1. Lɩmaɣza wena pɩpɔzʋʋ se ɖɩwɛɛnɩ waɖɛ nɖɩ ɖɩwɛna se ɖɩtɩmnɩ Yehowa yɔ ɖɩ-yɔɔ?

 ƐSƆDAA nɛ tɛtʋ Lɩzɩyʋ labɩ-ɖʋ kʋjɔʋ kɩbaŋʋ nakʋyʋ, ŋgʋ lɛ se ɛha-ɖʋ waɖɛ se ɖɩtɩmnɩ-ɩ. Maɣzɩ pɩ-yɔɔ pazɩ nɛ ŋna: Ðɩpɩzɩɣ nɛ ɖiheyi Yehowa ɖa-laŋɩyɛ taa tɔm paa alɩwaatʋ ndʋ tɩ-taa nɛ pɩtɩcɛyɩ se ɖa nɛ ɩ ɖɩnɩɩnɩ ɖama alɩwaatʋ natʋyʋ yɔɔ pʋcɔ nɛ ɖɩyɔɔdɩnɩ-ɩ. Paa ɖɩwɛ ɖɔkɔtɔ tɛ yaa salaka nakɛyɛ taa yɔ, ɖɩpɩzɩɣ nɛ ɖɩtɩmnɩ ɖa-Caa kʋsɔɔlʋ ɛnʋ, nɛ ɖa-taa tɛma se ɛkaɣ-ɖʋ welisinuu. Ðɩwɛnɩ ɛsɩmɩyɛ siŋŋ kʋjɔʋ ŋgʋ kɩ-yɔɔ.

2. Ɛzɩma Wiyaʋ Daviid wɩlaa se waɖɛ nɖɩ ɛwɛna se ɛtɩmɩ yɔ, ɖɩkɛ ñɩm pʋyʋ ɛ-ɛsɩndaa?

² Wiyaʋ Daviid kaakpaɣ waɖɛ nɖɩ ɛwɛna se ɛtɩmɩ yɔ se ɖɩkɛ ñɩm pʋyʋ. Ete hendu Yehowa se: “Ma-adɩma ɛkpa ñɔ-cɔlɔ ɛzɩ sɔzɩŋ ñɔsɩ [yaa ŋgee tɩlaaɖɩ] yɔ.” (Keɣa 140:1, 2) Daviid alɩwaatʋ taa, ŋgee tɩlaaɖɩ kiɖeɖeu ŋgʋ cɔjɔnaa lakaɣnɩ tʋmɩyɛ toovenim Ɛsɔ sɛtʋ taa yɔ, pakpakaɣ alɩwaatʋ nɛ pɔñɔɔzʋʋ-kʋ camɩyɛ. (Ejl. 30:34, 35) Mba palakaɣ ŋgee tɩlaaɖɩ yɔ, pakpakaɣ alɩwaatʋ nɛ pɔñɔɔzʋʋ-kʋ camɩyɛ. Mbʋ ɖɔɖɔ Daviid kaasɔɔlaa se ɛmaɣzɩ tɔm ndʋ ɛkaɣ yɔɔdʋʋ alɩwaatʋ ndʋ ɛɛtɩmɩɣnɩ Yehowa yɔ tɩ-yɔɔ camɩyɛ. Ða ɖɔɖɔ ɖɩsɔɔlɩ siŋŋ se ɖɩla mbʋ. Ðɩsɔɔlaa se ɖa-adɩma ɛkɛdɩnɩ Yehowa.

3. (a) Alɩwaatʋ ndʋ ɖɩtɩmɩɣnɩ Yehowa yɔ, wɛtʋ ndʋ pɩpɔzʋʋ se ɖɩwɛɛna? (b) Nɛ ɛbɛ yɔɔ?

