1, 2. (a) Paa ɖa-tɩŋa ɖɩwɛ Yehowa hɔʋ taa yɔ, wɛtʋ ndɩ ndɩ ndʋ taa ɖɩwɛɛ? (b) Nɛ ɛzɩma pɩɖɔma nɛ ɖɩtɩlɩ toovenim?

 YEHOWA cɔlɔ hɔʋ taa ɖʋtʋ lɩnaa. (Efɛ. 3:14, 15) Paa ɖa-tɩŋa ɖɩwɛ Yehowa hɔʋ taa yɔ, ɖɛ-wɛtʋ nɛ mbʋ pɩtalɩ-ɖʋ wezuu caɣʋ taa yɔ, pɩwɛ ndɩ ndɩ. Pʋtɔma, ɖooo palʋlʋʋ-ŋ yɔ ŋwɛ ña-lʋlɩyaa cɔlɔ na nɛ ŋkɔɔ ŋpaɣlɩ. Nabɛyɛ lɛ, pʋtɔma kʋdɔŋ nakʋyʋ, kɛgbɛdɩsaɣ nakɛyɛ yaa asɛyʋʋ nakʋyʋ laba nɛ pa-lʋlɩyaa sɩ nɛ peyebi-wɛ. Halɩ lalaa ñaatɩɩsɩŋ pa-lʋlɩyaa nɛ pʋcɔ.

² Ða-tɩŋa ɖɩkɛ Yehowa hɔʋ taa mba, ɛlɛ ɛzɩma pɩɖɔma nɛ ɖɩtɩlɩ toovenim yɔ pɩwɛ ndɩ ndɩ. Pɩtɩla, ‘palʋlɩ-ŋ toovenim taa na,’ nɛ ña-lʋlɩyaa wɩlɩ-ŋ Ɛsɔ paɣtʋ. (Wp. 6:6, 7) Yaa pɩtɩtɩlɩ yɔ, tɔm susuu tʋmɩyɛ nɖɩ Yehowa sɛyaa ɖiɣni labʋ yɔ, ɖɩ-yɔɔ pɩtɩŋnaa nɛ ŋkpɛlɩkɩ toovenim tɔm ɛzɩ ɛyaa sakɩyɛ yɔ.—Rom. 10:13-15; 1 Tim. 2:3, 4.

3. Nɔɔ kʋɖʋmaɣ ŋga wɛ ɖa-tɩŋa ɖe-wezuu caɣʋ taa?

³ Paa ɖɛ-wɛtʋ ɛwɛ ndɩ ndɩ ɛzɩ ɖɩtɛm naʋ yɔ yɔ, nɔɔ kʋɖʋmaɣ nakɛyɛ wɛ ɖe-wezuu caɣʋ taa. Aɖam kaañamtʋ yɔɔ lɛ ɖɩwɛɛ nɛ ɖɩnɩɣ siziŋ mbʋ pʋyɔɔ yɔ ɛɖɛzɩ-ɖʋ mantɩtalɩ pilim wɛtʋ, kɩwɛɛkɩm nɛ sɩm. (Rom. 5:12) Paa mbʋ yɔ, ɖa mba ɖɩkɛ Ɛsɔ sɛyaa toovenim ñɩma yɔ, ɖɩpɩzɩɣ nɛ ɖɩyaa Yehowa se “ɖa-Caa.” Izrayɛɛlɩ piya kaaheyi Yehowa Izaayii 64:7 taa se:  “Ñɛkɛnɩ ɖa-Caa.” Pɩtasɩ lɛ, Yesu paɣzɩ adɩma wena ɛlaba nɛ akɛnɩ-ɖʋ kɩɖaʋ yɔ lɛ, ɛtɔm se: “Ða-Caa ña weyi ŋwɛ ɛsɔdaa yɔ, ña-hɩɖɛ ɛsɛɛ.”—Mat. 6:9.

4, 5. Ye ɖɩñɩnɩɣ se ɖɩwɛɛnɩ ɛsɩmɩyɛ ɖa-Caa Yehowa yɔɔ nɛ pɩkɩlɩ yɔ, ɛbɛ pɩwɛɣ ɖeu se ɖɩla?

