Titu 3:1-15
3 Kontinua ta lenbra-s pa es obi ku govérnus i autoridadis, i pa es sta prontu pa faze tudu tipu di bon óbra,
2 pa es ka pâpia mal di ningen, pa es ka ser konfuzéntu, má pa es ser ikilibradu i sénpri pa es mostra brandura ku tudu algen.
3 Pamodi antis nos tanbê nu ka tinha juís, nu ka ta obiba ku Deus, pesoas ta inganaba nos, nos éra skravu di txeu tipu di dizeju i nu ta kreba sô pasa sábi, nu ta viveba di un manera mariadu i nos éra invejozu, nos éra mau dimás i nu ta odiaba kunpanheru.
4 Má, kantu Deus, nos Salvador, mostra se bondadi i se amor pa tudu algen
5 el salva-nu (ka pamodi kes óbra justu ki nu faze, má pamodi se mizerikórdia), através di kel banhu ki traze-nu pa vida, i através di spritu santu el bira-nu novu.
6 El baza txeu spritu santu riba nos através di Jizus Kristu, nos Salvador,
7 asi pa dipôs ki nu txomadu justu pamodi se grandi bondadi, pa nu biraba erderu di akordu ku un speransa di vida pa tudu ténpu.
8 Kes palavra li é di kunfiansa, i N krê pa bu kontinua ta distaka kes kuza li, asi pa kes ki kridita na Deus mante ses menti konsentradu na kes bons óbra. Kes kuza li é bon i es ta djuda tudu algen.
9 Má, di ninhun manera ka bu mete na diskuson ki ka ten sentidu i na diskutison sobri lista di famílias, na briga i na faze dibati sobri Lei, pamodi es ka ten valor i es ka ta sirbi pa nada.
10 Má, kel ómi ki ta insentiva un seita,* da-l konsedju* dôs bês i si el ka obi, nton bu debe ivita sta djuntu ku el.
11 Pamodi bu sabe ma kel ómi dja disvia di kaminhu i el sta ta peka, i el sta kondena se kabésa.
12 Óras ki N manda-u Ártimas ô Tikiku, faze di tudu pa bu ben djobe-m na Nikópulis, pamodi é la ki N disidi pasa ténpu friu.
13 Faze tudu kel ki bu ta pode pa djuda Zenas, ki konxe Lei dretu, i Apolu, asi pa nada ka falta-s pa ses viajen.
14 Má tanbê pa nos povu prende faze bons óbra sénpri, pa es pode djuda kes ki meste di ajuda urjenti, asi pa es pode da frutu sénpri.
15 Tudu kes ki sta ku mi sta manda-u mantenha. Da nha mantenha pa kes ki krê-nu txeu i ki sta na fé.
Pa kel grandi bondadi di Deus sta ku nhos tudu.
