1-2. (a) Ɛbɛ sɩɣnɩ-ɖʋ se ɖiwolo pɩ-yɔɔ nɛ ɖɩlʋkɩnɩ tɩlasɩ paa evemiye nɖɩ? Lɩzɩ pɩ-taa. (b) Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?

“MAMAƔZƖƔ kaɖɛ nɖɩ ɖɩ-taa mantɩŋnaa nɛ pɩɖɛɛ yɔ ɖɩ-yɔɔ lɛ, manaɣ se mantaapɩzɩɣ se malʋbɩnɩ-ɖɩ ma-maɣmaɣ.” Wiɖiyi ŋtɛm yɔɔdʋʋ tɔm ɛzɩ tʋnɛ yɔ? Ða-taa sakɩyɛ tɛm-tʋ yɔɔdʋʋ. Pɩtɩla ŋyɔɔdɩ tɔm ndʋ alɩwaatʋ ndʋ ŋmaɣzɩ ɛzɩma ŋpɩzaa nɛ ŋɖɔkɩ ña-tɩ kʋdɔŋ sɔsɔʋ nakʋyʋ taa, yaa ɛzɩma ŋpɩzaa nɛ ŋɖɔkɩ ña-tɩ ñɛ-ɛyʋ kʋsɔɔlʋ nɔɔyʋ sɩm wayɩ yɔ. Ŋmaɣzɩɣ kaɖɛ nɖɩ ɖɩ-taa ŋtɩŋnaa nɛ pɩɖɛɛ yɔ ɖɩ-yɔɔ lɛ, ŋnaɣ se Yehowa fezuu kiɖeɖeu hanɩ-ŋ ɖoŋ weyi “ɩcɛzɩ ɛyʋ ɖoŋ yɔ” nɛ ŋpɩzɩ nɛ ŋɖɔkɩ ña-tɩ paa evemiye nɖɩ.—2 Kɔr. 4:7-9.

² Ða ɖɔɖɔ ɖɩtaɣ liu fezuu kiɖeɖeu se kɩsɩnɩ-ɖʋ nɛ ɖɩlʋbɩnɩ ɖoŋ weyi ɛjaɖɛ kɩdɛkɛdɩyɛ ɖɩnɛ ɖɩwɛnɩ ɖɔ-yɔɔ yɔ. (1 Yoh. 5:19) Pɩtasɩ lɛ, pɩpɔzʋʋ se ɖɩlʋbɩnɩ “feziŋ kɩdɛkɛdɩŋ.” (Efɛz. 6:12) Lɛɛlɛɛyɔ, ɖɩkaɣ naʋ hɔɔlɩŋ naalɛ weyi ɩ-taa fezuu kiɖeɖeu sɩɣnɩ-ɖʋ se ɖɩlʋbɩnɩ tɩlasɩ nzɩ sɩ-tɩŋa yɔ. Pʋwayɩ lɛ, ɖɩkaɣ naʋ mbʋ ɖɩpɩzɩɣ ɖɩla nɛ fezuu kiɖeɖeu wazɩ-ɖʋ siŋŋ yɔ.

3. Nʋmɔŋ weyi ɩ-yɔɔ Yehowa tɩŋɩɣna nɛ ɛsɩɣnɩ-ɖʋ se ɖɩlʋbɩnɩ tɩlasɩ yɔ, ɩ-taa nakʋyʋ lɛ ŋgʋ?

³ Yehowa fezuu kiɖeɖeu sɩɣnɩ-ɖʋ pɩtɩŋnɩ ɛzɩma kɩhaɣ-ɖʋ ɖoŋ se ɖɩla mbʋ payɩ pɩpɔzʋʋ se ɖɩla yɔ, paa ɖɩkatɩɣ tɩlasɩ yɔ. Apostoloo Pɔɔlɩ ɖiɣzinaa se paa ɛkatɩ tɩlasɩ yɔ, ɛpɩzaa nɛ ewolo pɩ-yɔɔ nɛ ɛsɛɛ Yehowa, mbʋ pʋyɔɔ yɔ, ɛtaɣaɣ liu “Krɩstʋ ɖoŋ.” (2 Kɔr. 12:9) Pɔɔlɩ ɖɔŋaɣ ɛ-Ɛsɔtɔm tiyiyu nʋmɔʋ naalɛ ñɩŋgʋ lɛ, pɩtasɩnɩ se ɛkpaɣ alɩwaatʋ sakɩyɛ nɛ esusini tɔm lɛ, ɛlabɩ ɖɔɖɔ tʋmɩyɛ se pɩsa nɛ ɛcɔnɩ e-tomnaɣ yɔɔ kɩcɛyɩm ɖeɖe. Ɛtalɩ Kɔrɛntɩ lɛ, Akiila nɛ Prisiili pɛ-tɛ ɛsʋwa. Paakɛ kizinzikiŋ laɖaa. Ɛzɩma Pɔɔlɩ kaakɛ tʋmɩyɛ nɖɩ ɖɩ-laɖʋ ɖɔɖɔ yɔ pʋyɔɔ lɛ, ɛkpakaɣ avema naayɛ nɛ ɛ nɛ wɛ palakɩ tʋmɩyɛ. (Tʋma 18:1-4) Fezuu kiɖeɖeu ha Pɔɔlɩ ɖoŋ se ɛpɩzɩ nɛ ɛla tomnaɣ yɔɔ tʋmɩyɛ nɛ esusi tɔm ɖɔɖɔ.

