Primeru livru di Samuel 2:1-36
2 Nton, Ana faze kel orason li:
“Nha korason sta kontenti pamodi Jeová.Jeová ta da-m forsa.*
N ta pâpia kóntra nhas inimigu ku koraji,Pamodi N ta fika kontenti ku kes kuza ki bu ta faze pa salva algen.
2 Ka ten ningen ki é santu sima Jeová,Ka ten ningen sima bo,I ka ten rótxa ki é sima nos Deus.
3 Para di ingaba,Para di pâpia ku orgulhu,Pamodi Jeová é un Deus ki sabe tudu kuza.É sô el ki ta pode fla si kuzas ki un algen ta faze é dretu ô mariadu.
4 El ta kebra arku* di kes ómi fórti,Má el ta da forsa pa kes ki sta fraku.*
5 Kes ki tinha kumida avontádi, bira ta trabadja pa ranja kumida,Má kes ki staba ku fómi, gósi ka ta pasa fómi más.
Kel mudjer ki ka ta pode tinha fidju tevi 7 fidju,Má kel mudjer ki tinha txeu fidju fika sen nada.
6 Jeová ten puder pa tra vida i pa da vida.El ten puder pa poi algen na Sipultura,* i el ten puder pa resusita-l.
7 Jeová ten puder di poi algen ta fika póbri i ta fika riku.El ten puder di rabaxa i di engrandese un algen.
8 El ta labanta kes algen umildi di txon.*El ta labanta kes algen póbri di monti di sinza,*Pa pô-s ta xinta djuntu ku prínsipis,I el ta da-s un lugar inportanti.
É Jeová ki faze kes alisérsi di téra,I el poi mundu riba di es.
9 El ta proteje kes algen ki é lial pa el,Má kes algen mau, el ta kaba ku es i el ta pô-s na un lugar sukuru,Pamodi ómi ka ta vense ku se própi forsa.
10 Jeová ta ben kaba ku kes ki ta luta kóntra el.*El ta ben manda strubada kóntra es la di séu.
Jeová ta ben julga ti kes párti más lonji di téra.El ta ben da puder pa se reiI el ta ben da forsa* pa kel algen ki el skodje.”
11 Nton, Elkana bai pa se kaza na Ramá, má kel mininu fika ta sirbi Jeová dibaxu di orientason di saserdóti Eli.
12 Kes fidju di Eli éra mau, i es ka ta ruspetaba Jeová.
13 Envês di es fikaba kontenti ku kes kuza ki povu ta daba kes saserdóti, es ta fazeba si: óras ki un algen ta ofereseba un sakrifisiu, un ajudanti di saserdóti ta baba ku un garfu di três denti na mô. Timenti karni staba ta kuzinha,
14 el ta meteba kel garfu na panéla di dôs alsa, na kalderon, na panéla di un alsa ô na kalker otu panéla. Kel saserdóti ta fikaba ku tudu karni ki se ajudanti ta panhaba ku garfu. Éra si ki es ta fazeba ku tudu israelita ki ta baba pa Silu.
15 Tanbê, antis di kel ómi ki ba ofereseba sakrifisiu kemaba gordura, ta binha un ajudanti di saserdóti i el ta flaba el: “Da saserdóti karni pa el asa pamodi el ka ta seta karni kuzinhadu, sô kru.”
16 Óras ki kel ómi flaba el: “Dexa-m kema gordura primeru, dipôs bu pode leba kel ki bu krê”, kel ajudanti ta flaba: “Nau, da-m karni gósi li. Si bu ka da-m, N ta toma-l aforsa!”
17 Pur isu, Jeová atxa ma pekadu di kes ajudanti éra gravi dimás, pamodi kes ómi ka ta ruspetaba kes oférta pa Jeová.
18 Má Samuel staba ta sirbi Jeová, enbóra inda el éra mininu. Duránti se trabadju, el ta bistiba un éfodi* di linhu.
19 Tanbê tudu anu, se mai ta fazeba el un ropa spesial sen manga. El ta lebaba Samuel kel ropa, óras ki el ku se maridu, ta ba ofereseba sakrifisiu ki es ta fazeba tudu anu.
20 I Eli abênsua Elkana i se mudjer, i el fla: “Pa Jeová da-u un fidju através di kel mudjer li, asi pa el fika na lugar di kel mininu ki el da Jeová.” Dipôs, es volta pa kaza.
21 Jeová djuda Ana fika grávida i el tevi más três fidju matxu i dôs fidju-fémia. I Samuel kontinua ta kria i ta sirbi* Jeová.
