1-2. (a) Ɛzɩ Efɛɛzɩ mba 6:16 yɔɔdʋʋ yɔ, ɛbɛ yɔɔ pɩpɔzʋʋ-ɖʋ “tisuu kpayʋʋ sɔsɔʋ”? (b) Tɔm pɔzʋʋ mbʋ yɔɔ ɖɩkaɣ cosuu?

ŊWƐNƖ “tisuu kpayʋʋ sɔsɔʋ” na? (Kalɩ Efɛɛzɩ mba 6:16.) Pɩtʋʋ fɛyɩ se ŋwɛnɩ-kʋ. Ɛzɩ kpayʋʋ kandɩyʋʋ tomnaɣ hɔɔlʋʋ sɔsɔʋ yɔɔ yɔ, mbʋ ɖɔɖɔ ñe-tisuu kandɩyɩɣ ñɔ-yɔɔ se ɛjaɖɛ ɖɩnɛ ɖɩ-yɔɔ wɛtʋ kɩdɛkɛdɩtʋ, ɛzɩ kʋzʋʋ kɩdɛkɛdʋʋ, puuyaɣ lakasɩ nɛ mbʋ payɩ pɩɩlakɩ nɔɔ kʋɖʋmaɣ nɛ Ɛsɔ paɣtʋ kila yɔ, pɩtaawɛɛnɩ ɖoŋ ñɔ-yɔɔ.

² Paa mbʋ yɔ, “kɛdɛzaɣ kɩyakɩŋ” taa ɖɩwɛɛ, nɛ pɩwɛɣ nɛ pɩtakɩɣ ɖe-tisuu. (2 Tim. 3:1) Ɛzɩma ŋpɩzɩɣ nɛ ŋcɔnɩ ñe-tisuu kpayʋʋ yɔɔ nɛ pɩsa nɛ ña-taa tɛ se kɩwɛ ɖoŋ? Nɛ ɛbɛ ŋpɩzɩɣ ŋla nɛ ñe-tisuu wɛɛ ɖoŋ tam? Iyele nɛ ɖicosi tɔm pɔzʋʋ mbʋ pɩ-yɔɔ.

3. Ɛbɛ sɔɔjanaa lakaɣ pa-kpayɩŋ, nɛ ɛbɛ yɔɔ?

³ Bibl alɩwaatʋ taa, ɖoŋ ɖoŋ lɛ sɔɔjanaa wɛnɩ kpayɩŋ weyi pohuuzi ɩ-yɔɔ tɔnɛ yɔ. Sɔɔjanaa taɣaɣ num kpayɩŋ yɔɔ se pɩsa nɛ tɔnɛ ɛtaawɛɛkɩ, nɛ kalɩkɔdaɣ ɛtaakpa hɔɔlɩŋ weyi ɩkɛ ñɩɣyʋʋ yɔ. Ye sɔɔja nɔɔyʋ ɛyʋsaa se ɛ-kpayʋʋ caɣ wɛɛkʋʋ yɔ, ɛñakɩ pana se ɛñɔɔzɩ-kʋ se pɩsa nɛ ɛpɩzɩ ɛla you paa ɛzɩmtaa. Ɛzɩma ŋpɩzɩɣ nɛ ŋlabɩnɩ kɩɖaʋ kʋnɛ tʋmɩyɛ ñe-tisuu hɔɔlʋʋ taa?

4. (a) Ɛbɛ yɔɔ pɩwɛɛ se ŋcɔnɩ ñe-tisuu kpayʋʋ yɔɔ? (b) Nɛ ɛzɩma ŋpɩzɩɣ nɛ ŋla mbʋ?

