Ha ku na ku shingidzana mu ndobolo, nlume ne nkadzi ba nonga madraivara e flamachina a na nkumbulo u ngompela. Nenguba ku nga be ne mathatha, nngwe ne nngwe mu ndobolo u no alakana ne zila ye kuti “iswi” mu na kuti “imi.”

NLAYONTEWO WE BAIBILI: “Ndizo a ba tji babili, ba tji be mbili u nng’ompela.”—Matewu 19:6.

“Ndobolo ha te chithu che nthu u ngompela. Nlume ne nkadzi ba ka fanila shingidzana ku i dwilidza.”—Christopher.

Ha ku be ne ku sa wanana, nlume ne nkadzi ba singa shingidzane ba no gwisana mu na kuti ba gwisane ne buthatha. Zwithu zwi si zwa chingwe zwi nga shanduka ku be zwithu zwi kulukulu.

“Ku shingidzana ndiwo nti we ndobolo. Imi ne nlume wangu ha ta be ti singa shingidzane, to be ti li bathu ba no gala bose mu ngumba mu na ku be bathu ba ka lobolana—ti li bathu babili ba gele bose ngono ba si chithu chi ngompela ha ku zha mu khani ye ku tola thambo wuluwulu.”—Alexandra.

ZWITHATHUBE

• Apa ndo linga mari a ndi no hola ndi ti

  “nde angu ndoga”?

• Ku zwinyatutusa ne zila ya ka pelela, apa ko sheteka kuti ndi be ndi sina nkhwinya wangu we ndobolo?

• Apa ndo zwi sedzedza kulekule ne makamu e nkhwinya wangu we ndobolo, nenguba iye a ka batana nabo?

LEBESANA NE NKHWINYA UWO WE NDOBOLO

• I zila dzipi dza ka lulwama dza ti no shingidzana nadzo mu ndobolo yedu?

• Ndi ngayi pa ti nga tambunudza zwithu?

• Ti nga tola thambo dzipi ku shingidzana zwibuyanana?

GUMBULUDZO

• A titi u no zana bola ye tennis ne nkhwinya uwo we ndobolo ma ka lingisana. Mu bumo gwa ichecho, ini cha u nga thama kuti u be mu litabi gu ngompela naye mu zana mose?

• Mu na kuti u ti, ‘Ndi nga kunda chini?’ u ngati ‘Ti nga kunda chini?’

“U si tongo linga kuti ndiyani u phoso kene ndiyani wa ka lulwama. Ikoko ha ku to pinda ku be ne mbakiso ne ku wanana mu ndobolo iyo.”—Ethan.

NLAYONTEWO WE BAIBILI: “Nga a si linge zwino nshathisa koga, koga nga a linge ne zwino shathisa bamwe.”—Bafilipi 2:3, 4.