɛ eheyi abalʋ ɛnʋ se ɛkaɣ caɣʋ wezuu paradisuu taa tɛtʋ yɔɔ.

Pɩtʋʋ fɛyɩ se Yesu ñɩnaɣ se abalʋ ɛnʋ ɛnɩɩ pɩ-taa se ɛ-kɩlaʋ kaɣ-ɩ wazʋʋ ɖɔɖɔ. Ye Yesu ɛwɛnɩ lɩmaɣza ana kɩdɛkɛdɩm laɖʋ weyi ɛtaawɛɛnɩ waɖɛ se ɛsɛɛ Ɛsɔ yɔ ɛ-yɔɔ yɔ, pɩtʋʋ fɛyɩ se ɛwɛɣnɩ lɩmaɣza ana Krɩstʋ ñɩma mba pamɩyɩsɩ-wɛ lɩm nɛ pɛsɛɣ Ɛsɔ yɔ pɔ-yɔɔ. Ye mbʋ, ɛbɛ pɩzɩɣ nɛ pɩsɩnɩ-ɖʋ nɛ ɖitisi se toovenim taa lɛ, paa ɖɩɩlabɩ kɩwɛɛkɩm nɛ pɩɖɛɛ yɔ, Krɩstʋ kɩlaʋ kaɣ wazʋʋ ɖa-taa paa anɩ?

Ɛzɩma Yesu ɖʋ Pɔɔlɩ tʋmɩyɛ se esusi tɔm yɔ, pɩsɩnɩ-ɩ nɛ ɛnɩɩ pɩ-taa se ɛ-yɔɔ Yesu sɩba. Ɛzɩma tɩyɛ? Ɛlɩzɩ pɩ-taa se: “Mɛwɛnɩ ɛsɩmɩyɛ ɖa-Kɩbaɣlʋ Krɩstʋ Yesu yɔɔ, ɛnʋ weyi ɛha-m ɖoŋ yɔ, mbʋ pʋyɔɔ yɔ ɛcɔnɩ-m se mɛwɛ siɣsiɣ nɛ ɛɖʋ-m lɩm ɖʋʋ tʋmɩyɛ naɖɩyɛ, ŋgʋ ɖooo lɛ maakɛ Ɛsɔ yɔɔ tɔm kɩdɛkɛdɩtʋ yɔɔdɩyʋ nɛ ɛyaa nazɩyʋ nɛ weyi ɛɛñaŋ ɛyaa yɔ.” (1 Tim. 1:12-14) Tʋmɩyɛ nɖɩ paɖʋ Pɔɔlɩ yɔ, ɖɩsɩnɩ-ɩ nɛ ɛ-taa tɛ se Yesu na ɛ-pʋtɔdɩyɛ, ɛsɔɔlɩ-ɩ nɛ ɛtaɣ-ɩ liu. Yesu ta-ɖʋ liu nɛ ɛɖʋ ɖa-taa paa anɩ tʋmɩyɛ se esusi tɔm kɩbandʋ. (Mat. 28:19, 20) Tɔm susuu tʋmɩyɛ pɩzɩɣ nɛ pɩsɩnɩ ɖa ɖɔɖɔ nɛ ɖɩnɩɩ pɩ-taa se ɖɔ-yɔɔ Yesu sɩba?

Palɩzɩ Albert ɛgbɛyɛ taa pɩlakɩ ɛzɩ pɩnzɩ 34 mbʋ yɔ. Pitileɖi yɔ, ɛpɩsɩ Yehowa cɔlɔ nɛ pamʋ-ɩ ɛgbɛyɛ taa. Ɛyɔɔdaa se: “Man-kɩwɛɛkɩm wɛ paa ɖooye mɛ-ɛsɩndaa. Ɛlɛ alɩwaatʋ ndʋ mɛwɛɣ tɔm susuu taa yɔ, manɩɣ pɩ-taa se ɛzɩ Pɔɔlɩ yɔ, Yesu ɖʋ-m tʋmɩyɛ naɖɩyɛ. Pɩkpazɩɣ-m ɖoŋ nɛ pɩsɩɣnɩ-m se mɛwɛɛnɩ lɩmaɣza kɩbana ma-maɣmaɣ mɔ-yɔɔ, me-wezuu caɣʋ yɔɔ nɛ mɛn-tɛ cee wayɩ yɔɔ.”​—Keɣa 50:5.