⁴ Ɛzɩ caanaʋ taa sɔɔjanaa yɔ, pɩwɛɛ se ŋcɔŋnɩ ñe-tisuu kpayʋʋ yɔɔ ɖoŋ ɖoŋ se pɩsa nɛ ŋñɔɔzɩ ña-tɩ nɛ ŋpɩzɩ ŋla you paa ɛzɩmtaa. Ða Krɩstʋ ñɩma lɛ, ɖɩwɛɛ nɛ ɖɩlakɩ fezuu taa you, nɛ ɖo-koyindinaa taa nabɛyɛ lɛ feziŋ kɩdɛkɛdɩŋ. (Efɛz. 6:10-12) Nɔɔyʋ ɛɛpɩzɩɣ nɛ ɛcɔnɩ ñe-tisuu kpayʋʋ yɔɔ ño-lone taa. Ɛbɛ ŋpɩzɩɣ ŋla nɛ ŋna se  ŋñɔɔzɩ ña-tɩ camɩyɛ se ŋpɩzɩ nɛ ŋla you? Kajalaɣ lɛ, pɩwɛɛ se ŋtɩmnɩ Ɛsɔ se ɛsɩnɩ-ŋ. Pʋwayɩ lɛ, pɩwɛɛ se ŋlabɩnɩ tʋmɩyɛ Ɛsɔtɔm nɛ pɩsɩnɩ-ŋ nɛ ŋna ña-tɩ ɛzɩ Ɛsɔ naɣʋ-ŋ yɔ. (Ebr. 4:12) Bibl yɔɔdaa se: “Taa [Yehowa] liu nɛ ña-laŋɩyɛ pilim nɛ taataa ña-maɣmaɣ ñɔ-lɔŋ liu.” (Adu. 3:5, 6) Pʋyɔɔ lɛ, pɩɩwɛɣ ɖeu se ŋɖaɣnɩ maɣzʋʋ lɩmaɣza wena ŋkpaɣaa pitileɖita yɔ a-taa naayɛ yɔɔ nɛ ŋna? Pʋtɔma liidiye tɔm kaalabɩ-ŋ kaɖɛ siŋŋ. Ŋtɔzɩ lidaʋ tɔm ndʋ Yehowa yeba nɛ pama Ebree mba 13:5 taa se: “Maakaɣ-ŋ yebu kaaʋ, nɛ maakaɣ-ŋ siɣye haʋ kaaʋ” yɔ tɩ-yɔɔ? Lidaʋ tɔm ndʋ, tiyeba nɛ ña-taa tɛ se Yehowa kaɣ-ŋ sɩnʋʋ na? Ye ɛɛɛ yɔ, pɩwɩlɩɣ se ŋwɛɛ nɛ ŋcɔŋnɩ ñe-tisuu kpayʋʋ yɔɔ se kɩwɛɛ wɛtʋ kɩbandʋ taa.

5. Ɛbɛ ŋpɩzɩɣ nɛ ŋyʋsɩ alɩwaatʋ ndʋ ŋtazɩɣ se ŋna wɛtʋ ndʋ tɩ-taa ñe-tisuu wɛɛ yɔ?

⁵ Mbʋ ŋyʋsʋʋ alɩwaatʋ ndʋ ŋtazɩɣ camɩyɛ se ŋna wɛtʋ ndʋ tɩ-taa ñe-tisuu wɛɛ yɔ, pɩpɩzɩɣ nɛ pɩɖɩɣzɩ-ŋ. Ŋpɩzɩɣ nɛ ŋyʋsɩ ɛjandʋ natʋyʋ, ndʋ ŋtaaɖiɣzina se ŋwɛna yɔ. Kɩɖaʋ nakʋyʋ yɔ. Ŋpɩzɩɣ nɛ ŋyʋsɩ se nɩɣzɛ kadadayaɣ, cɛtɩm nɛ toma taa tibu camɩ ñe-tisuu. Ye pɩtalɩ-ŋ mbʋ yɔ, ɛzɩma ŋpɩzɩɣ nɛ ŋkandɩyɩ ñe-tisuu yɔɔ nɛ pɩtaacamɩ-pʋ nɛ pɩkɩlɩ?

