1-3. Tɔm ndʋ ɛyaa pɔzʋʋ sɩm yɔɔ? Nɛ ɛzɩma Ɛsɔ sɛtʋ agbaa ndɩ ndɩ cosuu tɩ-yɔɔ?

ƐYAA wɛʋ nɛ pamaɣzɩɣ tɔm pɔzʋʋ pʋnɛ pɩ-yɔɔ yɔ, pɩlakɩ pɩnzɩ kudokiŋ sakɩyɛ yɔ. Tɔm pɔzʋʋ pʋnɛ pɩcɛyaa. Paa ɖɩtɩɩkɛ anɩ nɛ paa le ɖɩtɩɩwɛɛ yɔ, tɔm pɔzʋʋ pʋnɛ pɩ-yɔɔ cosuu tukuuni-ɖʋ.

² Ñʋʋ ŋgʋ kɩɖɛwa yɔ, kɩ-taa ɖɩyɔɔdɩ ɛzɩma Yesu kɩhɛyʋʋ pʋ-ñʋʋ taa kɩlaʋ ha-ɖʋ waɖɛ se ɖihiɣ wezuu maatɛŋ yɔ. Ðɩkpɛlɩkaa ɖɔɖɔ se Bibl yɔɔdaa se alɩwaatʋ kaɣ kɔm nɛ “sɩm ɛɛtasɩɣ wɛʋ.” (Natʋ 21:4) Pʋcɔ nɛ alɩwaatʋ ndʋ tɩtalɩ lɛ, ɖa-tɩŋa ɖɩwɛ sɩm nesi tɛɛ. Wiyaʋ lɔŋsɩnɖʋ Salomɔɔ tɔm se: “Ɛzadɩnaa sɩm mbʋ se pakaɣ sɩbʋ.” (Eklesɩyastɩ 9:5) Ðɩsɔɔlaa se ɖɩcaɣ wezuu nɛ pileɖi. Ɛlɛ ɖɩnɩɣzɩɣ ɖɔɖɔ se ɛzɩ ɖɩsɩkɩ lɛ, ɛbɛ pɩtɛŋnɩ-ɖʋ.

³ Ðɛ-ɛyaa kʋsɔɔlaa nabɛyɛ sɩkɩ lɛ, ɖiwiɣ-wɛ pɩdɩɩfɛyɩ. Nɛ ɖɩpɩzɩɣ nɛ ɖɩpɔzɩ ɖa-tɩ se: ‘Ɛzɩ ɛbɛ pɩtɛŋnɩ-wɛ? Ɛzɩ pɛwɛɛ nɛ pɔtɔkɩ kʋñɔŋ na? Pɔcɔŋnɩ ɖɔ-yɔɔ? Ðɩpɩzɩɣ nɛ ɖɩsɩnɩ-wɛ? Ɛzɩ wiɖiyi ɖɩpɩzɩɣ nɛ ɖɩtasɩ-wɛ naʋ na?’ Tɔm ndʋ ɛjaɖɛ yɔɔ Ɛsɔ sɛtʋ agbaa cosuu tɔm tʋnɛ tɩ-yɔɔ yɔ, tɩwɛ ndɩ ndɩ. Naayɛ wɩlɩɣ se ye ŋcaɣ wezuu ŋgʋ kʋtʋʋzaa yɔ, ŋkaɣ kpaʋ ɛsɔdaa. Ɛlɛ ye ŋcaɣ wezuu kɩdɛkɛdʋʋ yɔ, ŋkaɣ wobu miŋ sɔsɔŋ  taa. Agbaa lɛɛna ñawɩlɩɣ se ɛyʋ sɩm wayɩ lɛ, ewoki hadɛdɩnaa cɔlɔ. Lɛɛna ɖɔɖɔ wɩlɩɣ se ɛyʋ sɩkɩ nɛ ewolo hadɛdɩnaa cɔlɔ nɛ pahʋnɩ-ɩ tɔm pɩtɛ lɛ, ɛlɩɩ nɔɔyʋ nɛ patasɩ-ɩ lʋlʋʋ.

