KAPÍTLU 25

Modi ki N pode vense ábitu di masturbason?

“N kumesa ta masturba kantu N tinha 8 anu di idadi. Dipôs N prende kuzê ki Deus ta pensa sobri kel asuntu li. N ta xintiba rei di mal óras ki N ta fazeba kel-li. N ta perguntaba nha kabésa: ‘Modi ki Deus pode gosta di un algen sima mi?’” — Luiz.

ÓRAS ki nu ta entra na adulesénsia, dizeju seksual ta bira más fórti. I pamodi kel-li, algen pode kai na ábitu di masturbason. * Txeu algen ta atxa ma kel-li é ka nada dimás. Es pode fla: “Bu ka ta mágua ningen.” Má nu ten un bon motivu pa ivita masturbason. Apóstlu Polu skrebe: ‘Pur isu, nhos poi ménbrus di nhos korpu ta fika mortu, pa kuzas sima. . . paxon diskontroladu’. (Colossenses 3:5) Masturbason ka ta poi dizeju seksual ta bira mortu, má el ta pô-l ta bira más txeu. Tanbê, pensa na kel-li:

● Masturbason ta pô-nu ta pensa sô na nos kabésa. Pur izénplu, óras ki algen ta masturba el ta konsentra sô na dizejus di se korpu.

● Masturbason ta poi un algen ta odja un ómi ô un mudjer sima un obijétu pa satisfaze ses dizeju di faze séksu.

● Masturbason ta poi un algen ta pensa sô na se kabésa, i kel-li pode trapadja relason seksual na un kazamentu.

Envês di masturba pa bu satisfaze bu dizeju seksual, tenta kontrola bu kabésa. (1 Tessalonicenses 4:4, 5) Pa djuda-u faze kel-li, Bíblia ta konsedja-u pa bu ivita situason ki ta pô-u ku gana di masturba. (Provérbios 5:8, 9) I si dja bu bira skravu di masturbason? Talvês dja bu tenta para, má bu ka konsigi. Bu pode pensa ma bu ka ta muda i ma nunka bu ka ta konsigi vive di akordu ku leis di Deus. Éra si ki un rapás ki txoma Pedru ta pensaba. El fla: “Óras ki N ta tinha un rekaída, N ta xintiba mariadu. I N pensa ma Deus nunka ka ta purduaba mi pa kes kuza ki N faze. Éra difísil N ora.”

Si é si ki bu ta xinti, ten koraji, ka bu dizanima. Bu ta konsigi vense. Txeu jóven ku adultu konsigi larga masturbason. Bo tanbê bu ta konsigi!

Modi ki nu pode lida ku sentimentu di kulpa

Kes ki ten ábitu di masturba, txeu bês es ta xinti kulpadu. Nu ka ten dúvida ma ‘tristéza di akordu ku vontadi di Deus’ ta da-u kel forsa ki bu meste pa bu vense kel ábitu mariadu li. (2 Coríntios 7:11) Xinti kulpadu dimás ta pô-u ta xinti sen valor pamodi bu pode fika dizanimadu dimás ki bu ta krê dizisti di luta. — Provérbios 24:10.

Sforsa pa bu pensa di manera ikilibradu sobri kel asuntu li. Masturbason é un ábitu mariadu. El pode pô-u ta bira ‘skravu di txeu dizeju i prazer’ i pô-u ta ten atitudis mariadu. (Tito 3:3) Má, masturbason é ka un konportamentu seksual mariadu gravi sima faze séksu sen sta kazadu. (Judas 7) Si bu prubléma é masturbason, ka bu pensa ma nunka Jeová ka ta purdua-u. Inportanti é bu sforsa pa kontrola kel dizeju i nunka ka bu para di luta!

É fásil fika dizanimadu si bu torna masturba otu bês. Si kel-li kontise, lenbra kuzê ki Provérbios 24:16 ta fla: ‘Sikrê justu kai 7 bês, el ta torna labanta otu bês; má kes mau ta tropesa pamodi disgrasa.’ Si kel-li kontise otu bês, ka bu pensa ma bo é un mau algen. Pur isu, ka bu dizisti. Envês di kel-li, djobe kuzê ki pô-u ta kai na tentason otu bês i sforsa pa bu ka faze mésmu kuza.