6. Nɩɣzɛ wena awɛ ɖeu yɔ, a-taa naayɛ lɛ wena?

⁶ Nɩɣzɛ naayɛ wɛɛ lɛ, awɛ ɖeu. Kɩɖaʋ nakʋyʋ yɔ. Pɩwɛ ɖeu se ɖɩnɩɣzɩ mbʋ pɩwɛɛ se ɖɩla nɛ ɖɔ-tɔm kɛdɩnɩ Yehowa nɛ Yesu yɔ pɩ-yɔɔ. (1 Kɔr. 7:32) Ye ɖɩlabɩ kɩwɛɛkɩm sɔsɔm nabʋyʋ yɔ, ɖɩnɩɣzɩɣ nɛ ɖɩñakɩ pana siŋŋ se ɖɩñɔɔzɩ ɖa nɛ Yehowa ɖa-taabalɩyɛ. (Keɣa 37:19) Ðɩnɩɣzɩɣ ɖɔɖɔ ɛzɩma ɖɩla nɛ ɖɔ-tɔm kɛdɩnɩ ɖɛ-tɛŋga yɔ pɩ-yɔɔ, nɛ ɛzɩma ɖɩla nɛ ɖɩcɔnɩ ɖɔ-hɔʋ taa ñɩma nɛ ɖo-koobiya kɩcɛyɩm ɖeɖe yɔ pɩ-yɔɔ.—1 Kɔr. 7:33; 2 Kɔr. 11:28.

7. Ɛzɩ Aduwa 29:25 yɔɔdʋʋ yɔ, ɛbɛ yɔɔ pɩtɩpɔzɩ se ɖise ɛyaa sɔɔndʋ?

⁷ Hɔɔlʋʋ lɛɛkʋ taa lɛ, nɩɣzɛ kadadayaɣ pɩzɩɣ nɛ pɩcamɩ ɖe-tisuu. Kɩɖaʋ nakʋyʋ yɔ. Paa ɛzɩmtaa ɖɩpɩzɩɣ nɛ ɖɩnɩɣzɩɣ ɛzɩma ɖɩla nɛ ɖɩwɛɛnɩ tɔɔnaɣ nɛ wondu kususutu sakɩyɛ yɔ pɩ-yɔɔ. (Mat. 6:31, 32) Pɩpɩzɩɣ piyele nɛ ɖɛ-ɛsɩyɛ sɛɛnɩ tomnaɣ yɔɔ ñɩm ñɩnʋʋ. Halɩ ɖɩpɩzɩɣ nɛ ɖɩpaɣzɩ liidiye sɔɔlʋʋ. Ye ɖiyeba nɛ pɩtalɩ-ɖʋ mbʋ yɔ, pɩkɔŋnɩ kaɖɛ tisuu mbʋ ɖɩwɛnɩ Yehowa yɔɔ yɔ, nɛ pɩwɛɛkɩ taabalɩyɛ nɖɩ ɖɩwɛ ɖa nɛ ɩ ɖɛ-hɛkʋ taa yɔ. (Mark. 4:19; 1 Tim. 6:10) Yaa ɖɩpɩzɩɣ nɛ ɖɩtɔlɩ nɩɣzɛ kadadayaɣ kpaca lɛɛkʋ taa. Kpaca ŋgʋ lɛ ɛzɩma ɖɩpɩzɩɣ nɛ ɖɩkɩlɩɣ nɩɣzʋʋ ɛzɩma ɖɔ-tɔm ɛkɛdɩnɩ lalaa yɔ pɩ-yɔɔ yɔ. Pɩpɩzɩɣ piyele nɛ ɖiseɣ sɔɔndʋ se lalaa ɩtaaɖʋ-ɖʋ fɛyɛ yaa pataanazɩ-ɖʋ nɛ pɩkɩlɩ se ɖise sɔɔndʋ se ɖɩtaala nabʋyʋ nɛ pɩwɩzɩ Yehowa. Pɩsa nɛ ɖɩtaatɔlɩ kpaca ŋgʋ kɩ-taa lɛ, pɩwɛɛ se ɖitendi Yehowa se ɛha-ɖʋ tisuu nɛ abalɩtʋ ndʋ pɩpɔzʋʋ-ɖʋ se ɖɩpɩzɩ nɛ ɖɩlʋbɩnɩ ɛyaa sɔɔndʋ seu yɔ.—Kalɩ Aduwa 29:25; Luka 17:5.

8. Ɛzɩma pɩwɛɛ se ɖɩla alɩwaatʋ ndʋ ɖɩnɩɣ cɛtɩm tɔm yɔ?

