Ku lebesana kwe malebeswa ko shingikala ha iwe ne bana babo mu pana mikumbulo ne mazwiwo.

Ku lebesana ku nga sima kwazokwazo mu bathu ba ptshwa. Ku si ntolo kwazo, “kwa ka be u ngati chingwe chi no shingigwa mu iphiri cho pindisigwa mu machilo e bana babo,” ko leba buka ye Breaking the Code. “Cha u nga lingilila wu kuti zwithu zwi thamigwe pa chena, ngono ha zwi nga be pa chena ne zila ya u no shaka.” Ku leyana na ichecho, ha ku shingikala ne zila ya ka jalo bana ba no sheta ku lebesana ku pinda chingwe ne chingwe!

Yendidzana ne ndongoloso ye ngwana uwo. Thama u jalo ne ku ka be ku dwa kuti mu lebeleke pakati kwe busiku.

“U ngana u ka zwihwa u shaka kuti, ‘Ndiko wo shaka lebeleka ngwenu? Nda shwa ndi nawe zhuba lose!’ Ngono iko dumbu ti nga kongwa teedza bana bedu chini ha be shaka ku ti dusila chi pa moyo? Apa ha te icho cha ka lingiligwa ne nzwadzi mu ngwana?”—Lisa.

“Ndo shaka yezela, ngono ku lebesana ku na mbayilo kwa nda ka be nako ne bana bangu kwa ka be mu zwibaka zwe pakati kwe busiku.”—Herbert.

NLAYONTEWO WE BAIBILI: “Nga ku shete u no zwishakila bubuya, koga nga a gu shakile bamwe.”—1 Bakorinta 10:24.

U si lobeke zebe. Tate bangwe ba ka ti: “Ndo so be ne zwithu zwinjinji mu nkumbulo wangu ha bana bangu be lebeleka. Ngono ha te i li kuti ba no be ba singa bone chi no shingikala—ba no be be bona!”

Ha u shaka hwa cha ba no leba, dzima TV u bo u lechedza chingwe ne chingwe cha u no shinga. Lingisa nkumbulo mu na chi no legwa ne ngwana uwo, u tola cha a no leba i li chithu chikulu mu kuli, nenguba ku nga lingika chi singa hwike.

“Ta ka fanila gadza bana bedu moyo kuti mazwiwo abo a no dwa chingwe mu tili. Ha ba nga kumbula ne zila i poga, ba nga na ba ka ti sumbikila chi pa moyo kene ba ka kumbila batsho ntome.”—Maranda.

“U si hwe zogwadza kwa ka pindilila, nenguba ngwana uwo a nga be ne mikumbulo ya ka linga ntome.”—Anthony.

NLAYONTEWO WE BAIBILI: “Ndizo ibeni ne njele mu ku hwilila kwenyu.”—Luka 8:18.

Shingisa chibaka che mayedziso. Mu zwibaka zwingwe bana ba no dusa chi pa moyo ha ba si gele pasi ba ka lingisana mesho ne nzwadzi.

“To shingisa zwibaka zwe ha ti yenda ne mota. Ku gala ta ka bapa mu na kuti ti be ta ka lingisana kwa ka thama kuti ti lebesane ne zila i na mbayilo.”—Nicole.

Chibaka che zojiwa i no be zila ingwe ya ti no lebesana nayo.

“Mu chibaka che zojiwa nngwe ne nngwe wedu u no leba zwa shwa zwa nshingikalila. Ikoku ko thama kuti ti batane ne ku batshana mu mathatha a ta ka lingisana nawo.”—Robin.

NLAYONTEWO WE BAIBILI: “Mu zwidiye ku hwilila [mu] si nga tjimbidzile ku lebeleka.”—Jakuba 1:19.