⁴ Ðɩkɛ samaɣ ŋga kayaɣ Yehowa hɩɖɛ nɛ tisuu yɔ, pʋyɔɔ lɛ ɛhaɣ-ɖʋ mbʋ pɩpɔzʋʋ-ɖʋ yɔ nɛ ɛkandɩyɩɣ ɖɔ-yɔɔ ɛzɩ pɩmʋnaʋ yɔ. Keɣa maɖʋ ma lɩmaɣza wena Yehowa wɛnɩ paa ɛ-sɛyʋ weyi lɛ ɛ-yɔɔ yɔ nɛ ɛtɔ se: “Ɛñɔnɩ-m yɔ malɩzɩɣ-ɩ pɩtɩŋa pɩ-taa, mankaɖɩɣ ɛ-yɔɔ, mbʋ yɔ ɛsɩm ma-hɩɖɛ.” (Keɣa 90:14) Toovenim taa lɛ, Yehowa holuu-ɖʋ ɖo-koyindinaa nesi tɛɛ nɛ ɛkandɩyɩɣ ɖɔ-yɔɔ se pataatɔyɩtɩ-ɖʋ, mbʋ pʋyɔɔ yɔ ɖɩkɛ ɛ-samaɣ.

⁵ Ye ɖɩñɩnɩɣ se ɖɩwɛɛnɩ ɛsɩmɩyɛ ɖa-Caa weyi ɛwɛ ɛsɔdaa yɔ ɛ-yɔɔ nɛ pɩkɩlɩ yɔ, pɩwɛɣ ɖeu se ɖɩtazɩ lɩmaɣza sɔsɔna naadozo anɛ a-taa: (1) Yehowa kɛ ɖa-Kʋjɔʋ Laɖʋ. (2) Yehowa kɛ ɖɔ-yɔɔ Kandɩyʋ. (3) Yehowa kɛ ɖa-Taabalʋ Sɔsɔ. Ðɩɩtazɩɣ lɩmaɣza ana a-taa lɛ, pɩwɛɣ ɖeu se ɖɩmaɣzɩ taabalɩyɛ nɖɩ ɖɩwɛ ɖa nɛ Ɛsɔ ɖɛ-hɛkʋ taa yɔ ɖɩ-yɔɔ, nɛ ɛzɩma ɖɩpɩzɩɣ nɛ ɖɩɖʋ-ɩ hɩɖɛ ɛzɩ ɖa-Caa yɔ. Pɩwɛɣ ɖeu ɖɔɖɔ se ɖɩmaɣzɩ wazasɩ nzɩ Yehowa kɔŋnɩ mba pɔñɔtʋʋnɩ-ɩ yɔ, sɩ-yɔɔ.—Yak. 4:8.

6. Ɛbɛ yɔɔ ɖɩpɩzɩɣ nɛ ɖɩtɔ se “paa pʋyʋ kɩbanʋ weyi” lɛ, Yehowa cɔlɔ ɛlɩɣna?

⁶ Yakubu mawa se: “Paa pʋyʋ kɩbanʋ weyi, paa kʋjɔʋ kɩbaŋʋ ŋgʋ lɛ, pɩtɩŋa pɩlɩɣnɩ mintʋsʋŋ Caa cɔlɔ nɛ pitiki ɖɔ-yɔɔ.” (Yak. 1:17) Wezuu kɛ kʋjɔʋ kɩbaŋʋ ŋgʋ kɩlɩnɩ Yehowa cɔlɔ yɔ. (Keɣa 35:10) Ye ɖɩkpaɣ ɖe-wezuu nɛ ɖɩlakɩnɩ Yehowa sɔɔlɩm yɔ, ɖihikiɣ wazasɩ sakɩyɛ sɔnɔ nɛ ɖɩkaɣ hiɣu wezuu maatɛŋ ɛjaɖɛ kɩfaɖɛ taa. (Ad. 10:22; 2 Pɩy. 3:13) Ŋgʋ, ɖɩnawa se Aɖam kaañamtʋ kɔnɩ kʋñɔmɩŋ sakɩyɛ. Ye mbʋ, ɛzɩma tɔm ndʋ tɩpɩzɩɣ nɛ tɩla?

7. Ɛzɩma tɩyɛ Ɛsɔ ha-ɖʋ waɖɛ se taabalɩyɛ kɩbanɖɛ ɛwɛɛ ɖa nɛ ɩ ɖɛ-hɛkʋ taa?