⁸ “Cɛtɩm caa” Sataŋ tɩŋɩɣnɩ mba pɔ-yɔɔ ɛtɔkɩ kewiyitu yɔ pɔ-yɔɔ nɛ esusuu cɛtɩm tɔm Yehowa nɛ ɖo-koobiya pɔ-yɔɔ. (Yoh. 8:44) Kɩɖaʋ nakʋyʋ lɛ ɛzɩma tisuu yebiyaa tɩŋɩɣnɩ intɛrnɛɛtɩ lona, teeleewaa nɛ tɔm susuu wondu lɛɛtʋ yɔɔ nɛ posusuu cɛtɩm tɔm Yehowa ɛgbɛyɛ yɔɔ yɔ. Cɛtɩm tɔm ndʋ, tɩkɛ Sataŋ “tɔʋ ñɩma miŋ ñɩna” taa naayɛ. (Efɛz. 6:16) Ɛzɩma pɩwɛɛ se ɖɩla, ye nɔɔyʋ ɛyɔɔdʋʋ cɛtɩm tɔm ndʋ ɖɔ-cɔlɔ? Ðiiwelisiɣ-tʋ! Ɛbɛ yɔɔ? Mbʋ pʋyɔɔ yɔ, ɖɩwɛnɩ tisuu Yehowa yɔɔ nɛ ɖɩtaɣ ɖo-koobiya liu.  Pʋyɔɔ lɛ, ɖɩtɩsɔɔlɩ kpa se ɖɩyɔɔdɩnɩ tisuu yebiyaa. Ðɩɩhaɣ nɔɔyʋ yaa nabʋyʋ waɖɛ pɩkpɛndɩnɩ saawɩɖɛ, se piyele nɛ ɖa nɛ wɛ ɖɩhɔ tɔm.

9. Ðoŋ weyi toma taa tibu pɩzɩɣ nɛ pɩwɛɛnɩ ɖɔ-yɔɔ?

⁹ Toma taa tibu pɩzɩɣ nɛ pɩcamɩ ɖe-tisuu. Ðɩɩpɩzɩɣ nɛ ɖɩla kaakendu ɖa-maɣmaɣ ɖa-tɩlasɩ yɔɔ. Toovenim taa lɛ, ye ɖɩlabɩ mbʋ yɔ pɩkɛɣnɩ kɩmɛlɛndʋ. Nɛ nabʋyʋ taa lɛ, pɩpɩzɩɣ nɛ pitibi-ɖʋ yɔɔɔ. Ɛlɛ, pɩtɩpɔzɩ se ɖiyele nɛ tɩlasɩ nzɩ ɖɩkatɩɣ yɔ, sɩwɛɛnɩ ɖoŋ ɖa-maɣzɩm yɔɔ. Pɩtɩkɛ mbʋ yɔ, ɖɩpɩzɩɣ nɛ ɖɩsɔɔ lidaʋ kɩbaŋʋ ŋgʋ Yehowa labɩ-ɖʋ yɔ kɩ-yɔɔ. (Natʋ 21:3, 4) Pɩpɩzɩɣ nɛ pitibi-ɖʋ yɔɔɔ siŋŋ nɛ pɩlabɩ-ɖʋ ɛzɩ ɖo-ɖoŋ tɛma yɔ, nɛ ɖiyele Yehowa sɛʋ. (Adu. 24:10) Ɛlɛ, pɩfɛyɩ se pɩtalɩ-ɖʋ mbʋ.