22 Eli dja staba ku txeu idadi, má el obi tudu kuza ki se fidjus staba ta faze ku tudu israelita. Tanbê, el sabia ma es staba ta deta ku kes mudjer ki ta sirbiba na entrada di ténda di runion.
23 El ta kustuma flaba es: “Pamodi ki nhos sta kontinua ta faze kes kuza li? Kes kuza ki N sta ta obi tudu algen ta fla sobri nhos é mariadu.
24 Ka nhos faze kel-li nhas fidju. Kes kuza ki N sta ta obi povu di Jeová ta fla é ka bon.
25 Si un ómi peka kóntra otu ómi, un algen pode pidi Jeová pa djuda-l.* Má si un ómi peka kóntra Jeová, kenha ki pode faze orason pa el?” Má es ka obi ku ses pai, pamodi Jeová dja staba disididu na mata-s.
26 Má Samuel kontinua ta kria i Jeová ku povu ba ta gosta di el kada bês más txeu.
27 Un dia, un ómi di Deus bai na Eli i el fla-l: “É kel-li ki Jeová fla: ‘Pur akazu N ka dexa família di bu pai konxe-m dretu, kantu es éra skravu na Ijitu, na kaza di Faraó?
28 I na meiu di tudu kes tribu di Israel, é bu família ki N skodje pa ser nha saserdóti i pa subi na nha altar pa faze sakrifisiu, pa oferese insénsu* i pa leba un éfodi nha dianti. I N da família di bus gentis grandi tudu kes oférta kemadu ki israelitas* ta faze.
29 Pamodi ki nhos sta ta dispreza* nha sakrifisiu i nha oférta ki N manda pa faze na nha kaza? Pamodi ki bu sta kontinua ta onra bus fidju más di ki mi? I pamodi ki nhos sta ta ingorda ku kes midjór párti di tudu oférta ki nha povu Israel sta faze?
30 “‘Pur isu, é si ki Jeová, kel Deus di Israel fla: “É verdadi ki N flaba ma bu família i família di bus gentis grandi sénpri ta sirbiba mi.” Má gósi, Jeová fla: “Kel-li ka ta ben kontise más, pamodi N ta onra kes ki ta onra-m, má N ta dispreza kes ki ta dispreza-m.”
31 Obi li! Ta ben txiga kel dia ki N ta ben kaba ku bu forsa i ku forsa* di família di bu pai, asi tudu ómi di bu kaza ta móre antis di es bira bédju.
32 N sta ben faze txeu kuza dretu pa nha povu Israel, má abo bu ta ben ten un inimigu na nha kaza. I nunka más ka ta ben ten un ómi di idadi na bu família.
33 N ta dexa un ómi di bu família ta sirbi na nha altar, má el ta poi bu odju ta fadja i el ta traze-u txeu sufrimentu. Má maioria di kes algen di bu família ta ben matadu ku spada.
34 I kuzê ki ta ben kontise ku bu dôs fidju, Ofni i Fineias, ta sirbi-u di sinal: es tudu dôs ta móre na mésmu dia.
35 Dipôs, N ta ben skodje un saserdóti fiel pa sirbi-m. El ta ben faze tudu kel ki nha korason krê,* i se família ta ben ser nha saserdóti pa tudu ténpu. I sénpri el ta ben ser saserdóti pa kel algen ki N skodje.
36 Kalker algen di bu família ki kontinua bibu, ta ben i ta inbaxa se dianti pa pidi-l dinheru i kumida, i el ta fla: “Favor, dexa-m ser saserdóti, asi pa N pode ten algun kuza pa N kume.”’”
Nótas di rodapé
^ Na ebraiku ta fla: “Jeová engrandese nha txifri ”. Djobe Disionáriu di Bíblia.
^ Djobe Disionáriu di Bíblia.
^ Ô: “ki sta ta tropesa”.
^ Ô: “Seol”. Kel-li krê fla sipultura ki ta podu tudu algen. Djobe Disionáriu di Bíblia.
^ Na ebraiku ta fla: “téra”.
^ Ô talvês: “lugar di poi lixu”.
^ Na ebraiku ta fla: “txifri”. Djobe Disionáriu di Bíblia.
^ Ô talvês: “Kes ki ta luta kóntra Jeová ta fika dizorientadu”.
^ Djobe Disionáriu di Bíblia.
^ Ô: “Samuel ba ta kria dianti di”.
^ Ô talvês: “Deus ta bira se árbitru”.
^ Ô talvês: “poi fumu di sakrifisiu ta subi”.
^ Na ebraiku ta fla: “fidjus di Israel”.
^ Na ebraiku ta fla: “xuta”.
^ Na ebraiku ta fla: “N ta korta bu brasu i brasu di”.
^ Ô: “kuzê ki sta na nha korason i na nha alma”.
