Primera di Juan 2:1-29
2 Nhas fidju, N sta skrebe nhos kes kuza li pa nhos ka faze pekadu. Má si un algen faze un pekadu, nu ten un algen djuntu ku nos Pai ki ta djuda-nu,* un algen justu, ki é Jizus Kristu.
2 El é un sakrifisiu pa nu faze pas ku Deus pamodi nos pekadu,* ka sô pa nos pekadu, má tanbê pa kes di mundu interu.
3 I através di kel-li nu ta sabe ma nu konxe-l: si nu kontinua ta obi ku se mandamentus.
4 Ken ki ta fla: “N konxe-l”, i simé el ka ta obi ku se mandamentus, el é un mintirozu i verdadi ka sta na el.
5 Má si algen ta obi ku se palavra, ta fika klaru ma el ta ama Deus di verdadi. Através di kel-li nu ta sabe ma nu sta unidu ku el.
6 Ken ki ta fla ma el ta kontinua unidu ku el, el ten obrigason di kontinua ta anda sima el anda.
7 Nhas irmon ki N krê txeu, N ka sta skrebe nhos un mandamentu novu, má un mandamentu antigu ki nhos tene désdi komésu. Es mandamentu antigu é kel palavra ki nhos obi.
8 Má, N sta skrebe nhos un mandamentu novu, ki é verdadi na se kazu i na nhos kazu, pamodi sukuru sta ta dizaparse i lus di verdadi dja sta ta límia.
9 Ken ki ta fla ma el sta na lus i simé el ta ôdia se irmon, inda el sta na sukuru.
10 Ken ki ta ama se irmon ta kontinua na lus, i na el ka ten nada ki ta pô-l ta tropesa.
11 Má ken ki ta ôdia se irmon sta na sukuru i el sta anda na sukuru i el ka sabe pa undi ki el sta bai, pamodi sukuru dja sega-l odju.
12 N sta skrebe pa nhos ki é fidju, dja ki nhos pekadu dja purduadu pamodi se nómi.
13 N sta skrebe pa nhos ki é pai, pamodi nhos konxe kel ki izisti désdi komésu. N sta skrebe pa nhos ki é jóven, pamodi nhos vense kel Malvadu. N sta skrebe pa nhos ki é fidju, pamodi nhos konxe nos Pai.
14 N sta skrebe pa nhos ki é pai, pamodi nhos konxe kel ki izisti désdi komésu. N sta skrebe pa nhos ki é jóven, pamodi nhos é fórti i palavra di Deus ta kontinua na nhos i nhos vense kel Malvadu.
15 Ka nhos ama mundu nen kes kuza di mundu. Si algen ta ama mundu, amor di nos Pai ka sta na el.
16 Pamodi tudu kuza ki ten na mundu, dizeju di karni, dizeju di odju i izibi* kes kuza ki nu ten, ka ta ben di nos Pai, má el ta ben di mundu.
17 Alén di kel-li, mundu sta ta pasa i se dizeju tanbê, má ken ki ta faze vontadi di Deus ta vive* pa tudu ténpu.
18 Nhas fidju, kel-li é últimu óra, i sima nhos obi ma kel antikristu* sta ben, mésmu gósi dja parse txeu antikristu. Pur isu nu sabe ma kel-li é últimu óra.
19 Es sai di nos meiu, má es ka éra di nos, pamodi si es éra di nos, es ta kontinuaba ku nos. Má es sai pa mostra ma es ka éra di nos.
20 I kel ki é santu skodje nhos, i nhos tudu ten konhisimentu.
21 N sta skrebe nhos, ka pamodi nhos ka konxe verdadi, má pamodi nhos konxe-l i pamodi ninhun mintira ka ta ben di verdadi.
22 Ken ki é mintirozu? É ka kel ki ta nega ma Jizus é Kristu? Kel-li é antikristu,* kel ki ta nega Pai i Fidju.
23 Tudu kenha ki ta nega Fidju, Pai ka ta fika kontenti ku el. Má kenha ki ta fla ma el ta kridita na Fidju, Pai ta fika kontenti ku el.
24 I nhos, kuzê ki nhos obi désdi komésu debe kontinua na nhos. Si kuzê ki nhos obi désdi komésu kontinua na nhos, tanbê nhos ta kontinua unidu ku Fidju i unidu ku Pai.
25 Tanbê, kel-li é kuzê ki el promete-nu: vida pa tudu ténpu.
26 N sta skrebe nhos kes kuza li sobri kes ki sta ta tenta ingana nhos.
27 I na nhos kazu, Deus skodje nhos ku se puder, i se puder ta kontinua na nhos, i nhos ka meste pa ningen inxina nhos. Má es puder ki ben di el é verdadi, é ka mintira, i el ta inxina nhos tudu kuza. Sima el inxina nhos, nhos kontinua unidu ku el.
28 Pur isu, nhas fidju, nhos kontinua unidu ku el, asi óras ki el parse pa nu pâpia ku kunfiansa i pa nu ka afasta di el ku vergónha duránti se prezénsa.
29 Si nhos sabe ma el é justu, tanbê nhos sabe ma tudu kel ki ta faze justisa nase di el.
Nótas di rodapé
^ Ô: “ki é nos adivogadu”.
^ Ô: “un sakrifisiu ki ta kubri nos pekadu”.
^ Ô: “ingaba di”.
^ Ô: “ta fika”.
^ Ô: “kel ki é kóntra Kristu”.
^ Ô: “kel ki é kóntra Kristu”.