10. Takayaɣ ŋga koobu halɩñɩnʋ nɔɔyʋ mawa yɔ, ɛbɛ ka-taa tɔm kpɛlɩkɩɣ-ŋ?

¹⁰ Iyele nɛ ɖɩna ɛzɩma Etaazuunii koobu halɩñɩnʋ nɔɔyʋ wɛɛ nɛ ɛcɔŋnɩ e-tisuu yɔɔ, alɩwaatʋ ndʋ ɛwɛɛ nɛ ɛcɔŋnɩ ɛ-walʋ weyi ɛwɛ kʋdɔŋ taa siŋŋ yɔ ɛ-yɔɔ yɔ. Ɛma takayaɣ nakɛyɛ nɛ etiyini ɖa-tʋmɩyɛ ɖɩlaɖɛ sɔsɔɖɛ nɛ ɛyɔɔdɩ ka-taa se: “Mbʋ pɩ-taa ɖɩwɛɛ yɔ, pɩhaɣ-ɖʋ nɩɣzɛ nɛ pitiki-ɖʋ yɔɔɔ nabʋyʋ taa, ɛlɛ ɖe-lidaʋ paɣlaa. Mɛwɛnɩ ɛsɩmɩyɛ mbʋ payɩ Yehowa haɣ-ɖʋ se pɩkpazɩ ɖe-tisuu ɖoŋ nɛ ɖɩwɛɛ abalɩtʋ yɔ pɩ-yɔɔ. Pɩpɔzɩ-ɖʋ lɔŋ tasʋʋ nɛ ɖoŋ kpazʋʋ mbʋ siŋŋ. Pɩsɩɣnɩ-ɖʋ se ɖiwolo pɩ-yɔɔ nɛ ɖɩsɛɣ Yehowa nɛ ɖɩɖɔkɩ ɖa-tɩ tɩlasɩ nzɩ Sataŋ kɔŋnɩ ɖɔ-yɔɔ yɔ sɩ-taa.” Tɔm ndʋ koobu halɩñɩnʋ ɛnʋ ɛyɔɔdaa yɔ, tɩwɩlɩɣ se ɖɩpɩzɩɣ nɛ ɖɩwa toma taa tibu! Ɛzɩma tɩyɛ? Tɔzɩ se Sataŋ tɩŋɩɣnɩ tɩlasɩ nzɩ ŋkatɩɣ yɔ sɩ-yɔɔ se ɛtakɩ-ŋ. Taa liu se Yehowa kaɣ ña-laŋɩyɛ hɛzʋʋ. Nɛ ña-taa ɛla leleŋ nɛ fezuu taa tɔɔnaɣ ŋga ɛhaɣ-ɖʋ yɔ.

11. Pɩsa nɛ ɖɩtɩlɩ wɛtʋ ndʋ tɩ-taa ɖe-tisuu wɛɛ yɔ lɛ, tɔm ndʋ pɩwɛɛ se ɖɩpɔzɩ ɖa-tɩ?

¹¹ Ŋna ñe-tisuu kpayʋʋ yɔɔ hɔɔlɩŋ nɩɩyɩ nɛ pɩwɛɛ se ŋcɔnɩ i-ɖeɖe na? Fenasɩ pazɩ nzɩ sɩɖɛwa yɔ sɩ-taa, ŋpɩzaa nɛ ŋlʋbɩnɩ nɩɣzɛ kadadayaɣ na? Ŋpɩzaa nɛ ŋkizi se ŋŋwelisiɣ yaa ŋŋhɔŋ tɔm nɛ tisuu yebiyaa pɩlɩɩnɩ cɛtɩm tɔm ndʋ posusuu yɔ tɩ-yɔɔ? Nɛ ŋpɩzaa nɛ ŋlʋbɩnɩ toma taa tibu na? Ye ɛɛɛ yɔ,  pɩwɩlɩɣ se ñe-tisuu wɛ wɛtʋ kɩbandʋ taa. Ɛlɛ, pɩwɛɛ se ɖɩwɛɛ feŋuu yɔɔ mbʋ pʋyɔɔ yɔ, Sataŋ lakɩnɩ tʋmɩyɛ you wondu lɛɛtʋ se ɛkaɖɩnɩ-ɖʋ. Iyele nɛ ɖɩyɔɔdɩ tɩ-taa kʋɖʋmʋʋ tɔm.

12. Ɛbɛ pɩzɩɣ nɛ pɩtalɩ-ɖʋ, ye ɖɩwɛ ñɩm laɣzaɣ yɔ?