4. Lɩmaɣzɩyɛ kʋyʋmɖɩyɛ nɖɩ Ɛsɔ sɛtʋ agbaa sakɩyɛ wɛnɩ sɩm yɔɔ?

⁴ Ɛsɔ sɛtʋ agbaa wɩlɩtʋ ndʋ tɩwɛnɩ nɔɔ kʋyʋmaɣ nakɛyɛ: Amazɩɣ se ɖɔ-hɔɔlʋʋ nakʋyʋ wɛɛ nɛ kɩɩsɩkɩ kaaʋ. Tomnaɣ yeke sɩkɩ na. Kpaɣnɩ caanaʋ taa nɛ pɩkɔɔ pɩtalɩ sɔnɔ, Ɛsɔ sɛtʋ agbaa taa ɛyaa sakɩyɛ lɩmaɣza taa lɛ, ɖa-sɩm wayɩ lɛ, ɖɩpɩzɩɣ nɛ ɖɩwɛɛ ɖoli nɛ ɖɩnaɣ, ɖɩnɩɣ yaa ɖɩmaɣzɩɣ. Ɛlɛ, ɛzɩma pɩpɩzɩɣ nɛ pɩla mbʋ? Ða-fɩtɩyɩm lakɩna nɛ ɖɩnɩɣ leleŋ yaa ɖɩnaɣ. Kɩyakʋ ŋgʋ ɖɩsɩkɩ yɔ, ɖa-fɩtɩyɩm ɛɛtasɩɣ tʋmɩyɛ labʋ. Ye ɖa-fɩtɩyɩm ɛɛlakɩ tʋmɩyɛ yɔ, ɖɩɩpɩzɩɣ nɛ ɖɩtasɩ tɔzʋʋ yaa ɖɩtasɩ nɩʋ yaa ɖɩtasɩ naʋ nabʋyʋ.

5, 6. Suwe Bibl wɩlɩɣ wɛtʋ ndʋ tɩ-taa sɩɖaa wɛɛ yɔ, tɩ-yɔɔ?

⁵ Mbʋ pɩtɛŋnɩ ɛyʋ sɩm wayɩ yɔ, Yehowa sɩm-pʋ. Ɛnʋ labɩnɩ ɛyʋ fɩtɩyɩm. Ɛsɩm mbʋ pɩkɛ toovenim yɔ, nɛ Bibl taa eheyiɣ-ɖʋ wɛtʋ ndʋ tɩ-taa sɩɖʋ wɛɛ yɔ. Ɛ-wɩlɩtʋ wɛ kpayɩ kpayɩ. Ndʋ yɔ: Ɛyʋ sɩkɩ lɛ, ɛɛtasɩɣ wɛʋ ɖoli. Sɩm nɛ wezuu patɩkaa pʋyʋ. Sɩɖʋ ɛɛpɩzɩɣ nɛ ɛna yaa ɛnɩɩ yaa ɛmaɣzɩ. Ðɔ-hɔɔlʋʋ nakʋyʋ ɛɛtasɩɣ caɣʋ wezuu ɖoli ɖo-tomnaɣ sɩm wayɩ. Ðɩfɛyɩnɩ ciyam yaa kalɩzaɣ yaa fezuu maasɩkɩ. *

⁶ Salomɔɔ mawa se, ɛzadɩnaa nawa se pakaɣ sɩbʋ. Nɛ ɛtasɩ ɖɔɖɔ se: “Piyele sɩɖaa ɩɩtasɩɣ natʋyʋ sɩm.” Ɛtasɩ lɩzʋʋ toovenim tɔm ndʋ tɩ-taa nɛ ɛtɔ se sɩɖaa ɩɩpɩzɩɣ pɔsɔɔlɩ yaa papaɖɩ. Nɛ ɛyɔɔdɩ ɖɔɖɔ se “tʋmɩyɛ labʋ lɔŋ nɛ sɩmtʋ nɛ maɣzʋʋ patɩtasɩ wɛʋ hadɛdɩnaa  tɛ [pʋ-tɔbʋʋ lɛ se pɩlaʋ taa].” (Kalɩ Eklesɩyastɩ 9:5, 6, 10.) Keɣa 145:4 tɔm ɖɔɖɔ se ɛyaa sɩkɩ lɛ, “pa-lɩmaɣza ɖʋ lɩm.” Ye ɖɩsɩba yɔ, ɖɩsɩba; ɖɔ-hɔɔlʋʋ nakʋyʋ ɛɛcakɩ wezuu ɖoli ɖo-tomnaɣ sɩm wayɩ. Ðɩpɩzɩɣ nɛ ɖɩkpaɣ wezuu ɖɩmaɣzɩnɩ mintʋsʋʋ. Ye peɖezi mintʋsʋʋ yɔ, kiiwoki ɖoli. Kiɖema, pɩtɛma.

