Kel últimu Páskua di Jizus ta sérba txeu spesial. Dja ki el sabia ma el sta ben moreba, el faze planus pa el kume kumida di Páskua djuntu ku se apóstlus i el inxina-s un novu komemorason, ki é Komemorason di se mórti. Jizus pidi Pedru ku Juan pa pripara kel sala undi ki es staba ta ba komemoraba Páskua. (Lu 22:7-13; odja dizenhu na kapa.) Kel-li ta lenbra-nu ma nos tanbê nu debe pripara pa Komemorason ki ta ben fazedu dia 27 di marsu. É klaru ki pa gósi, kongregasons dja tene algen pa faze diskursu i irmons dja organiza modi ki es ta ranja pon ku vinhu i otus kuza. Má kuzê ki kada un di nos pode faze pa nu pripara pa Komemorason?

Pripara bu korason. Lé i midita na leitura di Bíblia pa Komemorason. Bu pode atxa prugrama na Izamina testu di dia. Ô si bu krê bu pode atxa un prugrama más konplétu na Apêndice B12a i B12b di Tradução do Novo Mundo da Bíblia Sagrada. (Tanbê bu pode djobe Folhetu di studu pa runion di abril di 2020.) Pa bu atxa otus matéria pa uza na adorason na família sobri pamodi ki resgati é inportanti, odja Índice das Publicações da Torre de Vigia ô Guia de Pesquisa para Testemunhas de Jeová.

Konvida otus algen pa Komemorason. Konvida tudu algen ki bu ta pode. Pensa na kenha ki bu krê konvida, sima bus revizita, algen ki bu ta studaba Bíblia ku el antis, algen ki bu konxe i bu família. Ansions debe lenbra di konvida kes inativu. Má i si bu konvida un algen ki ka ta mora na bu tiritóriu? Entra na nos site jw.org, i la di riba klika na NOS ORGANIZASON i dipôs na “Komemorason”. La bu ta atxa lugar i óra ki Komemorason ta fazedu na zóna ki kel algen ta mora.

Kuzê más ki nu pode faze pa nu pripara pa Komemorason?