Ebreus 2:1-18
2 É pur isu ki nu meste presta más atenson di ki kel ki nu ta kustuma pa kes kuza ki nu ta obi, asi pa nunka nu ka disvia.
2 Pamodi, si kel palavra ki papiadu através di anjus mostra ma el é sértu, i tudu pekadu i dizobidiensa resebe kastigu di akordu ku justisa,
3 modi ki nu ta skapa si nu iginora un salvason mutu más grandi? Pamodi nos Sinhor é kel primeru ki pâpia di el i kes ki obi-l konfirma-nu el,
4 timenti Deus djunta ku es na da tistimunhu através di sinal, milagris, txeu óbra poderozu i dons di spritu santu ki dadu di akordu ku se vontadi.
5 Pamodi Deus ka poi anjus pa governa kel mundu ki sta pa ben, ki é kel ki nu sta ta pâpia di el.
6 Má un tistimunha skrebe na un párti na Skrituras: “Kuzê ki é ómi pa bu lenbra di el, ô fidju di ómi pa bu toma kónta di el?
7 Bu faze-l un bokadinhu más pikinoti di ki anjus. Bu pô-l koroa di glória i ónra, i bu skodje-l pa el toma kónta di trabadju di bu mô.
8 Bu poi tudu kuza dibaxu di se pé.” Kantu Deus poi tudu kuza dibaxu di el, el ka dexa nada ki ka fika dibaxu di el. Má gósi, nu ta odja ma inda é ka tudu kuza ki sta dibaxu di el.
9 Má nu ta odja Jizus, ki fazedu un bokadinhu más pikinoti di ki anjus, gósi ku koroa di glória i ónra pamodi el sufri ti ki el móre, asi pa através di kel grandi bondadi di Deus, el sprimentaba mórti pa tudu algen.
10 Tudu kuza izisti pa glória di Deus i es izisti através di el. El atxa dretu dexa kel Líder Prinsipal sufri, pa el pode bira perfeitu, asi pa txeu fidju pode dadu glória. Deus ta uza kel Líder Prinsipal pa salva-s.
11 Pamodi kel ki ta santifika i tanbê kes ki sta ta santifikadu, es tudu ten mésmu Pai. É pur isu ki el ka ta xinti vergónha di txoma-s di irmon,
12 óras ki el ta fla: “N ta ben pâpia di bu nómi pa nhas irmon. N ta lova-u ku kántikus na meiu di kongregason.”
13 Tanbê el ta fla: “N ta ben poi nha kunfiansa na el.” Inda el ta fla: “Nhos odja! Ami i kes mininu ki Jeová* da-m.”
14 Pur isu, dja ki “kes mininu” é di karni i osu,* el tanbê el bira karni, asi através di se mórti, el ta pode kababa ku kel ki ten puder di mata, ki é Diabu,
15 i pa libertaba tudu kes ki pasa ses vida interu sima skravu pamodi medu di mórti.
16 Pamodi na verdadi el ka ben djuda anjus, má el ben djuda kes disendenti* di Abraon.
17 Pur isu, el tinha ki biraba sima se “irmons” na tudu sentidu, pa el pode biraba un saserdóti prinsipal ki ten mizerikórdia i ki é fiel na kes kuza ki ten aver ku Deus, asi pa el pode ofereseba un sakrifisiu pa nu pode sta na pas ku Deus otu bês.*
18 Dja ki el sufri kantu el podu na próva, el pode ben djuda kes ki sta ta podu na próva.
Nótas di rodapé
^ Na gregu ta fla: “karni i sangi”.
^ Na gregu ta fla: “simenti”.
^ Ô: “un sakrifisiu ki ta kubriba nos pekadu”.
