Yehowa Aseɣɖe Tɩnaa ñaŋ kominawaa nɛ wondu ndʋ tɩsɩŋnɩ pa-ajɛɛ yɔ. Ðɩñaŋ ɖɔɖɔ mba poɖukini ɛjaɖɛ naɖɩyɛ, pɛsɛɣ kɩɖaʋ kɛdɛɛka yaa peteɣ kɩɖaʋ kɛdɛɛka hendu yɔ.

 Paa mbʋ yɔ, Yehowa Aseɣɖe Tɩnaa ɩɩɖʋ nesi ajɛɛ sɔnzɩ nzɩ, mbʋ pʋyɔɔ yɔ sɩɩlakɩ nɔɔ kʋɖʋmaɣ nɛ Bibl wɩlɩtʋ. Ðɩsɔɔlaa se lalaa ɩña mbʋ pɩ-yɔɔ ɖitisiɣ yɔ ɛzɩ ɖa ɖɔɖɔ ɖɩlakʋʋ-wɛ yɔ.

Tɔm ñʋʋ kʋnɛ kɩ-taa

•  Paɣtʋ kila wena ɖɩlakɩnɩ tʋmɩyɛ?

•  Ye paɣtʋ ɛpɔzɩna se ɖɩɖʋ nesi, ɛbɛ pɩwɛɛ se ɖɩla?

•  Ɛzɩ Yehowa Aseɣɖe Tɩnaa tɩnɩɣ politiki yaa ɛyaa wezuu caɣʋ lɩmaɣza naayɛ yɔɔ?

 Paɣtʋ kila naalɛ wena a-tɔm kɩlɩ cɛyʋʋ yɔ, ana yɔ

•   Ɛsɔ ɖeke koŋ pɩwɛɛ se ɖɩsɛɛ. Bibl tɔm se: « Ñɛ-Ɛsɔ Yehowa pɩwɛɛ se ŋsɛɛ, nɛ e-ɖeke koŋ pɩwɛɛ se ŋla tʋmɩyɛ kiɖeɖeye. » (Luka 4:8) Mba poɖukini ɛjaɖɛ naɖɩyɛ, pɛsɛɣ kɩɖaʋ kɛdɛɛka yaa peteɣ kɩɖaʋ kɛdɛɛka hendu yɔ, ɖoŋ ɖoŋ lɛ, pɔtɔŋ se pakpaɣ pa-tɩ nɛ paha ɛjaɖɛ nɖɩ nɛ pa-laŋɩyɛ pilim. Pʋyɔɔ Yehowa Aseɣɖe Tɩnaa ɛhʋyɛ ɛɛhaɣ-wɛ nʋmɔʋ se paɖʋ nesi sɔnzɩ nzɩ yɔ.

   Yehowa Aseɣɖe Tɩnaa ɛsɩndaa lɛ, kɩɖaʋ kɛdɛɛka sɛʋ kɛ Ɛsɔ sɛtʋ yaa sɩnaa latʋ nɛ Bibl paɖɩɣ lakasɩ nzɩ siŋŋ. (1 Kɔrɛntɩ mba 10:14) Caanaʋ taa tɔm taa tazɩyaa nabɛyɛ yɔɔdaa se kɩɖaʋ kɛdɛɛkasɩ sɩŋnɩ Ɛsɔ sɛtʋ agbaa wondu natʋyʋ. Caanaʋ taa tɔm taa tazɩyʋ Carlton J. H. Hayes yɔɔdaa se: « Tisuu hɔɔlʋʋ taa lɛ, kɩɖaʋ kɛdɛɛka kɛ mbʋ pɩ-tɔm kɩlɩ cɛyʋʋ yɔ nɛ kɛkɛ ɖɔɖɔ kajalaɣ wonuu ajɛɛ sɛʋ nʋmɔʋ taa ». a Takayɩsɩ mayʋ Daniel P. Mannix yɔɔdaa: « Kajalaɣ pɩnzɩ mɩnʋʋ taa Krɩstʋ mba kizaa se paalakɩ Roma ñʋʋdʋ ɛsɔnaa sɔnzɩ, nɛ pɩwɛ ɖɔɖɔ ɛzɩ ɛyʋ kiziɣ se ɛɛsɛɣ kɩɖaʋ kɛdɛɛka sɔnɔ yɔ ». b

