Nda ka zwaligwa ku Acul, toropo i kulekule ku western highlands dze Guatemala. Nsha wangu u ungwe we bathu be Ixil, be ludzi gu no dwa mu lutshinga gwe Maya. Pezhugwi kwe ku leba lulimi gwe Spanish, nda ka kula ndi leba lulimi gwe bathu ba kanyi kwedu. Nda ka chila makole angu e kutanga e buchillo pakati kwe nghwa ya ka bipa ye bathu be Guatemala, ya ka tola makole malefulefu a li 36. Mu chibaka ichecho bathu be Ixil banjinji ba ka fa.

Ha ndi na makole a li 4, nkulu wangu we chilume u na makole a li 7, wa ka be e zana ne bomo ye grenade i no posiwa ne luboko, ngono i ka phutuka ne phoso. Ku phutuka kwayo kwa ka thama kuti ndi be bofu; chi no gwadza, nkulu wangu wa ka fa. Shule kwa ikoko, nda ka no kulila ku ikwele che bana ba singa bone ku toropo wulu ye Guatemala, kwa nda ka zwidiya ku bala ne maboko. Ha ndi li ikweno, bashingi ba ka be be ndi dzibisa kuti ndi si tongo lebeleka ne bana bangwe ne mabaka a nda ka be ndi si nga hwisise ne buzhalo, bashingi ba ka be be ndi dzibila ku lebeleka ne bangwe bana be ikwele ngono bana ibabo ba ka be ba singa shake shangana nami. Nda ka be ndi gala ndi li ndoga koga ngono ndi yemula kuti zwikwele zwi zhaligwe ndi yende ku na mme, ba ka be be ndi bata ne buthu ne mahwilangoni. Chino hwisa zogwadza, ba ka fa ndi na makole a li 10. Ku lashikigwa ne nthu wa ka be ili iye koga u no ndi da, kwa ka ndi hwisa zogwadza kwazo.

Nda kati ndi na makole a li 11, ha gwilila kanyi ha be ndi no gala ne ngwana wa tate ne be nsha uwe. Ba ka be be ndi batsha ne zwa ndi no sheta, ngono kwa ka be ku sina u no ndi hwilangoni. Mu zwibaka zwingwe, nda ka be ndi lilila Ndzimu nditi: “Ini mme ba ka fa? Ini nda ka be bofu?” Bathu ba ka be be ndi dwa be ti kose ikoku wu da kwe Ndzimu. Nda ka pelela ndi ti Ndzimu ha a na mahwilangoni kakale ha a to thama zwithu ne ndulamo. Nda ka kongwa ku zwibulaya koga ne kuti nda ka be ndi singa khone.

Ku be nda ka be ndi li bofu kwa ka thama kuti ku be ku lelu ku hwisiwa zogwadza. Mu buchechana gwangu, nda ka shingisiwa ne zila i sa ka lulwama mu na zwe ndalo. Ngono ha kuna wa nda ka tongo budza​—nda ka be ndi kumbula kuti ha kuna u nga ndi teedza. Bathu ba ka be ba singa shake lebeleka nami, ndizo kwa ka be ku sina wa ndi nga lebeleka naye. Nda ka be ndi cha bathu kakale nda ka tshambilidzigwa mu mazwiwo, ngono ku sina wa ndi no themba.

Mu buchechana gwangu, nlume ne nkadzi uwe be Bafakazi ba Jehova ba ka lebeleka nami mu chibaka che break. Nngwe we matichara edu, wa ka be a na mahwilangoni mu ndili, wa ka ba kumbila kuti ba zhe ku ndili. Ba ka ndi budza ne kwe thembiso ye Baibili ye kuti bafi ba nowo musiwa ne mapofu a nowo bona kakale. (Izaya 35:5; Johani 5:28, 29), nda ka shathila cha ba ka ndi diya, ngono kwa ka be kwa ka ndi simila ku lebeleka nabo, ne kuti nda ka be ndi sa ka jwayela lebeleka ne bathu. Ne kwa jalo, nenguba nda ka be ndi cha bathu, ba ka ndi lakidza buthu ne ku dwilila be zha ku ndili ku ndi diya Baibili. Ba ka be be yenda chilizanyo chi no pinda 10 km ne makumbo mu zila i no pinda mu matombo kuti ba swike kwa ndi no gala.