⁷ Toovenim lɛ, Yehowa kɛ ɖa-Kʋjɔʋ Laɖʋ Sɔsɔ hɔɔlɩŋ sakɩyɛ taa. Yehowa labɩ-ɖʋ lootiye nɛ ɛya ɖa-ñʋʋ. Ða-tɩŋa payɩ ɖɩkɛ kɩwɛɛkɩm laɖaa, mbʋ pʋyɔɔ yɔ Aɖam ɖɛzɩ-ɖʋ mantɩtalɩ pilim wɛtʋ. (Rom. 3:23) Ɛlɛ Yehowa sɔɔlɩm yɔɔ lɛ, ɛha-ɖʋ waɖɛ se ɖa nɛ ɩ ɖɛ-hɛkʋ taa taabalɩyɛ kɩbanɖɛ ɛwɛɛ. Apostoloo Yohanɛɛsɩ mawa se: “Ɛzʋnɔ Ɛsɔ wɩlɩ-ɖʋ ɛ-sɔɔlɩm: Ɛsɔ tiyi ɛ-Pɩyalʋ ɛgbamɩyɛ ɛjaɖɛ yɔɔ se ɖɩwɛɛ ɛ-yɔɔ. Ɛ-sɔɔlɩm kɔyɔ se: pɩtɩkɛ ɖɔsɔɔlɩnɩ Ɛsɔ, ɛlɛ ɛnʋ sɔɔlɩnɩ-ɖʋ nɛ etiyi ɛ-Pɩyalʋ se ɛkɛ ɖa-kɩwɛɛkɩm kɩlaʋ kpɩnɛ.”—1 Yoh. 4:9, 10.

8, 9. Ɛzɩma Yehowa wɩlaa se ɛnʋ kɛnɩ Kʋjɔʋ Laɖʋ Sɔsɔ Abraham nɛ Izaakɩ pa-alɩwaatʋ taa? (Cɔnɩ kiɖe tɛɛ kɩlɛmʋʋ.)

⁸ Pɩnaɣ 1893 P.Ð.A. lɛ, nabʋyʋ labɩ Abraham wezuu caɣʋ taa nɛ pɩwɩlɩɣ se Yehowa kaɣ haʋ wezuu maatɛŋ ɛyaa mba pañaŋɩ-ɩ yɔ, pe-kpeekpe. Ebree 11:17-19 lɩzɩ pɩ-taa se: “Tisuu yɔɔ, pɩcɛzɩ Abraham lɛ, ɛlaa kɩlaʋ Izaakɩ, ɛ-pɩyalʋ ɛgbamɩyɛ, weyi ɛɛkɛ ñɩm mbʋ pɔyɔɔdɩ pɩ-tɔm yɔ pʋ-tɔɔyʋ yɔ. Ɛnʋ paaheyaa se: Izaakɩ yɔɔ yɔɔ ŋkaɣ wɛnʋʋ samaɣ ŋga pakaɣ-kɛ yaʋ ña-hɩɖɛ yɔ. Ɛsɔ lɛ, Abraham maɣzaɣ se ɛpɩzɩɣ nɛ efezi sɩɖaa; pʋyɔɔ yɔɔ ɛɖaɣnɩ ɛ-pɩyalʋ naʋ, nɛ pɩɩkɛ kawɩlaɣ.” Ɛzɩ Abraham tisuu faaa se ɛlaa ɛ-pɩyalʋ Izaakɩ yɔ, mbʋ ɖɔɖɔ Yehowa tisi faaa nɛ ɛcɛlɩ ɛ-Pɩyalʋ Yesu Krɩstʋ se ɛsɩ sɩm ɛyaa yɔɔ.—Kalɩ Yohanɛɛsɩ 3:16, 36.

⁹ Izaakɩ taa kaalabɩ leleŋ siŋŋ se payabɩ ɛ-ñʋʋ nɛ patɩkʋ-ɩ se palaa kɩlaʋ. Pɩtʋʋ fɛyɩ se ɛɛwɛnɩ ɛsɩmɩyɛ se Ɛsɔ yeba nɛ pakpaɣ ɛyaʋ ŋgʋ pɩɩlɛɣtɩ kɩ-hɩŋ hɔɖʋʋ nakʋyʋ tɛɛ yɔ nɛ palaa kɩlaʋ e-lone taa. (Kiɖe 22:10-13) Mbʋ labɩna  nɛ payaa lone nɖɩ se “[Yehowa] cɛlɩɣna.”—Kiɖe 22:14.

10, 11. (a) Mba nesi tɛɛ paɖʋzɩ “ceɣu tʋmɩyɛ”? (b) Nɛ ɛzɩma tɩyɛ palakɩ tʋmɩyɛ nɖɩ?