7. Yesu kpaɣ sɩm nɛ ɛmaɣzɩnɩ we?

⁷ Yesu wɩlɩ mbʋ pɩtɛŋnɩ sɩɖaa yɔ. Alɩwaatʋ ndʋ ɛ-taabalʋ Lazaarɩ sɩba yɔ, Yesu heyi ɛ-tɔmkpɛlɩkɩyaa se: “Ðɛ-ɛgbaɣdʋ Lazaarɩ ɖowa.” Tɔmkpɛlɩkɩyaa maɣzaɣ se ɖom maɣmaɣ tɔm Yesu yɔɔdʋʋ, pamaɣzaɣ se pɩwɩɣ Lazaarɩ nɛ ɛhɩnɩ se ɛhɛzɩ nɛ pɩlabɩ-ɩ sooci. Pataanɩɩ Yesu tɔm taa camɩyɛ, pɩ-yɔɔ Yesu lɩzɩ-wɛ pɩ-taa kpayɩ se: “Lazaarɩ sɩba.” (Kalɩ Yohanɛɛsɩ 11:11-14.) Yesu kpaɣ sɩm nɛ ɛmaɣzɩnɩ ɖom. Lazaarɩ tiwolo ɛsɔdaa yaa miŋ sɔsɔŋ taa. Etiwolo Ɛsɔ tiyiyaa yaa hadɛdɩnaa cɔlɔ. Ɛtɩlɩɩ nɔɔyʋ se patasɩ-ɩ lʋlʋʋ. Ɛwɛɛ nɛ ɛhɛzɩɣ ɛzɩ ɛyʋ ɖoou se ɛhɛzɩ yɔ. Ye mbʋ sɩm wɛ ɛzɩ ɖom sɔsɔm mbʋ pɩ-taa ɛyʋ eeɖozuu yɔ. Kɩyakʋ nakʋyʋ ɖɔɖɔ Yesu kaatɛm kpaɣʋ sɩm nɛ ɛmaɣzɩnɩ ɖom. Ewoba se efeziɣ Yayiruusi peleɣa lɛ, ɛtɔm se: “Katɩsɩ, koɖou kiɖou.”—Luka 8:52, 53.

8. Ɛzɩma ɖɩlabɩ nɛ ɖɩna se Ɛsɔ taaɖʋ se ɛyaa ɩsɩ?

⁸ Kiɖe tɛɛ lɛ, Ɛsɔ kaaɖʋwa se ɛyaa ɩsɩ na? Pɩtʋʋ fɛyɩ se aayɩ. Yehowa kaalabɩ ɛyʋ se ɛcaɣ wezuu maatɛŋ tɛtʋ yɔɔ. Ɛzɩ ɖɩɩtɛm naʋ takayaɣ kanɛ ka-taa yɔ, Ɛsɔ kaasɩ kajalaɣ abalʋ nɛ ɛ-halʋ paradisuu kɩbaŋʋ nakʋyʋ taa.  Ɛwazɩ-wɛ nɛ pɛwɛɛnɩ alaafɩya kiya. Pa-kɩbam yeke Ɛsɔ ñɩnaɣ. Lʋlʋyʋ kʋsɔɔlʋ nɔɔyʋ pɩzɩɣ nɛ ɛñɩnɩ se e-piya ɩla kʋñɔŋ nɛ sɩkpadɩyɩ nɛ sɩsɩ na? Aayɩ, yaa we? Yehowa kaasɔɔlɩ e-piya, pɩ-yɔɔ ɛñɩnaɣ se sɩwɛɛ laŋhɛzɩyɛ taa tɛtʋ yɔɔ tam. Bibl tɔm se: “[Yehowa] ɖʋ pa-laŋa taa tam tam alɩwaatʋ lɩmaɣza.” (Eklesɩyastɩ 3:11, NW) Ye mbʋ Ɛsɔ lɩzɩ-ɖʋ lɛ, ɛɖʋ ɖa-taa se ɖɩsɔɔlɩ wezuu maatɛŋ. Ɛha-ɖʋ  ɖɔɖɔ mbʋ pɩpɩzɩɣ nɛ pɩsɩnɩ-ɖʋ nɛ ɖɩcaɣ wezuu ŋgʋ yɔ.

