Ézudu 22:1-31
22 “Si un ómi furta un boi ô un ovelha i el mata-l ô el bende-l, el ten ki da dónu sinku boi pa kel boi i kuatu ovelha pa kel ovelha.
2 (“Si un ladron pegadu ta entra na un kaza i el dadu pankada i el móre, ken ki mata-l ka ta ten kulpa di sangi.
3 Má si kel-li kontise dipôs ki manxe, ken ki mata-l ta ten kulpa di sangi.)
“Kel ladron debe konpensa kel algen. Si el ka ten nada, el debe bendedu pa el paga kes kuza ki el furta.
4 Si el furta un animal i el atxadu ku el bibu, ka ta inporta si é un boi, un buru ô un ovelha, el ten ki da kel algen ki el furta dôs animal.
5 “Si un algen leba se animal pa ba kume na un txon ô na un plantason di uva i el dexa pa es kume na txon di otu algen, el ten ki da kel algen kel midjór di se txon ô kel midjór di se plantason di uva.
6 “Si un algen poi lumi i kel lumi kema kes pé di spinhu, i dipôs el spadja pa kanpu di un otu algen i el kema se plantason di serial ô kel txon interu, kel algen ki faze kel-la debe paga pa kes kuza ki kema.
7 “Si un ómi da se prósimu dinheru ô kalker otu kuza pa el guarda i kes kuza furtadu na se kaza, si kel ladron atxadu, el debe konpensa kel algen dôs bês más.
8 Si kel ladron ka atxadu, dónu di kaza debe lebadu dianti di Deus verdaderu, asi pa disididu si el ka fika ku kes kuza di se prósimu.
9 Sénpri ki un algen akuzadu di fika ku un kuza ki é ka di sel, pode ser un boi, un buru, un ovelha, un ropa ô kalker otu kuza ki perde i ki algen fla: ‘Kel-li é di meu!’, es tudu dôs ta aprizenta ses asuntu dianti di Deus verdaderu. Kel algen ki Deus fla ma é kulpadu ten ki konpensa se prósimu dôs bês más.
10 “Si un ómi pidi se prósimu pa toma kónta di un buru, un boi, un ovelha ô kalker otu animal doméstiku i kel animal móre, fika manku ô el panhadu i ningen ka odja,
11 kel ómi ki staba ta toma kónta di kel animal debe jura dianti di Jeová ma el ka fika ku kes kuza di se prósimu. Kel dónu debe seta kel juramentu. I kel otu ómi ka ten ki konpensa-l.
12 Má si kel animal ki kel ómi staba ta toma kónta furtadu,* el ten ki paga kel dónu.
13 Si un animal brabu dispadasa* un animal, kel animal ten ki lebadu pa sirbi di próva. Ka ten ki dadu nada pa un kuza ki un animal brabu dispadasa.
14 “Má si un algen pidi se prósimu pa inprista-l un animal i kel animal fika manku ô el móre kantu se dónu ka staba la, kel ómi ki pidi pa kel otu inprista-l, debe konpensa-l.
15 Si kel dónu staba la, kel ómi ka ten ki da ninhun konpensason. Si kel animal lugadu, kel présu ki el luga ta sirbi di konpensason.
16 “Si un ómi ingana un vírjen ki ka sta noiva i el ten relason seksual ku el, el debe paga kel présu di noiva pa el pode bira se mudjer.
17 Si se pai nega da-l el, kel ómi ten ki paga valor di akordu ku présu di noiva.
18 “Bu ka debe dexa un fitisera fika bibu.
19 “Tudu ken ki ten relason seksual ku un animal, di serteza debe matadu.
20 “Ken ki faze sakrifisiu pa kalker otu deus, envês di sô pa Jeová, ten ki matadu.
21 “Bu ka debe maltrata un stranjeru ki ta mora na nhos meiu, pamodi nhos éra stranjeru na téra di Ijitu.
22 “Nhos ka debe maltrata ninhun viúva ô mininu ki ka ten pai.*
23 Si bu maltrata-s di algun manera, i es txoma-m ta txora, di serteza N ta obi ses pididu di ajuda.
24 Nha raiba ta labanta kóntra nhos i N ta mata nhos ku spada. Nhos mudjer ta fika viúva i nhos fidju ta fika sen pai.
25 “Si bu inprista dinheru pa algun póbri di nha povu, algen ki ta vive ku bo, bu ka debe pensa na ganha algun kuza ku kel-la. Bu ka debe kobra-l juru.
26 “Si bu fika ku ropa di bu prósimu pa sirbi di garantia di un inpréstimu, bu ten ki divolve-l ti óras ki sol ta kanba.
27 Pamodi é sô kel ropa ki el ten, pa el kubri se korpu.* Kuzê ki el ta uza pa el durmi? Óras ki el pidi-m ajuda, di serteza N ta obi-l, pamodi N ten konpaxon.
28 “Bu ka debe maldísua* Deus nen maldísua un xéfi* di bu povu.
29 “Bu ka debe ten medu di da un párti di bu kodjéta, di bu vinhu i di bu azeti ki da txeu. Bu ten ki da-m bu primeru fidju.
30 É kel-li ki bu debe faze ku bu boi i ku bu ovelha: kel animal debe fika 7 dia ku se mai. Má na oitavu dia, bu ta da-m el.
31 “Nhos debe mostra ma anhos é un povu santu pa mi. Nhos ka debe kume karni ki un animal brabu dispadasa na kanpu. Nhos debe da katxor el.
Nótas di rodapé
^ Talvês el ka kuida di kel animal dretu ô el podia ivitaba kel situason.
^ Ô: “satadja”.
^ Ô: “órfon”.
^ Na ebraiku ta fla: “péli”.
^ Ô: “ofende”.
^ Ô: “governanti”.