Ngwana wa tate wa kati i bathu ba no mbala zwibuyanana ngono ba sina chingwe chi ngapo. Ne kwa ka jalo, ba ka be be ndi lakidza ludo, ngono be ndi pa zwipo. Nda ka bona kuti Bakirisiti be malebeswa koga ndibo ba nga thama be jalo.

Nda ka zwidiya Baibili ndi shingisa buka dze Braille (nkwalo we bathu ba singa bone). Nenguba nda ka be ndi hwisisa cha ndi no zwidiya, mu moyo wangu nda ka be nda ka simigwa ne ku duma zwithu zwingwe. Ha ndi lakidzila, nda ka be nda ka simigwa ku duma dumbu kuti Ndzimu u no ndi da ne kuti u nga shingisa bathu ku ndi lakidza ludo gugwe. Nda ka bona kuti ini Jehova a ka lechedzela kuti bathu ba thame zwithu zwa ka bipa, ngono nda ka be nda ka simigwa ku nlinga se Tate ba na ludo. *

Mu ku yenda kwe chibaka, cha nda ka zwidiya mu Hwalo cha ka ndi batsha ku linga zwithu zwibuyanana. Ha ndi lakidzila, nda ka zwidiya kuti Ndzimu u na mahwilangoni makulu mu na ba no dziyidzika. Ha ku zha mu bathu babe ba ka be be dziyidziwa, Ndzimu wa kati: “Ndabona kudziyila kwe bathu bangu . . . ndakahwa tjililo tjabo mu kudyiyidziwa kwabo.” (Ekezodo 3:7) Nda ka ti ndi bona buthu gwa Jehova gwa ka naka kwazo, nda ka tola thambo ye kuti ndi be nlanda uwe. Ne 1998, nda ka dubikiwa ku be Nfakazi wa Jehova.

Gole shule kwe ku dubikiwa, nda ka nginilila ikwele che bathu ba singa bone pejo ne toropo ye Escuintla. Nkugwana mu gubungano lingwe wa ka hwa ne kwe mathatha a nda ka be ndi lingisana nawo ha ku zha mu ku yenda ku zwidiyo zwe gubungano. Gubungano la ndi nga be nditi la ka be li li pejo nami la ka be li li shule kwe matombo a ka be e tathigwa ne Bafakazi ba ka be be zha kuwo zwidiya Baibili nami, ngono kwa ka be kwa ka ndi simila kuti ndi nga swika ko. Nkugwana iwoyo wa ka lebeleka ne be nsha nngwe we Bafakazi ba no gala mu Escuintla ba ka be beti ba nga gala nami kuti ndi khone ku yenda ku zwidiyo zwe gubungano. Ngwenu, ba no ndi thokomela se ngwana wabo.

Ndi nga leba ku li kunjinji ne kwe ludo gwe malebeswa gwa nda ka lakidziwa ne ba mu gubungano. Zose izwezwi, zo ndi lakidza kuti se nngwe we Bafakazi ba Jehova, ndi mu gubungano le Bakirisiti be malebeswa.​—Johani 13:34, 35.

Ha ndi cha zwilinga ndi si nthu wa chingwe u sina thembo. Ngwenu buchilo gwangu gu na mazwimisilo a zhele. Ku be ndi li nreri we chibaka chi zhele we Bafakazi ba Jehova u na gobe mu ku diya Baibili, ndo lingisa nkumbulo wangu mu ku diya bathu malebeswa e Baibili e mamo a pezhugwi pana mu ku lingisa nkumbulo mu bulema gwangu. Kakale, ndi na gobe le ku shingila ndi li nkugwana mu gubungano ndi pa ndebo dze Baibili. Kakale nda ka be ne gobe le ku pa ndebo dze Baibili mu nshangano we ntuthu wa ka be u na bathu ba njinji.

Ne 2010, Nda ka pedza zwidiyo ku ikwele che Ministerial Training School (chi no dangwa ngwenu kuyi School for Kingdom Evangelizers) ku El Salvador. Ikwele ichechi cha ka ndi baakanyila ku shinga nshingo wangu we gubungano zwibuyanana. Cha ka thama kuti ndi zwihwe ndi diwa ne ku amuchigwa na Jehova Ndzimu kwazo, u no thama kuti nngwe ne nngwe a fanile nshingo uwe.

Jesu wa kati: “Kupa kwakakombolegwa pana kupiwa.” (Mishingo 20:35) Ngwenu, ndi nga leba ne malebeswa ndi ti nda ka shatha dumbu, nenguba nda ka be ndi tola kuti ha ku nga khoneke, ngwenu ndo bona kuti ndi nga batsha bangwe.