¹⁰ Ðɩɩmaɣzɩɣ ɛzɩma Yehowa wɩlaa se ɛkɛ Kʋjɔʋ Laɖʋ Sɔsɔ yɔ pɩ-yɔɔ lɛ, ɖɩtɔzʋʋ nɛ ɛsɩmɩyɛ tʋmɩyɛ kɩbanɖɛ nɖɩ Yesu Krɩstʋ laba yɔ, ɖɩ-yɔɔ. Mbʋ ɖɔɖɔ Pɔɔlɩ laba. Ɛmawa se: “Ye ɛyʋ kʋyʋm koŋ ɛsɩbɩ ɛyaa kpeekpe yɔɔ kɔyɔ, ɖɩnɛ ɛlɛ ɛyaa kpeekpe sɩbɩna. Nɛ ɛsɩ ɛyaa kpeekpe yɔɔ se ɛzadɩnaa ɩtaatasɩ wɛʋ pa-maɣmaɣ pɔ-yɔɔ, ɛlɛ weyi ɛsɩba nɛ efe yɔ, ɛ-yɔɔ.”—2 Kɔr. 5:14, 15.

¹¹ Ɛzɩma kajalaɣ Krɩstʋ ñɩma kaasɔɔlɩ Ɛsɔ nɛ pɛwɛɛnɩ ɛsɩmɩyɛ waɖɛ nɖɩ ɛha-wɛ se pɛsɛɛ-ɩ yɔ pʋyɔɔ lɛ, palabɩ “ceɣu tʋmɩyɛ” nɖɩ paaɖʋ-wɛ yɔ nɛ taa leleŋ. Tɔm susuu nɛ kpɛlɩkɩyaa labʋ tʋmɩyɛ nɖɩ paalaba yɔ, ɖɩha ɛyaa mba paawɛnɩ laŋa kɩbana yɔ waɖɛ se pa nɛ Ɛsɔ peceɣ, pɛkɛ ɛ-taabalaa nɛ pʋwayɩ lɛ papɩsɩ e-piya fezuu taa. Sɔnɔ, tʋmɩyɛ kʋɖʋmɖɩyɛ nɖɩ ɖɔɖɔ koobiya pata-m numwaa ɖiɣni labʋ. Pɛkɛ Ɛsɔ nɛ Krɩstʋ po-lone taa caɣyaa, nɛ tʋmɩyɛ nɖɩ peɖiɣni labʋ yɔ, ɖɩhaɣ ɛyaa mba pɛwɛnɩ laŋa kɩbana yɔ waɖɛ se pɔñɔtɩnɩ Yehowa nɛ papɩsɩ Krɩstʋ mba.—Kalɩ 2 Kɔrɛntɩ 5:18-20; Yoh. 6:44; Tʋma 13:48.

12, 13. Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ kʋjɔŋ sakɩyɛ weyi Yehowa labɩ-ɖʋ yɔ ɩ-yɔɔ?

¹² Krɩstʋ ñɩma mba pɛwɛnɩ lidaʋ se pacakɩ tɛtʋ yɔɔ yɔ, pasɩɣnɩ pata-m numwaa Kewiyaɣ tɔm susuu, mbʋ pʋyɔɔ yɔ pɛwɛnɩ ɛsɩmɩyɛ Kʋjɔʋ Laɖʋ Sɔsɔ Yehowa yɔɔ. Bibl kɛ Ɛsɔ kʋjɔʋ kɩbaŋʋ lɛɛkʋ, nɛ ŋgʋ ɖɩlakɩnɩ tʋmɩyɛ tɔm susuu taa. (2 Tim. 3:16, 17) Ye ɖɩlakɩnɩ Bibl tʋmɩyɛ camɩyɛ ɖɔ-tɔm susuu taa yɔ, ɖɩhaɣ ɛyaa waɖɛ se pehiɣ wezuu maatɛŋ. Ɛlɛ Yehowa kʋjɔʋ lɛɛkʋ ɖɔɖɔ sɩɣnɩ-ɖʋ tʋmɩyɛ nɖɩ ɖɩ-labʋ taa: ŋgʋ lɛ e-fezuu kiɖeɖeu. (Zek. 4:6; Luka 11:13) Pee wena tʋmɩyɛ nɖɩ ɖɩlʋlʋʋ yɔ, aɖɔwa pɩdɩɩfɛyɩ ɛzɩ Annuaire des Témoins de Jéhovah waa tɩŋa wɩlʋʋ yɔ. Pɩkɛnɩ-ɖʋ hɩɖɛ ɖʋʋ siŋŋ se ɖɩsa ɖa-Caa nɛ ɖa-Kʋjɔʋ Laɖʋ Yehowa pɩtɩŋnɩ tɔm susuu tʋmɩyɛ nɖɩ ɖɩ-yɔɔ.

