“Pɩɩwɛɛ se ɩkɛ wɩlɩyaa.” (Ebr. 5:12) Ɩmaɣzɩ kpem nɛ ɩna! Yehowa, kedeŋa kpeekpe yɔɔ Wɩlɩyʋ sɔsɔ, yaɣ-ɖʋ se ɖɩwɩlɩ lalaa ɛ-yɔɔ tɔm. Ye paɖʋ-ɖʋ tʋmɩyɛ se ɖɩwɩlɩ Yehowa yɔɔ toovenim tɔm, paa pɩtɩɩkɛ hɔʋ taa, ɛgbɛyɛ taa, yaa tɔm susuu taa yɔ, pɩkɛ waɖɛ sɔsɔɖɛ nɛ sʋʋtʋ sɔsɔtʋ. Ɛbɛ pɩzɩɣ pɩsɩnɩ-ɖʋ nɛ ɖɩla tʋmɩyɛ nɖɩ camɩyɛ?

Tɔm cosuu wɛ tɔm ndʋ apostoloo Pɔɔlɩ kaama Timootee yɔ tɩ-taa. Eheyi-i se: “Wolo pɩ-yɔɔ nɛ ŋka ñʋʋ nɛ tɔm kalʋʋ ɛyaa ɛsɩndaa, nɛ ɛyaa sazʋʋ, nɛ tɔm wɩlʋʋ.” Pɔɔlɩ sɔzaa se: “Ye ŋlakɩ mbʋ yɔ, ŋkaɣ yabʋ ña-maɣmaɣ ña-ñʋʋ nɛ mba pewelisiɣni-ŋ yɔ pa-ñɩŋgʋ.” (1 Tim. 4:13, 16) Ɩwɛnɩ ñʋʋ yabɩtʋ tɔm se iheyi lalaa. Ye mbʋ, pɩcɛyaa se ɩñaɣ pana nɛ ɩkpasɩ tɔm kalʋʋ nɛ tɔm wɩlʋʋ taa. Palɩzɩ hatʋ cabɩ takayaɣ kanɛ se kasɩnɩ-mɩ nɛ ɩla mbʋ. Ɩna kɛ-wɛtʋ natʋyʋ.

Yehowa kɛnɩ “lɔŋ wɩlɩyʋ” Sɔsɔ. (Iza. 30:20) Alɩwaatʋ ndʋ hatʋ cabɩ takayaɣ kanɛ kakaɣ-ŋ sɩnʋʋ nɛ ŋwɛɛ niye tɔm kalʋʋ nɛ tɔm wɩlʋʋ taa yɔ, taasɔɔ kpa se Yehowa cɔlɔ tɔm ndʋ ɖɩwɩlɩɣ yɔ tɩlɩnaa nɛ ɛnʋ hɔŋnɩ ɛyaa. (Yoh. 6:44) Ye mbʋ, tɩmɩɣ ɖoŋ ɖoŋ nɛ ŋpɔzʋʋ fezuu kiɖeɖeu. Lakɩnɩ Ɛsɔtɔm tʋmɩyɛ ɖoŋ ɖoŋ. Hɔ ɛyaa lɩmaɣza nɛ ŋwoni Yehowa yɔɔ, taahɔ pa-lɩmaɣza nɛ ŋkɔnɩ ña-maɣmaɣ ñɔ-yɔɔ kpa. Ñaɣ pana nɛ ŋsɩnɩ ñɔ-tɔm welisiyaa nɛ pɔsɔɔlɩ Yehowa siŋŋ.

Tɔm ndʋ tɩ-tɔm kɩlɩ cɛyʋʋ nɛ paɖʋzɩ-tʋ ɛyaa nesi tɛɛ yɔ, ndʋ paya-mɩ se ɩwɩlɩ. Ye “ɖoŋ weyi Ɛsɔ haɣ yɔ” ɛnɩ ɩtaɣ liu yɔ, ɖɩɩpɩtɩɣ se ɩkaɣ tʋmɩyɛ nɖɩ labʋ camɩyɛ.—1 Pɩy. 4:11.

Mi-koobiya mba pɛkɛ tɔm wɩlɩyaa ɛzɩ mɩ yɔ,

Yehowa Aseɣɖe Tɩnaa tɛ Nɔɔɖɛyaa Ɛgbɛyɛ