  Paa Yehowa Aseɣɖe Tɩnaa ɩɩsɛɣ kɩɖaʋ kɛdɛɛka yɔ, paacɩyɩɣ-kɛ, paaɖʋʋ-kɛ miŋ yaa paalakɩ nabʋyʋ mbʋ pɩwɩlɩɣ se pɛfɛyɩnɩ ñamtʋ kɔ-yɔɔ yɔ. Nɛ pañaŋ ɖɔɖɔ wondu lɛɛtʋ ndʋ tɩŋnɩ pa-ajɛɛ yɔ.

•   Ɛsɔ ɛsɩndaa lɛ ɛyaa tɩŋa wɛ kɩmaŋ. (Tʋma Labʋ 10:34, 35) Bibl yɔɔdaa se Ɛsɔ «tɩŋnɩ ɛyʋ kʋɖʋm yɔɔ nɛ ɛla ajɛɛ ndɩ ndɩ taa ɛyaa. » (Tʋma Labʋ 17:26) Mbʋ yebina nɛ Yehowa Aseɣɖe Tɩnaa ɩɩyɔɔdʋʋ se kʋnʋŋ nakʋyʋ yaa ɛjaɖɛ naɖɩyɛ kɩlɩ lɛɛɖɛ. Ðɩñaŋ ɛyaa tɩŋa paa lone nɖɩ pɛwɛna, paa le palɩnaa yaa paa le pɛwɛɛ yɔ.—1 Pɩyɛɛrɩ 2:17.

 Yehowa Aseɣɖe Tɩnaa ɩɩkaɖɩɣnɩ komina. Ðɩnawa se Kominawaa kɛ «ɖʋtʋ ndʋ Ɛsɔ laba yɔ» nɛ ɛnʋ yebina nɛ pɛwɛɛ. (Roma mba 13:1-7) Ðɩnawa ɖɔɖɔ se pɩwɛɛ se Krɩstʋ mba ɩña ajɛɛ ñʋndɩnaa.—Luka 20:25.

 Nɛ ye ɛjaɖɛ naɖɩyɛ paɣtʋ ɛkaɖɩɣnɩ Ɛsɔ paɣtʋ? Nabʋyʋ taa ye pɩsaŋ yɔ, ɖɩpɔzʋʋ kominawaa se pɛlɛɣzɩ paɣtʋ ndʋ. c Ye pɩɩsaŋ se pɛlɛɣzɩ paɣtʋ ndʋ yɔ, Yehowa Aseɣɖe Tɩnaa lɩzɩɣ se ‘pañaŋ Ɛsɔ ɛzɩ pa-ñʋʋdʋ yɔ, pɩtɩkɛ ɛyaa.’—Tʋma Labʋ 5:29.

 Aayɩ. Yehowa Aseɣɖe Tɩnaa ɩɩɖʋ pɔ-nɔsɩ ɛjaɖɛ yɔɔ politiki tɔm taa. Ye ɖikizaa se ɖiiɖukini ɛjaɖɛ naɖɩyɛ, ɖɩɩsɛɣ kɩɖaʋ kɛdɛɛka yaa ɖiiteɣ kɩɖaʋ kɛdɛɛka hendu yɔ, pɩɩwɩlɩɣ se ɖɩkaɖɩɣnɩ politiki lɩmaɣza. Ɛlɛ tɔm ndʋ Bibl wɩlɩɣ pɩlɩɩnɩ sɔnzɩ nzɩ sɩ-yɔɔ yɔ, tɩ-yɔɔ ɖɩɖɔŋ.