Gole ne gole, shango i no tengenyeka ka njinjinjinji. Nenguba bunji gwako gu si gwa chingwe, ku tengenyeka kwe shango ku kulu ku nga chinya kwazo, ku nga pelela ne ku dziyidzika, ne lufu. Mu zwibaka zwingwe, ku nga pelela ne dzitsunami dzi no chinya mizi ye bathu, ne ku bulaya bathu ba njinji ba no gala mu ndawo iyeyo. A Baibili ya ka lebela mbeli ne kwe ku tengenyeka kwe shango ikoku?

Mu chidiyo ichechi

•  A Baibili ya ka lebela mbeli ne kwe ku tengenyeka kwe shango?

•  A ku tengenyeka kwe shango ngwenu ko shingikadza buporofiti gwe Baibili?

•  Buporofiti gwe Baibili gwe ku tengenyeka kwe shango go dwani mu tili?

•  Mikumbulo i sa ka lulwama ne kwe buporofiti gwe Baibili gwe ku tengenyeka kwe shango

 Baibili i no lebela mbeli ne kwe ku tengenyeka kwe shango mu buporofiti gwa ka legwa na Jesu. Matama awe a ka kwagwa mu buka thatu dze Baibili a noti:

 “Itjaba tjowomukila itjaba ne bushe gukamukila bushe. Kowobe yapo bhamba ne kutengenyeka kwe shango mu magalo akasiyana.”—Matewu 24:7.

 “Ludzi gowomukila gumwe ludzi ne bushe gowomukila gumwe bushe. Kowobe ne kutengenyeka kwe shango mu mituthu yakasiyana, kukabe ne bhamba.”—Mako 13:8.

 “Kowobe ne kutengenyeka kwe shango kwakabangalala, ne bhamba ne njigwelwe.”—Luka 21:11.

 Jesu wa ka lebela mbeli kuti “kutengenyeka kwe shango ku kulu” kowo shingikala mu “magalo a kasiyana” mu chibaka chi nowo be ku na ngwa, bhamba, ne magwele. Kose ikoko, ko lakidza histori ye ku chila kwe nthu ku no dangwa “ku pela kwe shango,” kene “mazhuba e bupelo.” (Matewu 24:3; 2 Timoti 3:1) Ku yendidzana ne ku tobedzana kwe misi ye Baibili, “mazhuba e bupelo” a ka tangisa ne 1914 ngono ha a thu a ka wila.

 Ee. Buporofiti gwa ka legwa na Jesu, ne cha a ka leba ne kwe ku tengenyeka kwe shango, go yendidzana ne zwi no shingikala ngwenu. Ku tangisa ne 1914, kwa ka be ne ku tengenyeka kwe shango ku kulu ku no pinda ka 1 950, kwa ka pelela kwa bulaya bathu ba no pinda 2 miliyoni. a A ti boneni cha ka shingikala mu century ya ngwenu.

 2004—Indian Ocean. Ku tengenyeka kwe shango kwe chilizanyo che 9.1-magnitude kwa ka pelela ne tsunami ya ka bulaya bathu ba nga be 225 000 mu shango dzi li 12.

 2008—China. Ku tengenyeka kwe shango kwe chilizanyo che 7.9-magnitude kwa ka chinya mizi ne dzitoropo, kwa ka pelela kwa bulaya bathu ba nga be 90 000, ne ku kubadza ba nga be 375 000, ne ku siya dzimiliyoni dzi sina mizi.

 2010—Haiti. Ku tengenyeka kwe shango kwe chilizanyo che 7.0-magnitude kwa ka tobegwa ne ku tetema kwe shango ku kulu kwa ka bulaya bathu ba no pinda 300 000 ne ku siya ba no pinda miliyoni ba sina mizi.

 2011—Japan. Ku tengenyeka kwe shango kwe chilizanyo che 9.0-magnitude ne dzitsunami dza ka shingikala kwa ka bulaya bathu ba nga be 18 500 ne ku fulusa bangwe mu mizi yabo. Power plant ye Fukushima ya ka chinyika, kwa ka pelela ne ngozi ye nuclear. Shule kwe makole a li 10, bathu ba nga be 40 000 ba ka be ba sathu ba ka khona ku gwilila ku mizi yabo i pejo ne power plant ne ntata ye ngozi ye radiation.

 Buporofiti gwe Baibili ne kwe ku tengenyeka kwe shango go ti zibisa ne kwe chi nowo shingikala mu chibaka chi no zha. Jesu wa kati: “Sa ikoko ha mubona zwithu izwezwi zwishingikala, zibani kuti bushe gwe Ndzimu gwabe pejo.”—Luka 21:31.

 Baibili ino lakidza kuti Bushe gwe Ndzimu i mbuso we malebeswa u kudzimu u no busiwa na Jesu Kirisiti. Bushe igogu ndigo Jesu gwa a kati badiyiwa babe ba gu tembezelele.—Matewu 6:10.

 Ha Bushe gwe Ndzimu gu busa mu shango, Ndzimu U nowo pedzisa ngozi dze shango dzi nonga, ku tengenyeka kwe shango, kuti dzi si hwise bathu zogwadza. (Izaya 32:18) Pezhugwi kwa ikoko, U nowo misa magwadzi wose a no thangwa ne ku tengenyeka kwe shango ngwenu. (Izaya 65:17; Zumbunulo 21:3, 4) Ku ziba kwa ka paphidzika, bala Nsholo u noti “Bogosi Jwa Modimo bo Tla Fitlhelela Eng?”