 ³ Alɩwaatʋ ndʋ ɖɩtɩmɩɣnɩ Yehowa yɔ, pɩwɛɛ se ɖɩwɛɛnɩ ñamtʋ siŋŋ. Maɣzɩ natʋ ndʋ pawɩlɩ Izaayii, Ezekɩyɛɛlɩ, Danɩyɛɛlɩ, nɛ Yohanɛɛsɩ yɔ tɩ-yɔɔ nɛ ŋna. Pa-taa paa weyi lɛ, ɛna natʋ ndʋ yɔ tɩwɛ ndɩ; ɛlɛ nabʋyʋ wɛ tɩ-taa nɛ pɩlakɩ nɔɔ kʋɖʋmaɣ. Tɩ-tɩŋa tɩwɩlɩɣ se Yehowa kɛ Wiyaʋ weyi ɛ-wayɩ fɛyɩ yɔ. Izaayii na “Yehowa caɣ kewiyaɣ kpelaɣ sɔsɔɔ yɔɔ, kakʋyɩ ɛsɔdaa.” (Iza. 6:1-3) Ezekɩyɛɛlɩ na Yehowa ɛcaɣ ɛsɔdaa ɛ-kɛɛkɛɛ yɔɔ nɛ nabʋyʋ ‘ñɩlɩsɩɣ ɛzɩ tɩŋgaɣyʋʋ’ yɔ ɛ-cɔlɔ kpɛɛɛ. (Ezek. 1:26-28) Danɩyɛɛlɩ na “kɩyakɩŋ akpadɩyʋ” esu wondu kʋhʋlʋmʋtʋ nɛ miŋ nzʋlʋma lɩɣnɩ e-kewiyaɣ kpelaɣ cɔlɔ. (Dan. 7:9, 10) Nɛ Yohanɛɛsɩ ñana Yehowa ɛcaɣ kewiyaɣ kpelaɣ nakɛyɛ yɔɔ; tɩŋgaɣyʋʋ nakʋyʋ kaacɔ-kɛ nɛ kɩ-taa; kɩɩwɛ kajʋka nɛ kɩ-wɛtʋ kaawɛ ɛzɩ emeroodi pɩyɛ nɖɩ ɖɩwɛnɩ ñɩtʋ lɛŋ ñɩndʋ tɔlɩm yɔ. (Natʋ 4:2-4) Alɩwaatʋ ndʋ ɖɩmaɣzɩɣ Yehowa samtʋ ndʋ tɩ-wayɩ fɛyɩ yɔ tɩ-yɔɔ yɔ, pɩtɔzʋʋ-ɖʋ se waɖɛ sɔsɔɖɛ ɖɩwɛna se ɖɩñɔtɩnɩ-ɩ adɩma taa; nɛ pɩtɔzʋʋ-ɖʋ ɖɔɖɔ se pɩcɛyaa se ɖɩla mbʋ nɛ ñamtʋ. Ɛlɛ ɛzɩma pɩwɛɛ se ɖɩtɩmɩ?

4. Mbʋ pɩ-tɔm Yesu calɩnɩ yɔɔdʋʋ kɩɖaʋ adɩma taa Maatiyee 6:9, 10 taa yɔ, ɛbɛ pɩkpɛlɩkɩɣ-ɖʋ?

⁴ Kalɩ Maatiyee 6:9, 10. Pʋʋ Yɔɔ Tɔm yɔɔdʋʋ taa, Yesu wɩlɩ ɛ-tɔmkpɛlɩkɩyaa ɛzɩma pɩwɛɛ se patɩmnɩ Ɛsɔ nɛ pɩkɛdɩnɩ-ɩ yɔ. Yesu yɔɔdaa se “ye mbʋ ɩtɩmɩ ɛzʋnɔ” nɛ pɩtɛ lɛ, ɛcalɩnɩ yɔɔdʋʋ mbʋ pɩ-tɔm kɩlɩ cɛyʋʋ nɛ pitukuuni Yehowa kaɖʋwa yɔ pɩ-tɔm. Mbʋ yɔ: Ɛsɔ hɩɖɛ yɔɔ ñalʋʋ; e-Kewiyaɣ ŋga kakaɣ kɔm nɛ kakaɣ ɖɩzʋʋ Ɛsɔ koyindinaa tɩŋa yɔ; nɛ cee wayɩ wazasɩ nzɩ ɛɖʋwa se ɛkɔŋnɩ tɛtʋ nɛ ɛyaa yɔ. Alɩwaatʋ ndʋ ɖɩtɩmɩɣ yɔ, ye ɖɩyɔɔdʋʋ pɩ-tɔm ɖa-adɩma taa yɔ, ɖɩwɩlɩɣ se Yehowa kaɖʋsɩ tɔm kɩlɩnɩ cɛyʋʋ ɖɛ-ɛsɩndaa.

5. Ɛzɩ pɩmʋnaa se ɖiheyi Yehowa ɖa-kɩcɛyɩm tɔm adɩma taa?

