Jeová a faze kel primeru kazamentu. Bíblia ta fla-nu ma el faze primeru mudjer i ‘el leba ómi el.’ Adon fika uma kontenti ki el fla: ‘Kel-li é osu di nhas osu i karni di nha karni.’ (Génesis 2:22, 23 ) Ti inda Jeová krê pa maridu ku mudjer ser filís.

Kantu bu kaza, talvês bu pensa ma tudu kuza ta sérba perfetu. Má, sikrê un maridu ku un mudjer ta ama kunpanheru txeu, es ta ten prublémas. (1 Coríntios 7:28 ) Na kel bruxura li, bu ta ben atxa alguns konsedju di Bíblia. Si bu sigi-s, es ta djuda-u ten un kazamentu i un família más filís. — Salmo 19:8-11.

KUZÊ KI BÍBLIA TA FLA: Maridu é xéfi di família. — Efésios 5:23.

Si bo é un maridu, Jeová ta spéra ma bu ta kuida di bu mudjer ku karinhu. (1 Pedro 3:7 ) El faze mudjer pa ser bu kunpanhera i el krê pa bu trata-l ku ruspetu i amor. (Génesis 2:18 ) Bu debe ama bu mudjer di tal manera, ki bu ta sta dispostu na poi se interesis más primeru ki di bo. — Efésios 5:25-29.

Si bo é un mudjer, Jeová ta spéra ma bu ta ruspeta bu maridu di korason i ma bu ta djuda-l kuida di se responsabilidadi. (1 Coríntios 11:3; Efésios 5:33 ) Apoia se disizons i djuda-l di tudu bu korason. (Colossenses 3:18 ) Si bu faze si, bu ta ten txeu valor pa bu maridu i pa Jeová. — 1 Pedro 3:1-6.

KUZÊ KI BU PODE FAZE:

• Pergunta kel algen ki bu sta kazadu ku el, modi ki bu pode ser un bon maridu ô un bon mudjer. Obi-l ku atenson, i faze kel ki bu pode pa midjora.

• Ten paxénxa. Ta leba algun ténpu pa nhos tudu dôs prende modi ki nhos ta poi kunpanheru filís.

KUZÊ KI BÍBLIA TA FLA: Bu meste sta atentu na interesis di bu mudjer ô di bu maridu. (Filipenses 2:3, 4 ) Nhos da kunpanheru txeu valor. Lenbra ma Jeová ta spéra ma se sérvus debe trata tudu algen dretu. (2 Timóteo 2:24 ) ‘Palavras ki ta fladu sen pensa é sima finka algen un spada, má língua di kes algen sábiu é un kura.’ Pur isu, skodje bus palavra ku kuidadu. (Provérbios 12:18 ) Spritu di Jeová pode djuda-u pâpia ku bondadi i amor. — Gálatas 5:22, 23; Colossenses 4:6.

KUZÊ KI BU PODE FAZE:

• Antis di pâpia di un asuntu sériu ku bu maridu ô bu mudjer, faze orason pa Deus djuda-u fika kalmu i sta dispostu na obi i seta opinion di otus.

• Pensa dretu na kuzê ki bu ta fla i modi ki bu debe fla.

KUZÊ KI BÍBLIA TA FLA: Kantu bu kaza, bo ku bu mudjer ô bu maridu, nhos bira ‘un karni’. (Mateus 19:5 ) Má simé, nhos kontinua ta ser dôs algen diferenti i talvês nhos ka ten mésmu opinion. Pur isu, nhos meste prende sta unidu na manera di pensa i na kuzas ki nhos ta xinti. (Filipenses 2:2 ) Sta unidu é rei di inportanti óras ki nu ta toma disizons. Bíblia ta fla: ‘Óras ki ten kumunikason, planus ta ten bon rezultadu’. (Provérbios 20:18 ) Nhos dexa konsedjus di Bíblia gia nhos, óras ki nhos ten ki toma disizons inportanti djuntu. — Provérbios 8:32, 33.

KUZÊ KI BU PODE FAZE:

• Ka bu fla bu maridu ô bu mudjer sô kuzê ki bu sabe ô bu opinion, má tanbê fla-l kuzê ki bu sta xinti.

• Pâpia ku bu maridu ô bu mudjer antis di faze un konpromisu.