Sugundu livru di Samuel 12:1-31
12 Nton, Jeová manda Natan ba pâpia ku Davidi. Kantu el txiga na el, el fla-l: “Na un sidadi tinha dôs ómi, un éra riku i kel otu éra póbri.
2 Kel ómi riku tinha txeu ovelha ku vaka.
3 Má kel ómi póbri tinha sô un ovelha pikinoti, ki el kunpraba. El ta kuidaba di el, i kel ovelha kria djuntu ku el i ku se fidjus. El ta kumeba kel poku kumida ki kel ómi tinha, el ta bebeba na se kópu i el ta durmiba na se brasu. Kel ovelha éra sima un fidju-fémia pa el.
4 Má un dia, kel ómi riku, resebe un algen ki ba vizita-l. El ka krê mataba ninhun di kes ovelha nen vaka ki el tinha pa el priparaba kumida pa kel algen ki ba vizita-l. Nton, el pega kel ovelha pikinoti di kel ómi póbri i el faze kumida ku el, pa da kel algen ki ba vizita-l.”
5 Kantu Davidi obi kel-li, el fika txeu xatiadu ku kel ómi, i el fla Natan: “N ta jura pa Jeová, kel Deus bibu, ma kel ómi ki faze kel-li merese móre!
6 I el debe paga valor di kel ovelha kuatu bês, pamodi el faze kel-li i el ka tevi péna di kel ómi.”
7 Nton, Natan fla Davidi: “Kel ómi li é nho! É kel-li ki Jeová, kel Deus di Israel, fla: ‘É mi própi ki skodje-u pa bu ser rei di Israel, i N libra-u di mô di Saul.
8 N da-u tudu kuza ki éra di Saul, i N poi kes mudjer di bu sinhor na bus brasu. Tanbê N pô-u ta ser rei di Israel i di Judá. I si kes kuza li ka txigaba, N krê fazeba mutu más inda pa bo.
9 Pamodi ki bu dispreza palavra di Jeová i bu faze kuzas ki Jeová ta atxa ma é mariadu? Bu mata Urias, kel itita, ku spada! I dipôs ki bu mata-l ku spada di kes amonita, bu toma se mudjer i bu kaza ku el.
10 Pur isu, spada nunka más ka ta afasta di bu família, pamodi bu dispreza-m kantu bu toma mudjer di Urias, kel itita, i bu kaza ku el.’
11 É kel-li ki Jeová fla: ‘N ta ben poi bu própi família ta traze-u disgrasa. I N ta ben toma bus mudjer dianti di bus odju, i N ta da-s pa otu ómi,* i el ta deta ku es na frenti di tudu algen.
12 Abo bu faze kes kuza li sukundidu, má ami N ta ben faze-l di dia, dianti di tudu Israel.’”
13 Nton, Davidi fla Natan: “N peka kóntra Jeová.” Natan fla Davidi: “Jeová ta púrdua pekadu* di nho. Nho ka ta móre.
14 Má, pamodi nho mostra txeu falta di ruspetu pa Jeová na kel asuntu li, fidju di nho, ki kaba di nase di serteza ta móre.”
15 Dipôs Natan bai pa se kaza.
I Jeová poi kel mininu ki Davidi tevi ku mudjer di Urias, ta fika duenti.
16 Davidi inplora kel Deus verdaderu pa salva kel mininu i el faze un jejun duru. Davidi ta entraba na se kuartu i el ta pasaba noti interu detadu na txon.
17 Kes ansion di se kaza ta fikaba pértu di el i es ta tenta konvenseba el pa el labantaba di txon, má el ta negaba i el ka ta krê kumeba djuntu ku es.
18 Na sétimu dia, kel mininu móre, má kes sérvu di Davidi staba ku medu di fla-l ma mininu dja moreba. Es fika ta fla: “Kantu kel mininu staba bibu nu ta papiaba ku rei, má el ka krê obiba nos. Nton, gósi modi ki nu ta fla-l ma mininu dja móre? El pode faze un kuza gravi.”
19 Kantu Davidi odja se sérvus ta pâpia baxu ku kunpanheru, el da kónta ma mininu dja moreba. Nton, Davidi pergunta se sérvus: “Mininu dja móre?” Es fla-l: “Sin, dja el móre.”
20 Nton, Davidi labanta di txon, el toma banhu, el troka ropa, i el poi óliu purfumadu na korpu. Dipôs el bai pa kaza di Jeová i el inbaxa ku róstu pa txon. Kantu el volta pa se kaza, el pidi pa es leba-l algun kuza pa el kume i el kume.
21 Se sérvus pergunta-l: “Pamodi ki nho sta ta aji di kel manera li? Kantu mininu staba bibu, nho staba ta faze jejun i ta txora, má lógu ki mininu móre, nho labanta i nho kume.”
22 El responde-s: “Timenti mininu staba bibu, N faze jejun i N txora pamodi N ta pensaba: ‘Talvês Jeová ta xinti péna di mi i el ta dexa kel mininu bibu.’
23 Má gósi ki dja el móre, pakê faze jejun? N ka ta pode da-l vida otu bês. Ami N ta ba atxa-l, má el ka ta pode volta pa mi.”
24 Nton, Davidi konsola Batiseba, se mudjer. El deta ku el, i ku ténpu el tevi un fidju matxu, i el podu nómi di Salumon.* Jeová ta amaba el txeu.
25 Dja ki Jeová ta amaba el,* el manda proféta Natan pa fla-s pa es txoma-l di Jedidias.*
26 Joabe kontinua ta luta kóntra Rabá di kes amonita, i el toma kel párti di sidadi undi ki ta fikaba* palásiu di rei.
27 Nton, Joabe manda alguns mensajeru pa ba fla Davidi: “N luta kóntra Rabá i dja N toma sidadi di agu.*
28 Má gósi, djunta tudu kes otu trópa, luta kóntra sidadi i toma-l abo. Sinon, N ta toma-l ami i ta fladu ma é mi ki toma-l.”*
29 Pur isu, Davidi djunta tudu kes trópa i el bai pa Rabá, el luta kóntra el i el toma-l.
30 Nton, Davidi tra koroa di kabésa di Malkan* i es poi Davidi el na kabésa. Kel koroa éra di oru, el ta pezaba 34 kilu* i el tinha pédras di valor na el. Tanbê Davidi leba txeu kuza ki el panha na kel sidadi.
31 Davidi prende kes algen ki staba la i el pô-s ta sera pédra, ta trabadja ku feraméntas di féru moladu i ku matxadu di féru, i ta faze tijolu. El faze kel-li ku tudu kes sidadi di kes amonita. Dipôs, Davidi ku tudu kes trópa volta pa Jiruzalen.
Nótas di rodapé
^ Ô: “pa bu prósimu”.
^ Ô: “ta dexa pekadu di nho pasa”.
^ El ta ben di un palavra na ebraiku ki siginifika “pas”.
^ Ô: “Pamodi Jeová”.
^ Ki krê fla “kel ki Jah ta ama”.
^ Ô: “sidadi di reinu”.
^ Talvês el sta ta pâpia di kes fonti di agu ki tinha na sidadi.
^ Ô: “sidadi ta ben fika ku nha nómi”.
^ Talvês é un imajen ki kes amonita ta adoraba. Na otu lugar tanbê el ta txomadu Moloki ô Milkon.
