Nshangano we ngathu we 2020 wa ka be uli nkulu ku pinda yose—nshangano wedu we kutanga wa ka tshambisiwa ne ku thamiwa kuti u be yapo mu inthanete! Ne kwa kajalo, bunji gwe bazwalani ne dziazwadzi dzedu ku Malawi ne Mozambique, ba ka hwilila nshangano ba singa shingise Inthanete. Ichecho cha ka khoneka chini?

 Dzikomiti dze Babatshanyi ne dze ku Diya dze Gubungano li no Laula dza ka dumila kuti ku andamisiwe nshangano mu thelevishini ne mu radio ye Malawi ne ye Mozambique. Ini kwa ku thamiwa ne zila iyeyo? Inthanete ku Malawi i no tura kwazo ku pinda ku dzingwe shango, ndizo Bafakazi ba shomanana koga ba nga khona ku ruwelela Inthanete. William Chumbi, nngwe we Komiti ye Letabi gwe Malawi u no chenesa eti: “Radio ne thelevishini ndiyo zila koga ya ka i nga shingisiwa ku andamisa nshangano ku bazwalani ne dziazwadzi.” Luka Sibeko, u no shingilabo mu Komiti ye Letabi gwe Malawi, u no paphidza eti: “Ha ti be ti sa ka khona ku u andamisa ne TV ne radio, bazwalani ba shomanana ba kusi kwe litabi gwedu ndibo koga ba no be ba ka khona ku hwilila nshangano.” Ku Mozambique naikobo, bazwalani ba shomanana koga ba no be ba ka khona ku be ne chishingisiwa cha ka fanila che electronic, ti singa lebe ne kwe Inthanete.

 Ne ntata ye bugwele gwe COVID-19, zwingwe zwiteishini zwe thelevishini ne radio iteishini zwa ka to gasa kale zwidiyo zwe gubungano. a Bazwalani bedu ba ka no lebeleka ne zwiteishini izwezwi be kumbila kuti ba paphidzigwe dzinako dze ku gasiwa kwe nshangano.

 Ku Malawi, bazwalani bedu ba ka be ba ka lingisana ne mathatha. Kanjinji zwiteishini zo dumila ku gasa mu chibaka che awara koga. Zwiteishini zwa ka be zwi tshwenyiwa ne kuti ku gasa mu chibaka chi lefu ku ngana ku ka thama kuti bathu ba si teedze. Ngono bazwalani bedu ba ka chenesa kuti nshingo wedu u no batsha ichaba. Dumbu ne mu chibaka che lockdown, to pa bathu ndebo mbuya dzi no dwa mu Baibili dzi no nyaladza, ku nga thama kuti bathu ba zwibate zwibuyanana ne ku chila buchilo gwe nsha ba ka shatha. Ku hwa ichechi, zwiteishini zwa ka dumila ku paphidzila bazwalani chibaka che ku gasa.

 Ku Malawi, nshangano wa ka gasiwa ne iteishini che thelevishini chi ngompela ne radio iteishini ingompela, thelevishini iyeyi ne radio iyeyi dzose dzo hwiligwa ne lingiligwa ne dzimiliyoni dze bathu. Ku Mozambique, nshangano iwoyo wa ka gasiwa ne iteishini che thelevishini chi ngompela ne dzi radio iteishini dzili 85.

 Mu shango dzose idzedzi, kwa ka shingisiwa mari a nga pa P313 904.56 b ku gasa nshangano ne thelevishini ne a nga be P222 414.40 ku gasa mu radio. Mari e ku shingisa radio ya ka be ili P166.81 mu zwiteishini zwi tukununu ku noti P30 882.24 mu zwiteishini zwi kulu zwe ichaba.

 Bazwalani bedu ba ka shinga kwazo ku shingisa zwipo zwi no dusiwa zwibuyanana. Ha ti lakidzila ku Malawi, ba ka kumbila praisi dzi pasi, ku shanganyila ne piwa discount i ngompela ye 30 percent. Discount iyeyi ya ka bata mari a nga pa P19 027.55. Ku Mozambique, zwiteishini zwingwe zwa ka be zwi duma kuti tapuzila dzipraisi ne kuti ba ka be be ti ziba ne thembeka kakale ti ruwela chinyolocho.

 Bazwalani bedu ba no bokela kwazo ku lingilila kene ku hwilila mu zwiteishini zwi mu ndawo yabo. Nkugwana ku dwa ku Malawi unoyi Patrick, akati: “To bokela kose kwa ta ka thamigwa ne be Gubungano li no Laula mu chibaka che bugwele igogu gwa ka wa.” Isaac, u no dwabo ku Malawi, akati: “Ha tina cha ti no shingisa, ndizo tobokela kwazo zila ya ka shalulika ya ta ka piwa ne gubungano la Jehova ye ku hwilila nshangano mu radio. Zila iyeyi, ya ka thama kuti bose be nsha wangu ba khone ku pelela ba hwilila nshangano. To tola ichechi ili zila i no lakidza ludo gwa Jehova mu bathu babe.”

 Nshangano we 2020 wa ka be uli we kutanga mu nreri nngwe ku Mozambique. Akati: “Ndongoloso ye ku lingilila nshangano mu TV ya ka ndi kumbudza kuti Jehova u Ndzimu we masimabawose. Bugwele gwa ka wa, ha gu zo misa kuti a ti pe nshangano ngono nda ka u lingilila ndi li mu ngumba yangu. Nda ka bona chilakidzilo che ludo pakati kwe bathu ba Jehova. Ndo duma kwa ka pelela kuti igogu budumili gwe malebeswa.

 Nkugwana unoyi Wyson akati: “Ndo shaka ku bokela zila ya ta ka thokomegwa ne nlanda u no thembeka mu chibaka che bugwele igogu gwa ka wa. Ku thama kuti nshangano u gasiwe mu radio ne mu TV kwa ka batsha banjnji bedu ba sina mari mu shango iyeyi, kuti ba batshiwe ne ndongoloso ye nshangano iwoyo.”

 Ne mu nshangano we ngathu we 2021, dzikomiti dze Babatshanyi ne dze ku Diya dza ka duma kuti nshangano u gasiwe kakale ne thelevishini ne radio mu zwichaba zwa ka shalugwa. To ruwelela chini ku gasiwa kwe nshangano ne zila iyeyi? Ne zwipo zwi no dusigwa nshingo we shango yose, bunji gwazo zo dusiwa ne zila dza ka siyasiyana dzi no wangwa mu donate.dan124.com. To bokela zwipo zwenyu zwi no dusiwa ne moyonchena.