Jénezis 26:1-35
26 Tevi un fómi na kel téra, alén di kel fómi ki tevi na ténpu di Abraon. Pur isu Izaki bai na Abimeleki, rei di kes filisteu, na Jerar.
2 Nton Jeová parse pa el i el fla-l: “Ka bu dixi pa Ijitu. Mora na téra ki N ta mostra-u.
3 Kontinua ta mora na kel téra li sima stranjeru, i N ta kontinua ku bo i N ta abensua-u, pamodi N ta ben da-u abo i bus disendenti* tudu kes téra li, i N ta kunpri kel juramentu ki N faze Abraon, bu pai:
4 ‘N ta bira bus disendenti txeu sima strélas na séu i N ta da tudu kes téra li pa bus disendenti, i tudu nason di téra ta ben ten un benson pa es através di bus disendenti’,
5 pamodi Abraon obi nha vós i el kontinua ta kunpri kes kuza ki N fla, nhas órdi i nhas lei.”
6 Nton Izaki kontinua ta mora na Jerar.
7 Óras ki kes ómi di kel lugar ta perguntaba el sobri se mudjer, el ta respondeba: “El é nha irman.” El tinha medu di fla-s: “El é nha mudjer”, pamodi el ta pensaba: “Kes ómi di kel lugar li pode mata-m pamodi Rebeka”, pamodi el éra txeu bunita.
8 Dipôs di algun ténpu, Abimeleki, rei di kes filisteu, staba ta djobe pa janéla i el odja Izaki ta brasa Rebeka, se mudjer.
9 Kel óra, Abimeleki txoma Izaki i el fla-l: “Afinal el é bu mudjer! Pamodi ki bu fla-m: ‘El é nha irman’?” Nton Izaki responde-l: “N staba ku medu ma es ta mataba mi pamodi el.”
10 Má Abimeleki kontinua ta fla: “Kel-li é kuzê ki bu faze ku nos? Éra fásil pa un algen di nos povu detaba ku bu mudjer, i bu ta trazeba kulpa riba nos!”
11 Nton Abimeleki da se povu interu kel órdi li: “Ken ki toka na kel ómi li i na se mudjer di serteza ta matadu!”
12 Izaki kumesa ta símia na kel lugar, i na kel anu el panha 100 bês más txeu di ki kel ki el símia, pamodi Jeová staba ta abensua-l.
13 Izaki bira riku i el kontinua ta ten kada bês más kuza ti ki el fika ku txeu rikéza.
14 El ranja txeu ovelha i txeu boi i un grupu grandi di sérvu, i kes filisteu kumesa ta xinti invéja di el.
15 Nton, kes filisteu panha téra i es tapa tudu kes posu ki sérvus di Abraon, se pai, kobaba kantu el staba bibu.
16 Nton, Abimeleki fla Izaki: “Sai di pértu di nos, pamodi dja bu bira mutu más fórti di ki nos.”
17 Pur isu, Izaki muda di la i el arma kanpamentu na vali di Jerar i el fika ta mora la.
18 Izaki torna koba kes posu ki es kobaba na ténpu di Abraon, se pai, má ki kes filisteu tapaba dipôs ki Abraon móre, i el pô-s kes nómi ki se pai poba es.
19 Kantu sérvus di Izaki staba ta koba na kel vali, es atxa un posu ki tinha un nasenti di agu.
20 I kes pastor di Jerar kumesa ta diskuti ku kes pastor di Izaki, ta fla-s: “Es agu é di nos!” Pur isu, Izaki poi kel posu nómi di Ezeki,* pamodi es diskuti ku Izaki.
21 I es kumesa ta koba otu posu, má es kumesa ta diskuti pamodi kel posu la tanbê. Nton el pô-l nómi di Sitna.*
22 Dipôs, el muda pa otu lugar i el koba otu posu, má es ka diskuti pamodi kel posu la. Pur isu el pô-l nómi di Reubote* i el fla: “É pamodi gósi Jeová da-nu lugar avontádi i el pô-nu ta bira txeu na kel téra li.”
23 Di la el subi pa Berseba.
24 Na kel noti Jeová parse pa el i el fla-l: “Ami é Deus di Abraon, bu pai. Ka bu xinti medu, pamodi N sta ku bo. N ta ben abensua-u i N ta poi bus disendenti ta bira txeu pamodi Abraon nha sérvu.”
25 Nton, el faze un altar la i el invoka nómi di Jeová. Izaki arma se ténda la, i se sérvus koba un posu la.
26 Dipôs, Abimeleki sai di Jerar i el bai na el djuntu ku Auzate, se konsedjeru, i Fikol, xéfi di se trópas.
27 Nton Izaki pergunta-s: “Pamodi ki nhos ben djobe-m, dja ki nhos ta odia-m i nhos manda-m pa lonji di nhos?”
28 Nton es responde-l: “Nu odja klaru ma Jeová sta ku bo. Pur isu nu fla: ‘Favor, nu faze un juramentu,* i dexa-nu faze un kontratu ku bo:
29 bu ka ta faze ninhun kuza mariadu kóntra nos, sima nos nu ka faze-u ninhun kuza mariadu, pamodi nu faze-u sô kuzas dretu kantu nu manda-u bai bu kaminhu na pas. Gósi bo é kel abensuadu di Jeová.’”
30 Nton el faze-s un fésta, es kume i es bebe.
31 Kel otu dia di palmanhan es labanta sédu i es faze kunpanheru un juramentu. Dipôs di kel-la, Izaki dispidi di es i es bai ses kaminhu na pas.
32 Na kel dia, kes sérvu di Izaki ba fla-l sobri kel posu ki es kobaba i es fla-l: “Nu atxa agu!”
33 Nton el txoma kel posu di Siba. I é pur isu ki nómi di kel sidadi é Berseba ti dia di oji.
34 Kantu Izaú tinha 40 anu el kaza ku Judite, fidju-fémia di Beeri, kel itita, i tanbê Bazemate, fidju-fémia di Elon, kel itita.
35 Kes mudjer li ta trazeba Izaki ku Rebeka txeu disgostu.*
Nótas di rodapé
^ Na ebraiku ta fla: “simenti”.
^ Ki krê fla “konfuzon”.
^ Ki krê fla “akuzason”.
^ Ki krê fla “lugaris grandi”.
^ Ô: “juramentu entri nos i bo”.
^ Na ebraiku ta fla: “Es ta poba Izaki ku Rebeka ku spritu disgostadu”.