⁵ Kɩɖaʋ adɩma hɔɔlʋʋ naalɛ ñɩŋgʋ taa, Yesu wɩlaa se pɩmʋnaa se ɖɩyɔɔdɩ ɖa-maɣmaɣ ɖa-kɩcɛyɩm tɔm adɩma taa. Ðɩpɩzɩɣ nɛ ɖɩpɔzɩ Yehowa se ɛha-ɖʋ ɖe-evemiye tɔɔnaɣ, se ekpeɣ-ɖʋ ɖa-kɩwɛɛkɩm, se ɛkandɩyɩ ɖɔ-yɔɔ nɛ ɖɩtaatɔlɩ takɩm taa, nɛ se ɛlɩzɩ-ɖʋ kañatʋ tʋ nesi tɛɛ. (Mat. 6:11-13) Alɩwaatʋ ndʋ ɖɩpɔzʋʋ wondu ndʋ  Yehowa yɔ, ɖɩwɩlɩɣ-ɩ se ɖɩnawa se pɩpɔzʋʋ se ɛsɩnɩ-ɖʋ nɛ ɖɩsɔɔlaa se ɖɔ-tɔm ɛkɛdɩnɩ-ɩ.

6. Mbʋ pɩ-tɔm pɔyɔɔdɩ kɩɖaʋ adɩma taa yɔ, pi-ɖeke pɩ-tɔm pɩwɛɛ se ɖɩyɔɔdɩ ɖa-adɩma taa? Lɩzɩ pɩ-taa.

⁶ Yesu taaɖaŋɩɣ se ɛ-wayɩ tɩŋɩyaa ɛlakɩnɩ tʋmɩyɛ tɔm pee wena ɖeyi ɖeyi awɛ kɩɖaʋ adɩma taa yɔ. Adɩma lɛɛna wena Yesu laba yɔ a-taa, ɛyɔɔdɩ tɔm ndɩ ndɩ ndʋ tɩ-tɔm kaacɛyɩ ɛ-ɛsɩndaa alɩwaatʋ ndʋ tɩ-taa yɔ na. (Mat. 26:39, 42; Yoh. 17:1-26) Ða ɖɔɖɔ ɖɩpɩzɩɣ nɛ ɖɩtɩmɩ nɛ ɖiheyi Yehowa mbʋ payɩ pɩhaɣ-ɖʋ nɩɣzɛ yɔ pɩ-tɔm. Alɩwaatʋ ndʋ ɖɩcaɣ lɩmaɣzɩyɛ naɖɩyɛ kpaɣʋ yɔ, ɖɩpɩzɩɣ nɛ ɖɩtɩmɩ nɛ ɖɩpɔzɩ lɔŋsɩnɖɛ nɛ tɔm taa nɩʋ lɛɣtʋ. (Keɣa 118:33, 34) Alɩwaatʋ ndʋ ɖɩcaɣ paɣzʋʋ tʋmɩyɛ kaɖɛ ñɩnɖɛ naɖɩyɛ labʋ yɔ, ɖɩpɩzɩɣ nɛ ɖɩtɩmɩ nɛ ɖɩpɔzɩ sɩmtʋ nɛ lɛɣtʋ. (Adu. 2:6) Lʋlɩyaa pɩzɩɣ nɛ patɩmɩ pe-piya yɔɔ, nɛ piya pɩzɩɣ nɛ sɩtɩmɩ sɩ-lʋlɩyaa yɔɔ; nɛ ɖa-tɩŋa ɖɩpɩzɩɣ nɛ ɖɩtɩmɩ ɖe-Bibl kpɛlɩkɩyaa nɛ mba ɖisusuu-wɛ tɔm yɔ pɔ-yɔɔ, nɛ pɩwɛɛ se ɖɩla mbʋ. Ɛlɛ, alɩwaatʋ ndʋ ɖɩtɩmɩɣ yɔ, pɩtasɩnɩ se ɖɩpɔzʋʋ Yehowa se ɛsɩnɩ-ɖʋ lɛ, pɩwɛɛ se ɖɩla nabʋyʋ ɖɔɖɔ.

7. Ɛbɛ yɔɔ pɩwɛɛ se ɖɩsa Yehowa ɖa-adɩma taa?