9. Paɣtʋ ndʋ Yehowa kaaɖʋ Aɖam? Nɛ ɛbɛ yɔɔ paɣtʋ ndʋ tɩ-yɔɔ ɖɔm taawɛɛ kaɖɛ?

⁹ Ye mbʋ, ɛbɛ laba nɛ ɛyaa sɩkɩ yɔ? Pɩsa nɛ ɖicosi lɛ, ɖɩpɩsɩ nɛ ɖɩna mbʋ pɩɩlaba alɩwaatʋ ndʋ Aɖam nɛ Ɛva pe-yeke paawɛ tɛtʋ yɔɔ yɔ. Bibl kɛdɩɣ se: “Kɩbaɣlʋ Ɛsɔ la nɛ tɩŋ ndɩ ndɩ ñɔ kajaɣ taa, ŋna-ɩ kɔyɔ, ŋseliɣ ɩ-yɔɔ, i-pee tɔɔʋ wɛ leleŋ.” (Kiɖe Tɛɛ Tɔm 2:9) Ɛlɛ, pɩtaakɛ tɩŋ pee tɩŋa pɩɩpɔzaa se pɔtɔɔ. Yehowa kaaheyi Aɖam se: “Ŋpɩzɩɣ ŋtɔɔ kajaɣ taa tɩŋ kpeekpe pee. Ɛlɛ taatɔɔ kɩbandʋ nɛ kɩdɛkɛdɩm pa-sɩmtʋ tɩʋ piye, mbʋ pʋyɔɔ yɔ kɩyakʋ ŋgʋ ŋtɔkɩ yɔ, ŋkaɣ sɩbʋ siŋŋ.” (Kiɖe Tɛɛ Tɔm 2:16, 17) Paɣtʋ ndʋ tɩ-yɔɔ ɖɔm taawɛ kaɖɛ, mbʋ pʋyɔɔ yɔ kaɖaɣ taa tɩŋ weyi Aɖam nɛ Ɛva paapɩzaɣ se pɔtɔɔ i-pee yɔ, ɩɩɖɔwa. Ɛlɛ paɣtʋ ndʋ tɩhaɣaɣ-wɛ waɖɛ se pawɩlɩ ɛsɩmɩyɛ pɛ-Ɛsɔ weyi ɛha-wɛ wezuu nɛ pɩtɩŋa payɩ yɔ. Ye paaɖɔm Ɛsɔ paɣtʋ yɔɔ yɔ, pɩɩwɩlaa se pɛwɛnɩ ɛsɩmɩyɛ nɛ pɩwɩlɩ ɖɔɖɔ se petisaa se pa-Caa weyi ɛwɛ ɛsɔdaa yɔ, ɛnʋ pʋpɔzʋʋ se ɛwɩlɩ-wɛ nʋmɔʋ.

10, 11. (a) Ɛzɩma pɩlaba nɛ kajalaɣ abalʋ nɛ ɛ-halʋ pamaanɩ Ɛsɔ paɣtʋ yɔɔ? (b) Mbʋ Aɖam nɛ Ɛva paalaba yɔ, pɩkɛ kɩwɛɛkɩm sɔsɔm. Ɛbɛ yɔɔ?

