THUTO 10
U Nga Ziba Chini Namato ye Malebeswa?
1. A kuna budumili gu ngompela koga gwe malebeswa?
“Chenjelelani balebesambeli be manyepkhwa”.—MATEWU 7:15.
Jesu wa ka diya batobeli babe budumili gu ngompela, budumili gwe malebeswa. Go fanana ne zila i no yesa ku buchilo gu si nga pele. Jesu wa kati: “ba no iwana bashomanana.” (Matewu 7:14) Ndzimu u no amuchila koga namato ya ka teyiwa mu Dama lile le malebeswa. Banamati bose be malebeswa ba no shanganyiwa ne ku galamoyo ku ngompela.—Bala Johani 4:23, 24; 14:6; Baefeso 4:4, 5.
Lingilila vidiyo Does God Accept All Forms of Worship?
2. Jesu wa ka lebani ne kwe Bakirisiti be manyepkhwa?
“Ba no leba kuti ba no ziba Ndzimu, koga ba no u landula nge mishingo yabo.”—TITO 1:16.
Jesu wa ka leba kuti baporofiti be manyepkhwa ba nowo chinya Bukirisiti. Ba no lingika se banamati be malebeswa. Ba no leba kuti kereke dzabo nde dze malebeswa. Ngono u nga khona bona kuti dumbu i bathu ba ka tini. Chini? Namato ye lebeswa ndiyo koga i na Bakirisiti be malebeswa ba no bongwa ne michelo ne zila dzabo.—Bala Matewu 7:13-23.
3. U nga bona chini banamati be malebeswa?
Ela njele zwithu zwi li 5 zwi no ba shalula:
-
Banamati be Malebeswa ba no hlonipha Baibili ne kuti i Dama le Ndzimu. Ba no gwisa ku chila ne milayontewo yayo. Budumili gwe malebeswa ha gu to fanana ne budumili gwa ka teyiwa mu mikumbulo ye bathu. (Matewu 15:7-9) Banamati be malebeswa ba no chila ku dumana ne cha ba no diya.—Bala Johani 17:17; 2 Timoti 3:16, 17.
-
Batobeli ba Jesu be malebeswa ba no hlonipha zina le Ndzimu, Jehova. Jesu wa ka lakidza kuti u no hlonipha zina le Ndzimu ne ku thama kuti li zigwe. Wa ka batsha bathu ku ziba Ndzimu ne ku ba diya ku tembezela kuti zina le Ndzimu li yengemadziwe. (Matewu 6:9) Kwa u no gala, i budumili gupi gu no thama kuti zina le Ndzimu li zigwe?—Bala Johani 17:26; Baroma 10:13, 14.
-
Bakirisiti be Malebeswa ba no rera ne kwe Bushe gwe Ndzimu. Ndzimu wa ka tumila Jesu kuti a rere ndebo mbuya dze Bushe. Bushe gwe Ndzimu ndigo koga thembo ye bathu. Jesu wa ka dwilila e lebeleka ne kwago kuswikilila e fa. (Luka 4:43; 8:1; 23:42, 43) Wa kati batobeli babe ba nowo rera ne kwe Bushe igogu. Ha nthu e lebeleka nawe ne kwe Bushe gwe Ndzimu, kanjinji u no be e dwa mu budumili gupi?—Bala Matewu 24:14.
-
Batobeli ba Jesu a te ba li be shango iyeyi ya ka bipa. Ba no lemogiwa ne ku sa nginilila mu dzipolotiki ne ku sa nginilila mu dzi nghwa. (Johani 17:16; 18:36) Kakale a ba to yedza mikhwa ne zwieto zwi sa ka lulwama zwe shango iyeyi.—Bala Jakubo 4:4.
-
Bakirisiti be malebeswa ba no dana ne ludo gwe malebeswa. Ba no zwidiya ku dwa mu dama le Ndzimu, kuti ba ka fanila hlonipha bathu be njudzi dzose. Nenguba budumili gwe manyepkhwa ka njinji go nginilila mu nghwa dze zwichaba, banamati be malebeswa ba no lamba ichecho. (Mika 4:1-3) Ne kwa ka jalo, Bakirisiti be malebeswa ba no shingisa nako yabo ne zwithu zwabo ku batsha ne ku kulumbidza bangwe.—Bala Johani 13:34, 35; 1 Johani 4:20.
4. A u nga khona ku lemoga budumili gwe malebeswa?
I budumili gupi gu no diya zwidiyo zwi no dwa mu Dama le Ndzimu, gu no hlonipha zina le Ndzimu, ne gu no leba kuti Bushe gwe Ndzimu ndigo koga gu nowo pedzisa mathatha e bathu? Ndi boyani ba no dana kakale be shima nghwa? No kumbulani?—Bala 1 Johani 3:10-12.