⁷ Pɩpɔzʋʋ se ɖɩtɔzɩ nɛ ɖɩsa Yehowa ɖa-adɩma taa. Nɔɔyʋ tɩmʋna se pɛcɛlɩ-ɩ samtʋ nɛ pɩtalɩ ɖɛ-Ɛsɔ. ‘Ɛwɛ ɖeu nɛ ekpeɣu.’ Ɛkɛ ɖɔɖɔ “pʋtɔdɩyɛ nayʋ nɛ hɛɛɛ tʋ weyi ɛ-hɔyɛ wɛ nikaɣ nɛ pana kɔʋ yɔ, sɔɔlɩm nɛ tʋtʋyɛ tʋ.” (Keɣa 85:5, 15) Pɩtʋʋ fɛyɩ se ɖɩwɛnɩ lɩmaɣza kɩbana wena a-yɔɔ pɩwɛɛ se ɖɩsa Yehowa yɔ. Pɩwɛɛ se ɖɩsamɩ-ɩ weyi ɛkɛwa nɛ mbʋ ɛlakɩ yɔ pɩ-yɔɔ.

8. Wondu ndʋ tɩ-yɔɔ ɖɩpɩzɩɣ nɛ ɖɩsɛɛ Yehowa se ɛlabaɣ lɛ yɔ, tɩ-taa natʋyʋ lɛ ndʋ? (Keɣa 103:12-15, 24)

⁸ Pɩtasɩna se ɖɩsaŋ Yehowa ɖa-adɩma taa lɛ, ɖɩsɔɔlaa ɖɔɖɔ se ɖɩsɛɛ-ɩ se ɛlabaɣ lɛ wondu kɩbandʋ ndʋ ɛhaɣ-ɖʋ yɔ tɩ-yɔɔ. Ðɩpɩzɩɣ nɛ ɖɩsɛɛ-ɩ se ɛlabaɣ lɛ hɛtʋ ndʋ ɖɩnaɣ nɛ tɩwɛnɩ tɔlɩm ndɩ ndɩ yɔ tɩ-yɔɔ, tɔɔnasɩ kɩbanzɩ ndɩ ndɩ yɔɔ, nɛ taa leleŋ weyi ɖihikiɣ taabalɩyɛ ɖʋʋ nʋmɔʋ taa yɔ ɩ-yɔɔ. Ða-Caa kʋsɔɔlʋ ha-ɖʋ wondu ndʋ nɛ wondu lɛɛtʋ sakɩyɛ se pɩha-ɖʋ taa leleŋ. (Kalɩ Keɣa 103:12-15, 24.) Kɔzɩ kɔzɩ lɛ, ɖɩsɛɣ Yehowa se ɛlabaɣ lɛ fezuu taa tɔɔnasɩ sakɩyɛ nzɩ ɛhaɣ-ɖʋ yɔ sɩ-yɔɔ; nɛ ɖɩsɛɣ-ɩ ɖɔɖɔ cee wayɩ lidaʋ kɩbaŋʋ ŋgʋ ɖɩwɛna yɔ kɩ-yɔɔ.

9. Ɛbɛ pɩzɩɣ pɩsɩnɩ-ɖʋ nɛ ɖɩtɔzɩ nɛ ɖɩsɛɛ Yehowa se ɛlabaɣ lɛ? (1 Tesalooniiki mba 5:17, 18)

 ⁹ Mbʋ payɩ Yehowa lakɩ-ɖʋ yɔ, pɩpɩzɩɣ nɛ pɩwɛɛ kɛlɛʋ se ɖɩsɔɔ se ɖɩsɛɛ-ɩ se ɛlabaɣ lɛ pɩ-yɔɔ. Ɛbɛ pɩzɩɣ pɩsɩnɩ-ŋ nɛ ŋtɔzɩ nɛ ŋsɛɛ-ɩ se ɛlabaɣ lɛ? Ŋpɩzɩɣ nɛ ŋma mbʋ ŋpɔzɩ Yehowa adɩma taa yɔ nɛ ŋsɩɩ; nɛ ɖoŋ ɖoŋ lɛ, ŋwiliɣ se ŋna se ɛzɩma Yehowa cosi ña-adɩma ana a-yɔɔ. Pʋwayɩ lɛ, tɩmɩ nɛ ŋsɛɛ-ɩ ɛzɩma ɛsɩnɩ-ŋ yɔ pɩ-yɔɔ. (Kalɩ 1 Tesalooniiki mba 5:17, 18.) Maɣzɩ tɔm tʋnɛ tɩ-yɔɔ nɛ ŋna: Alɩwaatʋ ndʋ lalaa wɩlɩɣ-ɖʋ pɛ-ɛsɩmɩyɛ yɔ, ɖa-taa lakɩ leleŋ nɛ ɖɩnaɣ se pɔsɔɔlɩ-ɖʋ. Mbʋ ɖɔɖɔ alɩwaatʋ ndʋ ɖɩtɔzʋʋ nɛ ɖɩsɛɛ Yehowa se ɛlabaɣ lɛ, mbʋ pʋyɔɔ yɔ ecosi ɖa-adɩma yɔɔ yɔ, pɩhaɣ-ɩ taa leleŋ. (Kol. 3:15) Ɛlɛ lɩmaɣzɩyɛ kɩcɛyɩyɛ lɛɛɖɛ nɖɩ yɔɔ pɩwɛɛ se ɖɩsɛɛ ɖɛ-Ɛsɔ se ɛlabaɣ lɛ?