4. Ɛzɩ 2 Kɔrɛntɩ mba 12:7b-9 yɔɔdʋʋ yɔ, ɛbɛ Pɔɔlɩ lʋbɩna?

⁴ Kalɩ 2 Kɔrɛntɩ mba 12:7b-9. Pɔɔlɩ yɔɔdʋʋ masɩ sɩnɛ sɩ-taa se ɛwɛɛ nɛ ɛlʋkɩnɩ ‘sɔɔyɛ naɖɩyɛ e-tomnaɣ taa’ yɔ, ɛzɩ suwe ɛñɩnaɣ yɔɔdʋʋ? Ye sɔɔyɛ naɖɩyɛ ɛwɛ ño-tomnaɣ taa yɔ, ŋnɩɣ siziŋ siŋŋ. Ye mbʋ, Pɔɔlɩ ñɩnaɣ ɛyɔɔdɩ se ɛwɛɛ nɛ ɛkatɩɣ kaɖɛ naɖɩyɛ, nɖɩ ɖiyeki nɛ ɛnɩɣ siziŋ siŋŋ yɔ. Ɛya kaɖɛ nɖɩ se “Sataŋ tiyiyu nɔɔyʋ,” nɛ ɖɩwɛɛ nɛ ‘ɖɩcɛkɩ-ɩ kadanzɩ’ (yaa ‘ɖɩmakɩ-ɩ,’ pɩ-tɛɛ tɔm.) Pɩtɩla, Sataŋ nɛ ɛ-aleewaa patɩkɔnɩ kaɖɛ naɖɩyɛ kaɣlaa, nɖɩ ɖɩwɛ ɛzɩ sɔɔyɛ yɔ Pɔɔlɩ tomnaɣ taa. Ɛlɛ alɩwaatʋ ndʋ feziŋ kɩdɛkɛdɩŋ ɛnɩ ɩyʋsaa se “sɔɔyɛ” naɖɩyɛ wɛ Pɔɔlɩ yɔɔ yɔ, ɖɩpɩzɩɣ nɛ ɖɩyɔɔdɩ se pɩtɩla ɩɩsɔɔlɩ kpem se ɩñɩɣ-ɖɩ nɛ ɖɩtɛzɩ sʋʋ e-tomnaɣ taa, nɛ piyele ɛnɩɩ siziŋ nɛ pɩkpaɖɩ. Ɛbɛ Pɔɔlɩ laba?

5. Ɛzɩma Yehowa cosi Pɔɔlɩ adɩma yɔɔ?

⁵ Kajalaɣ lɛ, Pɔɔlɩ kaasɔɔlaa se Yehowa ɛlɩzɩ “sɔɔyɛ” nɖɩ. Ɛyɔɔdaa se “Mentendi Kɩbaɣlʋ [Yehowa] tam nabudozo . . . se eposini-m ɖɩ.” Ɛlɛ paa Pɔɔlɩ kaatɩmaa yɔ, sɔɔyɛ nɖɩ ɖɩtɩlɩɩ e-tomnaɣ taa. Ɛzɩ pɩwɩlɩɣ se Yehowa ticosi Pɔɔlɩ adɩma yɔɔ? Pɩtɩkɛ mbʋ. Ecosi ɛ-adɩma yɔɔ. Yehowa tiyele nɛ kaɖɛ nɖɩ Pɔɔlɩ kataɣ yɔ ɖɩsɩɩ tɩnaɣ, ɛlɛ ɛha-ɩ ɖoŋ se ɛpɩzɩ nɛ ɛɖɔkɩ ɛ-tɩ. Yehowa yɔɔdaa se: “Mon-ɖoŋ wɛɛ nɛ ɩlakɩ tʋmɩyɛ pilim ɛjandʋ taa.” (2 Kɔr. 12:8, 9) Nɛ pɩtɩŋnɩ Ɛsɔ sɩnʋʋ yɔɔ lɛ, Pɔɔlɩ tilesi taa leleŋ nɛ laŋhɛzɩyɛ nɖɩ ɛɛwɛna yɔ!—Fil. 4:4-7.