¹⁰ Pɩlabɩ pʋtɔdɩyɛ se Aɖam nɛ Ɛva patɩɖɔ Yehowa paɣtʋ yɔɔ. Sataŋ tɩŋnɩ ɖʋm yɔɔ nɛ ɛyɔɔdɩnɩ Ɛva. Ɛpɔzɩ-ɩ se: “Ɛsɔ tɔm se ɩtaatɔɔ kajaɣ taa tɩŋ kpeekpe pee yaa?” Ɛva cosi-i se: “Ðɩpɩzɩɣ ɖɩtɔɔ kajaɣ taa tɩŋ pee. Ɛlɛ tɩʋ ŋgʋ kɩwɛ kajaɣ hɛkʋ taa yɔ, Ɛsɔ yɔɔdɩ kɩ-tɔm se: ‘Ɩtaatɔɔ-kʋ, itaatukuni-kʋ, ikihiɣ sɩm.’”—Kiɖe Tɛɛ Tɔm 3:1-3.

¹¹ Sataŋ pɩsɩnɩ Ɛva se: ‘Pɩlɩ! Ɩɩkaɣ sɩbʋ! Ɛlɛ Ɛsɔ maɣmaɣ sɩm mbʋ se kɩyakʋ ŋgʋ ɩtɔkɩ yɔ, mɩ-ɛza kuluu nɛ  ɩwɛɛ ɛzɩ [Ɛsɔ] yɔ nɛ ɩsɩ kɩbam nɛ kɩdɛkɛdɩm.’ (Kiɖe Tɛɛ Tɔm 3:4, 5) Sataŋ ñɩnaɣ se Ɛva etisi se ye ɛtɔɔ tɩʋ ŋgʋ pɔtɔm se pataatɔɔ ki-piye yɔ, ehikiɣ wazasɩ sakɩyɛ. Pɩsɩɣnɩ-ɩ nɛ ɛtɩlɩ kɩbam nɛ kɩdɛkɛdɩm nɛ ɛla mbʋ ɛ-maɣmaɣ ɛsɔɔlaa yɔ. Sataŋ tɔm ɖɔɖɔ se Ɛsɔ yɔɔdʋʋ se ye pɔtɔɔ tɩʋ piye pasɩkɩ yɔ, ɛcɛtɩ kɩcɛtʋʋ. Ɛva tisi Sataŋ tɔm yɔɔ nɛ ekoyi tɩʋ ŋgʋ ki-piye nɛ ɛtɔɔ. Pʋwayɩ lɛ, ɛha ɛ-walʋ nɛ ɛlɛ ɖɔɖɔ ñɔtɔɔ. Pa-maɣmaɣ panawa se mbʋ Ɛsɔ tɔm se pataala yɔ, mbʋ keekee palaba. Patɩɖɔ Ɛsɔ paɣtʋ yɔɔ. Patɩña pa-Caa weyi ɛwɛ ɛsɔdaa yɔ. Pɩwɩlɩɣ se petitisi e-kewiyitu tɔɔʋ yɔɔ. Pɩfɛyɩ se pana pa-pʋtɔdɩyɛ kpa. Mbʋ pʋyɔɔ yɔ, patɩña pa-Lɩzɩyʋ kʋsɔɔlʋ.

12. Ɛbɛ pɩzɩɣ nɛ pɩsɩnɩ-ɖʋ nɛ ɖɩnɩɩ wɩzasɩ nzɩ Yehowa kaanɩwa alɩwaatʋ ndʋ Aɖam nɛ Ɛva paakʋyɩ ɛ-yɔɔ yɔ, sɩ-taa?

 ¹² Ðɩkpaɣ kɩɖaʋ kʋnɛ nɛ ɖɩnɩɩ pɩ-taa camɩyɛ: Kpaɣ se ŋcalɩ pɩɣa nakɛyɛ nɛ ŋcɔnɩ kɔ-yɔɔ camɩyɛ. Ɛlɛ pʋwayɩ lɛ, kekizi se kaaɖɔŋ ña-paɣtʋ yɔɔ. Nɛ kawɩlɩ se kaañaŋɩ-ŋ yaa katɩsɔɔlɩ-ŋ. Pɩɖʋʋ-ŋ wɩzasɩ kpem yaa we? Lɛɛlɛɛyɔ maɣzɩ nɛ ŋna wɩzasɩ nzɩ Yehowa kaanɩwa alɩwaatʋ ndʋ Aɖam nɛ Ɛva paakʋyɩ ɛ-yɔɔ yɔ.

