CƆNƖ kɩlɛmʋʋ yɔɔ nɛ ŋna, abalʋ nɔɔyʋ wɛɛ ehuyuu se epi nabʋyʋ. Ɛcaɣ pim toko kɩbaŋʋ nakʋyʋ, sika paɣyɛ nɛ ñɩɣlɩm nabʋyʋ e-kizinziku tɛɛ. Ɛkpaɣ wondu ndʋ nɛ Yeriikoo tɛtʋ taa. Ɛlɛ ŋtɔzʋʋ mbʋ pɩɩpɔzaa palabɩnɩ Yeriikoo tɛtʋ taa wondu yɔ?

Pɩɩpɔzaa pɔyɔkɩ-tʋ. Nɛ pɔkɔnɩ sika nɛ ñɩɣlɩm paɖʋ Yehowa kediɣzaɣ kuduyuu ñɩm koozaɣ taa. Ye mbʋ, ɛyaa panɛ patɩña Ɛsɔ paɣtʋ. Pamɩlɩ Yehowa pʋyʋ. Payaɣ abalʋ ɛnʋ se Akaŋ nɛ mba ŋnaɣ ɛ-cɔlɔ yɔ, pɛkɛ ɛ-hɔʋ taa ɛyaa nabɛyɛ. Yele ɖɩna mbʋ pɩlaba keekee yɔ.

Akaŋ mɩlɩ wondu tʋnɛ pɩtɛ lɛ, Yosue tiyi abalaa nabɛyɛ se powolo poyooni Ayii tɛtʋ. Ɛlɛ powoba lɛ, pawabɩ-wɛ. Pakʋ pa-taa nabɛyɛ nɛ lalaa se. Pɩtaala Yosue leleŋ kaaʋ. Pɩ-yɔɔ ɛtɔlɩ tataa nɛ ɛpaɣzɩ Yehowa tɩmnʋʋ nɛ ɛtɔŋ se: ‘Ɛbɛ yɔɔ ŋyeba se pʋnɛ pɩtalɩ-ɖʋ?’

Yehowa cosi-i se: ‘Kʋyɩ! Izrayɛɛlɩ laba kɩwɛɛkɩm. Mbʋ pɔtɔm se pɔyɔkɩ yaa pɔkɔnɩ pasɩɩ Yehowa  kediɣzaɣ kuduyuu tɛɛ yɔ, pakpaɣ pɩ-taa nabʋyʋ. Pamɩlɩ toko kɩbaŋʋ nakʋyʋ nɛ pɛmɛsɩ. Ɩtɩyɔkɩ wondu ndʋ nɛ ɩkʋ weyi ɛmɩlɩ-tʋ yɔ, maakaɣ-mɩ wazʋʋ.’ Yehowa yɔɔdɩ se ɛkaɣ wɩlʋʋ Yosue weyi ɛlabɩ kɩdɛkɛdɩm mbʋ yɔ.

Pɩlabɩ mbʋ lɛ, Yosue kpeɣli samaɣ nɛ Yehowa wɩlɩ se Akaŋ labɩnɩ kɩwɛɛkɩm mbʋ. Peeɖe Akaŋ tɔm se: ‘Malabɩ kɩwɛɛkɩm. Mana toko kɩbaŋʋ, sika paɣyɛ nɛ ñɩɣlɩm pɔɔyɩsɩ nzɩ lɛ, sɩlabɩ-m liu nɛ mankpaɣ. Mɛmɛsɩ wondu ndʋ men-kizinziku tɛɛ.’

Pana wondu ndʋ nɛ pɔkɔnɩ-tʋ Yosue lɛ, eheyi Akaŋ se: ‘Ɛbɛ yɔɔ ŋñɩnaa se kaɖɛ ɛkɔɔ ɖɔ-yɔɔ? Lɛɛlɛɛyɔ Yehowa kɔŋnɩ kaɖɛ ɖɔɖɔ ñɔ-yɔɔ!’ Ɛyɔɔdɩ mbʋ lɛ, ɛyaa paɣzɩ Akaŋ nɛ ɛ-hɔʋ pɛɛ yaɣʋ nɛ pasɩ. Tɔm tʋnɛ tɩwɩlɩɣ-ɖʋ se pɩfɛyɩ ɖeu se ɖɩkpaɣ mbʋ pɩtɛkɛ ɖa-ñɩm yɔ.

Pɩlabɩ mbʋ pɩtɛ lɛ, Izrayɛɛlɩ piya ɖaɣnɩ wobu se poyooni Ayii. Ɛlɛ lɛɛlɛɛyɔ lɛ, Yehowa sɩnɩ-wɛ nɛ pawa.