6. (a) Ɛzɩma Yehowa pɩzɩɣ nɛ ecosi ɖa-adɩma yɔɔ? (b) Masɩ nzɩ sɩwɛ tayʋʋ pʋnɛ pɩ-taa yɔ, sɩ-taa lidaʋ tɔm ndʋ kpazɩɣ-ŋ ɖoŋ?

⁶ Ɛzɩ Pɔɔlɩ yɔ, wiɖiyi ŋtɛm tenduu Yehowa se ɛlɩzɩ-ŋ kaɖɛ naɖɩyɛ taa? Ye ŋtɩmnɩ-ɩ nɛ ña-laŋɩyɛ pilim ɛlɛ kaɖɛ nɖɩ ɖɩ-taa ŋwɛɛ yɔ, ɖɩtɩsɩɩ tɩnaɣ yaa halɩ ɖɩkpaɣ ɖoŋ kpaʋ yɔɔ yɔ, sɔɔndʋ kpa-ŋ se pɩtɩla ñɔ-tɔm tɩtasɩ kɛdɩnʋʋ Yehowa? Ye mbʋ yɔ, tɔzɩ Pɔɔlɩ kɩɖaʋ yɔɔ. Ɛzɩ Yehowa cosuu ɛ-adɩma yɔɔ yɔ, pɩtʋʋ fɛyɩ se ɛkaɣ cosuu ña-adɩma yɔɔ! Pɩtɩla Yehowa tiyele se kaɖɛ nɖɩ ɖɩsɩɩ tɩnaɣ. Ɛlɛ pɩtɩŋnɩ fezuu kiɖeɖeu yɔɔ lɛ, ɛkaɣ-ŋ haʋ ɖoŋ weyi pɩpɔzʋʋ-ŋ yɔ se ŋɖɔkɩ ña-tɩ kaɖɛ nɖɩ ɖɩ-taa. (Keɣa 60:4, 5) Pɩpɩzɩɣ nɛ ‘pɩyaɣ-ŋ nɛ tɛtʋ’ ɛlɛ Yehowa ɛɛkaɣ-ŋ lɔʋ.—2 Kɔr. 4:8, 9; Fil. 4:13.

7-8. (a) Ɛzɩma tɩyɛ fezuu kiɖeɖeu wɛ ɛzɩ helim yɔ? (b) Pɩyɛɛrɩ kɛdaa se ɛzɩma fezuu kiɖeɖeu lakɩ tʋmɩyɛ?

⁷ Hɔɔlʋʋ lɛɛkʋ ŋgʋ taa fezuu kiɖeɖeu sɩɣnɩ-ɖʋ? Ðɩpɩzɩɣ nɛ ɖɩkpaɣ fezuu kiɖeɖeu nɛ ɖɩmaɣzɩnɩ helim. Mɛlɛ pɩzɩɣ nɛ kɩlabɩnɩ tʋmɩyɛ helim mbʋ pɩmakɩnɩ hɔɔlʋʋ kɩbaŋʋ taa yɔ nɛ kɩtalɩ ɖenɖe kiwoki yɔ cɩŋgɩlɩm, paa teŋgu ɛwɛɛ nɛ kɩwasɩɣ yɔ. Mbʋ ɖɔɖɔ fezuu kiɖeɖeu sɩɣnɩ-ɖʋ se ɖiwolo pɩ-yɔɔ nɛ ɖɩsɛɣ Yehowa paa ɖɩkatɩɣ tɩlasɩ yɔ, nɛ ɖɩkɔɔ ɖɩsʋʋ ɛjaɖɛ kɩfaɖɛ nɖɩ Ɛsɔ labɩ tamaɣ se ɛhaɣ-ɖʋ yɔ ɖɩ-taa.

⁸ Ɛzɩma apostoloo Pɩyɛɛrɩ kaakɛ kpakpasɩ kpayʋ yɔ pʋyɔɔ lɛ, ɛsɩm tɔm sakɩyɛ mɛlɛ ŋgʋ kɩ-yɔɔ nɛ kɛdɛɛka yɔ kɩ-saʋ yɔɔ. Pɩtɩla pʋyɔɔ ɛlabɩnɩ tʋmɩyɛ tɔm pee wena alabɩ nɔɔ kʋɖʋmaɣ nɛ ɛzɩma mɛlɛ ŋgʋ kɩ-yɔɔ nɛ kɛdɛɛka yɔ kalakɩ tʋmɩyɛ yɔ, alɩwaatʋ ndʋ ɛkɛdaɣ ɛzɩma fezuu kiɖeɖeu lakɩ tʋmɩyɛ yɔ pɩ-tɔm yɔ. Ɛmawa se: “Natʋ tɔm tɩlɩɩnɩ ɛyʋ sɔɔlɩm taa wiɖiyi kaaʋ, ɛlɛ fezuu kiɖeɖeu ɖiyini ɛyaa nɛ pɔyɔɔdɩ Ɛsɔ hɩɖɛ taa.” Grɛɛkɩ tɔm piye nɖɩ pɛɖɛzaa se “ɖiyini” yɔ, ye pɛɖɛzɩɣ-ɖɩ piye piye yɔ, ɖɩ-tɔbʋʋ lɛ se sɩɣlaa nɛ pɩɖɛna; yaa kpaɣ nɛ pɩɖɛna.—2 Pɩy. 1:21.