¹³ Kʋjɔŋ weyi Ɛsɔ labɩ-ɖʋ payɩ yɔ ɩ-yɔɔ lɛ, pɩwɛɣ ɖeu se ɖɩpɔzɩ ɖa-tɩ se: ‘Mɛwɛɛ nɛ mañakɩ pana se mala mbʋ payɩ manpɩzɩɣ yɔ tɔm susuu taa se mawɩlɩ Yehowa mɛ-ɛsɩmɩyɛ na? Hɔɔlɩŋ weyi taa manpɩzɩɣ nɛ mantasɩ ñaɣʋ pana nɛ mɛwɛɛ niye tɔm susuu taa nɛ pɩkɩlɩ?’ Ye ɖɩsɩ Ɛsɔ Kewiyaɣ kajalaɣ lone taa ɖe-wezuu caɣʋ taa yɔ, ɖɩwɩlɩɣ se ɖɩwɛnɩ ɛsɩmɩyɛ kʋjɔŋ kɩbaŋ weyi Ɛsɔ labɩ-ɖʋ yɔ, ɩ-yɔɔ. Ye ɖɩlabɩ mbʋ yɔ, Yehowa kaɣ cɔnʋʋ ɖa-kɩcɛyɩm ɖeɖe. (Mat. 6:25-33) Ɛzɩma Ɛsɔ cɔŋnɩ ɖɔ-yɔɔ nɛ sɔɔlɩm yɔ pʋyɔɔ lɛ, pɩtʋʋ fɛyɩ se ɖɩsɔɔlaa se ɖɩla mbʋ ɖɩpɩzɩɣ yɔ nɛ ɖɔ-tɔm kɛdɩnɩ-ɩ nɛ ɛ-taa la leleŋ.—Ad. 27:11.

14. Ɛzɩma tɩyɛ Yehowa wɩlaa se ɛkɛ ɛ-samaɣ ñʋʋ yaɖʋ?

¹⁴ Keɣa maɖʋ Daviid te hendu se: “Nɛ ma yɔ, pʋtɔdɩyɛ tɔyɩ; [Yehowa] maɣzɩɣ mɔ-yɔɔ. Ña Ɛsɔ, ña na ma-ñʋʋ yaɖʋ nɛ man-kʋyʋʋ.” (Keɣa 39:18) Yehowa yabɩ ɛ-samaɣ ñʋʋ tam sakɩyɛ, kɔzɩ kɔzɩ alɩwaatʋ ndʋ ko-koyindinaa nazaɣ-kɛ siŋŋ nɛ pɛwɛɛ ka-wayɩ kaŋ kaŋ yɔ. Ðɩwɛnɩ ɛsɩmɩyɛ siŋŋ se Ɛsɔ sɩɣnɩ-ɖʋ nazɩm taa nɛ ɛlakɩ-ɖʋ fezuu taa kʋjɔŋ sakɩyɛ paa ɛzɩmtaa.