13. Yehowa kaaheyi Aɖam se ɛsɩkɩ lɛ, ɛbɛ pɩtɛŋnɩ-ɩ? Pʋ-tɔbʋʋ lɛ suwe?

¹³ Yehowa ɛɛpɩzɩɣ nɛ eyele Aɖam nɛ Ɛva mba patɩɖɔ ɛ-paɣtʋ yɔɔ yɔ, se pacaɣ wezuu maatɛŋ. Pasɩba ɛzɩ ɛɛyɔɔdʋʋ yɔ. Pe-wezuu sɩ tɩnaɣ na, patɩpɩsɩ feziŋ se pacaɣ wezuu ɖoli. Aɖam kaalabɩ kɩwɛɛkɩm nɛ Yehowa heyi tɔm ndʋ yɔ, tɩsɩɣnɩ-ɖʋ nɛ ɖɩtɩlɩ mbʋ pɩtɛmnɩ-ɩ yɔ. Ɛsɔ kaatɔm se: “[Ŋpɩsɩɣ] tɛtɛɛ ɖenɖe palɩzɩ-ŋ yɔ. Mbʋ pʋyɔɔ yɔ ŋkɛ mʋzʋʋ nɛ ŋkaɣ ɖɔɖɔ mʋzʋʋ pɩsʋʋ.” (Kiɖe Tɛɛ Tɔm 3:19) Yehowa kaakpaɣ cʋʋ na nɛ ɛmanɩ Aɖam. (Kiɖe Tɛɛ Tɔm 2:7) Pʋcɔ nɛ pama-ɩ lɛ, Aɖam taawɛɛ ɖoli. Yehowa heyuu Aɖam se ɛɖaɣnɩɣ pɩsʋʋ mʋzʋʋ yɔ, pɩwɩlɩɣ se Aɖam ɛɛtasɩɣ wɛʋ ɖoli. Aɖam ɛɛtasɩɣ sɩm pʋyʋ ɛzɩ cʋʋ ŋgʋ pakpaɣ nɛ pamanɩ-ɩ yɔ.

14. Ɛbɛ laba nɛ ɖɩsɩkɩ?

¹⁴ Aɖam nɛ Ɛva paapɩzaɣ se pacaɣ wezuu halɩ nɛ sɔnɔ. Ɛlɛ pasɩba mbʋ pʋyɔɔ yɔ, pɛtɛm pa-taa nɛ pamaanɩ Ɛsɔ paɣtʋ yɔɔ nɛ pala kɩwɛɛkɩm. Aɖam ɖɛzɩ kɩwɛɛkɩm nɛ sɩm ɛ-sɛyɩnaa kpeekpe, mbʋ labɩna nɛ ɖɩsɩkɩ. (Kalɩ Roma 5:12.) Kɩwɛɛkɩm wɛ ɛzɩ kʋdɔŋ kɩdɛkɛdʋʋ ŋgʋ kɩɖɛɣ ɛyaa, nɛ nɔɔyʋ fɛyɩ se kɩɩɖɛɣ-ɩ yɔ. Kɩwɛɛkɩm kɩhɛyʋʋ lɛ sɩm. Ye mbʋ sɩm tɩkɛ wazaɣ. Sɩm kɛ ɖo-koyindu na, pɩtɩkɛ ɖa-taabalʋ. (1 Kɔrɛntɩ 15:26) Pʋpɔzʋʋ se ɖɩwɛɛnɩ ɛsɩmɩyɛ siŋŋ Yehowa yɔɔ, mbʋ pʋyɔɔ yɔ, ɛtɩŋnɩ kɩhɛyʋʋ pʋ-ñʋʋ taa yɔɔ nɛ ɛya ɖa-ñʋʋ sɩm nesi tɛɛ.

15. Ɛbɛ yɔɔ sɩm yɔɔ toovenim tɩlʋʋ hɛzɩɣ ɖa-laŋa?