¹² Ñɩm laɣzaɣ pɩzɩɣ nɛ pɩkɛzɩ ɖa-lɩmaɣza nɛ ɖiyele cɔnʋʋ se ɖɩna wɛtʋ ndʋ tɩ-taa ɖe-tisuu kpayʋʋ wɛɛ yɔ. Apostoloo Pɔɔlɩ yɔɔdaa se: “Ɛyʋ weyi ɛkɛ sɔɔja yɔ, ɛɛɖʋʋ ɛ-nɔɔ wezuu caɣʋ taa tadɩyɛ labʋ taa, se pɩsa nɛ ɛ-tɔm kɛdɩnɩ weyi ɛmʋ-ɩ sɔɔjatʋ yɔ.” (2 Tim. 2:4) Pʋyɔɔ lɛ, pɩtaahaɣ waɖɛ Roma sɔɔjanaa se paɖʋ pɔ-nɔsɩ tadɩyɛ tɔm taa. Ye sɔɔja nɔɔyʋ ɛlabɩ kaakendu paɣtʋ ndʋ tɩ-yɔɔ, ɛbɛ pɩzɩɣ nɛ pɩla?

13. Ɛbɛ yɔɔ pɩtɩpɔzɩ se sɔɔja ɛɖʋ ɛ-nɔɔ tadɩyɛ labʋ tɔm taa?

¹³ Maɣzɩ tɔm tʋnɛ tɩ-yɔɔ. Sɔɔjanaa nabɛyɛ kpaɣ tanaŋ nakʋyʋ nɛ pafalɩsɩɣ pa-tɩ nɛ po-you sɩsɩ, ɛlɛ pa-taa kʋɖʋm tiwolo falɩsʋʋ mbʋ pɩ-taa. Sɔɔja ɛnʋ ɛwɛ kɩyakʋ taa nɛ ɛ-ɛsɩyɛ sɛɛnɩ tɔɔnaɣ pɛdʋʋ. Ðanaɣ ɖanaa lɛ, sɔɔjanaa kpaɣ alɩwaatʋ nɛ pɔcɔŋnɩ po-you wondu ɖeɖe nɛ pɛsɛyɩɣ po-you sɩsɩ. Ɛlɛ sɔɔja weyi ɛpɛdɩɣ tɔɔnaɣ yɔ, ɛlɛ kpaɣ ɛ-alɩwaatʋ nɛ ɛtɩzɩɣ tɔɔnaɣ se ɛpɛdɩ tɛʋ kifemuu. Tɛʋ fema lɛ, koyindu nɔɔyʋ tudi pɔ-yɔɔ se ɛlabɩ-wɛ nɛ you. Sɔɔjanaa mba pa-taa lɛ, añɔɔzɩ ɛ-tɩ se ɛla you camɩyɛ nɛ piyele nɛ ɛ-ñʋʋdʋ taa la leleŋ? Ye ŋwɛ you ŋgʋ kɩ-taa, a-cɔlɔ ŋkaɣ sɔɔlʋʋ se ŋsɩŋ? Sɔɔja weyi ɛkpaɣ alɩwaatʋ nɛ ɛñɔɔzɩ ɛ-tɩ camɩyɛ yɔ, yaa weyi ɛtɩka ɛ-lɩmaɣza ɛ-tɩ ñɔɔzʋʋ yɔɔ yɔ?

14. Ɛzɩma ɖɩkɛ Krɩstʋ sɔɔjanaa yɔ pʋyɔɔ lɛ, ɛbɛ mʋ ñɩm ɖɛ-ɛsɩndaa?

¹⁴ Ɛzɩ sɔɔjanaa kɩbama yɔ, ɖɩtɩsɔɔlɩ se nabʋyʋ ɛkɛzɩ ɖa-lɩmaɣza nɛ ataawɛɛ kaɖʋwa ŋga kɔ-tɔm kɩlɩ cɛyʋʋ yɔ kɔ-yɔɔ. Kaɖʋwa ŋga lɛ se ɖɔ-tɔm ɛkɛdɩnɩ ɖa-Ñʋndɩnaa Yehowa nɛ Krɩstʋ. Pɩ-tɔm cɛyɩ ɖɛ-ɛsɩndaa siŋŋ nɛ pɩkpaɖɩ mbʋ payɩ ɖɩpɩzɩɣ nɛ ɖihiɣ Sataŋ ɛjaɖɛ ɖɩnɛ ɖɩ-taa yɔ. Ðɩñakɩ pana se ɖɩwɛɛnɩ alɩwaatʋ nɛ ɖoŋ weyi pɩpɔzʋʋ-ɖʋ yɔ nɛ ɖɩsɛɛ Yehowa. Ðɩñakɩ  pana ɖɔɖɔ se ɖe-tisuu kpayʋʋ nɛ ɖe-fezuu taa you wondu lɛɛtʋ pɛwɛɛ wɛtʋ kɩbandʋ taa.