15. Ha kɩɖaʋ ŋgʋ kɩwɩlɩɣ ɛzɩma caja kɩbanʋ nɔɔyʋ kandɩyɩ ɛ-pɩɣa yɔɔ yɔ.

¹⁵ Caja kɩbanʋ cɔŋnɩ e-piya yɔɔ nɛ ɛkandɩyɩɣ sɩ-yɔɔ. Ye sɩwɛ kaɖɛ naɖɩyɛ taa  yɔ, paaheyiɣ-i kiheyu se ɛñaɣ pana nɛ ɛya sɩ-ñʋʋ. Koobu nɔɔyʋ tɔzʋʋ mbʋ pɩɩtalɩ-ɩ alɩwaatʋ ndʋ ɛɛkɛ pɩɣa taŋayʋ yem yɔ pɩ-yɔɔ. Ɛ nɛ ɛ-caa paalɩnɩ tɔm susuu nɛ pekpeŋ, nɛ pɩɩwɛɛ se pɛtɛzɩ pɔɔ nakɛyɛ. Tɛʋ sɔsɔʋ nakʋyʋ kaanɩ tanaŋ tɛɛ nɛ pɔɔ ŋga kosu. Pɩɩwɛɛ se pamaa kaaŋ sɔsɔŋ weyi ɩɩwɛ lɩm taa yɔ, ɩ-yɔɔ kʋɖʋm kʋɖʋm pʋcɔ nɛ pɛtɛzɩ pɔɔ. Ɛnʋ kaaɖɛnɩ ɛ-caa nɔɔ. Pɩkɛdaa lɛ, pituu-i kaaʋ nakʋyʋ yɔɔ nɛ ɛfalɩ lɩm taa, nɛ eli lɩm tam nabʋlɛ. Maɣzɩ kpem nɛ ŋna, ɛzɩma pɩɩlabɩ abalɩbɩɣa leleŋ siŋŋ alɩwaatʋ ndʋ ka-caa sezi nesi nɛ ɛkpa ka-hamʋʋ nɛ ɛlɩzɩ-kɛ lɩm tɛɛ yɔ! Mbʋ ɖɔɖɔ ɖa-Caa weyi ɛwɛ ɛsɔdaa yɔ eholuu-ɖʋ sɔnɔ. Eholuu-ɖʋ ɛjaɖɛ kɩdɛkɛdɩyɛ ɖɩnɛ ɖɩ-kpacanaa taa. Eholuu-ɖʋ ɖɔɖɔ ɛjaɖɛ ñʋʋdʋ Sataŋ nesi tɛɛ. Toovenim taa lɛ, ɖa-taa paa anɩ lɛ ɛsɔɔlaa se Yehowa ɛkɛnɩ ɛ-yɔɔ Kandɩyʋ.—Mat. 6:13; 1 Yoh. 5:19.

16, 17. Alɩwaatʋ ndʋ Izrayɛɛlɩ piya lakaɣ you nɛ Amaalɛɛkɩ mba yɔ, ɛzɩma tɩyɛ Yehowa sɩnɩ-sɩ nɛ ɛkandɩyɩ sɩ-yɔɔ?

¹⁶ Yehowa kandɩyɩ ɛ-ɛyaa yɔɔ nɛ sɔɔlɩm pɩnaɣ 1513 P.Ð.A. Pɩnaɣ ŋga eholi Izrayɛɛlɩ piya Egipiti yomiye taa nɛ ɛkandɩyɩ sɩ-yɔɔ alɩwaatʋ ndʋ sɩtɛzaɣ Teŋgu Kɩsɛɛmʋʋ yɔ. Pʋwayɩ lɛ pɔɖɔ kañɩmbusuu taa nɛ pɛɖɛɛnɩ Sinayii Pʋʋ cɔlɔ, nɛ pɔkɔɔ patalɩ Refidim.

¹⁷ Natʋ tɔm ndʋ pɔyɔɔdɩ Kiɖe Tɛɛ Tɔm 3:15 taa yɔ tiiɖiɣni labʋ. Ye mbʋ, Sataŋ kaawɛɛ nɛ ɛñɩnɩɣ nʋmɔʋ se eɖezi Izrayɛɛlɩ piya, mbʋ pʋyɔɔ yɔ ɛmaɣzaɣ se sɩtaawɛɛnɩ nɔɔyʋ se ɛkandɩyɩ sɩ-yɔɔ. Alɩwaatʋ natʋyʋ lɛ, Sataŋ tɩŋnɩ Amaalɛɛkɩ ñɩma mba pɛkɛ Ɛsɔ samaɣ koyindinaa yɔ, pɔ-yɔɔ. (Kɩg. 24:20) Iyele nɛ ɖɩna mbʋ Ɛsɔ laba pɩtɩŋnɩ ɛyaa siɣsiɣ tɩnaa naanza panɛ pɔ-yɔɔ yɔ: Yozuwee, Moyizi, Aarɔɔnɩ nɛ Huuri. Yozuwee lakaɣ you nɛ Amaalɛɛkɩ mba lɛ, Moyizi,  Aarɔɔnɩ, nɛ Huuri paasɩŋ piyaɣ nakɛyɛ ñʋʋ taa. Alɩwaatʋ ndʋ Moyizi kpazɩɣ e-nesi ɛsɔdaa lɛ, Izrayɛɛlɩ piya wakaɣ si-koyindinaa. Pɩkɔm nɛ pɩnɩɩ Moyizi nesi lɛ, Aarɔɔnɩ nɛ Huuri peteɣ-sɩ. Ye mbʋ, Yozuwee pɩzaa nɛ ɛwa “Amaalɛɛkɩ ɛyaa nɛ laɣɖɛ,” mbʋ pʋyɔɔ yɔ Yehowa sɩnɩ ɛ-samaɣ nɛ ɛkandɩyɩ kɔ-yɔɔ. (Egl. 17:8-13) Moyizi ma altaaru nakʋyʋ nɛ ɛyaa-kʋ se “[Yehowa] Nisi,” pʋ-tɔbʋʋ lɛ se “[Yehowa] tɔʋ wɛ e-nesi tɛɛ.”—Kalɩ Egipiti Lɩʋ 17:14, 15.

