Tirsera di Juan 1:1-14
1 Di kel ómi di idadi* pa Gaiu, kel ki N krê txeu i ki N ta ama di verdadi.
2 Nha irmon ki N krê txeu, N ta ora pa tudu kuza kontinua ta kóre dretu ku bo i pa bu ten* bon saúdi, sima bu tene gósi.
3 Pamodi N fika txeu kontenti kantu irmons ben i es fla ma bu sta kontinua fiel na verdadi i ma bu sta kontinua ta anda na verdadi.
4 N ka ten alegria* más grandi ki kel-li: obi ma nhas fidju sta kontinua ta anda na verdadi.
5 Nha irmon ki N krê txeu, bu sta mostra ma bo é fiel na kel ki bu ta faze pa bus irmon, mésmu ki bu ka konxe-s.
6 Es pâpia di bu amor dianti di kongregason. Favor, djuda-s ku kes kuza ki es meste pa ses viajen i faze-l di un manera ki ta agrada Deus.
7 É pamodi nómi di Deus ki es bai, sen resebe nada di kes algen di nason.
8 Pur isu, nu ten obrigason di resebe irmons sima kes-li dretu, asi pa nu pode bira kolaborador na verdadi.
9 N skrebe un kuza pa kongregason, má Diótrifis, ki gosta di ser primeru entri es, ka ta seta nada di nos ku ruspetu.
10 É pur isu ki si N bai la, N ta fla kes kalúnia ki el sta ta spadja sobri nos.* Dja ki el ka sta kontenti ku kel-li, el ta nega resebe kes irmon ku ruspetu, i el ta tenta inpidi i tra di kongregason kes ki ta krê resebe-s.
11 Nha irmon ki N krê txeu, ka bu imita kel ki é mau, má imita kel ki é bon. Ken ki ta faze kel ki é bon ta ben di Deus. Ken ki ta faze kel ki é mau ka odja Deus.
12 Tudu es ta pâpia ben di Dimétriu i ti mésmu verdadi ta konfirma kel-li. Na verdadi, nos tanbê nu ta da tistimunhu di el i abo bu sabe ma kel tistimunhu ki nu ta da é verdadi.
13 N tinha txeu kuza pa N skrebe-u, má N ka krê kontinua ta skrebe-u ku péna i tinta.
14 Má, N ta spera ma ka ta dura N ta odja-u i nu ta pâpia róstu ku róstu.
Pa bu ten pas.
Kes amigu sta manda-u mantenha. Da kada un di kes amigu nha mantenha.
Nótas di rodapé
^ Ô: “ansion”.
^ Ô: “pa bu alma ten”.
^ Ô talvês: “motivu pa agradese”.
^ Na gregu ta fla: “ta tagarela ku palavras ki ta ofende”.