10. Ɛzɩ 1 Pɩyɛɛrɩ 2:21 yɔɔdʋʋ yɔ, ɛbɛ yɔɔ pɩwɛɛ se ɖɩsɛɛ Yehowa se ɛlabaɣ lɛ mbʋ pʋyɔɔ yɔ etiyi Yesu tɛtʋ yɔɔ?

¹⁰ Kalɩ 1 Pɩyɛɛrɩ 2:21. Pɩwɛɛ se ɖɩsɛɛ Yehowa se ɛlabaɣ lɛ mbʋ pʋyɔɔ yɔ, etiyi ɛ-Pɩyalʋ kʋsɔɔlʋ se ɛwɩlɩ-ɖʋ tɔm. Alɩwaatʋ ndʋ ɖɩkpɛlɩkɩɣ Yesu yɔɔ tɔm yɔ, ɖɩtɩlɩɣ Yehowa yɔɔ tɔm sakɩyɛ nɛ mbʋ ɖɩla nɛ ɖɔ-tɔm kɛdɩnɩ-ɩ yɔ. Ye ɖɩwɛnɩ tisuu Krɩstʋ kɩlaʋ yɔɔ yɔ, ɖɩpɩzɩɣ nɛ ɖɩkɛ Yehowa Ɛsɔ taabalaa kɩbama nɛ laŋhɛzɩyɛ wɛɣ ɖa nɛ ɩ ɖɛ-hɛkʋ taa.—Roma 5:1.

11. Ɛbɛ yɔɔ pɩwɛɛ se ɖɩtɩmɩɣ Yesu hɩɖɛ taa?

¹¹ Ðɩsɛɣ Yehowa se ɛlabaɣ lɛ mbʋ pʋyɔɔ yɔ, ɖɩpɩzɩɣ nɛ ɖɩtɩŋnɩ ɛ-Pɩyalʋ yɔɔ nɛ ɖɩtɩmnɩ-ɩ. Yesu yɔɔ Yehowa tɩŋɩɣna nɛ ɛlakɩ-ɖʋ mbʋ ɖɩpɔzʋʋ-ɩ yɔ. Adɩma wena ɖɩlakɩ Yesu hɩɖɛ taa yɔ, Yehowa welisiɣ-yɛ nɛ ecosuu a-yɔɔ. Yesu lɩzɩ pɩ-taa se: “Mbʋ payɩ ɩpɔzʋʋ ma-hɩɖɛ taa yɔ, mankaɣ-pʋ labʋ, se pɩsa nɛ pasa Caa pɩtɩŋnɩ Pɩyalʋ yɔɔ.”—Yoh. 14:13, 14.

12. Lɩmaɣzɩyɛ lɛɛɖɛ nɖɩ yɔɔ pɩwɛɛ se ɖɩsɛɛ Yehowa se ɛlabaɣ lɛ ɛ-Pɩyalʋ yɔɔ?

¹² Yehowa tɩŋɩɣnɩ Yesu kɩhɛyʋʋ pʋ-ñʋʋ taa kɩlaʋ yɔɔ nɛ ekpeɣu-ɖʋ ɖa-kɩwɛɛkɩm. Masɩ yɔɔdʋʋ se Yesu kɛ ‘ɖɔ-cɔjɔ sɔsɔ nɛ ɛcaɣ Kɩlɩm kewiyaɣ kpelaɣ nesi kɩbanzɩ yɔɔ ɛsɔdaa.’ (Ebr. 8:1) Yesu kɛ ‘ɖa-sɩnɩyʋ nɔɔyʋ Caa cɔlɔ.’ (1 Yoh. 2:1) Ðɩwɛnɩ ɛsɩmɩyɛ siŋŋ se Yehowa ha-ɖʋ Cɔjɔ Sɔsɔ weyi ɛnɩɣ ɖɛ-ɛjandʋ taa nɛ weyi “etendiɣ ɖɔɖɔ ɖɔ-yɔɔ yɔ”! (Roma 8:34; Ebr. 4:15) Ðɩkɛ ɛyaa mantɩtalɩ pilimwaa; pʋyɔɔ lɛ, ye pɩtaakɛ Yesu kɩlaʋ yɔɔ yɔ, ɖɩtaapɩzɩɣ se ɖɩñɔtɩnɩ Yehowa adɩma taa. Pɩtʋʋ fɛyɩ se ŋtisiɣ se ɖɩɩpɩzɩɣ nɛ ɖɩsɛɛ Yehowa se ɛlabaɣ lɛ nɛ pɩtalɩ pi-lone taa kʋjɔʋ kɩbaŋʋ ŋgʋ ɛlabɩ-ɖʋ yɔ kɩ-yɔɔ; kʋjɔʋ ŋgʋ lɛ ɛ-Pɩyalʋ kʋsɔɔlʋ!