9. Ɛbɛ yɔɔ Pɩyɛɛrɩ ñɩnaɣ se ɖɩmaɣzɩ alɩwaatʋ ndʋ ɛlabɩnɩ tʋmɩyɛ tɔm piye nɖɩ ɖɩ-tɔbʋʋ lɛ se sɩɣlaa nɛ pɩɖɛna yɔ?

⁹ Ɛbɛ yɔɔ Pɩyɛɛrɩ ñɩnaɣ se ɖɩmaɣzɩ alɩwaatʋ ndʋ ɛlabɩnɩ tʋmɩyɛ tɔm piye nɖɩ ɖɩ-tɔbʋʋ lɛ se sɩɣlaa nɛ pɩɖɛna yɔ? Luka weyi ɛma Tʋma Labʋ takayaɣ yɔ, ɛlabɩnɩ Grɛɛkɩ tɔm piye nɖɩ ɖɔɖɔ tʋmɩyɛ ɛzɩ Pɩyɛɛrɩ labɩnʋʋ-ɖɩ tʋmɩyɛ yɔ, nɛ ɛkɛdɩ ɛzɩma helim kpaɣ mɛlɛ nakʋyʋ nɛ ‘pɩɖɛɣna’ yɔ pɩ-tɔm. (Tʋma 27:15) Bibl taa tazɩyʋ nɔɔyʋ yɔɔdaa se, Pɩyɛɛrɩ maʋ se  fezuu kiɖeɖeu “ɖiyini” Bibl mayaa yɔ, ɛlabɩnɩ tʋmɩyɛ tɔm piye nɖɩ ɖiyeki se ɛyaa ɩmaɣzɩ ɛzɩma helim kpakɩɣ mɛlɛ ŋgʋ kɩ-yɔɔ nɛ kɛdɛɛka yɔ nɛ pɩɖɛɣna yɔ pɩ-yɔɔ. Pɩyɛɛrɩ yɔɔdaa se, toovenim taa lɛ, ɛzɩ helim kpakɩɣ mɛlɛ nakʋyʋ nɛ pɩɖɛɣna se pɩsa nɛ kɩtalɩ ɖenɖe kiwoki yɔ, mbʋ ɖɔɖɔ fezuu kiɖeɖeu ɖiyi nayaa nɛ Bibl mayaa se pala tʋmɩyɛ nɖɩ paɖʋ-wɛ yɔ. Bibl taa tazɩyʋ ɛnʋ ɛtasɩ yɔɔdʋʋ se Bibl mayaa wɛ ɛzɩ mɛlɛnaa mba poposi pɛ-kɛdɛɛkasɩ yɔ. Nɛ paañɔɔzɩ pa-tɩ se pala tʋmɩyɛ nɖɩ fezuu kiɖeɖeu ɖiyi-wɛ se pala yɔ. Yehowa labɩ mbʋ pɩɩwɛɛ se ɛla yɔ. Ɛha-wɛ “helim” yaa fezuu kiɖeɖeu. Bibl mayaa ɖɔɖɔ labɩ tʋmɩyɛ nɖɩ paɖʋ-wɛ yɔ. Pɔɖɔm nʋmɔʋ ŋgʋ fezuu kiɖeɖeu wɩlɩ-wɛ yɔ kɩ-taa.

10-11. Pɩsa nɛ ɖa-taa tɛ se fezuu kiɖeɖeu wɛɛ nɛ kiɖiyiɣ-ɖʋ lɛ, nɩŋgbanzɩ naalɛ nzɩ pɩwɛɛ se ɖɩkpɛzɩ? Ha kɩɖaʋ nakʋyʋ.

¹⁰ Pɩkɛ toovenim se sɔnɔ Yehowa ɛɛtasɩɣ tɩŋnʋʋ e-fezuu kiɖeɖeu yɔɔ se ɛsɩnɩ ɛyaa nɛ pama Bibl taa takayɩsɩ. Ɛlɛ Yehowa ɖiɣni tɩŋnʋʋ e-fezuu kiɖeɖeu yɔɔ nɛ ɛwɩlɩɣ ɛ-sɛyaa nʋmɔʋ. Halɩ nɛ sɔnɔ Yehowa ɖiɣni labʋ mbʋ pɩwɛɛ se ɛla yɔ. Ɛzɩma ɖɩpɩzɩɣ ɖɩla nɛ Ɛsɔ fezuu kiɖeɖeu wazɩ-ɖʋ? Pɩcɛyaa se ɖɩñaɣ pana nɛ ɖɩlakɩ mbʋ pɩpɔzʋʋ se ɖɩla yɔ. Ɛzɩma ɖɩpɩzɩɣ nɛ ɖɩla mbʋ?

