Sugunda Koríntius 2:1-17
2 Pamodi dja N disidi ma otu bês ki N ba vizita nhos ka ta ser ku tristéza.
2 Pamodi si N poi nhos ta fika tristi, kenha ki ta anima-m si é ka nhos ki N poi ta fika tristi?
3 N skrebe kel ki N skrebe, asi pa óras ki N bai la, pa N ka fika tristi pamodi kes ki debe poba mi ta fika kontenti. Pamodi N ten serteza ma kel ki ta pô-m ta fika kontenti, ta poi nhos tudu ta fika kontenti tanbê.
4 Pamodi ku txeu sufrimentu i tristéza di korason, N skrebe nhos ku txeu lágua, ka pa nhos fika tristi, má pa nhos sabe di kel grandi amor ki N ten pa nhos.
5 Si algen traze tristéza, el ka traze tristéza sô pa mi, má ti sértu pontu pa nhos tudu, pa N ka ser duru dimás na kel ki N sta fla.
6 Kel disiplina ki maioria di nhos dja da es ómi dja txiga-l.
7 Gósi nhos debe purdua-l ku bondadi i konsola-l, pa tristéza dimás ka kaba ku el.*
8 Pur isu, N ta konsedja* nhos pa nhos prova ma nhos ta ama-l.
9 Tanbê é pur isu ki N skrebe nhos, pa N odja si nhos ta prova ma nhos é obidienti na tudu kuza.
10 Si nhos púrdua algen pa algun kuza, ami tanbê N ta purdua-l. Na verdadi, kel ki N púrdua (si é ki N púrdua algun kuza), N faze-l pa nhos ben, dianti di Kristu,
11 asi pa Satanás ka ingana-nu,* pamodi nu konxe se intenson.*
12 Kantu N txiga na Trôadi pa pâpia di kes notísia sábi sobri Kristu, i un pórta abridu pa mi na trabadju di Sinhor,
13 N fika txeu preokupadu pamodi N ka atxa Titu, nha irmon. Nton, N* dispidi di kes irmon di la i N viaja pa Masedónia.
14 Má nu ta agradese Deus, ki sénpri ta gia-nu na un marxa di vitória djuntu ku Kristu! I através di nos trabadju, konhisimentu sobri el, ki é sima un txeru sábi, sta ta spadjadu* pa tudu lugar.
15 Nos ki ta pâpia sobri Kristu, nos é sima un txeru sábi pa Deus, na meiu di kes ki sta na kaminhu di salvason i di kes ki sta na kaminhu di distruison.
16 Pa kes últimu, un txeru di mórti ki ta leba pa mórti. Pa kes primeru, un txeru di vida ki ta leba pa vida. I kenha ki sta kualifikadu pa kes kuza li?
17 Nos nu sta, pamodi nu ka ta anda ta bende palavra di Deus sima txeu algen ta faze, má Deus manda-nu pa nu pâpia ku tudu sinseridadi, dianti di Deus i djuntu ku Kristu.
Nótas di rodapé
^ Ô: “ka inguli-l”.
^ Ô: “insentiva”.
^ Ô: “pruveta”.
^ Ô: “planu; obijetivu”.
^ Na gregu ta fla: “nha spritu”.
^ Ô: “xintidu”.