13. Ðoo wena aɖɛwa nɛ kife nɛ pakʋ Yesu yɔ a-taa, ɛzɩma Yesu wɩlaa se ɛsɔɔlɩ ɛ-apostoloowaa?

¹³ Ðoo wena aɖɛwa nɛ kife nɛ pakʋ Yesu yɔ a-taa, ɛkpaɣ alɩwaatʋ sakɩyɛ nɛ ɛtɩmɩ ɛ-tɔmkpɛlɩkɩyaa yɔɔ. Ɛpɔzɩ ɛ-Caa se “kañatʋ tʋ yɔɔ lɛ, ɛcɔnɩ pɔ-yɔɔ.” (Yoh.17:15) Pɩwɩlɩɣ se Yesu kaasɔɔlɩ-wɛ siŋŋ. Paa ɛɛnawa se piileɖiɣ lɛ, ɛkaɣ tɔɔʋ kʋñɔŋ siŋŋ yɔ, ewobi pɩ-yɔɔ nɛ ɛnɩɣzɩ ɛ-apostoloowaa yɔɔ.

14. Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ ɖo-koobiya?

¹⁴ Ðɩmaɣzɩɣnɩ Yesu nɛ ɖɩɩkaŋ ɖa-lɩmaɣza ɖa-maɣmaɣ ɖa-kɩcɛyɩm yɔɔ ɖeke. Ɛlɛ ɖɩtɩmɩɣ ɖo-koobiya yɔɔ ɖoŋ ɖoŋ. Alɩwaatʋ ndʋ ɖɩlakɩ mbʋ yɔ, ɖɩwɩlɩɣ se ɖɩwɛɛ nɛ ɖɩñaŋ Yesu paɣtʋ ndʋ tɩtɔŋ se ɖɩsɔɔlɩ ɖama yɔ, nɛ ɖɩwɩlɩɣ Yehowa se ɖɩsɔɔlɩ ɖo-koobiya Krɩstʋ mba siŋŋ. (Yoh. 13:34). Ye ɖɩtɩmɩɣ ɖo-koobiya yɔɔ yɔ, pɩsɩɣnɩ-wɛ. Ɛsɔtɔm heyiɣ-ɖʋ se: “Ɛyʋ siɣsiɣ tʋ tenduu wɛnɩ ɖoŋ siŋŋ.”—Yak. 5:16.

15. Ɛbɛ yɔɔ pɩpɔzʋʋ se ɖɩtɩmɩ ɖo-koobiya Krɩstʋ mba yɔɔ?

 ¹⁵ Pɩpɔzʋʋ se ɖɩtɩmɩ ɖo-koobiya Krɩstʋ mba yɔɔ mbʋ pʋyɔɔ yɔ, pakatɩɣ kala sakɩyɛ. Ðɩpɩzɩɣ nɛ ɖɩpɔzɩ Yehowa se ɛsɩnɩ-wɛ nɛ pɔɖɔkɩ pa-laŋa kʋdɔŋ, asɛyɩŋ, yoŋ, nazɩm, yaa kala lɛɛna taa. Ðɩpɩzɩɣ ɖɔɖɔ nɛ ɖɩtɩmɩ ɖo-koobiya halaa nɛ abalaa mba palakɩ tʋmɩyɛ nɛ kpekpeka nɛ pasɩɣnɩ mba pɛwɛ kɩcɛyɩm taa yɔ pɔ-yɔɔ. Pɩtɩla yɔ, ña-maɣmaɣ ŋsɩm mba pakatɩɣ kala ana yɔ pa-taa nabɛyɛ. Pɩɩwɛɣ ɖeu se alɩwaatʋ ndʋ ŋlakɩ ña-maɣmaɣ ña-adɩma yɔ, ŋyaa pa-hɩla ña-adɩma taa? Alɩwaatʋ ndʋ ɖɩtɩmɩɣnɩ Yehowa se ɛsɩnɩ-wɛ nɛ pɔɖɔkɩ pa-laŋa yɔ, ɖɩwɩlɩɣ se ɖɩwɛnɩ koobiye sɔɔlɩm siŋŋ.