Pʋcɔ nɛ Allan tɩlɩɣ toovenim lɛ, ɛlabɩ kañatʋ lakasɩ sakɩyɛ nɛ ɛɛwɛ ɖɔɖɔ puuyaɣ siŋŋ. Ɛyɔɔdaa se: “Halɩ nɛ sɔnɔ, menɖiɣni tɔzʋʋ kañatʋ ndʋ malabɩ ɛyaa yɔ tɩ-yɔɔ. Nabʋyʋ taa pɩhaɣ-m nɩɣzɛ. Ɛlɛ mɛnsɛɣ Yehowa se ɛha ma weyi mɛnkɛ kɩwɛɛkɩm laɖʋ yɔ waɖɛ se monsusi tɔm kɩbandʋ ɛyaa lalaa. Manaɣ ɛzɩma ɛyaa welisiɣ tɔm kɩbandʋ yɔ lɛ, pɩtɔzʋʋ-m se Yehowa wɛ ɖeu nɛ ɛwɛnɩ sɔɔlɩm ɖɔɖɔ. Mamaɣzɩɣ se ɛwɛɛ nɛ ɛtɩŋɩɣnɩ mɔ-yɔɔ se ɛsɩnɩ ɛyaa lalaa mba palabɩ kɩwɛɛkɩm nɛ pɩɖɛɛ yɔ.”

Alɩwaatʋ ndʋ ɖɩwɛɣ tɔm susuu taa yɔ, ɖɩlakɩ mbʋ pɩwɛ ɖeu yɔ nɛ ɖɩmaɣzɩɣ mbʋ pɩkɛ kɩbam yɔ pɩ-yɔɔ. Piyeki nɛ ɖa-taa tɛŋ se Yesu kɛ pʋtɔdɩyɛ nayʋ, ɛsɔɔlɩ-ɖʋ nɛ ɛtaɣ-ɖʋ liu.

Pʋcɔ nɛ paɖɩzɩ Sataŋ ɛjaɖɛ kɩdɛkɛdɩyɛ ɖɩnɛ lɛ, ɖa-laŋɩyɛ pɩzɩɣ nɛ ɖɩkʋʋ ɖɔ-tɔm kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. Ɛbɛ pɩzɩɣ pɩsɩnɩ-ɖʋ nɛ ɖɩlʋbɩnɩ wɛtʋ ndʋ?

Ðoŋ ɖoŋ lɛ, Jean kʋʋ ɛ-tɩ tɔm pɩlɩɩnɩ pɩ-tɛɛ nɛ pɩ-yɔɔ wezuu ŋgʋ ɛcaɣaa alɩwaatʋ ndʋ ɛɛkɛ pɩɣa peleɣa yɔ kɩ-yɔɔ. Ɛyɔɔdaa se: “Pɩkɛdɩnɩ-m se ‘Ɛsɔ kɩlɩ ɖa-laŋa.’” (1 Yoh. 3:19, 20) Ɛzɩ Jean yɔ, ɖa ɖɔɖɔ ɖɩpɩzɩɣ nɛ ɖihiɣ laŋɩyɛ hɛzʋʋ, mbʋ pʋyɔɔ yɔ ɖɩnawa se Yehowa nɛ Yesu pasɩma se ɖɩkɛ kɩwɛɛkɩm laɖaa. Tɔzɩ se pɩtɩkɛ ɛyaa mba patalɩ pilim yɔ pɔ-yɔɔ paha kɩhɛyʋʋ pʋ-ñʋʋ taa kɩlaʋ, ɛlɛ kɩwɛɛkɩm laɖaa mba pekpiɖaa yɔ, pɔ-yɔɔ paha-kʋ.​—1 Tim. 1:15.

Ye ɖɩtɩmɩɣ nɛ ɖɩmaɣzɩɣ wɛtʋ ndʋ Yesu kaawɛna ɛyaa mantɩtalɩ pilimwaa yɔɔ yɔ tɩ-yɔɔ, nɛ ɖɩlakɩ ɖo-ɖoŋ ɖeɖe tɔm susuu tʋmɩyɛ nɖɩ ɛɖʋ-ɖʋ yɔ ɖɩ-taa yɔ, ɖa-taa tɛŋ se ɖɔ-yɔɔ Yesu sɩba. Ye ŋlakɩ mbʋ yɔ, ɛzɩ Pɔɔlɩ yɔ, ña ɖɔɖɔ ŋpɩzɩɣ nɛ ŋyɔɔdɩ se: Yesu “sɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ.”