Tra ténpu pa pensa na amor i na mizerikórdia di Jeová. Salmista Salmista Davidi, ki peka pamodi se frakézas, fla: ‘Sima un pai ta xinti péna di se fidjus, Jeová ta xinti péna di kes algen ki ta ruspeta-l. Pamodi el sabe dretu di kuzê ki nu fazedu, el ta lenbra ma nos é di téra.’ (Salmos 103:13, 14) Jeová sabe ma nos é inperfetu i el sta ‘prontu pa púrdua’. (Salmo 86:5) Má tanbê, el krê pa nu faze nos midjór pa nu obi ku el. Nton, kuzê ki bu meste faze pa bu vense kel ábitu mariadu li?

Djobe kuzê ki bu sta divirti ku el. Bu ta kustuma odja filmis, prugrama di tilivizon ô entra na kes pájina di internet ki ta poi algen ku gana di faze séksu? Salmista mostra sabedoria kantu el fla na orason: ‘Ka bu dexa nhas odju odja pa kuzas ki ka ten valor’. — Salmo 119:37.

Sforsa pa bu pensa na otus kuza. Un irmon ki txoma William da kel konsedju li: “Antis di bu ba deta, lé algun kuza ki ten bazi na Bíblia. É txeu inportanti pa kes últimu kuza ki bu ta pensa na el ser kuzas spritual.” — Filipenses 4:8.

Pâpia ku algun algen sobri bu prubléma. Bu pode xinti vergónha di pâpia ku algun algen sobri kel asuntu li. Má faze kel-li pode djuda-u vense kel mau ábitu li. É kel-li ki un irmon ki txoma Davidi faze. El fla: “N pâpia ku nha pai. Nunka N ka ta skese kuzê ki el fla-m. Ku kalma i ku un sorizu na róstu el fla: ‘N ten txeu orgulhu di bo.’ El sabia ma N mesteba di koraji pa N pâpia ku el sobri kel asuntu la. Éra kel-la ki N sta mesteba. I kel-la djuda-m sta disididu na midjora.”

“Nha pai dipôs mostra-m alguns testu di Bíblia ki djuda-m odja ma mi N ka éra mau algen. I dipôs el mostra-m otus testu pa djuda-m ntende ma kel ki N staba ta faze ka éra dretu. El fla-m pa N kontinua ta sforsa pa ivita kel ábitu li i dipôs nu ta kontinua ta papiaba. El fla-m pa N ka dizanima si N torna kaíba na kel tentason. Pa N kontinua ta sforsa pa N ka faze-l otu bês.” Modi ki kel-li djuda Davidi? “Pâpia ku otu algen i pidi ajuda foi midjór kuza ki N faze.”

[Nóta di rodapé]

TESTU DI BÍBLIA

‘Fuji di kes dizeju di juventudi, má npenha pa justisa, pa fé, pa amor, pa pas, djuntu ku kes ki ta invoka Sinhor ku un korason linpu.’ — 2 Timóteo 2:22.

UN IDEIA

Ora antis di bu dizeju bira más fórti. Pidi Jeová pa da-u ‘puder alén di normal’ pa bu aguenta tentason. — 2 Coríntios 4:7.

BU SABIA MA. . .

Kalker algen ki é fraku pode kai na tentason di satisfaze se dizeju seksual. Má un ómi ô un mudjer di verdadi ta kontrola se kabésa sikrê óras ki el sta el sô.

FAZE UN PLANU

N pode mante nha menti konsentradu na kuzas ki é puru si N ․․․․․

Envês di kai na tentason, N ta ․․․․․

Kuzê ki N ta gostaba di pergunta nha pai ku nha mai sobri kel asuntu li é ․․․․․

KUZÊ KI BU TA ATXA?

● Pamodi ki é inportanti nu lenbra ma Jeová ta sta ‘sénpri prontu pa púrdua’? — Salmo 86:5.

● É Deus ki kria kes dizeju seksual i é el tanbê ki ta fla ma bu debe ten kapasidadi di kontrola bu kabésa. Nton, kuzê ki Deus ta atxa ma bu ta konsigi faze?

[Lejenda]

“Désdi ki N vense kel ábitu li, N pasa ta ten un konsénsia linpu dianti di Jeová, i kel-li é un kuza ki N ka ta troka pa nada ki ten!” — Sara

[Dizenhu]

Kai na un korida ka krê fla ma bu ten ki kumesa tudu otu bês. Di mésmu manera, kai na tentason di faze masturbason ka ta tra valor di tudu kel ki dja bu fazeba antis.