Sugunda Koríntius 4:1-18
4 Dja ki nu ten kel trabadju sagradu li pamodi kel mizerikórdia ki nu mostradu, nu ka ta dizisti.
2 Má, nu ka ta seta kes kuza ki ta da vergónha ki ta fazedu sukundidu, i nu ka ta ingana nen distorse palavra di Deus. Má óras ki nu ta inxina pesoas verdadi, nu ta bira un bon izénplu pa tudu algen* dianti di Deus.
3 Si na verdadi kes notísia sábi ki nu ta prega sta sukundidu ku un véu, es sta sukundidu pa kes ki sta na kaminhu di distruison,*
4 pa kes ki é ka krenti, kes ki deus di kel mundu li dja sega ses menti pa lus di kes notísia sábi xeiu di glória sobri Kristu, ki é imajen di Deus, ka brilha riba di es.
5 Pamodi nu ka sta prega sobri nos mê, má nu sta prega ma Jizus Kristu é Sinhor i ma nos é nhos skravu pamodi Jizus.
6 Pamodi Deus é kel ki fla: “Pa lus brilha di sukuru”, i Deus sta ta límia nos korason ku kel konhisimentu xeiu di glória sobri el, através di róstu di Kristu.
7 Má, nu tene es tizoru na vazus di baru, asi pa kel puder alén di normal ka ser di nos, má di Deus.
8 Nu ta presionadu di tudu manera, má nu ka ta fika pertadu sen pode mexe. Nu ta fika konfuzu, má nu ka ta fika sen ninhun saída.*
9 Nu ta pirsigidu, má nu ka ta bandonadu. Nu ta dadu na txon, má es ka ta kaba ku nos.
10 Sénpri nu ta aguenta na nos korpu kel tratamentu duru ki Jizus sufri, asi pa nu pode ten un vida sima di Jizus.*
11 Pamodi nos ki sta bibu sénpri nu ta infrenta mórti kara-kara pamodi Jizus, kel-li ta mostra pesoas ma nu ta sufri sima Jizus sufri.
12 Nton prigu di mórti é pa nos, má vida é pa nhos.
13 Dja ki nu ten kel mésmu fé* sobri kel ki sta skrebedu: “N tevi fé, pur isu N pâpia”, nos tanbê nu ten fé i pur isu nu ta pâpia,
14 pamodi nu sabe ma Kel ki resusita* Jizus tanbê ta ben resusita-nu* pa nu sta djuntu ku Jizus i el ta aprizenta-nu djuntu ku nhos.
15 Pamodi tudu kes kuza li kontise pa nhos ben, asi pa mutu más algen pode resebe kel grandi bondadi di Deus, pamodi kada bês más algen sta ta agradese Deus i di kel manera li es sta ta da-l glória.
16 Pur isu, nu ka ta dizisti. Sikrê kel ómi ki nos é pa fóra sta ta kaba, di serteza kel ómi ki nos é di pa déntu, sta ta bira novu kada dia.
17 Enbóra sufrimentu é lébi i é pa poku ténpu, kel sufrimentu* ta pô-nu ta resebe un glória ki ta ba ta bira kada bês más grandi i el é pa tudu ténpu,
18 timenti nu ta konsentra nos odju ka na kes kuza ki nu ta odja, má na kes kuza ki nu ka ta odja. Pamodi kes kuza ki nu ta odja é pa poku ténpu, má kes kuza ki nu ka ta odja é pa tudu ténpu.
Nótas di rodapé
^ Na gregu ta fla: “pa konsénsia di tudu algen”.
^ Ô: “ki sta ta móre”.
^ Ô talvês: “nu ka ta fika dizusperadu”.
^ Na gregu ta fla: “asi pa vida di Jizus mostradu tanbê na nos korpu”.
^ Na gregu ta fla: “spritu di fé”.
^ Na gregu ta fla: “labanta”.
^ Na gregu ta fla: “labanta-nu”.
^ Ô: “provason”.