¹⁵ Tɔm ndʋ Bibl wɩlɩɣ mbʋ pɩtɛŋnɩ ɛyaa mba pasɩba pɔ-yɔɔ yɔ, pɩhɛzɩɣ ɖa-laŋa. Ɛzɩ ɖɩtɛm naʋ yɔ, sɩɖaa ɩɩnɩɣ siziŋ nɩɩyɩ yaa paalakɩ kʋñɔŋ nakʋyʋ. Pɩfɛyɩ se ɖise-wɛ sɔɔndʋ mbʋ pʋyɔɔ yɔ, paapɩzɩɣ nɛ palabɩ-ɖʋ kɩdɛkɛdɩm nabʋyʋ. Ðɩɩpɩzɩɣ nɛ ɖɩsɩnɩ-wɛ nɛ paapɩzɩɣ nɛ pasɩnɩ-ɖʋ ɖɔɖɔ. Ðɩɩpɩzɩɣ nɛ ɖɩyɔɔdɩnɩ-wɛ, paapɩzɩɣ nɛ pɔyɔɔdɩnɩ-ɖʋ ɖɔɖɔ. Ɛsɔ sɛtʋ agbaa ñʋndɩnaa sakɩyɛ cɛtɩɣ se mba pɩzɩɣ nɛ pasɩnɩ ɛyaa mba pasɩba yɔ. Nɛ mba paba tisiɣ pɔ-tɔm yɔ, pɛcɛlɩɣ-wɛ liidiye. Ɛlɛ ye ɖɩtɩlɩ toovenim yɔ, pɩsɩɣnɩ-ɖʋ nɛ ɛyaa mba paacɛtɩɣ-ɖʋ.

16. Ayiɣdiɣ Ɛsɔ sɛtʋ agbaa sakɩyɛ wɩlɩtʋ taa? Ɛzɩma ɛpɩzaa nɛ ɛla mbʋ?

¹⁶ Ñɛ-Ɛsɔ sɛtʋ ɛgbɛyɛ tisiɣ tɔm ndʋ Bibl wɩlɩɣ sɩɖaa yɔɔ yɔ, tɩ-yɔɔ? Ɛsɔ sɛtʋ agbaa sakɩyɛ iitisiɣ-tʋ. Ɛbɛ yɔɔ? Mbʋ pʋyɔɔ yɔ, Sataŋ yiɣdi pa-wɩlɩtʋ. Sataŋ tɩŋɩɣnɩ cɛtɩm Ɛsɔ sɛtʋ ɛgbɛyɛ yɔɔ nɛ ɛɖʋʋ ɛyaa lɩmaɣza taa se po-tomnasɩ sɩkɩ nɛ pɩtɛ lɛ, pɛwɛɣ wezuu hadɛdɩnaa cɔlɔ. Pɩkɛ cɛtɩm. Sataŋ tɩŋɩɣnɩ cɛtɩm pʋnɛ nɛ lɛɛbʋ yɔɔ ɖɔɖɔ nɛ ɛlakɩ se ɛyaa ɩha Yehowa Ɛsɔ siɣye. Ɛzɩma mbʋ?

17. Ɛbɛ yɔɔ miŋ sɔsɔŋ taa wobu wɩlɩtʋ pisiɣ Yehowa hɩɖɛ?

¹⁷ Ɛzɩ ɖɩtɛm kpɛlɩkʋʋ nɛ pɩɖɛɛ yɔ, Ɛsɔ sɛtʋ agbaa naayɛ wɩlɩɣ se ye ɛyʋ ɛcaɣ wezuu kɩdɛkɛdʋʋ yɔ, ɛ-sɩm wayɩ lɛ, Ɛsɔ ɖʋʋ-ɩ miŋ sɔsɔŋ taa nɛ ɛnɩɩ siziŋ tam. Wɩlɩtʋ ndʋ tipisiɣ Ɛsɔ hɩɖɛ. Yehowa kɛ Ɛsɔ sɔɔlɩm tʋ nɛ ɛɛpɩzɩɣ nɛ ɛnazɩ ɛyaa mbʋ kpa. (Kalɩ 1 Yohanɛɛsɩ 4:8.) Ye pɩɣa nakɛyɛ ɛlabɩ nabʋyʋ pɩfɛyɩ nɛ ɖeu nɛ ka-caa kpaɣ ke-nesi nɛ ɛɖʋ-sɩ miŋ taa, suwe ŋmaɣzɩɣ ɛ-yɔɔ? Ŋpɩzɩɣ nɛ ŋtasɩ ɛyʋ ɛnʋ ñam na? Ŋpɩzɩɣ nɛ ŋñɩnɩ se ŋtɩlɩ ɛyʋ ɛnʋ? Aayɩ. Pɩtʋʋ fɛyɩ, ŋmaɣzɩɣ se pʋdʋ kɛ kañaɣ. Ɛlɛ Sataŋ ñañɩnɩɣ se ɖɩmaɣzɩ se Yehowa ñaɣzɩɣ ɛyaa miŋ se panɩɩ siziŋ pɩnzɩ miiliyɔɔwaa sakɩyɛ.