¹¹ Maɣzɩ kɩɖaʋ kʋnɛ kɩ-yɔɔ nɛ ŋna. Ye mɛlɛ sayʋ nɔɔyʋ ɛñɩnɩɣ se helim ɛsɩnɩ-ɩ yɔ, pɩpɔzʋʋ se ɛkpɛzɩ nɩŋgbanzɩ naalɛ. Kajalaɣ lɛ, pɩwɛɛ se ɛtʋʋzɩ ɛ-mɛlɛ nɛ hɔɔlʋʋ ŋgʋ kɩ-taa helim ɖɛɣna yɔ. Toovenim taa lɛ, ye eposini ɖenɖe helim wɛɛ nɛ pɩmakɩ yɔ, ɛ-mɛlɛ ɛɛkaɣ pɩzʋʋ nɛ kɩɖɔ. Nabʋlɛ lɛ, pɩcɛyaa se ɛkpazɩ ɛ-kɛdɛɛka nɛ eposi-kɛ camɩyɛ ɛzɩ pɩpɔzʋʋ yɔ. Halɩ paa helim ɛwɛɛ nɛ pɩmakɩ yɔ, pɩwɛɛ se pɩsʋʋ ɛ-kɛdɛɛka taa pʋcɔ nɛ ɛ-mɛlɛ pɩzɩ nɛ kɩɖɛɛ. Mbʋ ɖɔɖɔ, pɩsa nɛ ɖiwolo pɩ-yɔɔ nɛ ɖɩsɛɣ Yehowa lɛ, pɩwɛɛ se fezuu kiɖeɖeu ɛsɩnɩ-ɖʋ. Pɩsa nɛ fezuu kiɖeɖeu wazɩ-ɖʋ lɛ, pɩwɛɛ se ɖɩkpɛzɩ nɩŋgbanzɩ naalɛ. Kajalaɣ lɛ, pɩwɛɛ se ɖɩla tʋma wena payɩ Ɛsɔ fezuu ɖiyiɣ ɛ-sɛyaa se pala yɔ. Nabʋlɛ lɛ, pɩwɛɛ se ɖɩla  tʋma ana nɛ ɖo-ɖoŋ kpeekpe ɛzɩ pɩpɔzʋʋ yɔ. (Keɣa 118:32) Ye ɖɩkpɛzɩ nɩŋgbanzɩ nzɩ yɔ, fezuu kiɖeɖeu kaɣ-ɖʋ haʋ ɖoŋ se ɖiwolo pɩ-yɔɔ nɛ ɖɩsɛɣ Yehowa, nɛ ɖɩkɔɔ ɖɩsʋʋ ɛjaɖɛ kɩfaɖɛ taa.

12. Ɛbɛ taa ɖɩkaɣ tazʋʋ lɛɛlɛɛyɔ?

¹² Ðɩyɔɔdʋʋ nɛ pɩtalɩ cɩnɛ yɔ, ɖɩtazɩ hɔɔlɩŋ naalɛ weyi ɩ-taa fezuu kiɖeɖeu sɩɣnɩ-ɖʋ yɔ ɩ-taa. Fezuu kiɖeɖeu haɣ-ɖʋ ɖoŋ nɛ kɩsɩɣnɩ-ɖʋ se ɖɩɖɔkɩ ɖe-siɣsiɣ wɛtʋ, paa ɖɩkatɩɣ tɩlasɩ yɔ. Fezuu kiɖeɖeu sɩɣnɩ-ɖʋ ɖɔɖɔ se ɖiwolo pɩ-yɔɔ nɛ ɖɩsɛɛ Yehowa nɛ ɖɩwɛɛ nʋmɔʋ ŋgʋ kiwokini wezuu maatɛŋ taa yɔ kɩ-taa. Lɛɛlɛɛyɔ, ɖɩkaɣ tazʋʋ nɩŋgbanzɩ naanza nzɩ pɩwɛɛ se ɖɩkpɛzɩ nɛ fezuu kiɖeɖeu wazɩ-ɖʋ siŋŋ yɔ sɩ-taa.

13. (a) Ɛzɩ 2 Timootee 3:16, 17 yɔɔdʋʋ yɔ, ɛbɛ Masɩ pɩzɩɣ sɩsɩnɩ-ɖʋ nɛ ɖɩla? (b) Ɛlɛ ɛbɛ pɩpɔzʋʋ se ɖɩla pʋcɔ nɛ sɩsɩnɩ-ɖʋ?

