•   «“Wɩlɩŋ sɔsɔŋ” wɛɛ nɛ ɩwɛɛkɩɣ wondu Siini ɛjaɖɛ taa ɖama yɔɔ ɖama yɔɔ. Nɛ wɩlɩŋ sɔsɔŋ weyi itukuni ɛjaɖɛ nɖɩ nabudozo ɖeɖe yɔ, ɩ-wayɩ fɛyɩ.»—The Guardian, 7 septembre 2022.

•   «Wɩlɩŋ sɔsɔŋ wɛʋ nɛ ɩwɛɛkɩɣ wondu Afrika hɔɔlɩŋ nɩɩyɩ taa yɔ, pɩlakɩ pɩnzɩ kagbanzɩ yɔ.»—UN News, 26 août 2022.

•   «Ñɩnɩyaa paɣ ɛyaa se ye patayɩ Erɔɔpɩ hɔɔlɩŋ naadozo taa yɔ, wɩlɩŋ sɔsɔŋ siŋŋ tukuuni hɔɔlɩŋ naalɛ, nɛ wɩlɩŋ ɛnɩ ɩtɩtasɩ labʋ peeɖe pɩlakɩ pɩnzɩ 500 yɔ.»—BBC News, 23 août 2022.

 Ñɩnɩyaa sakɩyɛ yɔɔdaa se wɩlɩŋ sɔsɔŋ kaɣ wobu pɩ-yɔɔ nɛ ɩlakɩ nɛ ɩkaɣ kpaʋ ɖoŋ nɛ pɩkɩlɩ. Ðɩpɩzɩɣ nɛ ɖɩwɛɛnɩ lidaʋ se wiɖiyi pɩkaɣ ñɔɔzʋʋ na? Suwe Bibl yɔɔdʋʋ?

 Bibl yɔɔdɩ tɔm tʋnɛ ɖa-alɩwaatʋ yɔɔ:

•   «Ñɔɔsɩ . . . kaɣ lɩʋ lona ndɩ ndɩ taa.»—Luka 21:11.

 Ðoŋ ɖoŋ lɛ, wɩlɩŋ yekina nɛ ñɔɔsɩ lɩɣ. Ñɔɔsɩ nzɩ nɛ kʋñɔmɩŋ nɛ sɩm mbʋ pɩkɔŋna yɔ, Bibl kaayɔɔdɩ pɩ-tɔm se pɩkaɣ labʋ.—Natʋ 6:6, 8.

 Bibl yɔɔdʋʋ lɩmaɣzɩyɛ sɔsɔɖɛ naɖɩyɛ nɖɩ ɖɩ-yɔɔ wɩlɩŋ kpaɣ ɖoŋ kpaʋ yɔɔ yɔ ɖɩ-tɔm. Ðɩkalɩɣ se:

•   «Ɛyʋ weyi eɖiɣni ɖɔm yɔ, pɩtɩkɛ ɛ-maɣmaɣ pɩwɛɛ se eɖiyi ɛ-nɩŋgbanzɩ.»—Yereemii 10:23.

 Tɔm tʋnɛ tɩwɩlɩɣ se ɛyaa ɩɩpɩzɩɣ nɛ ‘peɖiyi pa-nɩŋgbanzɩ’ yaa pɔtɔɔ kewiyitu pa-tɩ yɔɔ. Ðoŋ ɖoŋ lɛ, lɩmaɣza kɩdɛkɛda wena pakpakɩɣ yɔ, akɔŋnɩ wɩlɩŋ nɛ lɩm kɛdɛɖaɣ.

•   Lɛɣtʋ ñɩnɩyaa sakɩyɛ yɔɔdaa se ɛyaa lakasɩ yekina nɛ soŋaɣ ŋga ka-wayɩ fɛyɩ yɔ kalakɩ, nɛ pʋyɔɔ wɩlɩŋ sɔsɔŋ wɛɛkɩɣ wondu ɛjaɖɛ kpeekpe yɔɔ.

•   Ɛsa naɣ naɣ nɛ ɛzɩma politiki laɖaa kpakɩɣ lɩmaɣza nɛ paamaɣzɩɣ cee wayɩ yɔɔ yɔ, piyeki nɛ paɖɩzɩɣ laŋ, pepisiɣ helim, paalakɩnɩ tʋmɩyɛ camɩyɛ kedeŋa yɔɔ wondu nɛ pɛwɛɛkɩɣ lɩm kɩbam mbʋ pɩwɛ tɛtʋ yɔɔ yɔ.

 Paa mbʋ yɔ, Bibl haɣ-ɖʋ lidaʋ.

 Bibl haɣ-ɖʋ lidaʋ se Ɛsɔ kaɣ yebu nɛ lɩm kɛdɛɖaɣ sɩɩ tɩnaɣ. Ɛzɩma ɛkaɣ kpaɣnʋʋ nɛ ɛla mbʋ?

1.  1. Ɛsɔ kaɣ ɖɩzʋʋ «mba pɛwɛɛkɩɣ tɛtʋ yɔ.» (Natʋ 11:18) Pʋyɔɔ lɛ, mba pa-lakasɩ yeki nɛ lɩm tɛɖɩɣ ɛyaa yɔ, paakaɣ tasʋʋ wɛʋ. Mba lɛ, ɛyaa kɩdɛkɛdaa, ɛsa naɣ naɣ tɩnaa mba pɛwɛɛkɩɣ wondu kɩbandʋ ndʋ tɩcɔ-ɖʋ nɛ tɩta yɔ.—2 Timootee 3:1, 2.

2.  2. «Wɩlɩŋ tɛtʋ kaɣ pɩsʋʋ lɩŋgamʋʋ ŋgʋ kɩ-taa wɛ kañɩŋgbayɩsɩ yɔ.» (Izaayii 35:1, 6, 7) Ɛsɔ kaɣ ñɔɔzʋʋ mbʋ payɩ wɩlɩŋ sɔsɔŋ wɛɛkaa yɔ, nɛ eyele nɛ tɛtʋ pɩsɩ paradisuu ŋgʋ kɩ-taa lɩm kɩbam tɔyʋʋ yɔ.

3.  3. «Ŋcɔŋnɩ tɛtʋ yɔɔ, ŋlakɩ nɛ tɩlʋlʋʋ tɔɔnaɣ sakɩyɛ nɛ tɩwɛɣ mʋzʋŋ.» (Keɣa 65:9) Ɛsɔ wazasɩ kaɣ yebu nɛ ɛyaa tɩŋa wɛɛnɩ tɔɔnasɩ kɩbanzɩ nɛ lɩm kɩbam.