Sugundu livru di Reis 9:1-37
9 Nton, proféta Elizeu txoma un di kes fidju di proféta i el fla-l: “Prende bu ropa na sintura, leba es frasku di óliu i bai faxi pa Ramote-Jiliade.
2 Óras ki bu txiga la, djobe Jeú, fidju di Jeozafá, nétu di Ninsi. El ta sta djuntu ku kes otu xéfi di trópa. Bu ta pidi-l pa el labanta i bu ta bai djuntu ku el pa un kuartu más izoladu di kaza.
3 Dipôs, bu ta panha kel frasku di óliu, bu ta baza-l riba di se kabésa i bu ta fla-l: ‘É kel-li ki Jeová fla: “N sta skodje-u pa bu ser rei di Israel.”’ Dipôs, abri pórta i fuji faxi.”
4 Nton, kel ajudanti di proféta bai pa Ramote-Jiliade.
5 Kantu el txiga, kes xéfi di trópa staba xintadu la. El fla: “Xéfi, N tene un mensajen pa nho.” Jeú pergunta-l: “Pa kal di nos?” El responde: “Xéfi, é pa nho.”
6 Nton, Jeú labanta i el entra na kaza. Kel ajudanti baza óliu riba di se kabésa i el fla-l: “É kel-li ki Jeová, Deus di Israel, fla: ‘N sta skodje-u pa bu ser rei di Israel, ki é povu di Jeová.
7 Bu debe mata família di bu sinhor, Akabi, i N ta vinga sangi di nhas sérvu, kes proféta, i di tudu kes sérvu di Jeová ki Jizabel mata.
8 Tudu família di Akabi ta ben móre. N ta ben kaba ku tudu ómi di família di Akabi na Israel, ti mésmu ku kes ki ka ten ningen pa djuda-s i kes fraku.
9 N ta ben faze ku família di Akabi mésmu kuza ki N faze ku família di Jerubuon, fidju di Nebate, i ku família di Baaza, fidju di Aías.
10 I Jizabel, katxor ta ben kume-l na txon di Jesriel i ningen ka ta intera-l.’” Dipôs, el abri pórta i el fuji.
11 Kantu Jeú sai di kaza, kes otu xéfi di trópa di rei pergunta-l: “Sta tudu dretu? Pamodi ki kel dodu la ben pâpia ku bo?” El responde-s: “Nhos konxe kes tipu di algen la i modi ki é ses konbérsu.”
12 Má es fla-l: “Kel-li é ka verdadi! Fla-nu, favor.” Nton, Jeú fla-s kuzê ki kel fidju di proféta fla-l, i dipôs Jeú fla-s: “Tanbê kel fidju di proféta fla: ‘É kel-li ki Jeová fla: “N skodje-u pa bu ser rei di Israel.”’”
13 Nton kel óra, kada un di es panha ses ropa i es stende-s na skada pa Jeú anda riba di es. Es toka buzina i es fla: “Jeú dja bira rei!”
14 Dipôs Jeú, fidju di Jeozafá, nétu di Ninsi, faze un planu kóntra Jeoron.
Jeoron bai pa Ramote-Jiliade djuntu ku tudu trópas di Israel pa ba difende Israel kóntra ataki di Azael, rei di Síria.
15 Más tardi, Jeoron volta pa Jesriel pa faze tratamentu, pamodi kes síriu da-l pankada kantu el staba ta luta kóntra Azael, rei di Síria.
Nton Jeú fla: “Si nhos ta konkorda, ka nhos dexa ningen sai di sidadi pa ba konta kel-li na Jesriel.”
16 Dipôs, Jeú subi na se karu di géra i el bai pa Jesriel, dja ki Jeoron staba la na se kama pamodi kes pankada. I Akazias, rei di Judá, ba djobe-l.
17 Kantu kel guarda ki staba na tori, na Jesriel, odja txeu trópa di Jeú ta txiga pértu, kel óra el fla: “N sta odja un monti trópa.” Jeoron fla-l: “Txoma un trópa ki ta monta kabalu i fla-l pa el ba inkontra ku es i pa el pergunta-s: ‘Nhos ben na pas?’”
18 Nton, un trópa ki ta montaba kabalu ba inkontra ku es i el fla-s: “É kel-li ki rei purgunta: ‘Nhos ben na pas?’” Má Jeú responde-l: “Pamodi ki bu sta ta pâpia di ‘pas’? Fika nha tras i sigi-m!”
Nton kel guarda fla: “Kel mensajeru bai ti txiga na es, má el ka volta.”