¹³ Kajalaɣ lɛ, kpɛlɩkɩ Ɛsɔtɔm. (Kalɩ 2 Timootee 3:16, 17.) Ɛsɔ tɩŋnɩ e-fezuu kiɖeɖeu yɔɔ nɛ ɛɖʋ ɛ-lɩmaɣza Bibl mayaa maɣzɩm taa. Alɩwaatʋ ndʋ ɖɩkalɩɣ Bibl nɛ ɖɩmaɣzɩɣ ndʋ ɖɩkalɩɣ yɔ tɩ-yɔɔ yɔ, Ɛsɔ paɣtʋ cakɩ ɖa-maɣzɩm nɛ ɖa-laŋa taa. Paɣtʋ ndʋ, tɩsɩɣnɩ-ɖʋ se ɖɩla lɛɣzɩtʋ ɖe-wezuu caɣʋ taa se pɩsa nɛ ɖɔ-tɔm kɛdɩnɩ Yehowa. (Ebr. 4:12) Ɛlɛ pʋcɔ nɛ fezuu kiɖeɖeu wazɩ-ɖʋ siŋŋ lɛ, pɩwɛɛ se ɖɩñɩnɩ alɩwaatʋ nɛ ɖɩkpɛlɩkɩɣ Bibl ɖoŋ ɖoŋ nɛ ɖɩmaɣzɩɣ ndʋ ɖɩkalɩɣ yɔ tɩ-yɔɔ camɩyɛ. Ye ɖɩlakɩ mbʋ yɔ, Ɛsɔtɔm kaɣ wɛnʋʋ ɖoŋ ɖɔ-yɔɔdaɣ nɛ ɖa-lakasɩ tɩŋa yɔɔ.

14. (a) Ɛbɛ yɔɔ ɖɩpɩzɩɣ nɛ ɖɩyɔɔdɩ se fezuu kiɖeɖeu wɛ ɖe-kediɣzisi taa? (b) Ɛbɛ kaɣ-ɖʋ sɩnʋʋ nɛ fezuu kiɖeɖeu wazɩ-ɖʋ siŋŋ ɖe-kediɣzisi taa?

¹⁴ Nabʋlɛ lɛ, ña nɛ ño-koobiya ɩkpɛndɩ nɛ ɩsɛɛ Ɛsɔ. (Keɣa 21:23) Hɔɔlʋʋ nakʋyʋ taa lɛ, ɖe-kediɣzisi kɛnɩ lona wena a-taa “helim makɩ” yɔ. Yehowa fezuu wɛ kediɣzisi taa. (Natʋ 2:29) Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Ðɩpɩzɩɣ nɛ ɖɩyɔɔdɩ mbʋ, mbʋ pʋyɔɔ yɔ, alɩwaatʋ ndʋ ɖa nɛ ɖo-koobiya ɖikpeɣliɣ se ɖɩsɛɛ Ɛsɔ yɔ, ɖɩtɩmɩɣ nɛ ɖɩpɔzʋʋ fezuu kiɖeɖeu, ɖiteɣ Kewiyaɣ hendu ndʋ palɩzɩ-tʋ nɛ Ɛsɔtɔm taa yɔ, nɛ ɖiwelisiɣ lɔŋ weyi koobiya abalɩñɩma mba fezuu kiɖeɖeu lɩzaa yɔ, patɩŋɩɣnɩ Bibl yɔɔ nɛ patasɩɣ-ɖʋ yɔ. Nɛ fezuu kiɖeɖeu kʋɖʋmʋʋ ŋgʋ kɩsɩɣnɩ koobiya halɩñɩma nɛ pɔñɔɔzʋʋ pa-tʋma nɛ palakɩ-yɛ. Ɛlɛ pʋcɔ nɛ fezuu kiɖeɖeu wazɩ-ɖʋ siŋŋ lɛ, pɩcɛyaa se ɖɩñɔɔzɩ ɖa-tɩ nɛ pɩsa nɛ ɖicosi tɔm kediɣzisi taa. Ye ɖɩlakɩ mbʋ yɔ, alɩwaatʋ ndʋ ɖɩwɛɣ kediɣzisi taa yɔ, fezuu kiɖeɖeu sɩɣnɩ-ɖʋ ɛzɩ helim sɩɣnɩ mɛlɛ ŋgʋ kɩ-kɛdɛɛka posaa yɔ.

15. Ɛzɩma fezuu kiɖeɖeu sɩɣnɩ-ɖʋ tɔm susuu tʋmɩyɛ taa?