18, 19. Ɛzɩma tɩyɛ Ɛsɔ kandɩyɩɣ ɛ-sɛyaa yɔɔ sɔnɔ?

¹⁸ Yehowa kandɩyɩɣ mba pɔsɔɔlɩ-ɩ nɛ pañaŋɩ-ɩ yɔ, pɔ-yɔɔ. Ye ɖo-koyindinaa ɩkaɖɩɣnɩ-ɖʋ yɔ, ɖɩñɩnɩɣ sɩnʋʋ Ɛsɔ cɔlɔ ɛzɩ Izrayɛɛlɩ piya kaalabʋ Refidim yɔ. Ðoŋ ɖoŋ lɛ, Yehowa kandɩyɩɣ ɖɔ-yɔɔ nɛ ɛlɩzɩɣ-ɖʋ Sataŋ kpacanaa taa. Yehowa kandɩyɩ ɖo-koobiya mba pekizaa se paaɖʋʋ pɔ-nɔsɩ ɛjaɖɛ tɔm taa yɔ, pɔ-yɔɔ tam sakɩyɛ. Kɩɖaʋ nakʋyʋ yɔ mbʋ pɩtalɩ ɖo-koobiya Caama ɛjaɖɛ nɛ ajɛɛ lɛɛna taa pɩnzɩ 1930 waa taa nɛ pɩnzɩ 1940 waa kajalaɣ hɔɔlʋʋ taa yɔ. Pama ɛzɩma panazɩ koobiya nɛ ɛzɩma Yehowa kandɩyɩ pɔ-yɔɔ yɔ pɩ-tɔm takayɩsɩ nzɩ payaɣ se Annuaire des Témoins de Jéhovah yɔ sɩ-taa. Ye ɖɩkalɩɣ tɔm ndʋ nɛ ɖɩmaɣzɩɣ tɩ-yɔɔ yɔ, piyeki nɛ ɖɩtaa Yehowa liu nɛ ɖɩkpaɣ-ɩ ɛzɩ ɖa-ɖɩjɔzɩyɛ yɔ nazɩm alɩwaatʋ taa.—Keɣa. 90:2.

¹⁹ Yehowa tɩŋɩɣnɩ ɛ-ɛgbɛyɛ nɛ ɛgbɛyɛ takayɩsɩ pɔ-yɔɔ nɛ ɛtɔzʋʋ-ɖʋ nɛ sɔɔlɩm ɛzɩma ɖɩla nɛ ɖɩtaatɔlɩ Sataŋ kpacanaa taa yɔ. Maɣzɩ nɛ ŋna ɛzɩma lɔŋ tasʋʋ mbʋ, pɩwazɩ-ɖʋ kɛdɛzaɣ alɩwaatʋ tʋnɛ tɩ-taa yɔ. Ɛjaɖɛ wɛɛ nɛ ɖɩtɛzɩɣ ɖɩ-tɩ pisuu nɛ kʋzʋʋ, kʋzʋʋ kɩlɛmɩŋ nɛ sʋlʋm kpaŋʋʋ. Ɛlɛ Yehowa ñɔtɔzʋʋ-ɖʋ ɛ-paɣtʋ kila yɔɔ nɛ ɛzɩma ɖɩlabɩnɩ-yɛ tʋmɩyɛ kpɛdɛyɛ nɛ ɖɩtaatɔlɩ wezuu kɩdɛkɛdʋʋ kpaca taa yɔ. Ðɩkpaɣ ɛzɩ taabalɩyɛ ɖʋʋ nʋmɔʋ taa yɔ, Yehowa tasɩ-ɖʋ lɔŋ se ɖise taabalɩyɛ kɩdɛkɛdɩyɛ ɖʋʋ intɛrnɛɛtɩ yɔɔ. a—1 Kɔr. 15:33.