19 Nton, rei manda un otu trópa ki ta montaba kabalu i kantu el txiga pértu di es, el fla-s: “É kel-li ki rei fla: ‘Nhos ben na pas?’” Má Jeú responde: “Pamodi ki bu sta ta pâpia di ‘pas’? Fika nha tras i sigi-m!”
20 I kel guarda fla: “Kel mensajeru txiga na es, má el ka volta. Pa manera ki kel kondutor sta ta konduzi se karu di géra, el debe ser Jeú, nétu* di Ninsi, pamodi el ta konduzi sima un algen dodu.”
21 Jeoron fla: “Nhos pripara nha karu di géra!” Nton, es pripara se karu di géra i Jeoron, rei di Israel, i Akazias, rei di Judá, sai kada un di es na ses karu di géra pa ba inkontra ku Jeú. Es inkontra ku el na txon di Nabote, di Jesriel.
22 Lógu ki Jeoron odja Jeú, el pergunta-l: “Jeú, bu ben na pas?” Má el responde: “Modi ki pode ten pas si bu mai, Jizabel, sta kontinua ta faze prostituison i txeu fitisaria?”
23 Kel óra, Jeoron da vólta ku se karu di géra pa el fuji i el fla Akazias: “É un traison, Akazias!”
24 Jeú panha se arku* i el da ku un flexa ki mete Jeoron na kósta. Kel flexa entra-l na korason i Jeoron kai déntu di se karu di géra.
25 Dipôs, Jeú fla Bidkar, se ajudanti: “Pega-l i bota-l na txon di Nabote, kel jesrielita. Lenbra ma éra mi ku bo ki staba djuntu* ta konduzi karu di géra tras di Akabi, se pai, kantu Jeová fla kel mensajen li kóntra el:
26 ‘Jeová fla: “N ta jura ma sima N odja sangi di Nabote i sangi di ses fidju onti, N ta ben pô-u ta paga pa kes krimi li mê, na es padás di txon.”’ Pur isu, pega-l i bota-l na kel txon, sima Jeová fla.”
27 Kantu Akazias, rei di Judá, odja kuzê ki staba ta kontise, el fuji pa kaminhu di kaza di jardin. (Más tardi, Jeú bai se tras i el fla: “Nhos mata-l tanbê!” Nton, es da-l pankada kantu el staba na se karu di géra, na strada ki ta subi pa Gur, pértu di Iblion. Má el kontinua ta fuji pa Mejidu i el móre la.
28 Nton, ses sérvu leba-l na un karu di géra ti Jiruzalen i es intera-l djuntu ku ses gentis grandi na se sipultura, na Sidadi di Davidi.
29 Akazias bira rei di Judá na désimu primeru anu di Jeoron, fidju di Akabi.)
30 Kantu Jeú txiga na Jesriel, Jizabel fika ta sabe di kel-li. Nton, el pinta odju di prétu,* el konpo kabelu, el bai na janéla i el djobe pa baxu.
31 Lógu ki Jeú entra na porton, Jizabel fla-l: “Bu ta lenbra kuzê ki kontise ku Zinri, ki mata se sinhor?”
32 Jeú djobe pa janéla i el fla: “Ken ki sta di nha ladu? Kenha?” Kel óra, dôs ô três funsionáriu di palásiu djobe pa Jeú, ki staba la dibaxu.
33 Jeú fla: “Nhos bota-l pa baxu!” Nton es bota Jizabel pa baxu. Se sangi spadja na paredi i na kes kabalu, i Jeú poi kes kabalu ta pasa riba di el.
34 Dipôs di kel-li Jeú entra, el kume i el bebe. Dipôs el fla: “Favor, nhos panha kel mudjer maldisuada li i nhos intera-l. Afinal, el é fidju-fémia di un rei.”
35 Má, kantu es ba intera-l es atxa sô se kabésa,* ses pé i ses mô.
36 Kantu es volta i es ba konta Jeú kuzê ki kontise, el fla: “Kel-li ta kunpri kuzê ki Jeová fla através di se sérvu Elias, kel tisbita: ‘Na txon di Jesriel, katxor ta kume karni di Jizabel.
37 I na txon di Jesriel, korpu di Jizabel ta ben bira sima strumu riba txon, asi pa ningen ka fla: “Kel-li é Jizabel.”’”
Nótas di rodapé
^ Na ebraiku ta fla: “fidju”.
^ Djobe Disionáriu di Bíblia.
^ Ô: “ladu-ladu”.
^ Ô: “el poi sónbra na odju”.
^ Ô: “krániu; osu di kabésa”.
