THUTO 13
Ndebo Mbuya ne Kwe Budumili Ndi Dzipi?
1. A budumili gose gwa ka lulwama?
Ku na bathu ba ka lulwama mu dzikereke dzose. I ndebo mbuya kuti Ndzimu u no bona bathu ibabo ne ku ba khategela. Ngono chi no gwadza wuti, budumili gwa ka shingisigwa zwithu zwa ka bipa. (2 Bakorinta 4:3, 4; 11:13-15) Mbiko ye dzikhani i no leba kuti dzikereke dzingwe dzo baligwa mu ku bulaya, genocide, nghwa ne ku suta bana. Ichecho cho hwisa zogwadza ba no duma mu Ndzimu seni.—Bala Matewu 24:3-5, 11, 12.
Nenguba budumili gwe malebeswa gu kudza Ndzimu, budumili gwe manyepkhwa igo, go nhwisa zogwadza. Go diya mikumbulo i sipo mu Baibili, i nonga zwidiyo zwe manyepkhwa ne kwe Ndzimu ne bafi. Ngono Jehova u no shaka bathu be ziba malebeswa ne kukwe.—Bala Ezekieli 18:4; 1 Timoti 2:3-5.
2. Ndebo mbuya ne kwe budumili ndi dzipi?
Ko shathisa kuti Ndzimu ha a to chebegwa ne dzikereke dzi no ti dzo da Ndzimu ngono dumbu dzi da shango ya Satani. (Jakubo 4:4) Dama le Ndzimu lo dana budumili gose gwe manyepkhwa li ti “Bhabhiloni Nkulu.” Bhabhiloni ya ka be i li toropo hulu ya ntolo ya ka tangisa budumili gwe manyepkhwa shule kwe nkubila we chibaka cha Nowa. Ku sathu ku ka no ti ngayi, Ndzimu u nowo dwa e pedzisa budumili gu no chebela ne ku tshambidzila bathu.—Bala Zumbunulo 17:1, 2, 5, 16, 17; 18:8.
Ku na ndebo mbuya dzingwe. Jehova ha a zo kangangwa bathu ba ka lulwama ba ka andama ne dzikereke dze manyepkhwa mu shango yose. U no shanganya bathu ba ka jalo ne ku ba diya malebeswa.—Bala Mika 4:2, 5.
3. Ini chi nga thamiwa ne bathu ba na nkumbulo wa ka lulwama?
Budumili gwe malebeswa go thama kuti bathu ba wanane
Jehova u no khategela bathu ba no da malebeswa ne ndulamo. U no ba budza kuti ba bude mu budumili gwe manyepkhwa. Bathu ba no da Ndzimu ba ka zwimisila ku shanduka ku nshathisa.—Bala Zumbunulo 18:4.
Mu century ye kutanga, bathu ba na mikumbulo ya ka lulwama ba ka ti be hwa ndebo mbuya mu baapostolo, ba ka shatha. Ba ka zwidiya buchilo gu ptshwa mu na Jehova, gu no shathisa, gu na mazwimisilo, ne thembo. Ba chilakidzilo mu tili ngwenu, ne kuti ba ka amuchila ndebo mbuya ne ku biga Jehova mbeli mu machilo abo.—Bala 1 Bathesalonika 1:8, 9; 2:13.
Jehova u no amuchila banamati ba no buda mu budumili gwe manyepkhwa mu nsha uwe. Ha u amuchila ku kokiwa na Jehova ne ludo, u nowo be nkhwinya uwe mu nsha ptshwa u na ludo we banamati ba Jehova ne ku bona buchilo gu singa pele.—Bala Mako 10:29, 30; 2 Bakorinta 6:17, 18.
4. Ndzimu u no zhisa ku shatha chini mu shango yose?
Ku athugwa ku no zha kwe budumili gwe manyepkhwa, i ndebo mbuya. Kowo sunungula shango yose mu ku tshambilidzigwa. Budumili gwe manyepkhwa ha gu chowo chebela ne ku thubukanya bathu kakale. Bathu ba nowo be be namata Ndzimu we malebeswa koga be wanana.—Bala Zumbunulo 18:20, 21; 21:3, 4.