15. Suwe Pɔɔlɩ paɣ-ɖʋ, nɛ ɛbɛ yɔɔ?

¹⁵ Pɩtɩpɔzɩ kpa se ɖiyele feŋuu! Ɛbɛ yɔɔ? Apostoloo Pɔɔlɩ paɣ-ɖʋ se “mba pɛtɛm pa-taa se papɩsɩɣ ñɩm tɩnaa yɔ,” pakaɣ ‘posinuu tisuu.’ (1 Tim. 6:9, 10) Tɔm piye ‘posinuu’ wɩlɩɣ se ɖɩpɩzɩɣ nɛ ɖɩpaɣzɩ kam ɖa-lɩmaɣza wondu ndʋ tɩ-tɔm tɩcɛyɩ yɔ tɩ-ñɩnʋʋ yɔɔ nɛ pɩkɩlɩɣ. Pɩpɩzɩɣ piyele nɛ ɖɩpaɣzɩ wɛnʋʋ “kɩmɛlɛndʋ kɔɖɛyɩ nɛ kɔɖɛyɩ ŋgʋ kɩkɔŋnɩ ɛyʋ kaɖɛ” yɔ. Ðɩtaasɔɔ se Sataŋ tɩŋɩɣnɩ kɩmɛlɛndʋ kɔɖɛyɩ nɛ kɔɖɛyɩ ŋgʋ kɩkɔŋnɩ ɛyʋ kaɖɛ yɔ pɔ-yɔɔ se eyooni-ɖʋ nɛ ɛcamɩ ɖe-tisuu.

16. Kɛdaɣ ŋga kɛwɛ Maarkɩ 10:17-22 taa yɔ, tɔm pɔzʋʋ mbʋ yɔɔ keseɣtiɣ-ɖʋ se ɖɩmaɣzɩ?

¹⁶ Kpaɣ se ŋwɛnɩ liidiye sakɩyɛ se ŋpɩzɩɣ nɛ ŋya tomnaɣ yɔɔ wondu sakɩyɛ. Ɛzɩ pɩkɛɣnɩ kɩdɛkɛdɩm se ŋya wondu ndʋ ŋsɔɔlaa ɛlɛ toovenim taa lɛ, tɩɩwazɩɣ-ŋ lɛɛlɛɛyɔ yɔ? Nabʋyʋ ɛɛwɩlɩɣ se pɩkɛ kɩdɛkɛdɩm yaa pɩtɩkɛ kɩdɛkɛdɩm. Ɛlɛ, maɣzɩ tɔm pɔzʋʋ pʋnɛ pɩ-yɔɔ: Paa ɖɩpɩzɩɣ se ɖɩya wonuu nakʋyʋ yɔ, ɛzɩ toovenim taa lɛ, ɖɩkaɣ wɛnʋʋ alɩwaatʋ nɛ ɖoŋ se ɖɩlabɩnɩ-kʋ tʋmɩyɛ nɛ ɖɩcɔnɩ kɩ-yɔɔ? Pɩtasɩ lɛ, piyeki nɛ ɖɩkɩlɩ sɔɔlʋʋ tomnaɣ yɔɔ wondu ndʋ ɖɩwɛna yɔ  siŋŋ yaa we? Ɛzɩma ɖɩsɔɔlʋʋ tomnaɣ yɔɔ wondu yɔ, piyeki nɛ ɖɩla ɛzɩ abalʋ weyi Yesu ya-ɩ se ewolo nɛ ɛla Ɛsɔ tʋmɩyɛ nɛ pɩkpaɖɩ, nɛ ekizi yɔ ɛlabʋ yɔ? (Kalɩ Maarkɩ 10:17-22.) Pɩkɩlɩɣ ɖeu kpem se ɖɩcaɣ wezuu kɛlɛʋ nɛ ɖɩkpaɣ ɖa-alɩwaatʋ nɛ ɖo-ɖoŋ nɛ ɖɩlabɩnɩ Ɛsɔ sɔɔlɩm!