18. Cɛtɩm tɔm ndʋ tuzuu ɛyaa nɛ palakɩ sɔnzɩ sɩɖaa yɔɔ?

 ¹⁸ Sataŋ tɩŋɩɣnɩ ɖɔɖɔ coocinaa nabɛyɛ yɔɔ nɛ ɛwɩlɩɣ se ɛyaa sɩkɩ lɛ, papɩsɩɣ feziŋ weyi pʋpɔzaa se ɛzadɩnaa ɩña nɛ paɖʋ hɩɖɛ yɔ. Wɩlɩtʋ ndʋ tɩyɔɔdʋʋ se sɩɖaa kalɩzasɩ pɩzɩɣ nɛ sɩkɛ ɖa-taabalaa ɖoŋ ñɩma yaa ɖo-koyindinaa sɔsaa. Nɛ sakɩyɛ tisiɣ cɛtɩm tɔm ndʋ tɩ-yɔɔ. Pɩ-yɔɔ peseɣ sɩɖaa sɔɔndʋ, paɖʋʋ-wɛ hɩɖɛ nɛ pɛsɛɣ-wɛ. Ŋgʋ Bibl ñawɩlɩɣ se sɩɖaa ɖiɣni ɖou kiɖou nɛ Yehowa, Ɛsɔ toovenim tʋ weyi ɛkɛ ɖa-Lɩzɩyʋ nɛ ɖɔ-yɔɔ Cɔnɩyʋ yɔ, e-yeke koŋ pɩwɛɛ se ɖɩsɛɛ.—Natʋ 4:11.

19. Sɩm yɔɔ toovenim tɩlʋʋ sɩɣnɩ-ɖʋ nɛ ɖɩnɩɩ Bibl wɩlɩtʋ lɛɛtʋ ndʋ taa?

¹⁹ Ye ŋtɩlɩ toovenim sɩɖaa yɔɔ yɔ, pɩsɩɣnɩ-ŋ nɛ cɛtɩm wɩlɩtʋ ndʋ titaatolisi-ŋ. Pɩsɩɣnɩ-ŋ ɖɔɖɔ nɛ ŋnɩɩ Bibl wɩlɩtʋ lɛɛtʋ taa. Ye ŋnɩ pɩ-taa camɩyɛ se sɩɖaa fɛyɩ wezuu hadɛdɩnaa tɛ yɔ, pɩsɩɣnɩ-ŋ nɛ ŋnɩɩ paradisuu taa caɣʋ tɛtʋ yɔɔ lidaʋ taa camɩyɛ.

20. Tɔm pɔzʋʋ mbʋ yɔɔ ɖɩkaɣ cosuu ñʋʋ ŋgʋ kɩkɔŋ yɔ, kɩ-taa?

²⁰ Ɛyʋ siɣsiɣ tʋ Yɔb kaapɔzɩ tɔm tʋnɛ: “Ɛzɩ ŋmaɣzɩɣ se ɛyʋ ɛsɩba yɔ, ɛɖaɣnɩɣ wɛʋ na?” (Yɔb 14:14) Ɛyʋ weyi ɛsɩba yɔ, ɛpɩzɩɣ nɛ ɛɖaɣnɩ hiɣu wezuu na? Mbʋ Bibl wɩlɩɣ tɔm ndʋ tɩ-yɔɔ yɔ, putukuuni ɛyaa laŋa siŋŋ. Ðɩkɔŋ-tʋ naʋ ñʋʋ ŋgʋ kɩkɔŋ yɔ, kɩ-taa.