16. Ɛbɛ yɔɔ pɩwɛɛ se ɖɩtɩmɩ mba pɛɖɛɣ nɔɔ ɖɛ-hɛkʋ taa yɔ pɔ-yɔɔ?

¹⁶ Mba pɛɖɛɣ nɔɔ Yehowa ɛgbɛyɛ taa yɔ, pɛwɛnɩ ɛsɩmɩyɛ siŋŋ se lalaa tɩmɩɣ pɔ-yɔɔ, nɛ adɩma ana awazɩɣ-wɛ. Apostoloo Pɔɔlɩ kaanawa se pɩcɛyaa se lalaa ɩtɩmɩ ɛ-yɔɔ. Ɛmawa se: “Ɩtɩmɩ ɖɔɖɔ mɔ-yɔɔ nɛ pɩha-m tɔm pee alɩwaatʋ ndʋ monkuluu mɔ-nɔɔ yɔ, se pɩsa nɛ manpɩzɩ mɔyɔɔdɩnɩ abalɩtʋ alɩwaatʋ ndʋ meyeki se patɩlɩ tɔm kɩbandʋ tɛ mɛsaɣ tɛɛ tɔm kiɖeɖetu yɔ.” (Efɛz. 6:19). Sɔnɔ ɖɔɖɔ, koobiya sakɩyɛ ɖɛɣ nɔɔ ɖɛ-hɛkʋ taa nɛ palakɩ tʋmɩyɛ nɛ kpekpeka. Alɩwaatʋ ndʋ ɖɩtɩmɩɣnɩ Yehowa se ɛwazɩ pa-tʋma yɔɔ yɔ, ɖɩwɩlɩɣ se ɖɩsɔɔlɩ-wɛ.

17-18. (a) Alɩwaatʋ ndʋ taa papɩzɩɣ nɛ pɔpɔzɩ-ɖʋ se ɖɩɖɛɛ lalaa nɔɔ adɩma taa? (b) Nɛ tɔm ndʋ pɩwɛɛ se tɩwɛɛ ɖa-lɩmaɣza taa?

¹⁷ Nabʋyʋ taa, pɔpɔzʋʋ-ɖʋ se ɖɩɖɛɛ lalaa nɔɔ adɩma taa. Alɩwaatʋ ndʋ koobu halɩñɩnʋ nɔɔyʋ kaakpɛlɩkɩɣnɩ nɔɔyʋ Bibl yɔ, ɛpɩzɩɣ nɛ ɛpɔzɩ koobu halɩñɩnʋ weyi ɛsɩ-ɩ yɔ se ɛtɩmɩ. Koobu halɩñɩnʋ weyi ɛsɩ-ɩ yɔ, pɩtɩla yɔ ɛɛsɩŋ kpɛlɩkɩyʋ ɛnʋ camɩyɛ; pʋyɔɔ lɛ, ɛpɩzɩɣ nɛ ɛlɩzɩ se ɛlakɩ kɛdɛzaɣ adɩma. Ðɩnɛ ɛlɛ, pɩsɩɣnɩ-ɩ nɛ ɛtɩlɩ tɔm ndʋ ɛyɔɔdɩ yɔ camɩyɛ alɩwaatʋ ndʋ ɛɛtɩmɩɣ kpɛlɩkɩyʋ yɔɔ yɔ.