17. Tɔm ndʋ pɩtɩpɔzɩ kpa se ɖɩsɔɔ?

¹⁷ Pɩtɩpɔzɩ kpa se ɖɩsɔɔ se ɖɩwɛ you taa, nɛ pɩwɛɛ se ɖɩñɔɔzɩ ɖa-tɩ se ɖɩla you paa evemiye nɖɩ. (Natʋ 12:17) Ðo-koobiya ɩɩpɩzɩɣ nɛ pɔɖɔkɩ ɖe-tisuu kpayʋʋ ɖo-lone taa. Ða-maɣmaɣ pɩwɛɛ se ɖɩɖɔkɩ-kʋ kpam.

18. Ɛbɛ yɔɔ caanaʋ taa sɔɔjanaa ɖɔkaɣ pa-kpayɩŋ kpam?

¹⁸ Caanaʋ taa lɛ, ye sɔɔja nɔɔyʋ ɛwɛ abalɩtʋ you taa yɔ, pɩɖʋʋ-ɩ hɩɖɛ. Ɛlɛ ye ɛpɩsɩ ɖɩɣa nɛ ɛtɩɖɔkɩ ɛ-kpayʋʋ yɔ, pɩkɛnɩ-ɩ fɛyɛ tɔm. Caanaʋ tɔm taa tazɩyʋ weyi ɛkɛ Roma tʋ nɛ payaɣ-ɩ se Tacitus yɔ ɛmawa se: “Ye sɔɔja nɔɔyʋ ɛlɩnɩ you taa nɛ ɛtɩɖɔkɩ ɛ-kpayʋʋ yɔ, pipisiɣ ɛ-hɩɖɛ siŋŋ.” Lɩmaɣza wena a-yɔɔ sɔɔjanaa ɖɔkaɣ pa-kpayɩŋ kpam yɔ, a-taa naɖɩyɛ lɛ.

19. Ɛzɩma ɖɩpɩzɩɣ nɛ ɖɩɖɔkɩ ɖe-tisuu kpayʋʋ kpam?

¹⁹ Ðɩɖɔkʋʋ ɖe-tisuu kpayʋʋ kpam pɩtɩŋnɩ ɛzɩma ɖiwoki kediɣzisi ɖoŋ ɖoŋ nɛ ɖiheyiɣ lalaa Yehowa hɩɖɛ nɛ e-Kewiyaɣ pɔ-tɔm yɔ pɩ-yɔɔ. (Ebr. 10:23-25) Pɩtasɩ lɛ, ɖɩkalɩɣ Ɛsɔtɔm paa ɖooye nɛ ɖɩtɩmɩɣnɩ Yehowa se ɛsɩnɩ-ɖʋ nɛ ɖɩlabɩnɩ tʋmɩyɛ tɔm ndʋ ɖɩkalɩɣ yɔ. (2 Tim. 3:16, 17) Ye ɖɩlakɩ mbʋ yɔ, paa you wonuu ŋgʋ Sataŋ ɛlakɩnɩ tʋmɩyɛ se ɛkaɖɩnɩ-ɖʋ yɔ, pɩɩkaɣ-ɖʋ camʋʋ tam. (Iza. 54:17) ‘Ðe-tisuu kpayʋʋ sɔsɔʋ’ kaɣ ɖɔ-yɔɔ kandɩyʋʋ. Ðɩkaɣ ɖɔkʋʋ kpam nɛ ɖa nɛ ɖo-koobiya ɖɩla tʋmɩyɛ nɔɔ kʋɖʋmaɣ taa nɛ abalɩtʋ. Nɛ pɩtasɩnɩ se ɖɩwakɩ you ŋgʋ ɖɩlakɩ paa evemiye nɖɩ yɔ lɛ, pɩkaɣ-ɖʋ kɛnʋʋ hɩɖɛ ɖʋʋ se ɖɩwɛɛ Yesu hɔɔlʋʋ yɔɔ alɩwaatʋ ndʋ ɛwakɩ you ŋgʋ ɛ nɛ Sataŋ nɛ ɛlɛ wayɩ tɩŋɩyaa pakaɣ labʋ yɔ.—Natʋ 17:14; 20:10.