Yɔɔdɩ ɖoŋ yaa yɔɔdɩ hɛɛɛ. Ye ŋcaɣ se ŋñɩɣ niye lɩmaɣza kɩcɛya naayɛ yɔɔ nɛ ŋseɣti ñɔ-tɔm welisiyaa yɔ, yɔɔdɩ ɖoŋ. La mbʋ ɖɔɖɔ alɩwaatʋ ndʋ ŋkalɩɣ Masɩ hɔɔlʋʋ ŋgʋ kɩyɔɔdʋʋ tɔm hʋʋ nabʋyʋ tɔm yɔ. Ye ŋcaɣ se ñɔ-tɔm welisiyaa liu tɛɛ ɛkɔtɩnɩ tɔm ndʋ tɩkɔŋ yɔ, yaa ye ŋyɔɔdʋʋ sɔɔndʋ tɔm yaa nɩɣzɛ tɔm yɔ, yɔɔdɩ hɛɛɛ.

Lɛɣzɩ ñɔ-nɔɔ. Ye palakɩ mbʋ ña-kʋnʋŋ taa yɔ, yɔɔdɩ nɛ ñɔ-nɔɔ kʋyɩ alɩwaatʋ ndʋ ŋyɔɔdʋʋ taa leleŋ tɔm yɔ yaa alɩwaatʋ ndʋ ŋyɔɔdʋʋ nabʋyʋ paɣlɩka yaa ɛzɩma lone naɖɩyɛ posaa yɔ pɩ-tɔm yɔ. Yɔɔdɩ nɛ ñɔ-nɔɔ tii alɩwaatʋ ndʋ ŋyɔɔdʋʋ kʋñɔwiye yaa nɩɣzɛ tɔm yɔ.

Yɔɔdɩ lɛɛ lɛɛ yaa yɔɔdɩ tɛmm. Yɔɔdɩ lɛɛ lɛɛ nɛ pɩkɩlɩ alɩwaatʋ ndʋ ŋyɔɔdʋʋ taa leleŋ tɔm yɔ. Yɔɔdɩ tɛmm nɛ pɩkɩlɩ alɩwaatʋ ndʋ ŋyɔɔdʋʋ lɩmaɣza sɔsɔna tɔm yɔ.