¹⁵ Nabudozo lɛ, ɖʋ nesi tɔm susuu tʋmɩyɛ. Alɩwaatʋ ndʋ ɖɩlakɩnɩ Bibl tʋmɩyɛ tɔm susuu nɛ tɔm wɩlʋʋ tʋmɩyɛ taa yɔ, ɖɩhaɣ fezuu kiɖeɖeu nʋmɔʋ se kɩsɩnɩ-ɖʋ ɖɔ-tɔm susuu taa. (Roma 15:18, 19) Ɛlɛ pɩsa nɛ Ɛsɔ fezuu wazɩ-ŋ siŋŋ lɛ, pɩwɛɛ se ŋsusuu tɔm ɖoŋ ɖoŋ, nɛ ye pɩsaŋ yɔ ŋlabɩnɩ tʋmɩyɛ Bibl paa ɛzɩmtaa. Nʋmɔŋ weyi ɩ-yɔɔ ŋpɩzɩɣ nɛ ŋtɩŋna nɛ ña nɛ ɛyaa ɩpaɣzɩ kɛdaɣ camɩyɛ tɔm susuu taa yɔ, ɩ-taa lɛɛkʋ lɛ se ŋlabɩnɩ tʋmɩyɛ lɔŋ weyi patasɩɣ-ɖʋ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ taa se ɖɩtɩŋnɩ ɩ-yɔɔ nɛ ɖa nɛ ɛyaa ɖɩpaɣzɩ kɛdaɣ labʋ yɔ.

16. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩmʋ fezuu kiɖeɖeu yɔ, ɩ-taa ŋgʋ kpaɖaa?

¹⁶ Nabʋnaza lɛ, tɩmnɩ Yehowa. (Mat. 7:7-11; Luka 11:13) Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩmʋ fezuu kiɖeɖeu yɔ, ɩ-taa ŋgʋ kɩkpaɖaa yɔ, ŋgʋ lɛ se ɖɩtɩmnɩ Yehowa nɛ ɖɩpɔzɩ-ɩ kʋ. Nabʋyʋ ɛɛpɩzɩɣ nɛ pɩɖɩɣ nʋmɔʋ ɖa-adɩma se ataatalɩ Yehowa cɔlɔ, yaa nabʋyʋ ɛɛpɩzɩɣ nɛ pɩɖɩɣ-ɖʋ nʋmɔʋ se ɖɩtaamʋ Ɛsɔ fezuu. Halɩ paa ɖɩwɛ salaka taa yɔ, fezuu kiɖeɖeu pɩzɩɣ nɛ kɩsɩnɩ-ɖʋ, nɛ Sataŋ ɛɛpɩzɩɣ ɛla nabʋyʋ se ɛɖɩɣ-ɖʋ nʋmɔʋ se ɖɩtaamʋ-kʋ. (Yak. 1:17) Pɩsa nɛ fezuu kiɖeɖeu sɩnɩ-ɖʋ siŋŋ lɛ, ɛzɩma  pɩpɔzʋʋ se ɖɩtɩmɩ? Pɩsa nɛ ɖicosi tɔm ndʋ tɩ-yɔɔ lɛ, iyele nɛ ɖɩtazɩ adɩma labʋ tɔm taa nɛ pɩkpaɖɩ. Ðɩkaɣ tazʋʋ Bibl taa kɩɖaʋ nakʋyʋ taa, nɛ Luka tɛ Evaŋgilim * taa ɖeke pɔyɔɔdɩ kɩ-tɔm.

17. Kɩɖaʋ ŋgʋ kɩ-tɔm Yesu yɔɔdɩ Luka 11:5-9, 13 taa yɔ, ɛbɛ kɩpɩzɩɣ nɛ kɩkpɛlɩkɩ-ɖʋ adɩma labʋ yɔɔ?

¹⁷ Kalɩ Luka 11:5-9, 13. Kɩɖaʋ ŋgʋ kɩ-tɔm Yesu yɔɔdaa yɔ, kɩwɩlɩɣ ɛzɩma pɩwɛɛ se ɖɩtɩmɩ nɛ ɖɩpɔzɩ fezuu kiɖeɖeu yɔ. Abalʋ weyi ɛ-tɔm pɔyɔɔdɩ kɩɖaʋ ŋgʋ kɩ-taa yɔ, pɛcɛlɩ-ɩ mbʋ ɛñɩnaɣ yɔ mbʋ pʋyɔɔ yɔ ‘ɛwɛɛ nɛ ɛpɔzʋʋ kaahɛzaɣ.’ Paa ɖoo kaaɖɛwa yɔ, sɔɔndʋ taakpa-ɩ se ɛpɔzɩ ɛ-taabalʋ sɩnʋʋ. (Kalɩ Juillet 2018 tɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ.) Yesu yɔɔdaa se ɛbɛ kɩɖaʋ ŋgʋ kɩkpɛlɩkɩɣ-ɖʋ adɩma labʋ yɔɔ? Ɛyɔɔdaa se: “Ɩwɛɛ pɔzʋʋ yɔɔ, nɛ pakaɣ-mɩ haʋ; ɩwɛɛ ñɩnʋʋ yɔɔ, nɛ ɩkaɣ hiɣu; ɩwɛɛ kɔtʋʋ yɔɔ, nɛ pakaɣ-mɩ tʋlʋʋ.” Ye mbʋ, ɛbɛ tɔm ndʋ tɩkpɛlɩkɩɣ-ɖʋ? Pɩsa nɛ fezuu kiɖeɖeu sɩnɩ-ɖʋ lɛ, pɩwɛɛ se ɖɩtɩmɩɣ nɛ ɖɩpɔzʋʋ-kʋ kaahɛzaɣ.