20. Yɔɔ kandɩyʋʋ nɛ lɔŋ tasʋʋ mbʋ ɖihikiɣ Krɩstʋ ɛgbɛyɛ taa?

²⁰ Ɛzɩma ɖɩpɩzɩɣ nɛ ɖɩwɩlɩ se ɖɩkɛ “[Yehowa] sukuli piya” toovenim taa? Pɩpɔzʋʋ se ɖɩɖɔŋ ɛ-paɣtʋ yɔɔ camɩyɛ. (Iz. 54:13) Pɩtɩŋnɩ Krɩstʋ ɛgbɛyɛ yɔɔ lɛ, ɖɩmʋʋ wɩlɩtʋ nɛ yɔɔ kandɩyʋʋ mbʋ pɩpɔzʋʋ-ɖʋ yɔ. Peeɖe ɛzʋtʋyaa siɣsiɣ tɩnaa tasɩɣ-ɖʋ lɔŋ nɛ pasɩɣnɩ-ɖʋ se ɖɩɖɔ Bibl paɣtʋ yɔɔ. (Gal. 6:1) Ɛzʋtʋyaa mba, pɛkɛ “ɛyaa kʋjɔŋ” nɛ ɖoŋ ɖoŋ lɛ, pɔ-yɔɔ Yehowa tɩŋɩɣna nɛ ɛcɔŋnɩ ɖɔ-yɔɔ. (Efɛ. 4:7, 8) Ðɩkaɣ-wɛ welisinuu na? Ye ɖiluzuu ɖa-tɩ pɛ-tɛɛ nɛ ɖa-laŋɩyɛ pilim nɛ ɖɩñaŋ-wɛ yɔ, Ɛsɔ wazɩɣ-ɖʋ.—Ebr. 13:17.

21. (a) Pɩwɛɛ se ɖɩtɛ ɖa-taa se ɖɩlakɩ we? (b) Ɛbɛ ɖɩkaɣ kpɛlɩkʋʋ ñʋʋ ŋgʋ kɩkɔŋ yɔ kɩ-taa?

²¹ Ðɩtɛ ɖa-taa kpem nɛ ɖitisi se ɖa-Caa weyi ɛwɛ ɛsɔdaa yɔ, eɖiyi-ɖʋ pɩtɩŋnɩ e-fezuu kiɖeɖeu yɔɔ. Pɩwɛɛ ɖɔɖɔ se ɖɩmaɣzɩɣ ɛ-Pɩyalʋ Yesu Krɩstʋ wezuu caɣʋ yɔɔ, nɛ ɖɩñaɣ pana nɛ ɖɩtɩŋ kɩɖaʋ kɩbaŋʋ ŋgʋ ɛha-ɖʋ yɔ. Ɛñam Ɛsɔ pɩkɔɔ pɩtalɩ ɛ-sɩm wiye nɛ pʋyɔɔ lɛ, ɛlɛ wazɩ-ɩ sakɩyɛ kʋmmm. (Fil. 2:5-11) Ye ɖɩtaɣ Yehowa liu nɛ ɖa-laŋɩyɛ pilim yɔ, pakaɣ-ɖʋ wazʋʋ ɛzɩ paawazʋʋ-ɩ yɔ. (Ad. 3:5, 6) Tɛtɛ pɩla mbʋ nɛ ɖiwolo pɩ-yɔɔ tam nɛ ɖɩkpaɣ Yehowa ɛzɩ ɖa-Kʋjɔʋ Laɖʋ nɛ ɖɔ-yɔɔ Kandɩyʋ sɔsɔ yɔ. Pɩkɛ taa leleŋ nɛ waɖɛ sɔsɔɖɛ kpem se ɛyʋ ɛkɛ Yehowa sɛyʋ. Ye ɖɩkpaɣ alɩwaatʋ nɛ ɖɩmaɣzɩɣ nʋmɔʋ naadozo ñɩŋgʋ, ŋgʋ kɩ-yɔɔ Yehowa tɩŋɩɣna nɛ ɛcɔŋnɩ ɖɔ-yɔɔ yɔ, pɩkaɣ-ɖʋ seɣtuu nɛ ɖɩsɔɔlɩ-ɩ nɛ pɩkɩlɩ. Nʋmɔʋ ŋgʋ lɛ taabalɩyɛ nɖɩ ɖɩwɛ ɖa nɛ ɩ ɖɛ-hɛkʋ taa yɔ. Ñʋʋ ŋgʋ kɩkɔŋ yɔ, kɩkaɣ wɩlʋʋ ɛzɩma Yehowa kɛ ɖa-Taabalʋ sɔsɔ yɔ.