¹⁸ Papɩzɩɣ nɛ pɔpɔzɩ koobu abalɩñɩnʋ nɔɔyʋ se ɛtɩmɩ tɔm susuu kediɣzaɣ nakɛyɛ taa yaa ɛgbɛyɛ taa kediɣzaɣ nakɛyɛ taa. Koobiya abalɩñɩma mba pɛwɛnɩ waɖɛ nɖɩ yɔ, pɩwɛɛ se kaɖʋwa ŋga kɔ-yɔɔ palakɩ kediɣzaɣ ŋga yɔ, kɛwɛɛ pa-lɩmaɣza taa. Adɩma  tɩkɛ nʋmɔʋ ŋgʋ kɩ-yɔɔ patɩŋɩɣna se patasɩ lɔŋ ɛgbɛyɛ yaa se posusi tɔm natʋyʋ ɛgbɛyɛ yɔ. Ɛgbɛyɛ taa kediɣzisi sakɩyɛ taa lɛ, cɛcɛsɩ kagbanzɩ pahaɣ se peteeni hendu nɛ pala adɩma; pʋyɔɔ lɛ, koobu abalɩñɩnʋ weyi ɛtɩmɩɣ yɔ, pɩtɩcɛyɩ se ɛyɔɔdɩ “tɔm sakɩyɛ,” kɔzɩ kɔzɩ kediɣzaɣ ɖɩbazɩyɛ.—Mat. 6:7.

19. Ɛbɛ kaɣ-ɖʋ sɩnʋʋ se Yehowa tɔm hʋʋ kɩyakʋ ɛtaakɔɔ nɛ kitudi-ɖʋ?

¹⁹ Pɩcɛyaa se ɖɩsɩɩ adɩma kajalaɣ ɖeɖe ɖe-wezuu caɣʋ taa nɛ pɩkɩlɩ, mbʋ pʋyɔɔ yɔ Yehowa tɔm hʋʋ kɩyakʋ wɛɛ nɛ kɩñɔtʋʋ. Hɔɔlʋʋ ŋgʋ kɩ-taa lɛ, Yesu yɔɔdaa se: “Pʋyɔɔ lɛ, ɩcaɣnɩ mɩ-ɛsa nɛ itendiɣ Ɛsɔ paa ɛzɩmtaa, nɛ ɩpɩzɩ ɩlɩɩ mbʋ payɩ pɩkaɣ labʋ yɔ pɩ-taa.” (Luka 21:36) Ɛɛɛ, ye ɖɩtɩmɩɣ ɖoŋ ɖoŋ yɔ, pɩkaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩcaɣnɩ ɖɛ-ɛsa fezuu taa nɛ pɩsa nɛ Ɛsɔ kɩyakʋ ɛtaakɔɔ nɛ kitudi-ɖʋ.

20. Ɛzɩma ɖa-adɩma pɩzɩɣ nɛ awɛɛ ɛzɩ ŋgee tɩlaaɖɩ ŋgʋ kɩlɩɣ sɔzɩŋ camɩyɛ yɔ?

²⁰ Tɔm ndʋ taa ɖɩtazaa? Ðɩkpɛlɩkaa se waɖɛ nɖɩ ɖɩwɛna se ɖɩtɩmɩ yɔ, ɖɩkɛ ñɩm pʋyʋ siŋŋ ɖɛ-ɛsɩndaa. Mbʋ pɩwɛɛ se pɩ-tɔm ɛkɩlɩ cɛyʋʋ ɖa-adɩma taa yɔ mbʋ lɛ mbʋ pitukuuni Yehowa kaɖʋsɩ yɔ. Pɩwɛɛ ɖɔɖɔ se ɖɩsɛɛ Ɛsɔ se ɛlabaɣ lɛ, ɛ-Pɩyalʋ nɛ e-Kewiyaɣ yɔɔ nɛ ɖɩtɩmɩ ɖo-koobiya Krɩstʋ mba yɔɔ. Yehowa sɔɔlaa se ɖɩtɩmɩ nɛ ɖɩpɔzɩ ɖe-evemiye taa kɩcɛyɩm, nɛ ɖɩpɔzɩ-ɩ ɖɔɖɔ se ɛsɩnɩ-ɖʋ nɛ ɖe-tisuu wɛɛ ɖoŋ tam. Ye ɖɩkpakɩɣ alɩwaatʋ nɛ ɖɩmaɣzɩɣ tɔm ndʋ ɖɩyɔɔdʋʋ ɖa-adɩma taa yɔ tɩ-yɔɔ camɩyɛ yɔ, ɖɩwɩlɩɣ se waɖɛ kɩbanɖɛ nɖɩ ɖɩwɛna se ɖɩtɩmɩ yɔ ɖɩkɛ ñɩm pʋyʋ ɖɛ-ɛsɩndaa. Ðɔ-tɔm pee kaɣ wɛʋ ɛzɩ ŋgee tɩlaaɖɩ ŋgʋ kɩlɩɣ sɔzɩŋ camɩyɛ yɔ Yehowa ɛsɩndaa, pʋ-tɔbʋʋ se ‘akɛdɩɣnɩ-ɩ.’—Adu. 15:8