18. Ɛzɩ Yesu yɔɔdʋʋ ɛ-kɩɖaʋ taa yɔ, ɛbɛ yɔɔ ɖa-taa pɩzɩɣ nɛ pɩtɛ se Yehowa kaɣ-ɖʋ haʋ e-fezuu kiɖeɖeu?

¹⁸ Kɩɖaʋ ŋgʋ kɩ-tɔm Yesu yɔɔdaa yɔ, kɩsɩɣnɩ-ɖʋ ɖɔɖɔ se ɖɩna mbʋ pʋyɔɔ Yehowa kaɣ-ɖʋ haʋ fezuu kiɖeɖeu yɔ. Abalʋ weyi ɛ-tɔm pɔyɔɔdɩ kɩɖaʋ ŋgʋ kɩ-taa yɔ, ɛñɩnaɣ se ɛkɛ ɛgɔndʋ mʋyʋ kɩbanʋ. Ɛmaɣzaa se pɩkɛnɩ-ɩ kɩjɛyʋʋ se ɛha tɔɔnaɣ ɛ-ɛgɔm weyi ɛkɔm ɖoo cɩjɩka taa yɔ, ɛlɛ ɛtaawɛɛnɩ nabʋyʋ se ɛha-ɩ. Yesu yɔɔdaa se abalʋ ɛnʋ ɛ-taabalʋ tisaa nɛ ɛcɛlɩ-ɩ kpɔnʋ, mbʋ pʋyɔɔ yɔ ɛwɛɛ nɛ ɛpɔzʋʋ-ɩ kaahɛzaɣ. Tɔm ndʋ Yesu ñɩnaɣ se ɖɩkpɛlɩkɩ? Ye ɛyʋ weyi ɛtɩtalɩ pilim yɔ, etisi faaa nɛ ɛsɩnɩ ɛ-taabalʋ weyi ɛpɔzɩ-ɩ kpɔnʋ kaahɛzaɣ yɔ, ɖa-taa pɩzɩɣ nɛ pɩtɛ se ɖa-Caa kɩbanʋ weyi ɛwɛ ɛsɔdaa yɔ, ɛkaɣ sɩnʋʋ mba pɔpɔzʋʋ-ɩ fezuu kiɖeɖeu kaahɛzaɣ yɔ! Ye mbʋ, ɖa-taa pɩzɩɣ nɛ pɩtɛ se ye ɖɩpɔzɩ Yehowa fezuu kiɖeɖeu yɔ, ɛkaɣ cosuu ɖa-adɩma yɔɔ.—Keɣa 9:17; 65:19.

19. Ɛbɛ yɔɔ ɖa-taa pɩzɩɣ nɛ pɩtɛ se ɖɩkaɣ wabʋ?

¹⁹ Ða-taa pɩzɩɣ nɛ pɩtɛ se paa Sataŋ kaañaɣ pana ɛzɩma se ɛwabɩ-ɖʋ yɔ, ɖɩkaɣ-ɩ wabʋ. Ɛbɛ yɔɔ? Mbʋ pʋyɔɔ yɔ, fezuu kiɖeɖeu sɩɣnɩ-ɖʋ hɔɔlɩŋ naalɛ taa. Kajalaɣ lɛ, kɩhaɣ-ɖʋ ɖoŋ weyi pɩpɔzʋʋ-ɖʋ yɔ se ɖɩɖɔkɩ ɖa-tɩ tɩlasɩ taa. Nabʋlɛ lɛ, fezuu kiɖeɖeu kɛnɩ ɖoŋ weyi ɛsɩɣnɩ-ɖʋ se ɖiwolo pɩ-yɔɔ nɛ ɖɩsɛɛ Yehowa lɛɛlɛɛyɔ, nɛ pɩkɔɔ pɩtalɩ ɛjaɖɛ kɩfaɖɛ taa yɔ. Ðɩtɛ ɖa-taa se ɖiyeki nɛ fezuu kiɖeɖeu wazɩ-ɖʋ siŋŋ!